1, 2. Samtang mouswag ta sa espirituwal, unsay makat-onan natong buhaton? Iilustrar.

USA ka bata ang nakadawat ug regalo. Giingnan siya sa iyang ginikanan: “Pagpasalamat.” Mituman ang bata bisag wala ni sa iyang buot. Samtang siya modako, mas masabtan niya kon nganong naghunahuna ang iyang ginikanan nga importanteng magpasalamat sa kaayo sa uban. Tungod ana, mahimong mas sinsero ang iyang pagpasalamat. Ngano? Kay natural na niya ang pagpasalamat.

² Sa susama, dihang nakadangat ta sa kamatuoran, atong nakat-onan ang kaimportante sa pagtuman sa simpleng mga sugo ni Jehova. Pero samtang nagpadayon ta sa pag-uswag sa espirituwal, nakakat-on tag dugang bahin sa panghunahuna ni Jehova​—ang iyang gusto ug dili gusto, ug ang iyang panglantaw sa lainlaing butang. Kon magpaimpluwensiya ta sa panghunahuna ni Jehova diha sa atong mga buhat ug desisyon, atong gipakita nga gisundog nato siya.

3. Nganong malisdan ta usahay sa pagsundog sa panghunahuna ni Jehova?

³ Bisan pag malipay tang mosundog kang Jehova, usahay dili ni  sayon tungod sa atong pagkadili-hingpit. Pananglitan, malisdan tingali ta sa pagsabot sa panglantaw ni Jehova sa moral nga kahinlo, materyalismo, pagsangyaw, sayop nga paggamit sa dugo, o uban pa. Unsay atong mahimo? Sa unsang paagi makapadayon ta sa pagsundog sa panghunahuna sa Diyos? Ug sa unsang paagi makaapektar nâ sa atong desisyon karon ug sa umaabot?

4. Unsay kahulogan sa ‘pagbag-o sa atong hunahuna’?

⁴ Basaha ang Roma 12:2. Gihisgotan dinhi ni Pablo kon unsay kinahanglan natong buhaton aron masundog ang panghunahuna ni Jehova. Sa miaging artikulo, atong nasabtan nga kinahanglang ‘mohunong na ta sa pagpaumol sumala niining sistemaha sa mga butang.’ Mahimo nato kana pinaagi sa pagsalikway sa kalibotanong panglantaw ug kinaiya. Pero gihisgotan sab ni Pablo nga kinahanglan tang ‘magbag-o sa atong hunahuna.’ Nagkahulogan ni nga atong tun-an ug sabton ang Pulong sa Diyos, pamalandongon kini, ug sundogon ang iyang panghunahuna.

5. Unsay kahulogan sa pagtuon?

⁵ Ang pagtuon wala lang magpasabot ug paspas nga pagbasa sa impormasyon ug paglinya sa mga tubag. Dihang magtuon, kinahanglan natong konsiderahon kon unsay atong makat-onan bahin kang Jehova, sa iyang paagi, ug sa iyang hunahuna. Maningkamot tang masabtan kon nganong gipabuhat sa Diyos ang usa ka butang ug gipalikayan ang lain. Hunahunaon sab nato kon unsay angay natong bag-ohon sa atong kinabuhi ug panghunahuna. Dili nato makonsiderar kining tanan matag pagtuon. Pero makabenepisyo ta kon mogahin tag panahon​—tingali katunga sa gidugayon sa atong pagtuon—​sa pagpamalandong sa atong gibasa.​—Sal. 119:97; 1 Tim. 4:15.

6. Unsay mahitabo kon atong pamalandongon ang panghunahuna ni Jehova?

⁶ Samtang regular tang mamalandong sa Pulong sa Diyos, dunay talagsaong mahitabo. Atong ‘mapamatud-an sa atong kaugalingon,’ o makombinsir ta, nga hingpit ang panghunahuna ni Jehova. Atong masabtan ang iyang panglantaw ug mouyon ta ana. Ang atong panghunahuna ‘mabag-o,’ ug makabaton tag bag-ong paagi sa paghunahuna. Sa ngadtongadto, masundog nato ang panghunahuna ni Jehova.

7, 8. (a) Unsay panglantaw ni Jehova sa materyal nga mga butang? (Tan-awa ang mga hulagway sa sinugdan sa artikulo.) (b) Kon gisundog nato ang iyang panglantaw, unsay kanunay natong hatagag prayoridad?

⁷ Ang atong panghunahuna makaapektar dili lang sa atong panglantaw sa mga butang kondili sa atong binuhatan usab. (Mar. 7:21-23; Sant. 2:17) Konsiderahon nato ang pipila ka pananglitan aron mas masabtan nato kini. Pananglitan, ang Ebanghelyo klarong nagpakita sa panghunahuna ni Jehova sa materyal nga mga butang. Gipili mismo sa Diyos ang tawhanong ginikanan nga maoy magpadako sa iyang Anak​—usa ka magtiayong dili dato. (Lev. 12:8; Luc. 2:24) Dihang natawo si Jesus, “gipahigda siya [ni Maria] sa pasungan, tungod kay wala nay dapit alang kanila sa lawak nga abotanan.” (Lucas 2:7) Kon gusto ni Jehova, makatagana siya ug mas maayong sak-anan para sa pagkatawo sa iyang Anak. Pero gusto niya nga si Jesus magdako sa pamilya nga nag-una sa espirituwal nga mga butang. Mao nay labing importante niya.

⁸ Niini nga asoy bahin sa pagkatawo ni Jesus, atong masabtan ang panglantaw ni Jehova sa materyal nga mga butang. Ang pipila ka ginikanan naghunahuna nga mas makaayo  sa ilang mga anak ang pag-una sa materyal nga mga butang, bisan pag maapektohan niini ang espirituwalidad sa ilang anak. Pero para kang Jehova, ang pinakaimportante mao ang espirituwal nga mga butang. Nasundog ba nimo ang panghunahuna ni Jehova niining bahina? Unsay gipakita sa imong binuhatan?​—Basaha ang Hebreohanon 13:5.

9, 10. Sa unsang paagi atong ikapakita nga pareho tag panghunahuna ni Jehova niadtong nakapandol sa uban?

⁹ Ang laing pananglitan mao ang panghunahuna sa Diyos bahin sa usa nga nakapandol sa uban. Si Jesus miingon: “Si bisan kinsa nga magapandol sa usa niining mga gagmay nga nagatuo, mas maayo pa alang kaniya kon ang iyang liog higtan ug galingan nga bato sama nianang ginabiyo sa asno ug siya igatambog ngadto sa dagat.” (Mar. 9:42) Bug-at kini nga mga pulong! Kay si Jesus parehas gyod sa iyang Amahan, makaseguro ta nga mao sab nay gibati ni Jehova niadtong tawo nga wala maghunahuna nga ang iyang gibuhat makapandol sa usa sa mga sumusunod ni Jesus.​—Juan 14:9.

¹⁰ Gisundog ba nato ang panglantaw ni Jehova ug Jesus? Unsay gipakita sa atong binuhatan? Pananglitan, ibutang ta nga ganahan ta sa usa ka estilo sa sinina o pamostura. Pero lagmit dunay mapandol ana diha sa atong kongregasyon o makapukaw nag imoral nga panghunahuna sa uban. Ang ato bang gugma sa mga igsoon mas importante kay sa atong gusto?​—1 Tim. 2:9, 10.

11, 12. Sa unsang paagi mapanalipdan ta kon dumtan nato ang gidumtan ni Jehova ug maugmad nato ang pagpugong sa kaugalingon?

¹¹ Ikatulong pananglitan: Gidumtan ni Jehova ang pagkadili-matarong. (Isa. 61:8) Bisag nahibalo siya nga tungod sa atong pagkadili-hingpit duna tay tendensiya nga mohimog sayop, gitambagan ta niya nga dumtan ang pagkadili-matarong. (Basaha ang Salmo 97:10.) Ang pagpamalandong kon nganong gidumtan ni Jehova ang pagkadaotan makatabang nato nga masundog ang iyang panghunahuna, ug mas makasukol sa daotang binuhatan.

¹² Ang pag-ugmad sa panglantaw ni Jehova bahin sa pagkadili-matarong makatabang nato nga mailhan ang pipila ka sayop nga buhat bisag walay espesipikong gihisgotan ang Pulong sa Diyos bahin niana. Pananglitan, ang lap dancing maoy law-ay nga buhat nga komon sa kalibotan karon. Bation tingali sa uban nga walay nalapas nga prinsipyo kay dili kuno ni sama sa aktuwal nga pagpakigsekso. * Pero gipakita ba niini ang panghunahuna sa Diyos, kinsa nagdumot sa tanang klase sa pagkadaotan? Likayan nato ang pagkadaotan pinaagi sa pag-ugmad sa pagpugong sa kaugalingon ug pagdumot sa gidumtan ni Jehova.​—Roma 12:9.

13. Nganong angay natong pamalandongon daan ang panghunahuna ni Jehova aron makahimo tag maalamong desisyon sa umaabot?

¹³ Dihang magtuon, angay natong pamalandongon ang panghunahuna ni Jehova sa mga situwasyon nga mahimong maatubang nato sa umaabot. Nianang paagiha, kon makaatubang tag mga situwasyon diin kinahanglan dayon tang modesisyon, kabalo ta kon unsay buhaton. (Prov. 22:3) Atong hisgotan ang pipila ka ehemplo diha sa Bibliya.

14. Unsay atong makat-onan sa pagbalibad ni Jose sa asawa ni Potipar?

¹⁴ Pinaagi sa pagbalibad dayon sa panental  sa asawa ni Potipar, gipakita ni Jose nga iyang gipamalandong daan ang panghunahuna ni Jehova bahin sa pagkamaunongon diha sa kaminyoon. (Basaha ang Genesis 39:8, 9.) Dugang pa, ang iyang tubag sa asawa ni Potipar: “Unsaon ko pagbuhat kining dakong pagkadaotan ug makasala gayod batok sa Diyos?” nagpakita nga gisundog niya ang panglantaw sa Diyos. Komosta sa atong bahin? Ibutang ta nga duna kay kauban sa trabaho nga misugod ug flirt nimo. O kaha gipadalhan kag law-ay nga mga mensahe o letrato diha sa imong cellphone. * Mas sayon nga magmatinumanon kon ato nang nahibaloan ug gisundog ang panghunahuna ni Jehova ug nakadesisyon na ta kon unsay himoon.

15. Sa unsang paagi makapabilin tang matinumanon sama sa tulo ka Hebreohanon?

¹⁵ Konsideraha sab ang ehemplo sa tulo ka Hebreohanon nga si Sadrak, Mesak, ug Abednego. Ang ilang hugot nga pagdumili nga mosimba sa imahen nga bulawan nga gipatindog ni Haring Nabucodonosor ug ang ilang klarong tubag sa hari nagpakita nga ila nang napamalandong kon unsay kinahanglang buhaton aron makapabiling matinumanon kang Jehova. (Ex. 20:4, 5; Dan. 3:4-6, 12, 16-18) Ibutang ta nga paamoton ka sa imong amo para sa usa ka selebrasyon nga konektado sa bakak nga pagsimba. Unsay imong buhaton? Imbes maghulat nga mahitabo ang ingon ani nga mga situwasyon, nganong dili pamalandongon karon ang panghunahuna ni Jehova nianang mga butanga? Unya, kon duna may mahitabo nga ingon ana, mas sayon na nimo ang pagbuhat ug pagsulti kon unsay husto, sama sa gihimo sa tulo ka Hebreohanon.

16. Sa unsang paagi ang klarong pagsabot sa panghunahuna ni Jehova makatabang nato sa pagpangandam para sa medikal nga emerhensiya?

¹⁶ Ang pagpamalandong daan sa panghunahuna ni Jehova makatabang sab nato nga magmatinumanon dihang dunay medikal nga emerhensiya. Siyempre, determinado tang dili magpaabonog kompletong dugo o usa sa upat ka pangunang sangkap niini, pero dunay pipila ka procedure nga naglangkit sa dugo ug nagkinahanglag personal nga desisyon base sa mga prinsipyo sa Bibliya. (Buh. 15:28, 29) Seguradong dili sa ospital  ang saktong panahon sa pagpamalandong niana, tingali dihang nag-antos na ta sa kasakit ug gipresyur nga modesisyon dayon. Karon na ang panahon nga mag-research, kompletohon ang legal nga mga dokumento nga nagpakita sa imong gusto, ug estoryahon ang imong doktor. *

17-19. Nganong importanteng masayran karon ang panglantaw ni Jehova sa mga butang? Paghatag ug pananglitan diin kinahanglan tang mangandam.

¹⁷ Sa kataposan, konsideraha ang dihadihang tubag ni Jesus sa dili maayong tambag ni Pedro: “Magmaluloton ka sa imong kaugalingon, Ginoo.” Klarong gipamalandong na pag-ayo ni Jesus ang kabubut-on sa Diyos alang kaniya ug ang giingon sa Kasulatan bahin sa iyang kinabuhi ug kamatayon dinhi sa yuta. Kini nga kahibalo nakapalig-on sa iyang desisyon nga magmatinumanon ug ihalad ang iyang kinabuhi alang natong tanan.​—Basaha ang Mateo 16:21-23.

¹⁸ Karon, gusto sa Diyos nga ang iyang katawhan makigsuod niya ug makigbahin sa buluhatong pagsangyaw kutob sa maarangan. (Mat. 6:33; 28:19, 20; Sant. 4:8) Sama sa nahitabo kang Jesus, may mga tawo nga maayog intensiyon ang mosulay tingali sa pagpatipas nato gikan niana nga tumong. Pananglitan, basin tanyagan ka sa imong amo ug promosyon ug patas-an ang imong suweldo pero mababagan ang imong espirituwal nga kalihokan. O kon nag-eskuyla ka, tingali tanyagan kag oportunidad nga mokuhag dugang edukasyon sa lugar nga layo sa inyo. Niana pa bang panahona nga mag-research ka, mokonsulta sa imong pamilya ug tingali sa mga ansiyano, ug modesisyon? Nganong dili sayron karon ang panglantaw ni Jehova sa maong mga butang ug maningkamot sa pagsundog niana? Dayon, kon dunay motanyag nimo ana, dili na ka madani. Mahibalo na ka kon unsay angayng buhaton kay nakadesisyon ka na nga magpokus sa pag-alagad kang Jehova.

¹⁹ Lagmit may mahunahunaan ka pang wala damhang mga situwasyon. Siyempre, dili nato mapangandaman ang tanang situwasyon. Pero, kon atong pamalandongon ang panghunahuna ni Jehova matag higayon nga magtuon ta, dakog posibilidad nga mahinumdoman nato ang atong natun-an ug mapadapat nâ sa situwasyon nga atong maatubang. Busa dihang magtuon, susihon nato ang panglantaw ni Jehova sa mga butang, sundogon kana, ug pamalandongon kon unsay epekto sa panghunahuna sa Diyos diha sa atong binuhatan karon ug sa umaabot.

20, 21. (a) Nganong matagamtam nato ang kagawasan sa bag-ong kalibotan? (b) Sa unsang paagi magmalipayon gihapon ta bisan karon?

²⁰ Nagpaabot gyod ta sa bag-ong kalibotan. Kadaghanan nato naglaom nga mabuhi sa Paraiso sa walay kataposan. Ubos sa pagmando sa Gingharian, ang katawhan mahigawas sa kagul-anan niining sistemaha sa mga butang. Aw, nianang panahona ang mga tawo duna gihapoy kagawasan sa pagpili. Ang matag usa makadesisyon sumala sa iyang gusto.

²¹ Siyempre, ang maong kagawasan dili absoluto. Kon bahin sa pagpili kon unsay husto ug sayop, ang mga maaghop giyahan sa mga balaod ug panghunahuna ni Jehova. Kini moresultag dakong kalipay ug abundang kalinaw. (Sal. 37:11) Pero bisan karon magmalipayon gihapon ta samtang sundogon nato ang panghunahuna ni Jehova.