1, 2. (a) Unsa ang atong labing bililhong gipanag-iya? (b) Unsang mga kamatuoran ang atong gipabilhan, ug ngano? (Tan-awa ang mga hulagway sa sinugdan sa artikulo.)

UNSA ang imong labing bililhong gipanag-iya? Andam ka bang ibaylo kana sa butang nga dili kaayo bililhon? Para sa dedikadong mga alagad ni Jehova, simple ra ang tubag nianang mga pangutanaha. Ang atong labing bililhong gipanag-iya mao ang atong relasyon kang Jehova, ug dili nato nâ ibaylo sa bisan unsa. Gipabilhan sab nato ang kamatuoran sa Bibliya, nga nakatabang nato nga maugmad ang suod nga relasyon sa atong langitnong Amahan.​—Col. 1:9, 10.

² Hunahunaa lang ang tanang gitudlo sa atong Dakong Instruktor diha sa iyang Pulong, ang Bibliya! Siya nagpadayag sa kamatuoran bahin sa kaimportante sa iyang ngalan ug sa iyang nindot nga mga hiyas. Gisultian ta niya bahin sa talagsaong tagana sa lukat, nga mahigugmaon niyang gihatag kanato pinaagi sa iyang Anak, si Jesus. Si Jehova nagtudlo nato bahin sa Mesiyanikong Gingharian, ug naghatag ug paglaom​—sa langit para sa mga dinihogan ug Paraisong yuta para sa “ubang mga karnero.” (Juan 10:16) Iya  tang gitudloan kon unsaon nato pagkinabuhi. Gipabilhan nato ang maong mga kamatuoran kay nakatabang nâ nato nga masuod sa atong Maglalalang. Naghatag nag direksiyon sa atong kinabuhi.

3. Unsay wala ipasabot sa pagpalit sa kamatuoran?

³ Si Jehova mahinatagong Diyos. Wala niya ihikaw ang maayo sa mga nangita sa kamatuoran. Gihatag pa gani ni Jehova ang kinabuhi sa iyang pinalanggang Anak ingong regalo. Dili gyod ta niya obligahon nga bayrag kuwarta ang kamatuoran. Gani, dihang ang tawong si Simon nagtanyag ug kuwarta kang apostol Pedro aron makabaton siyag awtoridad sa paghatag ug balaang espiritu, gibadlong siya ni Pedro: “Malaglag pa unta ang imong plata uban kanimo, tungod kay ikaw naghunahuna nga makapanag-iya sa walay bayad nga gasa sa Diyos pinaagig salapi.” (Buh. 8:18-20) Busa unsa diay ipasabot sa instruksiyon: “Palita ang kamatuoran”?

4. Niining artikuloha, unsay atong makat-onan bahin sa kamatuoran?

⁴ Basaha ang Proverbio 23:23. Dili nato mabatonan ang kamatuoran sa Pulong sa Diyos kon dili ta maningkamot. Kinahanglang andam tang mohimog bisan unsang sakripisyo aron mabatonan kini. Sama sa giingon sa maalamong magsusulat sa Proverbio, dihang atong ‘mapalit,’ o mabatonan, ang “kamatuoran,” kinahanglang mag-amping ta nga dili ni “ibaligya,” o mawala. Atong hisgotan kon unsay ipasabot sa ‘pagpalit’ sa kamatuoran ug ang kantidad nga ato tingaling ibayad niini, ingnon ta. Sa ingon molalom ang atong apresasyon sa kamatuoran ug molig-on ang atong determinasyon nga dili ni “ibaligya.” Ato unyang masabtan kon nganong bililhon kaayo ang kamatuoran.

5, 6. (a) Unsaon nato pagpalit sa kamatuoran nga dili mogamit ug kuwarta? Iilustrar. (b) Sa unsang paagi makaayo nato ang kamatuoran?

⁵ Bisag libre ang usa ka butang, makagasto gihapon ka. Ang Hebreohanong pulong nga gihubad ug “palita” diha sa Proverbio 23:23 nagkahulogan sab ug “batoni.” Kanang mga pulonga nagpasabot nga ang usa maningkamot o may isakripisyo para sa usa ka importanteng butang. Ikailustrar tingali nato ang ideya sa pagpalit sa kamatuoran niining paagiha. Ibutang ta nga nag-advertise ang usa ka merkado ug “Libreng Saging.” Motungha ra bag kalit ang saging sa atong lamesa? Dili. Kinahanglang maningkamot ta sa pag-adto sa merkado aron kuhaon nâ. Libre ba ang saging? Oo, pero kinahanglan tang maningkamot ug mogahig panahon sa pag-adto sa merkado. Sa susama, dili kinahanglan ang kuwarta sa pagpalit sa kamatuoran. Pero, kinahanglan tang maningkamot aron mabatonan kana.

⁶ Basaha ang Isaias 55:1-3. Ang pulong ni Jehova nga gisulat ni Isaias makatabang nato nga masabtan kon unsay kahulogan sa pagpalit sa kamatuoran. Niining mga bersikuloha, gikomparar ni Jehova ang iyang pulong sa tubig, gatas, ug bino. Sama sa bugnawng tubig, ang pulong sa Diyos makarepresko nato. Ug maingon nga ang gatas makapalig-on nato ug makatabang sa mga bata nga modako, ang makapahimsog sa espirituwal nga pulong ni Jehova makatabang nato nga molig-on ug mouswag. Dugang pa, ang pulong ni Jehova sama pod sa bino. Sa unsang paagi? Sa Bibliya, ang bino konektado sa kalipay. (Sal. 104:15) Busa, dihang giingnan ni Jehova ang iyang katawhan sa ‘pagpalit ug bino,’ siya nagpasalig nato nga magmalipayon ta kon atong sundon ang iyang mga balaod. (Sal. 19:8) Nindot gyod kana nga pag-ilustrar sa kaayohan nga madawat sa pagkat-on ug pagpadapat sa kamatuoran! Ikakomparar nato ang atong paningkamot  sa bili nga atong ibayad. Busa, atong hisgotan ang lima ka butang nga puwedeng gamiton aron mapalit nato ang kamatuoran.

7, 8. (a) Nganong kinahanglan tang mogahin ug panahon sa pagpalit sa kamatuoran? (b) Unsay andam isakripisyo sa usa ka batan-ong estudyante, ug unsay resulta?

⁷ Panahon. Kini ang angayng ibayad sa tanan nga gustong mopalit sa kamatuoran. Kinahanglan tang mogahig panahon sa pagpaminaw sa mensahe sa Gingharian, pagbasa sa Bibliya ug mga publikasyon, paghimog personal nga pagtuon, ug pagpangandam ug pagtambong sa tigom. Angay natong ‘paliton,’ o kuhaon, ang maong panahon gikan sa ubang dili kaayo importanteng kalihokan. (Basaha ang Efeso 5:15, 16.) Unsa ka dakong panahon ang atong igahin aron makakat-on sa tukmang kahibalo sa simpleng mga pagtulon-an sa Bibliya? Nagdepende kana sa atong kahimtang. Daghan kaayo tag puwedeng makat-onan bahin sa kaalam, pamaagi, ug buluhaton ni Jehova. (Roma 11:33) Ang unang isyu sa Watch Tower nagkomparar sa kamatuoran ngadto sa “gamayng bulak,” ug miingon: “Ayawg katagbaw sa usa lang ka bulak sa kamatuoran. Kon igo na ang usa, wala na untay lain. Padayon sa pagtigom, pangita pag dugang.” Puwede natong pangutan-on ang kaugalingon, ‘Unsa ka dako ang akong pungpong sa kamatuoran?’ Bisag mabuhi ta sa walay kataposan, duna gyod gihapon tay makat-onan bahin kang Jehova. Karon, importante kaayong gamiton sa maalamong paagi ang atong panahon aron makapalit tag daghang kamatuoran kutob sa mahimo. Konsideraha ang pananglitan sa usa nga nangita sa kamatuoran.

⁸ Si Mariko, * usa ka dalagang Japanese, miabot sa New York City, U.S.A., para moeskuyla. Niadtong panahona, membro siya sa usa ka relihiyon nga nagsugod sa Japan niadtong 1959. Nasangyawan siya sa usa ka payunir nga sister nga namalaybalay. Dihang nakat-onan niya ang kamatuoran, lipay kaayo siya maong giingnan niya ang nag-Bible study niya nga magtuon sila kaduha sa usa ka semana. Bisan pa sa daghang buluhaton sa eskuylahan ug pagtrabahog part-time, si Mariko misugod dayon sa pagtambong sa mga tigom. Wala na pod siya moapil sa ubang kalingawan aron makagahig panahon sa pagkat-on sa kamatuoran. Tungod sa maong sakripisyo, paspas ang pag-uswag niya sa espirituwal. Sulod lang sa usa ka tuig, siya nabawtismohan. Unom ka bulan sa ulahi, pagka-2006, nagsugod siyag payunir, ug karon payunir gihapon siya.

9, 10. (a) Sa unsang paagi ang pagpalit sa kamatuoran makaapektar sa atong panglantaw sa materyal nga mga butang? (b) Unsay gisakripisyo sa usa ka batan-ong babaye, ug unsay iyang gibati niana?

⁹ Materyal nga mga butang. Aron mapalit ang kamatuoran, kinahanglan tingali natong isakripisyo ang dakog suweldong trabaho. Dihang giimbitar ni Jesus ang mangingisdang si Pedro ug Andres aron mahimong “mangingisda ug mga tawo,” ilang “gibiyaan ang mga pukot.” (Mat. 4:18-20) Siyempre, kadaghanan sa nakakat-on sa kamatuoran karon dili bastabastang makabiya sa ilang trabaho. Naa silay binase sa Bibliyang obligasyon. (1 Tim. 5:8) Pero, ilang giusab ang ilang panglantaw sa materyal nga mga butang ug ang ilang prayoridad. Klaro ning gihisgotan ni Jesus: “Hunong na kamo sa pagtigom ug mga bahandi alang kaninyo dinhi sa yuta . . . Hinunoa, pagtigom kamo ug mga bahandi alang kaninyo sa langit.” (Mat. 6:19, 20) Konsideraha ang pananglitan sa usa ka batan-ong babaye.

¹⁰ Si Maria makamao nang mo-golf bisag wala pa siya mag-eskuyla. Paghayskul niya, nahimo siyang mas hanas sa golf, ug  ngadtongadto nahimong eskolar sa usa ka unibersidad. Bahin na sa iyang kinabuhi ang golf, ug tumong niyang mahimong propesyonal sa maong sport. Dayon, misugod si Maria sa pag-Bible study, ug giganahan siya sa iyang nakat-onan. Nalipay siya nga gibag-o sa kamatuoran ang iyang kinabuhi. Siya miingon: “Samtang mas nahiuyon sa Bibliya ang akong panghunahuna ug pagkinabuhi, nahimo kong mas malipayon.” Naamgohan ni Maria nga lisod dunganon ang pagpangitag espirituwal ug materyal nga bahandi. (Mat. 6:24) Iyang gisakripisyo ang dugay na niyang gipangandoy nga propesyon ug kahigayonan nga madato ug mosikat. Pero tungod sa pagpalit sa kamatuoran, siya karon payunir ug matod niya, iyang natagamtam ang “labing malipayon ug makahuloganong kinabuhi.”

11. Dihang paliton nato ang kamatuoran, unsa tingali mahitabo sa atong relasyon sa uban?

¹¹ Relasyon sa uban. Dihang gipili nato nga magkinabuhi sumala sa kamatuoran sa Bibliya, mausab tingali ang atong relasyon sa atong mga amigo ug paryente. Ngano? Si Jesus miampo bahin sa iyang mga sumusunod: “Balaana sila pinaagi sa kamatuoran; ang imong pulong maoy kamatuoran.” (Juan 17:17) Ang pag-ingong “balaana sila” mahimong magpasabot ug “ilain sila.” Dihang gidawat nato ang kamatuoran, gilain ta kay wala na man ta magpaimpluwensiya sa kalibotan. Mausab na ang panglantaw sa mga tawo nato kay lahi na man tag prinsipyo. Nagsunod na ta sa mga prinsipyo sa Bibliya. Bisag dili nato gustong mahimong rason sa pagkabahinbahin, ang pipila ka amigo ug membro sa pamilya mopalayo tingali nato o mosupak pa gani sa atong bag-ong tinuohan. Dili nâ ikatingala. Si Jesus miingon: “Sa pagkatinuod, ang mga kaaway sa usa ka tawo mao unya ang mga tawo sa iyang kaugalingong panimalay.” (Mat. 10:36) Siya nagpasalig pod nga ang mga panalangin tungod sa pagpalit sa kamatuoran mas labaw kon ikomparar sa atong isakripisyo.​—Basaha ang Marcos 10:28-30.

12. Unsay gisakripisyo sa usa ka Hudiyo para sa kamatuoran?

¹² Sukad sa pagkabata, ang Hudiyong negosyante nga si Aaron gitudloan nga dili angayng litokon ang ngalan sa Diyos. Pero uhaw siya sa kamatuoran. Nalipay siya dihang gipakita kaniya sa usa ka Saksi nga kon dugangag mga vowel ang Hebreohanong mga letra sa ngalan sa Diyos, puwede ning litokon ug “Jehova.” Eksayted kaayo siyang miadto sa sinagoga aron isulti sa mga rabbi ang iyang nadiskobrehan. Pero lahi ang ilang reaksiyon sa gidahom ni Aaron. Imbes malipay pod sa pagkakat-on sa kamatuoran, ilang giluwaan siya ug gipapahawa sa sinagoga. Nadaot ang iyang relasyon sa pamilya. Bisan pa niana, nagpadayon siya sa pagpalit sa kamatuoran ug maisogong nag-alagad ingong Saksi ni Jehova sa tibuok niyang kinabuhi. Aron makalakaw sa kamatuoran parehas ni Aaron, andam tang mosakripisyo bisag madaot ang atong relasyon sa mga tawo sa komunidad o sa atong pamilya.

13, 14. Unsang kausaban sa panghunahuna ug panggawi ang gikinahanglan aron mapalit ang kamatuoran? Paghatag ug pananglitan.

¹³ Dili diyosnong panghunahuna ug panggawi. Aron mapadapat ang mga prinsipyo sa Bibliya nga atong nakat-onan, kinahanglang andam tang bag-ohon ang atong panghunahuna ug panggawi. Matikdi ang giingon ni Pedro bahin niini: “Ingong masinugtanong mga anak, hunong na sa pagpaumol sumala sa mga tinguha nga inyong nabatonan kanhi sa inyong kawalay-alamag, apan . . . magmabalaan usab kamo sa tanan ninyong panggawi.” (1 Ped. 1:14, 15) Para sa mga tawo diha sa imoral nga siyudad sa Corinto, ang pagpalit sa kamatuoran nagpasabot ug paghimog dagkong kausaban sa ilang pagkinabuhi. (1 Cor. 6:9-11) Sa susama, daghan pod karon ang kinahanglang mobiya sa  dili maayong panggawi aron mapalit ang kamatuoran. Si Pedro nagpadayon sa iyang tambag sa mga Kristohanon kaniadto: “Ang panahong miagi igo na alang kaninyo sa pagbuhat sa kabubut-on sa mga nasod sa dihang kamo nagpadayon sa mga buhat sa malaw-ayng panggawi, kaulag, pagpatuyang sa bino, hudyaka, palabwanay sa inom, ug sa gidiling mga idolatriya.”​—1 Ped. 4:3.

¹⁴ Sa daghang tuig, si Devynn ug Jasmine mga palahubog. Bisag maayong bookkeeper si Devynn, wala siyay permanenteng trabaho tungod sa paghuboghubog. Si Jasmine nailhang agresibo ug bayolente. Usa ka adlaw niana samtang naglakaw nga hubog, nasangyawan si Jasmine sa duha ka Saksing misyonaryo. Nakigsabot ang mga misyonaryo nga mag-Bible study sila, pero pag-abot nila sa balay ni Devynn pagkasunod semana, parehong hubog si Jasmine ug Devynn. Wala sila magdahom nga bisitahon gyod sila sa mga misyonaryo. Maong lahi na ang kahimtang pagbalik sa mga misyonaryo. Sukad sa unang pagtuon, si Jasmine ug Devynn ganahan na kaayong magtuon sa Bibliya ug nagpadapat dayon sa ilang nakat-onan. Wala ray tulo ka bulan, sila nakadesisyon nga dili na maghuboghubog ug sa ulahi sila nagpakasal. Kay nakamatikod ang mga tawo sa ilang pagbag-o, daghan sa ilang baryo ang nagpa-Bible study.

15. Unsa ang usa sa kinalisdang sakripisyo nga himoon para sa kamatuoran, ug ngano?

¹⁵ Kostumbre ug mga buhat nga supak sa Bibliya. Aron mapalit ang kamatuoran, ang usa sa kinalisdang sakripisyo mao ang pagbiya sa kostumbre ug mga buhat nga supak sa Bibliya. Ang pipila tingali wala malisdi sa pagdawat ug pagpadapat sa giingon sa Bibliya bahin niana. Pero ang uban basig magduhaduha sa paghimog sakripisyo tungod sa presyur gikan sa pamilya, katrabaho, ug suod nga mga higala. Mas lisod ni ilabina kon apil sa kostumbre ang pagpasidungog sa namatayng mga paryente. (Deut. 14:1) Ang kaisog nga gipakita sa uban makatabang nato sa paghimo niana nga kausaban. Konsideraha ang pagkamaisogon sa pipila ka taga-Efeso niadtong unang siglo.

16. Unsay gihimo sa pipila ka taga-Efeso aron mapalit ang kamatuoran?

¹⁶ Sa Efeso komon kaayo ang madyik. Aron mapalit ang kamatuoran, unsay kinahanglang himoon sa bag-ong nakabig nga mga Kristohanon, kinsa nagahimo nianang supak sa Bibliya nga mga buhat? Ang Bibliya miingon: “Ubay-ubay niadtong nanaggamit ug mga kalaki sa salamangka nagtapok sa ilang mga basahon ug nagsunog niini atubangan sa tanan. Ug ilang gikuwenta sa tingob ang bili niini ug ilang nakaplagan nga kini mikabat ug [50,000] ka pirasong plata. Busa sa gamhanang paagi ang pulong ni Jehova padayong mikaylap ug nagmadaogon.” (Buh. 19:19, 20) Ang maong matinumanong mga Kristohanon mihimog dakong pinansiyal nga sakripisyo ug gipanalanginan ni Jehova.

17. (a) Unsay puwede natong isakripisyo aron mapalit ang kamatuoran? (b) Unsang mga pangutana ang tubagon sa sunod nga artikulo?

¹⁷ Unsay imong gisakripisyo para sa kamatuoran? Kitang tanan migahig panahon sa pagtigom ug mga bulak sa kamatuoran. Gisakripisyo pod sa pipila ang materyal nga mga butang ug ang ilang relasyon sa uban. Daghan ang mihimog kausaban sa ilang panghunahuna ug panggawi ug mibiya sa kostumbre ug mga buhat nga supak sa Bibliya. Bisag unsa may atong gisakripisyo, kombinsido ta nga dili sayang ang atong gihimo. Sa pagbuhat ana, maangkon nato ang pinakaimportante natong gipanag-iya, ang suod nga relasyon kang Jehova. Kon atong pamalandongon ang mga panalangin nga atong nadawat tungod sa kamatuoran, lisod kaayong hunahunaon kon nganong dunay gustong mobaligya niana. Nganong nahitabo kana? Sa unsang paagi nâ malikayan? Tubagon kana sa sunod nga artikulo.