1, 2. (a) Unsang buluhaton ang giuna ni Jesus, ug ngano? (b) Unsay angay natong buhaton aron magmalamposon ingong “mga isigkamagbubuhat sa Diyos”?

SI Jesu-Kristo panday ug ministro. (Mar. 6:3; Roma 15:8) Hanas siya niana nga mga buluhaton. Ingong panday, nakat-onan niya kon unsaon paggamit ang mga himan aron himoong mapuslanon nga mga butang ang kahoy. Ingong magtutudlo sa maayong balita, maalamon niyang gigamit ang iyang dakong kahibalo sa Kasulatan aron tabangan ang ordinaryong mga tawo nga masabtan ang kamatuoran sa Pulong sa Diyos. (Mat. 7:28; Luc. 24:32, 45) Pag-edad ni Jesus ug 30, miundang siya sa pagpamanday kay nahibalo siyang mas importante ang pagkahimong ministro. Siya miingon nga ang pagsangyaw sa maayong balita sa Gingharian sa Diyos maoy usa ka rason nga gipadala siya sa yuta. (Mat. 20:28; Luc. 3:23; 4:43) Giuna ni Jesus ang ministeryo, ug gusto niyang motabang ang uban niana nga buluhaton.​—Mat. 9:35-38.

² Dili tingali ta panday, pero seguradong mga ministro ta. Importante kaayo ni kay gitawag gani tag “mga isigkamagbubuhat sa Diyos.” (1 Cor. 3:9; 2 Cor. 6:4) Nahibalo ta nga “ang diwa sa . . . pulong [ni Jehova] maoy kamatuoran.” (Sal. 119:159, 160) Maong gusto natong seguroon nga “nagagamit [ta] sa pulong sa kamatuoran sa hustong paagi” diha sa atong ministeryo. (Basaha ang 2 Timoteo 2:15.) Busa naningkamot tang mahimong mas hanas sa  paggamit sa Bibliya, ang atong pangunang himan sa pagtudlo sa kamatuoran bahin kang Jehova, Jesus, ug sa Gingharian. Aron magmalamposon sa atong ministeryo, ang organisasyon ni Jehova nagtaganag dugang nga mga himan ug kinahanglang mahibalo ta kon unsaon nâ paggamit. Kini mao ang atong Teaching Toolbox.

3. Sa atong ministeryo niining mubong panahon nga nahibilin, sa unsa ta angayng magpokus, ug sa unsang paagi ang Buhat 13:48 makatabang nato sa paghimo niana?

³ Basig makapangutana ka kon nganong gitawag nig Teaching Toolbox, dili Preaching Toolbox. Ang “pagsangyaw” nagpasabot ug pagsulti sa mensahe, pero ang “pagtudlo” nagpasabot ug pagtisok sa maong mensahe sa hunahuna ug kasingkasing sa tawo, aron molihok siya sumala sa iyang nakat-onan. Sa atong ministeryo niining mubong panahon nga nahibilin, angay tang magpokus sa pagsugod ug mga Bible study ug pagtudlo sa kamatuoran. Nagpasabot kana nga pangitaon nato pag-ayo kadtong “hustong nakiling alang sa kinabuhing walay kataposan” ug tabangan sila nga mahimong magtutuo.​—Basaha ang Buhat 13:44-48.

4. Unsaon nato pag-ila kon kinsa ang “hustong nakiling alang sa kinabuhing walay kataposan,” ug unsaon nato sila pagpangita?

⁴ Unsaon nato pag-ila kon kinsa ang “hustong nakiling alang sa kinabuhing walay kataposan”? Niadtong unang siglo, pagsangyaw lang ang paagi aron makit-an sila. Busa, kinahanglan natong sundon ang sugo ni Jesus: “Sa bisan unsang siyudad o balangay nga kamo mosulod, pangitaa kon kinsa didto ang takos.” (Mat. 10:11) Siyempre, dili nato dahomon nga maminaw sa maayong balita ang mga tawong dili sinsero, mapahitas-on, o walay pagpakabana sa espirituwal. Gipangita nato kadtong matinud-anon, mapaubsanon, ug uhaw sa kamatuoran. Pareho ni sa gihimo ni Jesus ingong panday. Siya nangita ug hustong klase sa kahoy nga himoong muwebles (furniture), pultahan, yugo, o uban pa. Dihang makit-an niya ang haom nga materyales, kuhaon niya ang toolbox, ug gamiton ang iyang nahibaloan sa paghimog mapuslanong butang. Kinahanglang buhaton sab nato nâ dihang maningkamot sa pagtabang sa mga tawo nga mahimong tinun-an.​—Mat. 28:19, 20.

5. Unsay angay natong mahibaloan sa mga himan diha sa atong Teaching Toolbox? Iilustrar. (Tan-awa ang mga hulagway sa sinugdan sa artikulo.)

⁵ Diha sa toolbox, ang matag himan dunay espesipikong gamit. Tagda pananglitan ang mga himan sa panday nga gigamit ni Jesus. * Nagkinahanglan siyag himan sa pagsukod, pagmarka, paggabas, pagbarina, ug pagporma sa kahoy. Nagkinahanglan sab siyag lebel, tunton, ug himan sa pag-asembol sa mga kahoy. Sa susama, ang matag himan sa atong Teaching Toolbox dunay espesipikong gamit. Busa atong tan-awon kon unsaon paggamit ang gihatag kanato nga mga himan.

6, 7. (a) Giunsa nimo paggamit ang mga contact card? (b) Unsa ang duha ka gamit sa imbitasyon sa tigom?

⁶ Mga contact card. Gagmay ni pero epektibong mga himan aron mapailaila nato ang atong kaugalingon sa uban ug magiyahan sila sa atong website​—diin makakat-on silag dugang bahin nato ug makahangyo pa ganig pagtuon sa Bibliya. Sa pagkakaron, kapig 400,000 na ang mihangyog pagtuon sa Bibliya pinaagi sa jw.org, ug ginatos pa ang nagahangyo kada adlaw! Puwede kang magdaladalag contact card aron makasangyaw ka samtang naghimo sa imong adlaw-adlawng buluhaton.

⁷ Mga imbitasyon. Ang imbitasyon para sa atong mga tigom dunay duha ka gamit. Kini nag-ingon: “Ikaw among giimbitar sa pagtuon  sa Bibliya uban sa mga Saksi ni Jehova.” Dayon dunay kapilian: “Sa among publikong mga tigom,” “o uban sa usa ka magtutudlo.” Busa, kini nga himan wala lang magpailaila nato, nag-imbitar pod ni niadtong “mahunahunaon sa ilang espirituwal nga panginahanglan” sa pagtuon sa Bibliya uban nato. (Mat. 5:3) Siyempre, puwedeng motambong ang mga tawo sa atong mga tigom, sila man magpa-Bible study o dili. Kon motambong sila, ilang makita ug madungog ang edukasyon sa Bibliya nga atong gitanyag nila.

8. Unsa ka importante nga makatambong ang mga tawo sa atong mga tigom bisag kas-a lang? Paghatag ug pananglitan.

⁸ Importante ang padayong pag-imbitar sa mga tawo nga motambong sa atong mga tigom bisag kas-a lang. Ngano? Kay ilang makita nga dako kaayo ang kalainan sa atong abunda sa espirituwal nga tigom kon ikomparar sa makaluluoyng espirituwal nga kahimtang sa Dakong Babilonya. (Isa. 65:13) Usa ka magtiayon sa United States, si Ray ug Linda, nakamatikod niini nga kalainan pipila ka tuig kanhi. Sila nakadesisyon nga magsugod nag simba. Sila nagtuo sa Diyos ug gutom sa espirituwal. Busa gitagsatagsa nilag sulod ang tanang simbahan sa ilang siyudad. Dunay daghang simbahan ug relihiyon. Sa sinugdan pa lang, ang magtiayon nakahunahunag duha ka kinahanglanon sa usa ka relihiyon nga ilang pasakopan. Una, kinahanglang duna silay makat-onan inigsimba nila, ug ikaduha, kinahanglang makita sa pamostura sa mga membro sa simbahan nga nagrepresentar sila sa Diyos. Human sa pipila ka tuig, nasudlan nila ang tanang simbahan sa ilang lugar pero nadismayar sila. Wala silay nakat-onan, ug ang mga membro sa simbahan dili desenteg pamostura. Human maadto ang tanang simbahan sa ilang listahan, si Linda miadto sa iyang trabahoan ug si Ray mipauli sa ila. Sa iyang pagpauli, naagian ni Ray ang Kingdom Hall ug nahunahunaan niya, ‘Sulayan kaha nakog simba no aron mahibal-an kon unsa ni sila.’ Siyempre, kana ang pinakamaayo niyang eksperyensiya! Ang tanan diha sa Kingdom Hall maabiabihon, mahigalaon, ug desenteg sininaan. Milingkod si Ray sa atubangan, ug giganahan siya sa iyang nakat-onan! Pareho ni sa giingon ni Pablo bahin sa tawo nga mitambong sa Kristohanong tigom sa unang higayon ug miingon: “Ang Diyos anaa gayod sa inyong taliwala.” (1 Cor. 14:23-25) Human niadto, si Ray kada Dominggo nang motambong, dayon regular na pod siyang motambong sa midweek. Misugod pod ug tambong si Linda, ug bisan kapig 70 anyos na, sila nagpa-Bible study ug nagpabawtismo.

9, 10. (a) Nganong sayon gamiton ang mga tract? (b) Ipatin-aw kon unsaon paggamit sa tract nga Unsa ang Gingharian sa Diyos?

⁹ Mga tract. Naa tay walo ka tract nga sayon gamiton ug epektibo sa pagsugod ug panag-estoryahay. Sukad nga gisugdan nig release niadtong 2013, mga lima ka bilyong kopya na ang naimprenta! Maayo ni nga himan kay dihang makakat-on ka sa paggamit sa usa niini, makamao na kang mogamit sa uban kay pareho ra silag estilo. Unsaon nimo paggamit ang tract sa pagsugod ug panag-estoryahay?

¹⁰ Tingali gusto nimong gamiton ang tract nga Unsa ang Gingharian sa Diyos? Ipakita sa imong kaestorya ang pangutana sa atubangan samtang mangutana ka: “Nahunahunaan ba nimo kon unsa ang Gingharian sa Diyos? Kini ba . . . ?” Dayon papilia siya sa tulo ka tubag. Imbes isulti kon husto o sayop ba ang iyang tubag, ablihi ang “Kon Unsay Giingon sa Bibliya” ug ipabasa ang Daniel 2:44 ug Isaias 9:6. Kon posible, ipadayon ang panaghisgot. Dayon, ipasiugda ang pangutana ubos sa “Hunahunaa Kini”: “Unsay kahimtang kon magmando na ang Gingharian sa Diyos?” Puwede ning himoong basehanan sa inyong sunod nga  panag-estorya. Dihang magkita mo pag-usab, mahimong ipakita nimo ang leksiyon 7 sa brosyur nga Maayong Balita Gikan sa Diyos!, nga usa ka himan sa pagsugod ug pagtuon sa Bibliya.

11. Para kang kinsa gidisenyo ang atong mga magasin, pero unsay angay natong mahibaloan bahin niini?

¹¹ Mga magasin. Ang Bantayanang Torre ug Pagmata! mao ang kinadaghanang naimprenta ug nahubad nga mga magasin sa tibuok kalibotan! Kay gipanagtag ni sa tibuok kalibotan, ang topiko sa atubangan niini gidisenyo aron mainteres ang lainlaing klase sa tawo. Kinahanglang gamiton ni nato aron mapukaw ang interes sa mga tawo sa kon unsa gyoy importante sa kinabuhi. Aron mahatag ni ngadto sa haom nga mga tawo, angay natong mahibaloan kon para kang kinsa gidisenyo ang kada magasin.

12. (a) Para kang kinsa gidisenyo ang Pagmata!, ug unsay katuyoan niini? (b) Unsay imong maayong eksperyensiya sa paggamit niini di pa dugay?

¹² Ang Pagmata! gidisenyo para sa mga magbabasa nga tingali gamay rag nahibaloan o wala gyoy nahibaloan sa Bibliya. Sila tingali walay nahibaloan bahin sa Kristohanong pagtulon-an, walay pagsalig sa relihiyon, o wala masayod nga praktikal gihapon ang Bibliya karon. Ang pangunang katuyoan sa Pagmata! mao ang pagkombinsir sa magbabasa nga dunay Diyos. (Roma 1:20; Heb. 11:6) Motabang pod ni sa magbabasa sa pagpalig-on sa iyang pagtuo nga ang Bibliya “sa pagkatinuod . . . pulong sa Diyos.” (1 Tes. 2:13) Kini ang tulo ka topiko nga hisgotan sa 2018: “Ang Dalan sa Kalipay,” “12 Ka Sekreto sa Malamposong Pamilya,” ug “Tabang Para sa Namatyan.”

13. (a) Para kang kinsa gidisenyo ang publikong edisyon sa Bantayanang Torre? (b) Unsay imong maayong eksperyensiya sa paggamit niini di pa dugay?

¹³ Ang Bantayanang Torre, publikong edisyon, nagpokus sa espirituwal nga mga topiko para niadtong may pagtahod sa Diyos ug sa iyang Pulong. Bisag duna tingali silay diyutayng kahibalo sa Bibliya, sayop ang ilang pagsabot sa mga pagtulon-an niini. (Roma 10:2; 1 Tim. 2:3, 4) Kini ang tulo ka topiko nga hisgotan sa 2018: “Praktikal pa ba ang Bibliya Karon?,” “Unsay Imong Kaugmaon?,” ug “Ang Diyos ba may Pagtagad Kanimo?”

14. (a) Unsay katuyoan sa upat ka video diha sa atong Teaching Toolbox? (b) Sa unsang paagi malamposon nimong naggamit ang maong mga video?

¹⁴ Mga video. Sa panahon ni Jesus, ang panday mogamit lang ug manomanong himan. Pero karon, ang mga panday mogamit nag mga power tool sa paggabas, pagbarina, pagliha, paglansang, ug uban pa. Gawas sa atong naimprentang mga publikasyon, duna na tay nindot nga mga video nga ipatan-aw sa mga tawo​—ang upat niini naa sa atong toolbox: Nganong Tun-an ang Bibliya?, Sa Unsang Paagi Ginahimo ang Bible Study?, Unsay Ginahimo Diha sa Kingdom Hall?, ug Kinsa ang mga Saksi ni Jehova? Ang mga video nga wala ray duha ka minuto epektibo sa unang panag-estorya. Ang mas tag-as nga video magamit sa pagbalikduaw ug niadtong dunay igong panahon. Kining nindot nga mga himan makadasig sa mga tawo sa pag-Bible study ug pagtambong sa mga tigom.

15. Paghatag ug pananglitan sa epekto sa pagpatan-awg video sa mga tawo sa ilang pinulongan.

¹⁵ Pananglitan, nailaila sa usa ka sister ang babaye nga mibalhin gikan sa Micronesia, ug Yapese ang orihinal nga pinulongan niini. Gipatan-aw siya sa sister sa Yapese nga video nga Nganong Tun-an ang Bibliya? Pagsugod sa video, ang babaye miingon: “Pinulongan ni nako. Di ko katuo! Tagaamo gyod ni siya tungod sa tono sa iyang sinultihan. Pinulongan gyod namo ang iyang giestorya!” Human niana, siya miingon nga iyang basahon ug tan-awon ang tanang naa sa jw.org sa ilang pinulongan.  (Itandi ang Buhat 2:8, 11.) Tagda ang laing eksperyensiya. Usa ka sister sa United States ang dunay pag-umangkon nga nagpuyo sa laing nasod. Iya ning gipadalhag link sa pareho nga video sa pinulongan niini. Gitan-aw ni sa pag-umangkon ug nag-email siya sa sister: “Nainteres ko sa bahin nga dunay daotang gahom nga nagkontrol sa kalibotan. Nag-fill up kog hangyo para sa pagtuon sa Bibliya.” Nagpuyo siya sa nasod diin gidili ang atong buluhaton!

16. Ipatin-aw ang espesipikong katuyoan sa brosyur nga: (a) Pamati sa Diyos ug Mabuhi Ka sa Walay Kataposan. (b) Maayong Balita Gikan sa Diyos! (c) Kinsay Nagabuhat sa Kabubut-on ni Jehova Karon?

¹⁶ Mga brosyur. Unsaon nimo pagtudlo niadtong dili kaayo kabasa o walay mga basahon diha sa ilang pinulongan? Duna tay himan para nila​—ang brosyur nga Pamati sa Diyos ug Mabuhi Ka sa Walay Kataposan. * Maayo pod kaayong gamiton ang Maayong Balita Gikan sa Diyos! sa pagsugod ug pagtuon sa Bibliya. Puwede nimong ipakita sa imong kaestorya ang 14 ka topiko sa likod niini ug papilion siya kon unsay nakapainteres kaayo niya. Dayon sugdi ang pagtuon niana nga leksiyon. Nasulayan na ba nimo ni nga paagi sa imong mga balikduaw? Ang ikatulong brosyur sa toolbox mao ang Kinsay Nagabuhat sa Kabubut-on ni Jehova Karon? Kini gidisenyo aron tudloan ang mga Bible study bahin sa organisasyon. Aron mahibalo ka kon unsaon ni paggamit sa matag pagtuon, tan-awa ang Marso 2017 nga Atong Kristohanong Kinabuhi ug Ministeryo​—Workbook sa Tigom.

17. (a) Unsay espesipikong katuyoan sa matag libro sa pagtuon? (b) Unsay kinahanglang buhaton niadtong magpabawtismo, ug ngano?

¹⁷ Mga libro. Human sa pagtuon sa pipila ka bahin sa brosyur, puwede kang mobalhin sa What Can the Bible Teach Us? * Kini nga himan makatabang sa Bible study nga makakat-og dugang bahin sa simpleng mga pagtulon-an sa Bibliya. Dihang mahuman na niya ang maong libro ug miuswag na siya sa espirituwal, ipadayon ang pagtuon gamit ang How to Remain in God’s Love. Kini nga himan magtudlo sa Bible study kon unsaon pagpadapat ang mga prinsipyo sa Bibliya sa adlaw-adlawng pagkinabuhi. Hinumdomi nga bisag bawtismado na sila, kinahanglang humanon sa mga bag-ohan ang duha ka libro. Makatabang ni nila nga makabatog lig-ong pundasyon sa kamatuoran.​—Basaha ang Colosas 2:6, 7.

18. (a) Ingong magtutudlo sa kamatuoran, unsay gidasig sa 1 Timoteo 4:16 kanato, ug unsay resulta niana? (b) Dihang gamiton nato ang Teaching Toolbox, unsay angay natong tumong?

¹⁸ Ingong mga Saksi ni Jehova, responsibilidad nato ang pagtudlo “sa kamatuoran [sa] maayong balita” nga mahimong maggiya sa mga tawo ngadto sa kinabuhing walay kataposan. (Col. 1:5; basaha ang 1 Timoteo 4:16.) Tungod niana, gihatagan tag Teaching Toolbox nga kompleto sa tanan natong gikinahanglan. (Tan-awa ang “ Teaching Toolbox.”) Hinaot gamiton nato ni nga mga himan sa pinakamaayong paagi. Ang matag magsasangyaw maoy mopili kon unsay gamiton nga literatura sa toolbox ug kon kanus-a ni gamiton. Pero dili lang ang pagpanagtag ug literatura ang atong tumong. Dili pod ta mohatag ug literatura niadtong dili interesado. Tumong nato nga himoong tinun-an ang mga tawong matinud-anon, mapaubsanon, ug gutom sa espirituwal​—mga tawo nga “hustong nakiling alang sa kinabuhing walay kataposan.”​—Buh. 13:48; Mat. 28:19, 20.