Unsay sinugdan sa sinagoga?

ANG “sinagoga” naggikan sa Gregong pulong nga nagkahulogang “katigoman” o “panagtigom.” Haom ang maong ngalan kay ang mga sinagoga maoy tigomanan sa mga Hudiyo para sa pagtudlo ug pagsimba sukad pa kaniadto. Ang Hebreohanong Kasulatan wala maghisgot ug sinagoga. Pero gipakita sa Kristohanon Gregong Kasulatan nga diha nay mga sinagoga sa unang siglo C.E.

Kadaghanan sa mga eskolar nagtuo nga ang mga sinagoga nagsugod niadtong nabihag ang mga Hudiyo sa Babilonya. Ang Encyclopaedia Judaica nag-ingon: “Ang mga Binihag, nga naa sa langyawng lugar diin walay Templo, mibati nga kinahanglan silang mahupayan. Sila magtigom matag karon ug unya, tingali panahon sa Igpapahulay, ug magbasa sa Kasulatan.” Dihang nahigawas na sila sa pagkabihag, ang mga Hudiyo lagmit nagtigom gihapon alang sa pag-ampo ug pagbasa sa Kasulatan, ug nagtukod silag mga sinagoga sa lugar nga ilang gipuy-an.

Sa unang siglo C.E., ang mga sinagoga nahimong sentro sa pagsimba sa mga Hudiyo ug sa ilang kalihokan sa komunidad. May mga sinagoga sa mga lugar palibot sa Dagat Mediteranyo, sa tibuok Middle East, ug sa Israel mismo. “[Ang sinagoga] nagsilbing lugar para sa pagtuon, sagradong pagpangaon, husay sa korte, miting sa politika ug sa komunidad, ug depositohanan sa mga amot,” matod ni Propesor Lee Levine sa The Hebrew University of Jerusalem. Siya midugang: “Siyempre, ang pinakaimportante mao ang kalihokan sa relihiyon.” Maong dili ikatingala nga si Jesus tig-adtoan sa mga sinagoga. (Mar. 1:21; 6:2; Luc. 4:16) Didto, siya nanudlo, nagtambag, ug nagdasig sa mga nanambong. Human matukod ang Kristohanong kongregasyon, si apostol Pablo pirme pong magsangyaw sa mga sinagoga. Ang mga uhaw sa espirituwal moadto sa sinagoga, busa inig-abot ni Pablo sa usa ka siyudad, sagad moadto siya sa sinagoga ug magsangyaw didto.​—Buh. 17:1, 2; 18:4.