1, 2. Unsang mga hagit ang giatubang sa mga batan-on karon, ug unsay ilang mahimo aron masagubang kana?

“BRAYT man tâ ka, nganong motuo man kag Diyos,” miingon ang klasmet sa usa ka batan-ong sister sa Britain. Usa ka brader sa Germany misulat: “Giisip sa akong mga titser nga tumotumo lang ang asoy sa Bibliya bahin sa paglalang. Ug sila nagdahom nga ang mga estudyante nagtuo sa ebolusyon.” Ang usa ka batan-ong sister sa France miingon: “Ang mga titser sa among eskuylahan nakurat nga may mga estudyante nga motuo gihapog Bibliya.”

² Ingong usa ka batan-ong alagad ni Jehova o nagtuon pa bahin Kaniya, napresyur ka ba nga mouyon sa popular nga mga pagtulon-an, sama sa ebolusyon, imbes motuo sa Maglalalang? Kon mao, duna kay mahimo aron molig-on ug magpabiling lig-on ang imong pagtuo. Usa niana mao ang paggamit sa imong hinatag sa Diyos nga katakos sa panghunahuna, nga maoy “magabantay kanimo.” Kana manalipod kanimo batok sa mga pilosopiya nga makapahuyang sa imong pagtuo.—Basaha ang Proverbio 2:10-12.

3. Unsay atong hisgotan niining artikuloha?

³ Ang lig-ong pagtuo gibase sa tukmang kahibalo bahin sa Diyos. (1 Tim. 2:4) Busa dihang magtuon ka sa Pulong sa Diyos ug sa atong mga publikasyon, ayaw kana dalidaliag basa. Gamita ang katakos sa  panghunahuna aron imong ‘masabtan ang diwa’ niana. (Mat. 13:23) Atong tan-awon kon sa unsang paagi ang paghimo niana makapalig-on sa imong pagtuo sa Diyos ingong Maglalalang ug sa Bibliya—mga topiko nga daghag makapakombinsir nga ebidensiya.—Heb. 11:1.

4. Nganong ang pagtuo sa Diyos ug sa sinugdan sa kinabuhi parehong naglangkit ug pagtuo, ug unsay atong buhaton aron makahimo tag hustong konklusyon?

⁴ May miingon na ba nimo nga motuo siya sa ebolusyon kay gibase kini sa siyensiya pero dili siya motuo sa Diyos kay dili Siya makita? Daghan ang naghunahunag ingon niana. Apan maayong hinumdoman nato kini: Nagtuo man ang usa sa Diyos o sa ebolusyon, nalangkit gihapon ang pagtuo. Sa unsang paagi? Walay usa kanato ang nakakita sa Diyos o nakasaksi sa iyang paglalang. (Juan 1:18) Ug walay tawo—siyentipiko man o dili—ang nakasaksi sa usa ka matang sa kinabuhi nga nausab ngadto sa laing matang sa kinabuhi. Pananglitan, walay nakakita nga ang usa ka reptilya (reptile) nag-usab-usab ug nahimong mananap nga sus-an (mammal). (Job 38:1, 4) Busa, angay natong susihon ang ebidensiya ug gamiton ang atong katakos sa panghunahuna aron makahimog hustong konklusyon. Sa paghisgot sa paglalang, si apostol Pablo misulat: “Ang . . . dili-makita nga mga hiyas [sa Diyos], nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, mao nga sila walay ikapangatarongan.”—Roma 1:20.

5. Sa unsang paagi kita ingong katawhan sa Diyos nasangkapan sa paggamit sa atong pagsabot?

⁵ Ang ‘pagsabot’ nagkahulogan ug pag-ila sa usa ka butang nga lagmit dili dayon makita o maklaro. (Heb. 11:3) Busa, ang mga tawong may pagsabot mogamit sa ilang hunahuna, dili lang sa ilang mga mata ug dalunggan. Ang organisasyon ni Jehova nagtagana kanatog daghang maayong pagkadukiduki nga mga himan. Kini makatabang nato nga ‘makakita’ sa atong Maglalalang pinaagi sa atong mata sa pagtuo. (Heb. 11:27) Kini nga mga himan naglakip sa video nga The Wonders of Creation Reveal God’s Glory, mga brosyur nga Gilalang ba ang Kinabuhi? ug The Origin of Life—Five Questions Worth Asking, ug sa librong Is There  a Creator Who Cares About You? Nadawat usab nato ang maayong mga impormasyon gikan sa atong mga magasin. Diha sa Pagmata!, sagad hisgotan ang interbiyo sa mga siyentipiko ug sa uban nga nagpatin-aw kon nganong motuo na sila sa Diyos. Ang serye nga nag-ulohang “Gidisenyo ba Kini?” nagpasiugda sa mga pananglitan sa talagsaong mga disenyo nga atong makita sa kinaiyahan. Ang mga siyentipiko sagad naningkamot sa pagsundog nianang nindot nga mga disenyo.

6. Unsa ang pipila ka kaayohan sa paggamit sa mga himan nga gitagana, ug sa unsang paagi nakabenepisyo ka niini?

⁶ Bahin sa duha ka brosyur nga bag-o lang gihisgotan, usa ka 19 anyos nga brader sa United States miingon: “Mapuslanon kaayo ni nako. Kadaghan na nako ning natun-an.” Usa ka sister sa France misulat: “Talagsaon kaayo ang mga artikulong ‘Gidisenyo ba Kini?’! Gipakita niana nga bisag masundog sa banggiitang mga inhenyero ang mga disenyo sa kinaiyahan, dili gyod nila matupngan ang kakomplikado niini.” Ang ginikanan sa usa ka 15 anyos nga dalagita sa South Africa miingon: “Sagad, ang unang basahon sa among anak diha sa Pagmata! mao ang artikulong ‘Interbiyo.’” Komosta sa imong bahin? Gipahimuslan ba nimo kini nga mga tagana? Kini makapalig-on pag-ayo sa imong pagtuo nga mahisama ka sa kahoy nga nakagamot pag-ayo. Nianang paagiha, ang imong pagtuo makatabang nimo sa pagbarog batok sa samag unos nga bakak nga mga pagtulon-an.—Jer. 17:5-8.

7. Nganong gusto sa Diyos nga gamiton nimo ang imong gahom sa pagpangatarongan?

⁷ Sayop ba nga mangutana bahin sa Bibliya? Dili gayod! Gusto ni Jehova nga gamiton nimo ang imong “gahom sa pagpangatarongan” aron makombinsir ka sa kamatuoran. Dili niya gusto nga motuo lang ka tungod kay ang uban mituo. Busa gamita ang imong katakos sa panghunahuna aron makabatog tukmang kahibalo. Dayon, kana nga kahibalo maoy mahimong lig-ong pundasyon sa imong pagtuo. (Basaha ang Roma 12:1, 2; 1 Timoteo 2:4.) Ang usa ka paagi nga mabatonan kana nga kahibalo mao ang pagtuon ug espesipikong mga ulohan nga gusto nimong masabtan pag-ayo.

8, 9. (a) Unsang mga topiko ang ganahang tun-an sa pipila? (b) Sa unsang paagi nakabenepisyo ang pipila sa pagpamalandong sa ilang gitun-an?

⁸ Ang pipila ganahang magtuon bahin sa mga tagna sa Bibliya o sa pagkatukma niini maylabot sa kasaysayan, arkeolohiya, ug siyensiya. Ang usa sa mga tagna nga nindot tun-an mao ang Genesis 3:15. Kana nga bersikulo nagpaila sa pangunang tema sa Bibliya, nga mao ang pagbindikar sa pagkasoberano sa Diyos ug pagbalaan sa iyang ngalan pinaagi sa Gingharian. Gamit ang mahulagwayong mga pulong, gipakita niana nga bersikulo kon sa unsang paagi wagtangon ni Jehova ang tanang pag-antos nga nasinati sa mga tawo sukad sa Eden. Sa unsang paagi tingali nimo tun-an ang Genesis 3:15? Ang usa ka paagi mao ang paghimog time line. Mahimo nimong ilista ang mga teksto nga nagpakita kon sa unsang paagi ang Diyos anam-anam nga naghatag ug katin-awan bahin sa mga indibiduwal ug sa kahikayan nga gihisgotan niini nga bersikulo nga nagpamatuod nga matuman gyod ang maong tagna. Samtang imong makita nga nagkauyon ang maong mga teksto, makahinapos gyod ka nga ang mga manalagna ug magsusulat sa Bibliya “giagak sa balaang espiritu.”—2 Ped. 1:21.

⁹ Usa ka brader sa Germany miingon nga ang matag basahon sa Bibliya naghisgot bahin sa Gingharian. Siya midugang: “Tinuod kana bisan pag 40 ka tawo ang nagsulat sa Bibliya. Ug daghan kanila ang nabuhi sa lainlaing panahon ug wala magkailhanay.” Usa ka sister sa Australia ang natandog sa tun-anang artikulo sa Bantayanang Torre sa Disyembre 15, 2013, nga naghisgot sa kahulogan sa Paskuwa. Ang maong espesyal nga pagsaulog konektado sa Genesis 3:15 ug sa pag-abot  sa Mesiyas. Siya misulat: “Tungod sa maong pagtuon, naamgohan nako kon unsa ka kahibulongan si Jehova. Natandog kaayo ko nga iyang gihimo kini nga kahikayan alang sa mga Israelinhon ug natuman kini kang Jesus. Kinahanglan kong mohunong kadiyot ug mamalandong kon unsa ka talagsaon kadtong panihapon sa Paskuwa!” Nganong mao kanay gibati sa sister? Tungod kay siya namalandong sa iyang nabasa ug “nakasabot sa diwa niini.” Kini nakapalig-on sa iyang pagtuo ug mas nakapasuod niya kang Jehova.—Mat. 13:23.

10. Sa unsang paagi ang pagkamatinud-anon sa mga magsusulat sa Bibliya nagpalig-on sa atong pagsalig sa ilang mga sinulat?

¹⁰ Makapalig-on usab sa pagtuo ang pagkonsiderar sa kaisog ug pagkamatinud-anon sa mga tawo nga nagsulat sa Bibliya. Daghang karaang magsusulat ang naghisgot lang sa maayong mga butang bahin sa ilang mga lider ug gingharian. Apan ang mga manalagna ni Jehova kanunayng nagsulti sa tinuod. Gihisgotan pa gani nila ang kasaypanan sa ilang katawhan, bisan sa ilang mga hari. (2 Cron. 16:9, 10; 24:18-22) Ug gisulat nila ang ilang mga kapakyasan ug nianang sa ubang alagad sa Diyos. (2 Sam. 12:1-14; Mar. 14:50) “Talagsaon ang ingon ana nga pagkamatinud-anon,” miingon ang usa ka batan-ong brader sa Britain. “Makapalig-on ni sa atong pagsalig nga ang Bibliya gikan gyod kang Jehova.”

11. Sa unsang paagi mas mapabilhan sa mga batan-on ang mga prinsipyo sa Bibliya?

¹¹ Tungod sa giya niini, daghan ang kombinsido nga ang Bibliya inspirado sa Diyos. (Basaha ang Salmo 19:7-11.) Usa ka batan-ong sister sa Japan misulat: “Dihang gipadapat sa akong pamilya ang mga pagtulon-an sa Bibliya, kami malipayon kaayo. Among nasinati ang kalinaw, panaghiusa, ug gugma.” Ang mga prinsipyo sa Bibliya manalipod kanato batok sa bakak nga pagsimba ug sa mga patuotuo nga nag-ulipon sa daghan. (Sal. 115:3-8) Nakaapektar ba sa mga tawo ang mga pilosopiya nga walay Diyos? Ang mga pagtulon-an sama sa ebolusyon daw naghimo sa kinaiyahan ingong usa ka diyos, nga nag-isip nianang gamhanan imbes si Jehova. Kadtong miingon nga walay Diyos nangangkon nga ang atong kaugmaon nagdepende lang sa atong kaugalingong paningkamot. Pero, dili sila makagarantiya ug maayong kaugmaon.—Sal. 146:3, 4.

12, 13. Unsa ang usa ka epektibong paagi sa pagpakighisgot bahin sa paglalang ug sa Bibliya uban sa mga klasmet o titser?

¹² Sa unsang paagi epektibo kang makapangatarongan sa uban bahin sa paglalang ug sa Bibliya? Una, ayaw dayon paghunahuna nga nahibalo na ka sa gituohan sa uban. Ang pipila moingon nga sila nagtuo sa ebolusyon, pero gibati sab nila nga naglungtad ang Diyos. Sila naghunahuna nga gigamit sa Diyos ang ebolusyon sa paglalang sa lainlaing matang sa kinabuhi. Ang uban moingon nga nagtuo sila sa ebolusyon kay gibati nila nga dili kana itudlo sa eskuylahan kon dili nâ tinuod. Ug ang pipila wala na motuo ug Diyos kay sila nahigawad sa relihiyon. Busa, kon makighisgot ka bahin sa sinugdan sa kinabuhi, maayong mangutana usa ka. Sayra ang gituohan sa imong kaestorya. Kon rasonable ka ug andam maminaw niya, lagmit mamati pod siya nimo.—Tito 3:2.

¹³ Kon dunay mokuwestiyon sa imong pagtuo sa paglalang, mahimo nimo siyang pangutan-on sa matinahorong paagi kon unsay iyang hunahuna sa sinugdan sa kinabuhi. Mahimo nimong ipasaysay niya kon sa unsang paagi nagsugod ang kinabuhi kon walay Maglalalang. Kon mitungha pa ang kinabuhi pinaagig ebolusyon, ang unang matang sa kinabuhi kinahanglang modaghan, nga magpatunghag matang sa kinabuhi nga pareho niana. Usa ka propesor sa chemistry miingon nga lakip sa gikinahanglan mao ang (1) samag panit nga magsilbing proteksiyon, (2) katakos sa pagkuha ug paggamit sa enerhiya, (3) impormasyon diha sa mga gene, ug  (4) katakos sa pagkopya sa maong impormasyon. Siya midugang: “Mahingangha gayod ang usa sa kakomplikado bisan sa kinasimplehang matang sa kinabuhi.”

14. Unsay imong mahimo kon gibati nimong dili pa ka andam makighisgot bahin sa ebolusyon o paglalang?

¹⁴ Kon gibati nimo nga dili pa ka andam makighisgot bahin sa ebolusyon o paglalang, puwede nimong gamiton ang simpleng pangatarongan nga gigamit ni Pablo. Siya misulat: “Ang matag balay adunay nagtukod, apan siya nga nagtukod sa tanang butang mao ang Diyos.” (Heb. 3:4) Kana nga pangatarongan rasonable ug epektibo kaayo! Oo, ang komplikadong mga disenyo maoy resulta sa usa ka intelihenteng hunahuna. Mahimo sab nimong gamiton ang haom nga publikasyon. Usa ka sister ang migamit sa duha ka brosyur nga gihisgotan ganina dihang nakig-estorya sa usa ka batan-ong lalaki kinsa miingong wala siya motuo nga dunay Diyos ug mituo siyag ebolusyon. Mga usa ka semana sa ulahi, ang maong batan-on nakaingon, “Karon motuo na kog Diyos.” Kini mitultol sa panagtuon sa Bibliya, ug ang maong batan-on nabawtismohan.

15, 16. Sa unsang mga paagi ikapatin-aw nimo nga ang Bibliya gikan sa Diyos, ug unsay imong tumong?

¹⁵ Mahimo nimong gamiton ang susamang mga paagi dihang makig-estorya sa usa nga nagduhaduha sa Bibliya. Sayra kon unsa gyoy iyang gituohan ug unsang mga topiko ang iyang ganahan. (Prov. 18:13) Kon interesado siya sa siyensiya, lagmit maminaw siya kon hisgotan nimo ang mga punto nga nagpakita sa katukma sa Bibliya maylabot sa siyensiya. Ang uban mapalihok tingali dihang masayran nila nga ang Bibliya naundan ug kasaligang mga tagna ug tukma nga kasaysayan. O kaha, puwede nimong ipasiugda ang mga prinsipyo sa Bibliya, sama nianang makita sa Wali sa Bukid.

¹⁶ Hinumdomi, ang imong tumong mao ang pagtandog sa kasingkasing, dili ang pagdaog sa argumento. Busa mahimong maayong tigpaminaw. Pangutana sa sinserong paagi, ug sulti uban ang kalumo ug pagtahod, ilabina kon makig-estorya ka sa mga edaran. Kon buhaton nimo kana, lagmit tahoron nila ang imong panglantaw. Mamatikdan sab nila nga gihunahuna nimo pag-ayo ang imong gituohan. Kana maoy usa ka butang nga wala mahimo sa daghang batan-on. Siyempre, maayong hinumdoman nga dili ka obligadong tubagon kadtong dili rasonable o gusto lang magbugalbugal sa imong gituohan.—Prov. 26:4.

17, 18. (a) Unsay makatabang nimo sa pagpalig-on sa imong pagtuo sa Bibliya? (b) Unsang pangutana ang atong hisgotan sa sunod nga artikulo?

¹⁷ Aron molig-on ang pagtuo, kita nagkinahanglag labaw pa kay sa pangunang kahibalo sa Bibliya. Busa, tun-ig maayo ang Pulong sa Diyos, nga samag nangita kag natagong mga bahandi. (Prov. 2:3-6) Pahimusli ang ubang himan nga mabatonan sa imong pinulongan, sama sa Watchtower Library sa DVD, Watchtower ONLINE NGA LIBRARYA, ingon man ang Watch Tower Publications Index o ang Giya sa Pagpanukiduki Para sa mga Saksi ni Jehova. Dugang pa, himoang tumong nga mabasa ang enterong Bibliya. Mahimong mahuman nimo kana sulod sa usa ka tuig. Usa kana sa kinamaayohang paagi nga mapalig-on ang atong pagtuo. Sa paghinumdom sa iyang pagkabatan-on, usa ka tigdumala sa sirkito miingon: “Ang usa sa nakatabang nako nga maapresyar nga ang Bibliya Pulong sa Diyos mao ang pagbasa sa enterong Bibliya. Ang mga estorya nga akong nakat-onan sa bata pa ko nasabtan ra nako. Kini nakadasig nako nga mouswag sa espirituwal.”

¹⁸ Mga ginikanan—kamo ang may pangunang responsabilidad sa pagtudlo sa inyong mga anak bahin kang Jehova. Sa unsang paagi ninyo sila matabangan sa pagpalig-on sa ilang pagtuo? Hisgotan kana sa sunod nga artikulo.