1. Nganong kombinsido ta nga gamhanan ang Pulong sa Diyos? (Tan-awa ang hulagway sa sinugdan sa artikulo.)

INGONG katawhan ni Jehova, kombinsido ta nga ang pulong sa Diyos, ang iyang mensahe sa mga tawo, “buhi ug gamhanan.” (Heb. 4:12) Daghan kanato ang makapamatuod nga ang gahom sa Bibliya makabag-o sa kinabuhi. Sa wala pa ma-Saksi, ang pipila kaniadto kawatan, adik sa droga, o imoral. Ang uban, bisag nagtagamtam ug temporaryong kalamposan niining sistemaha, mibati gihapon nga dunay kulang sa ilang kinabuhi. (Eccl. 2:3-11) Sukad pa sa una, ang mga nawad-an ug direksiyon sa kinabuhi nagiyahan sa hustong dalan pinaagi sa gahom sa Bibliya. Seguradong nalipay ka sa pagbasa sa mga eksperyensiya diha sa Bantayanang Torre sa seryeng “Ang Bibliya Makabag-o sa Kinabuhi.” Ug imong nakita nga bisag nadawat na nila ang kamatuoran, ang mga Kristohanon padayong miuswag sa espirituwal sa tabang sa Kasulatan.

2. Sa unsang paagi milihok ang gahom sa Pulong sa Diyos niadtong unang siglo?

² Masorpresa ba ta nga daghan karon ang nakahimog dagkong kausaban tungod sa ilang pagtuon sa Pulong sa Diyos? Dili gyod! Ang ilang eksperyensiya nagpahinumdom nato sa unang siglong  mga igsoon, nga may langitnong paglaom. (Basaha ang 1 Corinto 6:9-11.) Human hisgoti ang klase sa mga tawo nga dili makapanunod sa Gingharian sa Diyos, si apostol Pablo midugang: “Ingon niana ang pipila kaninyo kaniadto.” Pero nabag-o sila sa tabang sa Kasulatan ug sa balaang espiritu sa Diyos. Bisan human makadangat sa kamatuoran, ang pipila padayong nakigbisog sa seryosong mga problema sa ilang espirituwalidad. Ang Bibliya naghisgot sa usa ka dinihogang Kristohanon nga kinahanglang ipalagpot; sa ulahi, siya napasig-uli. (1 Cor. 5:1-5; 2 Cor. 2:5-8) Makapadasig ang pagkahibalo nga ang atong mga igsoon sa pagtuo nakalahutay sa mga problema pinaagi sa tabang sa Pulong sa Diyos!

3. Unsay atong hisgotan niining artikuloha?

³ Ang Pulong sa Diyos gamhanan ug kini gihatag ni Jehova kanato. Busa, gamiton gyod nato ni sa pinakamaayong paagi. (2 Tim. 2:15) Niining artikuloha, atong konsiderahon kon unsaon nga epektibong magamit ang Pulong sa Diyos sa atong (1) personal nga kinabuhi, (2) ministeryo, ug (3) pagpanudlo diha sa plataporma. Kini motabang nato nga mapakita ang atong gugma ug pagpasalamat sa atong mahigugmaon ug langitnong Amahan, kinsa nagtudlo nato para sa atong kaayohan.​—Isa. 48:17.

4. (a) Aron makabenepisyo sa Pulong sa Diyos, unsay angay natong buhaton? (b) Unsay imong eskedyul sa pagbasa sa Bibliya?

⁴ Kon gusto natong makabenepisyo sa Pulong sa Diyos, kinahanglang regular nato ning basahon​—kon posible, kada adlaw. (Jos. 1:8) Siyempre, daghan tag buluhaton kada adlaw. Pero, dili nato tugotan ang bisan unsang butang​—lakip ang atong importanteng responsibilidad​—nga mobalda sa atong rutina sa pagbasag Bibliya. (Basaha ang Efeso 5:15, 16.) Ang mga alagad ni Jehova mogahin gyod ug panahon nga mabasa ang Bibliya kada adlaw​—mabuntag, magabii, o sa bisan unsang orasa anang adlawa. Ilang gibati ang giingon sa salmista: “Gihigugma ko gayod ang imong balaod! Kini ang akong gipalandong sa tibuok nga adlaw.”​—Sal. 119:97.

5, 6. (a) Nganong importante ang pagpamalandong? (b) Sa unsang paagi mahimong epektibo ang atong pagpamalandong? (c) Sa unsang paagi personal kang nakabenepisyo sa pagbasa ug pagpamalandong sa Pulong sa Diyos?

⁵ Gawas sa pagbasag Bibliya, importante ang pagpamalandong sa atong nabasa. (Sal. 1:1-3) Pinaagi niini, mapadapat nimo ang bililhong kaalam sa Bibliya. Nagbasa man diha sa inimprenta o elektroniko, ang panguna natong tumong mao ang pagtandog sa atong kasingkasing.

⁶ Sa unsang paagi mahimong epektibo  ang atong pagpamalandong? Nakatabang sa daghan ang paghunong humag basa sa teksto, ug ang pagpangutana sa kaugalingon: ‘Unsay akong makat-onan niini bahin kang Jehova? Giunsa nako pagpadapat ang prinsipyo niining tekstoha? Unsa pay puwede nakong pauswagon?’ Dihang iampo ug pamalandongon nato ang atong nabasa, mas determinado tang ipadapat ang tambag sa Pulong sa Diyos. Oo, magamit gyod nato sa epektibong paagi ang gahom niini.​—2 Cor. 10:4, 5.

7. Sa unsang paagi epektibo natong magamit ang Pulong sa Diyos diha sa ministeryo?

⁷ Unsay makatabang aron epektibo natong magamit ang Pulong sa Diyos diha sa ministeryo? Ang usa ka paagi mao ang kanunayng paggamit niini diha sa pagsangyaw ug pagpanudlo. Usa ka brader miingon, “Kon partner nimog sangyaw si Jehova, ikaw lang bay moestorya o paestoryahon pod nimo siya?” Ang iyang punto: Kon direkta natong basahon ang Pulong sa Diyos diha sa pagsangyaw, samag gitugotan nato si Jehova nga moestorya sa tagbalay. Ang maayong pagkapili nga teksto mas puwersado kay sa bisan unsang pulong nga puwede natong isulti. (1 Tes. 2:13) Pangutan-a ang kaugalingon, ‘Naningkamot ba kong mabasahan ug teksto ang akong gisangyawan?’

8. Nganong dili lang basta basahon ang teksto dihang magsangyaw?

⁸ Siyempre, dili igo nga basahan lang natog teksto ang atong gisangyawan. Ngano? Kay daghan ang gamay lag nasabtan o walay nahibaloan bahin sa Bibliya. Kanay kahimtang niadtong unang siglo, ug ingon niana sab karon. (Roma 10:2) Busa dihang mabasahan natog teksto ang atong kaestorya, dili ta angayng magdahom nga masabtan dayon niya ang punto niini. Kinahanglang mogahin tag panahon aron ipasiugda ang pipila  ka punto sa teksto​—lagmit basahog usab ang importanteng pulong—​ug ipatin-aw ang kahulogan niini. Pinaagi niana, ang mensahe sa Pulong sa Diyos matisok sa hunahuna ug kasingkasing sa atong kaestorya.​—Basaha ang Lucas 24:32.

9. Sa dili pa basahon ang teksto, unsay atong himoon aron ipasiugda ang pagtahod sa Bibliya? Paghatag ug pananglitan.

⁹ Sa dili pa magbasag teksto, paghimog introduksiyon nga magpasiugdag pagtahod sa Bibliya. Pananglitan, puwede tang moingon, “Tan-awon nato ang giingon sa atong Magbubuhat bahin ini nga topiko.” Dihang makig-estorya sa dili Kristiyano ug kagikan, puwede tang moingon, “Matikdi kon unsay giingon sa Balaang Kasulatan.” O kon magsangyaw ug edukadong mga tawo, puwede tang mangutana, “Pamilyar ba sa imo ning karaang panultihon?” Oo, kinahanglan natong konsiderahon ang matag indibiduwal ug ipasibo ang atong pagpakig-estorya nila.​—1 Cor. 9:22, 23.

10. (a) Hisgoti ang eksperyensiya sa usa ka brader. (b) Sa unsang paagi nakita nimong gamhanan ang paggamit sa Pulong sa Diyos diha sa imong ministeryo?

¹⁰ Nakita sa daghan nga ang paggamit sa Pulong sa Diyos diha sa ministeryo nakapainteres sa ilang gisangyawan. Pananglitan, giduaw sa brader ang usa ka edarang lalaki kinsa dugay nang tigbasahan sa atong magasin. Imbes ihatag lang ang bag-ong Bantayanang Torre, gibasa sa brader ang usa ka teksto nga makita sa maong magasin. Iyang gibasa ang 2 Corinto 1:3, 4, nga nag-ingon: “Ang Amahan sa malumong mga kaluoy ug ang Diyos sa tanang paghupay . . . nagahupay kanamo sa tanan namong kasakitan.” Kay natandog pag-ayo ang tagbalay sa maong teksto, gipabasa niya kinig otro. Ang lalaki miingon nga sila sa iyang asawa nanginahanglan gyod ug paghupay, ug karon gusto na siyang makakat-on pag dugang sa Bibliya. Gamhanan gyod ang paggamit sa Pulong sa Diyos diha sa ministeryo!​—Buh. 19:20.

11. Unsay angayng hinumdoman sa mga brader nga manudlo diha sa plataporma?

¹¹ Kitang tanan ganahan gyong motambong sa atong Kristohanong mga tigom, asembliya, ug kombensiyon. Ang pangunang rason sa atong pagtambong mao ang pagsimba kang Jehova. Makabenepisyo sab ta sa espirituwal nga mga instruksiyon nga atong madawat. Giisip gyod sa mga brader nga dakong pribilehiyo ang pagpanudlo diha sa plataporma. Pero angay nilang hinumdoman nga usa kini ka seryosong responsibilidad. (Sant. 3:1) Segurohon nila nga ang ilang gitudlo gibase sa Pulong sa Diyos. Kon duna kay bahin sa plataporma, sa unsang paagi epektibo nimong magamit ang gahom sa Bibliya?

12. Unsaon pagseguro sa mamumulong nga ang Kasulatan maoy pundasyon sa iyang pakigpulong?

¹² Seguroha nga ang Kasulatan mao ang pundasyon sa imong pakigpulong. (Juan 7:16) Unsaon kana paghimo? Pag-amping nga walay bisan unsa​—mga eksperyensiya, ilustrasyon, o ang paagi sa paghatag sa bahin—​ang makasapaw sa mga teksto nga imong gigamit. Dugang pa, ang pagbasag daghang teksto wala magpasabot ug epektibong pagpanudlo gikan sa Bibliya. Gani, kon mobasa kag daghan kaayong teksto, lagmit walay mahinumdoman ang imong mamiminaw. Busa pilia pag-ayo ang mga teksto nga imong basahon, dayon ipatin-aw, iilustrar, ug iaplikar kini. (Neh. 8:8) Kon ang pakigpulong gibase sa outline gikan sa organisasyon, tun-i kini ug ang mga teksto nga gigamit. Sabta kon unsay koneksiyon sa matag punto sa outline ug sa mga teksto nga gisitar.  Dayon pagpilig mga teksto aron ipatin-aw ang mga punto sa outline. (Makita nimo ang mga sugyot sa tun-anan 21-23 sa librong Pahimusli ang Edukasyon sa Teokratikanhong Tunghaan sa Ministeryo.) Labaw sa tanan, pag-ampo sa tabang ni Jehova aron epektibo nimong matudlo ang iyang panghunahuna nga naa sa Bibliya.​—Basaha ang Esdras 7:10; Proverbio 3:13, 14.

13. (a) Sa unsang paagi natandog ang usa ka sister sa teksto nga gigamit diha sa tigom? (b) Sa unsang paagi nakabenepisyo ka sa Kasulatan nga gigamit diha sa mga tigom?

¹³ Usa ka sister sa Australia ang natandog pag-ayo sa usa ka teksto nga gibasa diha sa tigom. Siya may pait nga kasinatian sa bata pa. Bisan pa niana, gidawat niya ang mensahe sa Bibliya ug nagpahinungod kang Jehova. Pero, nagduhaduha gihapon siya nga gihigugma siya ni Jehova. Kadugayan, nakombinsir siya nga gihigugma siya sa Diyos. Unsay nakatabang niya? Nausab ang iyang panghunahuna dihang gipamalandong niya ang teksto nga gibasa diha sa tigom, ug gikonektar kini sa ubang teksto. * Diha bay higayon nga natandog ka sa paggamit sa Pulong sa Diyos sa atong mga tigom, asembliya, ug kombensiyon?​—Neh. 8:12.

14. Sa unsang paagi ikapakita nato ang atong apresasyon sa Pulong ni Jehova?

¹⁴ Mapasalamaton gyod ta kang Jehova sa pagtagana sa iyang Pulong, ang Bibliya! Gawas nga iya ning gitagana para sa mga tawo, gituman sab niya ang iyang saad nga kini molahutay. (1 Ped. 1:24, 25) Maningkamot gyod tang regular nga basahon ang Pulong sa Diyos, ipadapat kini, ug gamiton aron tabangan ang uban. Sa paghimo niana, atong gipakita ang atong gugma ug apresasyon niining balaang bahandi ug sa Awtor niini​—si Jehova nga Diyos.