1. Unsang espesyal nga paagi nga gipaila ni Jehova ang iyang kaugalingon kang Moises, ug nganong makapatandog kini?

SA USA ka higayon, nagpaila ang Diyos kang Moises pinaagi sa pagpahayag sa Iyang kaugalingong ngalan ug mga hiyas. Ang iyang unang gihisgotan mao ang pagkamaluluy-on ug pagkamabination [o, pagkamapuangoron]. (Basaha ang Exodo 34:5-7.) Puwede untang ipasiugda ni Jehova ang iyang gahom ug kaalam. Pero, ngadto kang Moises, kinsa nangayog pasalig sa tabang sa Diyos, gipasiugda hinuon ni Jehova ang iyang pagkaandam nga motabang sa iyang mga alagad. (Ex. 33:13) Seguradong matandog gyod ka nga giuna paghisgot ni Jehova kana nga mga hiyas. Kining artikuloha magpokus sa hiyas nga pagkamabination​—ang pagsimpatiya sa pag-antos o kagul-anan sa uban ug ang pagtinguha nga motabang.

2, 3. (a) Unsay nagpakita nga natural sa tawo ang pagkamabination? (b) Nganong angay kang mainteres sa giingon sa Bibliya bahin sa pagkamabination?

² Ang mga tawo gihimo sumala sa larawan sa mabinationg Diyos nga si Jehova. Busa, natural sa tawo nga hunahunaon ang kaayohan sa uban. Bisan kadtong wala makaila sa Diyos sagad magpakita  gihapog pagkamabination. (Gen. 1:27) Atong makita diha sa Bibliya ang daghang estorya nga nagpasiugda sa pagkamabination. Hinumdomi ang estorya sa duha ka pampam (prostitute) nga naglalis atubangan ni Solomon kon kinsa kanila ang tinuod nga inahan sa bata. Aron testingan sila, si Solomon nagsugo nga pikason ang bata. Kay naluoy ang tinuod nga inahan, gipalabi niya nga ihatag na lang ang bata sa laing pampam. (1 Hari 3:23-27) Hinumdomi sab ang anak nga babaye ni Paraon kinsa nagluwas sa batang si Moises. Bisag nahibalo siya nga ang bata usa ka Hebreohanon ug kinahanglang patyon, “siya naluoy kaniya” ug midesisyon sa pagpadako sa bata ingong iyang anak.​—Ex. 2:5, 6.

³ Nganong kinahanglan pa natong tun-an ang pagkamabination? Kay ang Bibliya nagdasig nimo sa pagsundog kang Jehova. (Efe. 5:1) Pero, bisag gihimo ta uban ang pagkamabination, duna tay tendensiya nga maghunahuna lang sa kaugalingon tungod sa atong pagkadili-hingpit ingong kaliwat ni Adan. Usahay malisdan ta sa pagdesisyon kon tabangan ba nato ang uban o magpokus lang sa kaugalingon. Daghan ang padayong nalisdan sa pagbalanse kon unsay angayng buhaton. Unsay makatabang nimo aron mahimong mabination ug magmahunahunaon sa kaayohan sa uban? Una, gahinig panahon ang pagtuon kon giunsa pagpakita ni Jehova ug sa uban ang pagkamabination. Ikaduha, konsideraha kon unsaon nimo pagsundog ang Diyos ug kon nganong makabenepisyo ka sa pagbuhat niana.

4. (a) Nganong nagpadala si Jehova ug mga anghel didto sa Sodoma? (b) Unsay atong makat-onan sa estorya bahin kang Lot ug sa iyang mga anak?

⁴ Mabasa nato ang daghang estorya nga nagpakita sa pagkamabination ni Jehova. Hunahunaa ang gibuhat sa Diyos kang Lot. Ang matarong nga si Lot “naguol pag-ayo” tungod sa makauulawng panggawi sa mga taga-Sodoma ug Gomora. Oo, gihukman sa Diyos nga angayng mamatay ang maong imoral nga mga tawo. (2 Ped. 2:7, 8) Nagpadala ang Diyos ug mga anghel sa pagluwas kang Lot. Ilang gihangyo si Lot ug ang iyang pamilya sa pagbiya sa gihukmang siyudad. “Sa dihang siya nagpadayon sa paglanganlangan, tungod sa kaluoy ni Jehova kaniya, ang mga [anghel] naghawid sa iyang kamot ug sa kamot sa iyang asawa ug sa mga kamot sa iyang duha ka anak nga babaye ug ilang gidala siya sa gawas ug gipahimutang sa gawas sa siyudad.” (Gen. 19:16) Kini nga pananglitan nagpakita nga nahibalo gyod si Jehova sa lisod nga mga situwasyon nga maatubang usahay sa iyang matinumanong katawhan.​—Isa. 63:7-9; Sant. 5:11; 2 Ped. 2:9.

5. Sa unsang paagi ang Pulong sa Diyos, sama sa 1 Juan 3:17, magtudlo nato sa pagkamabination?

⁵ Wala lang nagpakita si Jehova ug pagkamabination, gitudloan sab niya ang iyang katawhan nga angayng ipakita kini nga hiyas. Konsideraha ang balaod nga gihatag sa Israel maylabot sa pagkuha sa sinina sa tawo ingong garantiya sa utang. (Basaha ang Exodo 22:26, 27.) Ang way kaluoy nga tigpahulam lagmit maaghat sa pagkuha sa sinina sa nakautang, ug pasagdan kini nga matulog nga walay ikasul-ob. Pero, gitudloan ni Jehova ang iyang katawhan nga likayan kining dili mabinationg buhat. Kinahanglang magmabination ang iyang katawhan. Dili ba angay sab natong sundon ang prinsipyo sa maong balaod? Pasagdan ba nato ang atong mga igsoon nga matugnawan, ingnon ta, bisag duna tay mahimo aron matabangan sila sa ilang pag-antos?​—Col. 3:12; Sant. 2:15, 16; basaha ang 1 Juan 3:17.

6. Unsay atong makat-onan sa pagkamabination ni Jehova sa makasasalang mga Israelinhon?

 ⁶ Si Jehova nagmabination sa Israel bisag dihang nakasala kini. Atong mabasa: “Si Jehova nga Diyos sa ilang mga katigulangan nagpadayon pagpadala [o, pagpasidaan] batok kanila pinaagi sa iyang mga mensahero, sublisubling nagpadala [o, nagpasidaan], tungod kay siya naluoy sa iyang katawhan ug sa iyang puloy-anan.” (2 Cron. 36:15) Dili ba angay sab tang magmabination sa mga tawo nga posible pang maghinulsol ug makaangkon sa pabor sa Diyos? Dili gusto ni Jehova nga may mamatay sa umaabot nga paghukom. (2 Ped. 3:9) Busa samtang dili pa laglagon ang mga daotan, padayon natong isangyaw ang maluluy-ong pasidaan sa Diyos.

7, 8. Nganong nakaingon ang usa ka pamilya nga si Jehova nagmabination kanila?

⁷ Daghang eksperyensiya ang nagpakita sa pagkamabination sa Diyos. Konsideraha ang nahitabo sa pamilya sa 12 anyos nga atong nganlag Milan. Panahon kadto sa panag-away sa mga rasa niadtong mga 1990. Si Milan, iyang manghod nga lalaki, ginikanan, ug pipila ka Saksi nagsakayg bus gikan sa Bosnia paingon sa Serbia. Padulong sila sa kombensiyon diin bawtismohan ang iyang ginikanan. Pero diha sa utlanan (border), siya uban sa iyang pamilya gipakanaog sa mga sundalo tungod sa ilang rasa; pero ang ubang igsoon gipalahos. Human sa duha ka adlawng pagkatanggong, gitawgan sa polis ang iyang dakodako kon unsay ilang himoon sa pamilya ni Milan. Ang polis nga nanawag naa ra sa atubangan sa pamilya, maong nadungog nila ang tubag, “Dad-a sila sa gawas ug pamusila!”

⁸ Samtang nakig-estorya ang polis sa iyang mga sakop, duha ka lalaki ang miduol sa pamilya ug mihunghong nga nagpailang mga Saksi sila. Nahibal-an nila ang nahitabo gikan sa ubang igsoon nga nakalahos. Giingnan sa duha ka lalaki si Milan ug ang iyang manghod nga mosakay sa ilang kotse aron makatabok sa border, kay dili na man susihon ang papeles sa mga bata. Dayon, gisugo sa duha ka lalaki ang ginikanan sa pagbaktas pagawas sa checkpoint sa border ug makigkita nila sa tabok. Naglibog si Milan kon mokatawa o mohilak ba siya sa giingon sa duha ka lalaki. Nangutana ang ginikanan, “Mosugot kaha nâ sila nga basta na lang tang manglakaw?” Pero, samtang nanglakaw sila, morag milapos ra ang panan-aw sa mga sundalo samtang nagtan-aw kanila. Ang ginikanan ug mga anak nagkauban pag-usab tabok sa border. Dayon, sila mitambong sa kombensiyon ug kombinsido nga gitubag ni Jehova ang ilang sinserong pag-ampo. Atong nakat-onan sa Bibliya nga may mga higayon diin dili direkta ang pagtabang ni Jehova sa iyang mga alagad. (Buh. 7:58-60) Pero si Milan miingon: “Morag gibutaan sa mga anghel ang mga sundalo ug giluwas mi ni Jehova.”​—Sal. 97:10.

9. Unsay gihimo ni Jesus sa makaluluoyng panon nga misunod kaniya? (Tan-awa ang hulagway sa sinugdan sa artikulo.)

⁹ Makakat-on sab ta kang Jesus. Nagmabination siya sa panon nga misunod niya, kay “sila pinanitan ug nagkatibuagsa sama sa mga karnero nga walay magbalantay.” Unsay iyang gihimo sa ilang makaluluoyng kahimtang? “Siya misugod sa pagtudlo kanila ug daghang butang.” (Mat. 9:36; basaha ang Marcos 6:34.) Lahi kaayo siya sa mga Pariseo, kinsa dili gustong motabang sa ordinaryong mga tawo. (Mat. 12:9-14; 23:4; Juan 7:49) Sama kang Jesus, gusto ba pod nimong tabangan ang mga tawong gigutom sa espirituwal?

10, 11. Angay ba tang magpakitag kaluoy sa tanang situwasyon? Ipatin-aw.

¹⁰ Hinuon, wala magpasabot nga angay  tang magpakitag pagkamabination, o kaluoy, sa tanang situwasyon. Base sa mga pananglitan sa Bibliya nga nahisgotan, balanse ang kaluoy nga gipakita sa Diyos. Pero, tungod sa kaluoy ni Haring Saul, gisupak niya ang sugo sa Diyos. Wala niya patya si Agag nga kaaway sa Diyos, ug wala niya patya ang kinamaayohang mga hayop. Tungod niini, gisalikway ni Jehova si Saul ingong hari sa Israel. (1 Sam. 15:3, 9, 15) Siyempre, si Jehova mao ang matarong nga Maghuhukom. Mabasa niya ang kasingkasing sa tawo ug nahibalo siya kon kinsay dili angayng kaluy-an. (Lam. 2:17; Ezeq. 5:11) Duol na ang panahon dihang ipahamtang niya ang paghukom niadtong tanan nga misupak niya. (2 Tes. 1:6-10) Dili nâ mao ang panahon nga maluoy siya niadtong gihukman niyang daotan. Hinuon, ang paglaglag kanila maoy pagpakitag hustong kaluoy sa Diyos ngadto sa mga matarong nga iyang luwason.

¹¹ Klaro, wala tay katungod nga hukman ang usa ka tawo kon malaglag ba siya o dili. Hinuon, kinahanglang buhaton nato ang tanan sa pagtabang sa mga tawo. Busa, unsaon nato pagpakitag kaluoy sa atong isigkatawo sa praktikal nga mga paagi? Konsideraha ang pipila ka sugyot.

12. Unsaon nimo pagpakitag pagkamabination sa uban?

¹² Pagtabang sa tanang higayon. Aron masundog si Jesus, kinahanglan tang magmabination sa mga igsoon ug sa uban. (Juan 13:34, 35; 1 Ped. 3:8) Ang usa ka kahulogan sa pagkamabination mao ang “pagduyog sa pag-antos sa uban.” Ang tawong mabination andam mohupay sa uban, lagmit pinaagi sa pagtabang sa ilang kalisdanan. Pangitag mga paagi nga mahimo kana! Pananglitan, matabangan ba nimo ang uban sa ilang trabahoon sa balay, tingali mag-grocery para nila?​—Mat. 7:12.

13. Unsang mga hiyas sa katawhan sa Diyos ang nakita sa daghan human sa katalagman?

¹³ Paghatag ug hinabang. Daghan ang naluoy tungod sa kalisdanan niadtong mga biktima sa kalamidad. Ilado ang katawhan ni Jehova sa pagtabang kon dunay katalagman. (1 Ped. 2:17) Sa Japan, usa ka sister ang nagpuyo sa lugar nga grabeng naigo sa linog ug tsunami niadtong 2011. Siya miingon nga  “nadasig ug nahupayan” gyod siya tungod sa paningkamot sa mga boluntaryo gikan sa ubang lugar sa Japan ug sa laing nasod aron ayohon ang nadaot nga mga balay ug Kingdom Hall. Siya misulat: “Kini nakatabang nako nga makita ang pagmahal ni Jehova. Ug ang mga igsoon naghunahuna sa usag usa. Giampo pod mi sa mga igsoon sa tibuok kalibotan.”

14. Unsaon nimo pagtabang ang mga masakiton ug tigulang?

¹⁴ Pagtabang sa mga masakiton ug tigulang. Dihang atong makita nga nag-antos ang uban tungod sa epekto sa sala ni Adan, mapalihok ta sa pagpakitag pagkamabination. Nangandoy gyod ta sa panahon nga wala nay masakit ug matigulang. Busa, mag-ampo ta nga moabot na ang Gingharian sa Diyos. Sa pagkakaron, buhaton nato ang tanan sa pagtabang niadtong nanginahanglan. Konsideraha ang gisulat sa usa ka awtor bahin sa iyang tigulang nga inahan nga naay Alzheimer’s disease. Kas-a, nahugaw ang sinina sa tigulang. Samtang gilabhan sa tigulang ang sinina, mitingog ang doorbell. Duha ka Saksi nga tigduawan sa tigulang ang miabot. Miingon ang mga sister kon may ikatabang ba sila. Ang tigulang mitubag: “Maulaw man ko, pero sige.” Gitabangan siya sa mga sister. Dayon gitimplahan nilag tsa ang tigulang ug nag-estoryahanay. Mapasalamaton gyod ang iyang anak. “Bilib kaayo ko sa mga Saksi,” miingon ang anak. “Ilang gipadapat ang ilang gitudlo.” Gihimo ba nimo ang tanan sa pagtabang sa mga masakiton ug tigulang aron mamenosan ang ilang pag-antos?​—Filip. 2:3, 4.

15. Unsay ikatabang sa atong buluhatong pagsangyaw?

¹⁵ Pagtabang sa espirituwal. Ang mga problema ug kabalaka sa mga tawo magpalihok nato nga tabangan sila sa espirituwal. Ang kinamaayohang paagi sa paghimo niana mao ang pagtudlo nila bahin sa Diyos ug kon unsay buhaton sa iyang Gingharian. Ang laing paagi mao ang pagtabang nila nga masabtan ang kaimportante sa pagkinabuhi subay sa sukdanan sa Diyos. (Isa. 48:17, 18) Mapauswag ba nimo ang imong ministeryo, ang buluhaton nga nagpasidungog kang Jehova ug nagpakitag pagkamabination?​—1 Tim. 2:3, 4.

16. Unsay benepisyo sa pagkamabination?

¹⁶ Ang mga eksperto miingon nga ang pagkamabination makaayo sa imong panglawas, pagkatawo, ug relasyon sa uban. Kon makatabang ka sa uban, mahimo kang mas malipayon, positibo, dili kaayo maguol, ug mas gamayg purohan nga maghunahunag negatibo. Oo, ang pagkamabination makaayo nimo. (Efe. 4:31, 32) Ang matinabangong mga Kristohanon nakatagamtam ug hinlong konsensiya, kay nasayod nga ilang gisunod ang mga prinsipyo sa Diyos. Ang pagkamabination makatabang aron mahimong mas maayong ginikanan, kapikas, ug higala. Mas dakog purohan sab nga tabangan sa uban kadtong kanunayng mabination.​—Basaha ang Mateo 5:7; Lucas 6:38.

17. Nganong gusto nimong makat-onan ug mapakita ang pagkamabination?

¹⁷ Ang mga benepisyo sa pagkamabination dili angayng mahimong pangunang rason sa imong pagkat-on niini. Ang pangunang rason mao nga gusto nimong sundogon ug himayaon ang Tuboran sa gugma ug pagkamabination, si Jehova nga Diyos. (Prov. 14:31) Kay siya ang kinamaayohang panig-ingnan, buhaton nato ang tanan sa pagsundog kaniya. Pinaagi sa pagkamabination, hinaot ipakita nato ang lalom nga pagbati sa mga igsoon ug buhaton nato ang maayo sa uban.​—Gal. 6:10; 1 Juan 4:16.