1. Unsang importanteng hiyas ang gihisgotan ni Jesus sa iyang kataposang gabii uban sa iyang mga tinun-an?

SA IYANG kataposang gabii uban sa iyang mga tinun-an, gihisgotan ni Jesus ang gugma halos 30 ka beses. Giingnan niya ang iyang mga tinun-an nga kinahanglang “maghigugmaay [sila] sa usag usa.” (Juan 15:12, 17) Mahimong talagsaon kaayo ang ilang gugma nga kini klarong magpaila nila ingong iyang tinuod nga mga sumusunod. (Juan 13:34, 35) Kini nga gugma dili kay pagbati lang. Gitumong ni Jesus dinhi ang kinamaayohang hiyas​—ang nagsakripisyo sa kaugalingon nga gugma. Siya miingon: “Walay usa nga may gugmang labaw pa kay niini, nga ang usa magtugyan sa iyang kalag alang sa iyang mga higala. Kamo akong mga higala kon inyong buhaton ang ginasugo ko kaninyo.”​—Juan 15:13, 14.

2. (a) Unsay atong makita diha sa mga alagad sa Diyos? (b) Unsang mga pangutana ang atong tubagon niining artikuloha?

² Ang mga alagad ni Jehova karon nailhan sa ilang tinuod, nagsakripisyo sa kaugalingon nga gugma ug dili mabungkag nga panaghiusa. (1 Juan 3:10, 11) Mapasalamaton gyod ta nga ang gugmang sama nianang kang Jesus makita diha sa mga alagad  ni Jehova bisag unsay rasa, tribo, pinulongan, o kagikan! Pero, makapangutana tingali ta: ‘Nganong importante kaayo ang gugma karon? Giunsa ta pagpalig-on ni Jehova ug Jesus pinaagi sa gugma? Unsaon nato pagpakita ang gugma nga “nagapalig-on”?’​—1 Cor. 8:1.

3. Sa unsang paagi naapektohan ang mga tawo sa ‘makuyaw nga mga panahon’?

³ Kay ang kinabuhi puno sa “kasamok ug sa mga butang makapadaot,” daghan niining ‘makuyaw nga mga panahon’ ang nag-antos sa lainlaing kagrabehon sa kagul-anan. (Sal. 90:10; 2 Tim. 3:1-5) Daghan ang morag mosurender na. Gibanabana nga kapig 800,000 ka tawo ang maghikog kada tuig​—usa sa matag 40 segundos. Ikasubo nga gihimo sab nâ sa pipila ka igsoon.

4. Kinsa nga mga karakter sa Bibliya ang nagtinguhang mamatay?

⁴ Sa kapanahonan sa Bibliya, may pipila ka matinumanong alagad sa Diyos nga nabug-atan pag-ayo sa ilang mga problema ug gusto nang mamatay. Pananglitan, tungod sa grabeng kasakit, si Job miingon: “Gisalikway ko [ang akong kinabuhi]; hangtod sa panahong walay tino ako dili buot mabuhi.” (Job 7:16; 14:13) Si Jonas nadismayar pag-ayo nga siya miingon: “Karon, Oh Jehova, kuhaa, palihog, ang akong kalag gikan kanako, kay mas maayo pa nga ako mamatay kay sa ako mabuhi.” (Jon. 4:3) Dugang pa, dihay higayon nga nawad-ag paglaom ang matinumanong propeta nga si Elias maong mihangyo siya kang Jehova: “Igo na! Karon, Oh Jehova, kuhaa ang akong kalag.” (1 Hari 19:4) Bisan pa niana, gimahal ni Jehova ang maong maunongong mga alagad ug gusto niyang mabuhi sila. Imbes badlongon, gitabangan niya sila nga mawala ang ilang tinguha nga mamatay. Gipalig-on niya sila pinaagi sa gugma aron magmaunongon sila sa pag-alagad kaniya.

5. Nganong ang mga igsoon nagkinahanglan gyod karon sa atong gugma?

⁵ Bisan tingalig ang atong mga igsoon wala maghunahunang mosurender, daghan ang nagmagul-anon ug kinahanglang palig-onon pinaagi sa gugma. Ang pipila gilutos ug gibugalbugalan. Ang uban gisaway o gilibak diha sa ilang trabahoan. O kaha gikapoy sila tungod sa pag-obertaym o sa walay kahumanang mga deadline. Ang uban usab naluya tungod sa mga problema sa pamilya, tingali gilutos sa dili Saksing bana. Ingong resulta, daghan ang naluya sa pisikal ug emosyonal. Kinsay makatabang nila?

6. Giunsa pagpalig-on ni Jehova ang iyang mga alagad pinaagi sa gugma?

⁶ Si Jehova nagpalig-on sa iyang mga magsisimba pinaagi sa pagpasalig nila nga dili mapakyas ang iyang gugma. Seguradong nadasig ang matinumanong mga Israelinhon dihang giingnan sila ni Jehova: “Ikaw bililhon sa akong mga mata, ikaw giisip nga dungganon, ug ako nahigugma kanimo. . . . Ayaw kahadlok, kay ako uban kanimo”! (Isa. 43:4, 5) Ingong usa sa mga alagad ni Jehova, makaseguro ka nga gimahal ka niya pag-ayo. * Ang Pulong sa Diyos nagsaad niadtong nagsunod sa putling pagsimba: “Ingong Usa nga gamhanan, siya magaluwas. Siya magasadya tungod kanimo uban ang pagmaya.”​—Sof. 3:16, 17.

7. Sa unsang paagi ang gugma ni Jehova susama nianang sa nagpasusong inahan? (Tan-awa ang hulagway sa sinugdan sa artikulo.)

 ⁷ Bisag unsang kalisdanan ang atubangon sa iyang katawhan, si Jehova nagsaad nga lig-onon ug hupayon niya sila. “Sama sa usa ka bata magsuso ka ug kugoson ka niya ug hagwahagwaon. Sama sa anak nga lipayon sa iyang inahan, lipayon ko usab kamo.” (Isa. 66:12, 13, Ang Bag-ong Maayong Balita Biblia) Pagkamakapatandog nga esena​—usa ka mahigugmaong inahan nga nagkugos sa iyang gamayng bata o naghagwahagwa niini! Nianang paagiha giilustrar ni Jehova ang kadako sa iyang gugma alang sa iyang matuod nga mga magsisimba. Ayaw gyod pagduhaduha nga ikaw bililhon kaayo ug gimahal ni Jehova.​—Jer. 31:3.

8, 9. Giunsa ta pagpalig-on sa gugma ni Jesus?

⁸ Ang tinuod nga mga Kristohanon may rason sab nga madani sa gugma sa Diyos: Iyang “gihigugma pag-ayo . . . ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Pagkadako usab sa gugma nga gipakita ni Jesus sa paghatag sa iyang kinabuhi para nato! Ug ang maong gugma makapalig-on gyod nato! Ang Pulong sa Diyos nagsaad nga bisan ang ‘kasakitan o kagul-anan’ dili ‘makabulag nato gikan sa gugma sa Kristo.’​—Roma 8:35, 38, 39.

⁹ Dihang mag-atubang tag kalisdanan nga makapaluya sa pisikal, emosyonal, o espirituwal, ang kadako sa gugma ni Jesus makahatag natog kusog aron makalahutay. (Basaha ang 2 Corinto 5:14, 15.) Ang iyang gugma makapalig-on ug makatabang nato nga dili mosurender bisan pa sa kalisdanan sama sa mga katalagman, paglutos, pagkadismayar, o kabalaka.

10, 11. Kang kinsang responsibilidad ang pagpalig-on sa naluyang mga igsoon? Ipatin-aw.

¹⁰ Si Jehova naggamit usab sa kongregasyon sa pagpalig-on nato pinaagi sa gugma. Mabalosan nato ang iyang gugma kon atong higugmaon ug palig-onon ang mga igsoon sa espirituwal ug emosyonal  nga paagi. (1 Juan 4:19-21) Si apostol Pablo nag-awhag sa mga Kristohanon: “Magpadayon sa paghupay sa usag usa ug sa paglinig-onay sa usag usa, ingon gayod sa inyong ginabuhat.” (1 Tes. 5:11) Oo, ang tanan sa kongregasyon​—dili lang mga ansiyano​—makasundog kang Jehova ug Jesus pinaagi sa paghupay ug pagpalig-on sa mga igsoon.​—Basaha ang Roma 15:1, 2.

¹¹ Ang pipila diha sa kongregasyon nga may grabeng depresyon o kabalaka magkinahanglan tingalig tambal ug tabang sa doktor. (Luc. 5:31) Ang mga ansiyano ug ang uban diha sa kongregasyon nahibalo nga dili sila propesyonal nga mga doktor. Pero, may mahimo sila​—ang ‘paghupay sa magul-anong mga kalag, pagbulig sa mga maluya, ug pagpailob sa tanan.’ (1 Tes. 5:14) Ang tanang Kristohanon kinahanglang magpakitag mahigugmaong empatiya ug pailob, nga maghupay niadtong naluya. Imo bang gihupay ug gidasig ang mga igsoon? Mas epektibo nimo nang mahimo kon mahibalo ka kon unsaon nimo paghatag ang maong tabang.

12. Paghatag ug pananglitan sa usa nga napalig-on sa gugmang gipakita sa mga igsoon.

¹² Sa unsang paagi ang atong gugma makapalig-on niadtong may grabeng depresyon? “Usahay, maghunahuna kog hikog,” matod sa usa ka sister sa Europe. “Pero wala ko pasagdi sa mga igsoon sa among kongregasyon. Giluwas nila ang akong kinabuhi. Sila makapadasig ug mahigugmaon kaayo. Bisag pipila lang ang nahibalo nga may depresyon ko, pirme kong tabangan sa mga igsoon. Usa ka magtiayon ang samag espirituwal nga ginikanan nako. Ila kong atimanon ug tabangan, bisan tibuok adlaw ug gabii.” Tinuod, dili tanan ang makatabang nga sama niana. Pero ang atong kinasingkasing nga pagtabang dakog epekto sa mga igsoong may depresyon. *

13. Unsay kinahanglan natong buhaton aron mapalig-on ang uban?

¹³ Mahimong maayong mamiminaw. (Sant. 1:19) Ang pagpaminaw nga may empatiya maoy pagpakitag gugma. Puwede kang mangutana sa mataktikanhon ug mabinationg paagi aron masabtan ang gibati sa usa nga naluya. Dayon, makapakita kag empatiya ug mapalig-on nimo ang imong igsoon. Ipakita diha sa ekspresyon sa imong nawong ang imong pagkasinsero ug gugma. Dihang kinahanglan niyang idetalye ang iyang gibati, magmapailobon ug ayawg sagbat. Kon maminaw ka pag-ayo, lagmit mas masabtan nimo ang iyang gibati. Unya ang maong igsoon mosalig na nimo ug mas andam mamati sa imong isulti. Dihang ipakita nimo nga gusto nimo siyang tabangan, mahupay gyod siya.

14. Nganong likayan nato ang pagkahinawayon?

¹⁴ Likayi ang pagkahinawayon. Kon hinawayon ta niadtong may depresyon, mosamot ang ilang gibati ug malisdan ta sa pagpalig-on nila pinaagi sa gugma. “Adunay nagapamulong nga walay paghunahuna sama sa mga dunggab sa espada, apan ang dila sa mga maalamon makaayo.” (Prov. 12:18) Siyempre, dili nato tuyo nga ‘dunggabon,’ ingnon ta, ang na-depress nga igsoon pinaagig sakit nga sinultihan. Pero bisag wala tuyoa, masakitan gihapon siya. Aron mapalig-on ug madasig  ang igsoon, kinahanglan tang magpakitag empatiya, nga ibutang nato ang kaugalingon sa iyang kahimtang kutob sa mahimo.​—Mat. 7:12.

15. Unsang bililhong tabang ang atong magamit sa pagpalig-on sa uban?

¹⁵ Hupaya ang uban pinaagi sa Pulong sa Diyos. (Basaha ang Roma 15:4, 5.) Ang Balaang Kasulatan maoy tuboran sa paghupay. Kini naggikan sa “Diyos nga naghatag ug pag-antos [o, paglahutay] ug paghupay.” Gawas sa makapadasig nga mga teksto, daghan pod tag mga tabang sa pagtuon sa Bibliya. Magamit nato ang Watch Tower Publications Index ug ang Giya sa Pagpanukiduki Para sa mga Saksi ni Jehova. Makatabang ni nato sa pagpangitag makapalig-ong mga teksto ug publikasyon nga magamit nato sa paghupay ug pagdasig sa mga igsoon.

16. Unsang hiyasa ang atong gikinahanglan dihang magdasig sa igsoong na-depress?

¹⁶ Magmalumo. Kini maoy importanteng bahin sa dili-hakog nga gugma nga atong ipakita dihang dasigon ug palig-onon nato ang atong igsoon. Si Jehova mao “ang Amahan sa malumong mga kaluoy ug ang Diyos sa tanang paghupay,” ug siya may “malumong kaluoy” sa iyang mga alagad. (Basaha ang 2 Corinto 1:3-6; Luc. 1:78; Roma 15:13) Si Pablo naghatag ug maayong ehemplo niining bahina. Siya misulat: “Kami nahimong malumo sa inyong taliwala, sama sa usa ka nagpasusong inahan nga nagpangga sa iyang kaugalingong mga anak. Busa, kay may malumong pagmahal kaninyo, kami nahimuot nga ipaambit kaninyo, dili lamang ang maayong balita sa Diyos, kondili usab ang among kaugalingong mga kalag, tungod kay kamo nahimo man nga among hinigugma.” (1 Tes. 2:7, 8) Kon magmalumo ta, posibleng kita ang tubag sa pag-ampo sa igsoong na-depress.

17. Unsang realistikong panglantaw ang makatabang nato sa pagpalig-on sa atong mga igsoon?

¹⁷ Ayaw pagdahom ug kahingpitan sa mga igsoon. Magmarealistiko sa imong panglantaw sa mga igsoon. Kon dahomon nimo nga dili masayop ang mga igsoon, madismayar gyod ka. (Eccl. 7:21, 22) Hinumdomi, si Jehova realistiko sa gidahom niya sa iyang mga alagad. Kon sundogon nato siya, makapailob ta sa kasaypanan sa uban. (Efe. 4:2, 32) Dili nato gustong mobati sila nga kulang ang ilang paningkamot. Hinuon, komendahan nato sila sa ilang nahimo. Makadasig nâ nila. Ang sinserong komendasyon makapalig-on sa uban ug makatabang nila nga magmalipayon sa ilang pag-alagad. Mas maayong buhaton nato nâ imbes itandi sila sa uban.​—Gal. 6:4.

18. Nganong angay natong palig-onon ang uban?

¹⁸ Ang tanang karnero ni Jehova bililhon kaayo kaniya ug kang Jesus, kinsa nagtagana sa halad lukat. (Gal. 2:20) Gimahal nato pag-ayo ang mga igsoon. Ug gusto natong trataron sila sa malumo ug mahigugmaong paagi. Aron makapadasig ta, “atong tinguhaon ang mga butang nga mopatunghag pakigdait ug ang mga butang nga makapalig-on sa usag usa.” (Roma 14:19) Nagpaabot ta sa panahon dihang, sa umaabot nga Paraiso, wala na gyoy rason nga madismayar ta! Wala nay sakit, gubat, napanunod nga kamatayon, paglutos, problema sa pamilya, ug kapakyasan. Human sa usa ka libo ka tuig, hingpit na ang katawhan. Unya, kadtong makapasar sa kataposang pagsulay sagopon ni Jehova ingong yutan-ong mga anak ug makabaton sa “mahimayaong kagawasan sa mga anak sa Diyos.” (Roma 8:21) Hinaot padayon natong ipakita ang gugma nga makapalig-on ug tabangan ang usag usa nga madawat kanang makapalipayng panalangin.