1, 2. (a) Nganong lahi si Jehova sa gamhanang mga tawo karon? (b) Unsay atong hisgotan niining artikuloha?

ANG mga tawong gamhanan ug impluwensiyal sagad “mahariharion,” daogdaogan pa gani. (Mat. 20:25; Eccl. 8:9) Lahi kaayo sila kang Jehova! Bisag siya ang Labing Gamhanan, walay makalabaw niya sa pagpakitag konsiderasyon sa dili hingpit nga mga tawo. Siya buotan ug mahunahunaon. May pagtagad siya sa atong pagbati ug mga panginahanglan. Kay “nahinumdom nga kita abog,” wala siya mangayog labaw kay sa atong mahatag.​—Sal. 103:13, 14.

² Ang Bibliya may daghang ehemplo sa pagpakita ni Jehova ug konsiderasyon sa iyang mga alagad. Maghisgot tag tulo. Una, ang pagkamahunahunaon sa Diyos dihang iyang gitabangan si Samuel sa pagdalag mensahe sa paghukom sa Hataas nga Saserdoteng si Eli; ikaduha, ang pagpailob ni Jehova dihang dili mosugot si Moises nga manguna sa mga Israelinhon; ug ikatulo, ang pagpakita sa Diyos ug konsiderasyon sa mga Israelinhon dihang mibiya sila sa Ehipto. Samtang ato ning hisgotan, tan-awon nato kon unsay  atong makat-onan bahin kang Jehova ug kon unsaon kini pagpadapat.

3. Unsay talagsaong nahitabo kang Samuel usa ka gabii niana, ug unsay atong ikapangutana? (Tan-awa ang hulagway sa sinugdan sa artikulo.)

³ Si Samuel “nag-alagad kang Jehova” sa tabernakulo sukad sa pagkabata. (1 Sam. 3:1) Usa ka gabii niana, dihang nakatulog na si Samuel, dihay talagsaong panghitabo. * (Basaha ang 1 Samuel 3:2-10.) Nakadungog siyag tingog nga nagtawag niya. Abi niyag ang Hataas nga Saserdoteng si Eli ang nagtawag, busa midagan siya ngadto kang Eli ug miingon: “Ania ako, kay ikaw nagtawag kanako.” Si Eli mitubag: “Wala ako magtawag.” Dihang kaduha pa to nahitabo, naamgohan ni Eli nga ang Diyos maoy nagtawag kang Samuel. Busa giingnan niya ang bata kon unsaon pagtubag, ug misunod si Samuel. Nganong wala dayon magpaila si Jehova kang Samuel pinaagi sa iyang anghel? Walay giingon ang Bibliya, pero posibleng gihimo to ni Jehova aron pakitaag konsiderasyon ang batang si Samuel. Sa unsang paagi?

4, 5. (a) Unsay reaksiyon ni Samuel sa gisugo sa Diyos niya, ug unsay nahitabo pagkabuntag? (b) Unsay atong makat-onan niini nga estorya bahin kang Jehova?

⁴ Basaha ang 1 Samuel 3:11-18. Ang Balaod ni Jehova nagsugo sa mga anak nga tahoron ang mga tigulang, ilabina kadtong may awtoridad. (Ex. 22:28; Lev. 19:32) Moadto kaha si Samuel kang Eli pagkabuntag ug maisogong isulti kaniya ang bug-at nga mensahe sa paghukom sa Diyos? Siyempre dili! Gani, ang Bibliya nag-ingon nga “nahadlok si Samuel nga isulti kang Eli” ang bahin sa panan-awon. Pero, giklaro sa Diyos kang Eli nga Iyang gitawag si Samuel. Tungod niana, giingnan dayon ni Eli si Samuel: “[Ayaw] ililong . . . kanako ang usa ka pulong sa tanang pulong nga iyang gisulti kanimo.” Misunod si Samuel ug ‘gisugilon kaniya ang tanan.’

⁵ Wala kaayo masorpresa si Eli sa mensahe ni Samuel kay parehas ni sa giingon sa wala nganling “tawo sa Diyos” nga nakig-estorya sa hataas nga saserdote unâ pa niana. (1 Sam. 2:27-36) Kini nga estorya bahin kang Samuel ug Eli nagpakita nga si Jehova maalamon ug nagpakitag konsiderasyon.

6. Unsay atong makat-onan sa pagtabang sa Diyos sa batang si Samuel?

⁶ Bata pa ba ka? Kon oo, ang estorya bahin kang Samuel nagpakita nga nakasabot si Jehova sa imong mga problema ug gibati. Tingali maulawon ka ug maglisod pagsangyaw sa mga edaran o sa pagpabiling lahi sa imong mga kaedad. Magmasaligon nga gusto kang tabangan ni Jehova. Busa pag-ampo niya ug isulti kon unsa gyoy imong gibati. (Sal. 62:8) Pamalandonga ang mga ehemplo sa Bibliya sama kang Samuel. Ug pakig-estorya sa mga igsoon​—bata o tigulang—​nga lagmit milampos sa pag-atubang sa mga problema nga sama sa imoha. Tingali ilang isulti nimo kon kapila na sila tabangi ni Jehova, lagmit sa mga paaging wala nila damha.

7, 8. Giunsa pagpakita ni Jehova ang iyang talagsaong konsiderasyon kang Moises?

⁷ Dihang 80 anyos na si Moises, gihatagan siya ni Jehova ug lisod kaayong asaynment. Kinahanglang luwason ni Moises ang Israel gikan sa pagkabihag sa Ehipto. (Ex. 3:10) Kay nahimong magbalantay ug karnero sa Midian sulod sa 40 ka tuig, seguradong nakurat siya sa maong asaynment. Siya miingon: “Kinsa ba ako aron ako moadto kang  Paraon ug aron akong pagawason ang mga anak sa Israel gikan sa Ehipto?” Pero gipasaligan siya sa Diyos: “Ako magauban kanimo.” (Ex. 3:11, 12) Gisaaran pod siya: Ang mga ansiyano sa Israel “mamati gayod sa imong tingog.” Bisan pa niana, si Moises mitubag: “Pananglit sila . . . dili mamati sa akong tingog.” (Ex. 3:18; 4:1) Morag gisupak ni Moises ang giingon sa Diyos! Pero nagpailob gihapon si Jehova. Gani, mibuhat siyag labaw pa. Gihatagan niyag gahom si Moises sa paghimog mga milagro. Tungod niana, si Moises ang unang tawo nga narekord sa Bibliya nga gihatagan niana nga gahom.​—Ex. 4:2-9, 21.

⁸ Nangita na pog rason si Moises​—dili kuno siya maayong manulti. Busa, giingnan siya sa Diyos: “Ako magauban sa imong baba ug ako magtudlo kanimo sa angay nimong isulti.” Nakombinsir na ba si Moises? Wala pa gyod, kay gihangyo niya ang Diyos nga magpadala na lag lain. Nianang tungora, nasuko na si Jehova. Pero nagpakita gihapon siyag konsiderasyon sa pagbati ni Moises, ug nagtudlo kang Aaron ingong tigpamaba ni Moises.​—Ex. 4:10-16.

9. Sa unsang paagi ang pailob ug pagpakitag konsiderasyon ni Jehova nakatabang kang Moises?

⁹ Unsay gitudlo niini bahin kang Jehova? Ingong Labing Gamhanang Diyos, puwede unta niyang hadlokon si Moises aron motuman dayon. Pero, si Jehova mapailobon ug buotan, nga nagdasig sa iyang makasaranganon ug mapaubsanong alagad. Milampos ba ang iyang paagi? Oo! Si Moises nahimong maayong lider nga nagpakitag kalumo ug konsiderasyon sama kang Jehova.​—Num. 12:3.

10. Unsay kaayohan kon atong sundogon ang pagpakitag konsiderasyon ni Jehova?

¹⁰ Mga leksiyon nga atong mapadapat: Ikaw ba bana, ginikanan, o ansiyano? Kon oo, naa kay awtoridad. Busa, importante gyong sundogon nimo ang pagpakitag konsiderasyon, pagkabuotan, ug pagpailob ni Jehova sa imong pagtratar niadtong ilalom sa imong awtoridad. (Col. 3:19-21; 1 Ped. 5:1-3) Kon maningkamot ka sa pagsundog  kang Jehova ug sa Dakong Moises, si Jesu-Kristo, dali kang duolon ug makapadasig ka sa uban. (Mat. 11:28, 29) Mahimo pod kang maayong ehemplo.​—Heb. 13:7.

11, 12. Dihang gigiyahan ni Jehova ang mga Israelinhon sa pagbiya sa Ehipto, unsay iyang gihimo aron mobati silang luwas?

¹¹ Dihang mibiya ang mga Israelinhon sa Ehipto niadtong 1513 B.C.E., tingali miabot silag kapin sa tulo ka milyon. Niining tulo o upat ka henerasyon, may mga bata, tigulang, ug seguradong diha poy mga masakiton o baldado. Aron magiyahan ang ingon ka daghan sa pagbiya sa Ehipto, seguradong gikinahanglan ang masinabtanon ug mahunahunaong Lider. Klarong gipakita nâ ni Jehova pinaagi kang Moises. Tungod niana, mibating luwas ang mga Israelinhon dihang mibiya sila sa ilang pinuy-anan.​—Sal. 78:52, 53.

¹² Unsay gihimo ni Jehova aron mobating luwas ang iyang katawhan? Una, gigiyahan niya sila sa pagbiya sa Ehipto sa organisado kaayong paagi, nga samag “nahan-ay alang sa gubat.” (Ex. 13:18) Seguradong nagpasalig nâ sa mga Israelinhon nga kontrolado sa Diyos ang situwasyon. Gipakita pod ni Jehova ang iyang presensiya pinaagi sa “usa ka panganod sa maadlaw ug . . . kahayag sa kalayo” sa gabii. (Sal. 78:14) Sama rag miingon si Jehova: “Ayawg kahadlok. Ubanan ta mo aron giyahan ug proteksiyonan.” Ug wala madugay human niana, gikinahanglan nila ang maong pasalig!

13, 14. (a) Giunsa pagpakita ni Jehova ang iyang konsiderasyon sa mga Israelinhon didto sa Pulang Dagat? (b) Giunsa pagpakita ni Jehova nga mas gamhanan siya kay sa mga Ehiptohanon?

¹³ Basaha ang Exodo 14:19-22. Hunahunaang tua ka didto​—nagsunod nimo ang kasundalohan sa Paraon ug naa sa imong atubangan ang Pulang Dagat. Dayon, may gibuhat ang Diyos. Ang haligi nga panganod mibalhin sa likod, nga nagbabag sa mga Ehiptohanon. Tungod niana, ngitngit na sa ilang kampo pero sa inyo puno sa milagrosong kahayag! Dayon imong nakita si Moises nga nag-isa sa iyang kamot ibabaw sa dagat, ug ang kusog nga hanging sidlakan nagtunga sa dagat. Sa organisadong paagi, ikaw, ang imong pamilya, ug ang imong mga hayop naglakaw sa salog sa dagat kauban ang ubang katawhan. Dayon, may namatikdan kang talagsaon. Ang salog sa dagat dili lapokon o danlog; kini uga ug bantok, busa sayon rang lakwan. Tungod niana, bisan ang kinahinayang molakaw luwas nga nakatabok.

¹⁴ Basaha ang Exodo 14:23, 26-30. Sa kasamtangan, ang hambogiro ug buangbuang nga Paraon nagdalidali sa paggukod ninyo sa dagat. Giisa na sab ni Moises ang iyang kamot ibabaw sa dagat. Niining tungora, ang duha ka nanibuok nga paril sa tubig nahugno. Sama kinig duha ka tsunami nga nagbangga. Ang Paraon ug ang iyang kasundalohan nangamatay!​—Ex. 15:8-10.

15. Unsay atong makat-onan niini nga estorya bahin kang Jehova?

¹⁵ Atong nakat-onan niining estoryaha nga si Jehova maoy Diyos nga organisado​—usa ka hiyas nga makapabati natong luwas. (1 Cor. 14:33) Gipakita pod ni Jehova nga siya usa ka mahigugmaong magbalantay nga nag-atiman sa iyang katawhan sa praktikal nga mga paagi. Mapinanggaon niya silang gigakos, nga nanalipod nila batok sa ilang mga kaaway. Pagkanindot niini nga pasalig kanato samtang nagkaduol ang kataposan niining sistemaha sa mga butang!​—Prov. 1:33.

16. Unsay kaayohan kon atong hinumdoman ang pagluwas ni Jehova sa mga Israelinhon?

¹⁶ Karon, giatiman pod ni Jehova ang iyang katawhan ingong grupo​—sa espirituwal  ug pisikal nga paagi. Ug padayon niya nang himoon sa nagkaduol nga dakong kasakitan. (Pin. 7:9, 10) Busa, bata man o tigulang, himsog o baldado, ang katawhan sa Diyos dili mahadlok panahon sa dakong kasakitan. * Gani, lahi kaayo ang ilang himoon! Ilang hinumdoman ang gisulti ni Jesu-Kristo: “Tindog nga tul-id ug ihangad ang inyong mga ulo, tungod kay ang inyong kaluwasan nagakaduol na.” (Luc. 21:28) Magmasaligon sila bisag moatake na ang Gog​—ang alyansa sa kanasoran nga mas gamhanan kay sa Paraon. (Ezeq. 38:2, 14-16) Nganong magmasaligon ang katawhan sa Diyos? Tungod kay nahibalo sila nga dili mausab si Jehova. Pamatud-an na pod niya nga siya Manluluwas nga mahigugmaon ug nagpakitag konsiderasyon.​—Isa. 26:3, 20.

17. (a) Sa unsang paagi makabenepisyo ta sa mga estorya sa Bibliya bahin sa pag-atiman ni Jehova sa iyang katawhan? (b) Unsay atong hisgotan sa sunod nga artikulo?

¹⁷ Niining artikuloha, atong nahisgotan ang pipila lang sa mga pananglitan nga si Jehova mahunahunaong nag-atiman, naggiya, ug nagluwas sa iyang katawhan. Samtang imong pamalandongon ang maong mga estorya, hunahunaa ang mga detalye bahin sa mga hiyas ni Jehova nga wala kaayo nimo mamatikdi sa una. Kon imo nang buhaton, mas matisok sa imong hunahuna ug kasingkasing ang maong nindot nga mga hiyas, ug modako ang imong gugma ug pagtuo sa Diyos. Atong hisgotan sa sunod nga artikulo ang mga paagi nga masundog nato si Jehova sa pagpakitag konsiderasyon sa uban. Magpokus ta sa pamilya, kongregasyon, ug sa ministeryo.