1. Giunsa pagpakita sa katawhan sa Diyos nga nahigugma sila sa usag usa?

ANG katawhan sa Diyos maoy usa ka espirituwal nga pamilya nga nahigugma sa usag usa. (1 Juan 4:16, 21) Usahay mohimo silag dagkong sakripisyo para sa mga igsoon. Pero, sagad gipakita nila ang ilang gugma sa ginagmayng paagi, sama sa mahunahunaong mga pulong ug maayong mga buhat. Kon magpakita tag kaayo ug konsiderasyon, kita “mahimong mga tigsundog sa Diyos, ingon nga hinigugmang mga anak.”​—Efe. 5:1.

2. Giunsa pagsundog ni Jesus ang gugma sa Diyos?

² Si Jesus hingpit nga nagsundog sa iyang Amahan. Siya miingon: “Umari kanako, kamong tanang nabudlayan ug nabug-atan, ug ako magapalagsik kaninyo . . . , kay ako malumog-buot ug mapainubsanon sa kasingkasing.” (Mat. 11:28, 29) Kon sundogon nato ang Kristo pinaagi sa “pagkamahunahunaon [o, pagpakitag konsiderasyon] sa timawa,” malipay ang atong langitnong Amahan ug malipay sab ta. (Sal. 41:1) Tan-awon nato kon unsaon pagpakitag konsiderasyon diha sa pamilya, kongregasyon, ug sa ministeryo.

3. Unsaon pagpakita sa bana nga siya may pagsabot ug konsiderasyon sa iyang asawa? (Tan-awa ang hulagway sa sinugdan sa artikulo.)

³ Ang mga bana angayng manguna sa pagpakitag konsiderasyon sa ilang pamilya. (Efe. 5:25; 6:4) Pananglitan, giawhag sila sa pagtratar sa ilang asawa “sumala sa kahibalo”​—nga mahimong magpasabot ug “pagpakita kanilag konsiderasyon; pagsabot kanila.” (1 Ped. 3:7) Dili puwedeng magbulag ang pagsabot ug konsiderasyon. Pananglitan, ang bana nga masinaboton nahibalo nga ang iyang asawa, ingong iyang katimbang, lahi kaniya sa daghang paagi, pero dili gyod siya ubos. (Gen. 2:18) Busa ang bana magmahunahunaon sa pagbati sa iyang asawa, nga pakitaan kinig dignidad ug pasidungog. Usa ka asawa sa Canada ang miingon bahin sa iyang bana: “Dili gyod niya pakamenoson ang akong pagbati o moingong, ‘Di ka angayng mobatig ingon ana.’ Maayo sab siya nga tigpaminaw. Dihang tabangan ko niya sa pag-adyas sa akong panglantaw, buhaton niya kini nga may kalumo.”

4. Unsaon pagpakita sa bana ug konsiderasyon sa iyang asawa diha sa pagpakiglabot niya sa ubang babaye?

⁴ Ang banang mahunahunaon magpakita sab ug konsiderasyon sa pagbati sa iyang asawa dihang makiglabot sa ubang babaye. Dili siya mo-flirt o magpakitag dili haom nga interes kanila; dili pod nâ niya buhaton diha sa social media o sa Internet. (Job 31:1) Oo, magmaunongon siya sa iyang asawa, dili lang tungod kay nahigugma siya niini kondili kay nahigugma siya sa Diyos ug nagdumot sa pagkadaotan.​—Basaha ang Salmo 19:14; 97:10.

5. Unsaon pagpakita sa asawa ug konsiderasyon sa iyang bana?

⁵ Dihang sundogon sa bana ang iyang ulo, si Jesu-Kristo, gitabangan niya ang iyang asawa sa pag-ugmad ug “halawom nga pagtahod” kaniya. (Efe. 5:22-25, 33) Ug kon motahod niya ang iyang asawa, magpakita sab nig konsiderasyon niya. Sama pananglitan dihang puliki siya sa mga buluhaton sa kongregasyon o may mga problemang giatubang. Usa ka bana sa Britain miingon: “Usahay, mamatikdan sa akong asawa nga may nakahasol sa akong hunahuna. Iyang ipadapat ang prinsipyo sa Proverbio 20:5, bisan pag nagpasabot ni nga maghulat siya sa hustong panahon sa ‘pagtimba’ sa akong gihunahuna kon puwede ni nakong iestorya niya.”

6. Sa unsang paagi kitang tanan makadasig sa mga bata sa pagpakitag konsiderasyon, ug unsay kaayohan niini sa mga bata?

⁶ Dihang ang mga ginikanan magpakitag konsiderasyon sa usag usa, naghatag silag maayong ehemplo sa ilang mga anak. Siyempre, ang mga ginikanan ang dunay pangunang responsibilidad sa pagtudlo sa ilang mga anak kon unsaon pagpakitag konsiderasyon. Pananglitan, puwede silang tudloan nga dili magdagandagan sulod sa Kingdom Hall. Diha sa mga tapoktapok, mahimong sultian sila nga paunahon ang mga tigulang sa pagkuhag pagkaon. Siyempre, makatabang sa mga ginikanan ang tanang igsoon sa kongregasyon. Pananglitan, dihang magpakita ang bata ug pagkamahunahunaon​—pinaagi tingali sa pag-abli sa pultahan para nato—​angay nato siyang komendahan. Maayo nag epekto sa bata, ug makat-onan niya nga “adunay labaw nga kalipay sa paghatag kay sa pagdawat.”​—Buh. 20:35.

7. Giunsa pagpakita ni Jesus ang konsiderasyon sa tawong bungol, ug unsay atong makat-onan kaniya?

⁷ Dihang didto si Jesus sa Decapolis, ang mga tawo ‘nagdalag usa ka tawong bungol ug may babag sa pagsulti.’ (Mar. 7:31-35) Imbes ayohon siya atubangan sa mga tawo,  gidala siya ni Jesus sa unahan, nga layo nila, ug giayo siya. Ngano? Basig dili siya komportable atubangan sa mga tawo tungod sa iyang kahimtang. Seguradong nasabtan ni Jesus ang iyang pagbati, ug giayo siya nga sila rang duha. Siyempre, dili ta makahimog milagro. Pero puwede tang maghunahuna​—ug angayng maghunahuna​—sa panginahanglan ug pagbati sa atong mga igsoon. Si apostol Pablo misulat: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat.” (Heb. 10:24) Nasabtan ni Jesus ang gibati sa maong tawo ug gipakitaan siyag konsiderasyon. Maayo gyong sundogon si Jesus!

8, 9. Sa unsang paagi makapakita tag konsiderasyon sa mga tigulang ug maluya? (Paghatag ug mga pananglitan.)

⁸ Magpakitag konsiderasyon sa mga tigulang ug maluya. Ang timailhan sa kongregasyon dili ang kahanas, kondili ang gugma. (Juan 13:34, 35) Tungod sa maong gugma, andam tang mosakripisyo sa pagtabang sa mga tigulang ug maluya nga makatambong sa tigom ug makasangyaw. Buhaton nato nâ bisag limitado ra ang ilang mahimo. (Mat. 13:23) Si Michael, nga nag-wheelchair na lang, mapasalamaton kaayo sa tabang sa iyang pamilya ug sa mga igsoon sa iyang grupo sa pagsangyaw. Siya miingon: “Tungod sa ilang tabang, makatambong ko halos sa tanang tigom ug regular nga makasangyaw. Ilabinang nagustoan nako ang publikong pagsangyaw.”

⁹ Daghang puy-anang Bethel ang dunay tigulang ug luya nga mga igsoon. Ang mahigugmaong mga tigdumala nagpakitag konsiderasyon niining matinumanong mga alagad pinaagi sa paghimog kahikayan nga makasangyaw sila pinaagig sulat ug telepono. “Giapresyar namo ang pribilehiyo nga makahimog mga sulat,” matod ni Bill nga 86 anyos ug nagsulat sa mga tawo sa lisod adtoong mga lugar. Si Nancy, kinsa mag-90 anyos na, miingon bahin sa pagsulat: “Wala nako ni isipa ingong pagsulod lag sulat sa sobre. Pagsangyaw ni. Kinahanglang mahibalo ang mga tawo sa kamatuoran!” Si Ethel, nga natawo niadtong 1921, miingon: “Pirmeng magsakit akong lawas. Usahay, malisdan ko bisan sa pag-ilis lag sinina.” Bisan pa niana, ganahan siyang magsangyaw pinaagig telepono ug may regular nga mga balikduaw. Si Barbara, nga 85 anyos, miestorya: “Tungod sa akong sakit, malisdan ko sa paggawas sa kanataran nga regular. Pero pinaagi sa telepono makasangyaw ko. Salamat kaayo, Jehova!” Wala ray usa ka tuig, ang usa ka grupo sa minahal nga mga tigulang nakagahin ug 1,228 ka oras diha sa ministeryo, nakapadalag 6,265 ka sulat, nakahimog kapin sa 2,000 ka tawag sa telepono, ug nakapahimutang ug 6,315 ka publikasyon! Seguradong nakapalipay kang Jehova ang ilang paningkamot!​—Prov. 27:11.

10. Sa unsang paagi matabangan nato ang mga igsoon nga makabenepisyo sa mga tigom?

¹⁰ Magpakitag konsiderasyon diha sa mga tigom. Gusto nato nga ang mga igsoon makabenepisyo gyod sa mga tigom. Makatabang ta nila kon magpakita tag konsiderasyon. Sa unsang paagi? Ang usa ka paagi mao ang pagpaningkamot nga dili maulahi aron dili makabalda. Siyempre, malangan ta usahay tungod sa wala damhang mga panghitabo. Pero, kon pirme tang maulahi, angay natong hunahunaon kon unsay atong mahimo aron mas makapakitag konsiderasyon. Hinumdomi sab nga ang nag-imbitar nato mao si Jehova ug ang iyang Anak. (Mat. 18:20) Angay gyod nato silang tahoron!

11. Nganong kinahanglang ipadapat niadtong may mga bahin ang instruksiyon sa 1 Corinto 14:40?

¹¹ Ang pagpakita natog konsiderasyon sa mga igsoon nagpasabot sab ug pagsunod sa instruksiyon: “Himoa ang tanang butang nga may kahapsay ug pinaagig kahikayan.” (1 Cor. 14:40) Ang mga igsoon nga may bahin sa tigom nagsunod niana kon dili sila moobertaym. Nianang paagiha nagpakita silag  konsiderasyon dili lang sa sunod nga may bahin kondili sa tibuok kongregasyon usab. Ang pipila tingali kinahanglang mobiyaheg layo sa pagpauli. Ang uban nagdepende sa publikong transportasyon. Ug ang pipila may mga kapikas nga dili Saksi nga nagdahom nga makauli sila sa saktong oras.

12. Nganong ang kugihang mga ansiyano takos sa “labaw sa kasagaran nga pagtahod diha sa gugma”? (Tan-awa ang kahong “ Magpakitag Konsiderasyon sa mga Nagapanguna.”)

¹² Ang espirituwal nga mga magbalantay nga nagkugi diha sa kongregasyon ug madasigong nanguna sa ministeryo angay pong pakitaag labaw nga pagtahod o konsiderasyon. (Basaha ang 1 Tesalonica 5:12, 13.) Seguradong mapasalamaton ka sa ilang gihimo para nimo. Busa, ipakita nâ pinaagi sa imong kinabubut-ong pagkooperar ug pagtabang. Tungod kay “sila nagabantay sa [imong] kalag ingon nga sila maoy maghatag ug husay.”​—Heb. 13:7, 17.

13. Unsay atong makat-onan sa pagtratar ni Jesus sa mga tawo?

¹³ Si Isaias mitagna bahin kang Jesus: “Walay gupok nga tangbo nga iyang balion; ug kon bahin sa nag-awop nga pabilong lino, siya dili magpalong niini.” (Isa. 42:3) Tungod sa gugma ni Jesus sa katawhan, nagpakita siyag empatiya kanila. Nakasabot siya sa gibati niadtong samag gupok nga tangbo o pabilo sa lampara nga nag-awop na. Tungod ana, siya mahunahunaon, buotan, ug mapailobon. Bisan ang mga bata gustong moduol niya. (Mar. 10:14) Siyempre, dili ta makasabot o makatudlo sa mga tawo nga sama gyod kang Jesus! Pero puwede​—ug angay—​tang magpakitag konsiderasyon sa mga tawo sa atong teritoryo. Apil ana ang atong paagi sa pagpakigsulti, kon kanus-a ni buhaton, ug kon unsa ka dugay.

14. Nganong ilabinang mag-amping ta sa atong pagpakigsulti sa mga tawo?

 ¹⁴ Unsaon nato pagpakigsulti sa mga tawo? Karon, minilyon ang “pinanitan ug nagkatibuagsa” tungod sa korap ug way kasingkasing nga mga lider sa negosyo, politika, ug relihiyon. (Mat. 9:36) Ingong resulta, daghan ang nawad-ag pagsalig ug paglaom. Busa, importante gyod nga magpakita tag kaayo ug konsiderasyon diha sa atong isulti ug gikusgon sa tingog! Gani, daghan ang nadani sa atong mensahe dili lang tungod sa atong kahibalo sa Bibliya o pagkamaayong mangatarongan kondili tungod sa atong sinserong interes kanila ug pagkamahunahunaon.

15. Sa unsang praktikal nga mga paagi nga makapakita tag konsiderasyon sa atong sangyawan?

¹⁵ Daghang praktikal nga paagi sa pagpakitag konsiderasyon sa atong sangyawan. Pananglitan, dihang mangutana, himoon nato ni sa lumo ug matinahorong paagi. Usa ka payunir ang nag-alagad sa teritoryo diin daghan ang hilomon ug maulawon. Busa, gilikayan niya ang mga pangutana nga makapaulaw sa mga tawo. Apil niini ang mga pangutana nga dili tingali matubag sa gisangyawan o kaha sayop ang ilang tubag. Sama pananglitan sa mga pangutanang ‘Kabalo ka ba sa ngalan sa Diyos?’ o ‘Nahibalo ka ba kon unsa ang Gingharian sa Diyos?’ Hinunoa, moingon siya, “Akong nakat-onan sa Bibliya nga dunay ngalan ang Diyos. Puwede ba nako ning ipakita nimo?” Siyempre, magkalahi ang mga kultura ug mga tawo, busa puwedeng dili ni mohaom sa inyong lugar. Bisan pa niana, kinahanglang pirme tang magpakitag konsiderasyon ug pagtahod, ug nag-apil nâ sa pagkahimong pamilyar sa mga tawo sa atong teritoryo.

16, 17. Sa unsang paagi ang pagpakita natog konsiderasyon sa mga tawo makaapektar (a) sa panahon nga mobisita ta nila? (b) sa gidugayon sa atong pagpakig-estorya nila?

¹⁶ Kanus-a ta angayng moduaw sa mga tawo? Dihang mamalaybalay ta, wala magdahom ang mga tawo sa atong pagbisita. Busa, importante nga mobisita ta sa panahon nga mas andam silang makig-estorya! (Mat. 7:12) Pananglitan, ang mga tawo ba sa inyong teritoryo dugay mangmata kon Sabado ug Dominggo? Kon mao, puwede kang magsangyaw unâ sa kadalanan, mag-cart, o mobalikduaw sa mga tawo nga kabalo kang nagmata na anang panahona.

¹⁷ Unsa ka dugay ta makig-estorya? Daghan ang puliki, busa mas maayong mubo lang ang imong pagpakig-estorya, ilabina sa sinugdan. Mas maayong humanon dayon ang panaghisgot imbes magdugay. (1 Cor. 9:20-23) Dihang makita sa mga tawo nga nakasabot ta sa ilang kahimtang o kapuliki, basin mas andam silang makig-estorya nato sa atong pagbalik. Klaro, angayng ipakita ang bunga sa espiritu sa Diyos diha sa atong ministeryo. Kon buhaton nato nâ, mahimo gyod tang “mga isigkamagbubuhat sa Diyos.” Basin gamiton pa gani ta ni Jehova sa pagdani sa mga tawo ngadto sa kamatuoran.​—1 Cor. 3:6, 7, 9.

18. Kon magpakita tag konsiderasyon, unsang mga panalangin ang atong madawat?

¹⁸ Busa maningkamot ta sa pagpakitag konsiderasyon diha sa pamilya, kongregasyon, ug sa ministeryo. Kon buhaton nato nâ, makadawat tag daghang panalangin karon ug sa umaabot. Ang Salmo 41:1, 2 nag-ingon: “Malipayon siya nga nagabuhat uban ang pagkamahunahunaon sa timawa; sa adlaw sa katalagman itagana ni Jehova ang kaikyasan kaniya. . . . Siya ipahayag nga malipayon dinhi sa yuta.”