SA TIBUOK kalibotan, gipabilhan sa mga ansiyano ang ilang pribilehiyo diha sa organisasyon. Panalangin gyod sila kanato! Pero di pa dugay, may gihimong kausaban. Gihangyo ang tigulang nga mga ansiyano nga ipasa ang pipila nila ka bug-at nga responsibilidad ngadto sa batabatang mga ansiyano. Sa unsang paagi?

Sa bag-ong kahikayan, ang mga tigdumala sa sirkito ug field instructor dili na magpadayon sa maong pag-alagad dihang 70 anyos na. Dugang pa, inig-80 anyos, ipasa na sa tigulang nga mga ansiyano ngadto sa batabatang mga ansiyano ang lainlaing asaynment, sama sa pagkahimong koordinetor sa Komite sa Sangang Buhatan o koordinetor sa mga ansiyano sa lokal nga kongregasyon. Unsay reaksiyon sa tigulang nga mga ansiyano niini nga kausaban? Sila nagmaunongon kang Jehova ug sa iyang organisasyon!

“Uyon kaayo ko ani nga desisyon,” miingon si Ken, kinsa halos 49 ka tuig nga nag-alagad ingong koordinetor sa Komite sa Sangang Buhatan. “Gani, nianang buntaga nga ako tong nahibaloan, nag-ampo na ko kang Jehova nga unta batabatang brader na ang moalagad ingong koordinetor.” Ang reaksiyon ni Ken parehas nianang sa matinumanong tigulang nga mga ansiyano sa tibuok kalibotan. Siyempre, kay gusto man gyod  nilang moalagad sa mga igsoon, may pipila nga nadismayar sa sinugdan.

“Medyo naguol ko,” miingon si Esperandio, nga koordinetor sa mga ansiyano sa ilang kongregasyon. Pero siya miangkon: “Nagkinahanglan kog dugang panahon sa pag-atiman sa kaugalingon kay nagkaluya na ko.” Sama sa atong madahom, si Esperandio matinumanong nag-alagad kang Jehova ug nahimong panalangin sa kongregasyon.

Komosta ang dugay nang mga nagapanawng tigdumala nga gibalhin sa laing klase sa pag-alagad? Si Allan, nga 38 ka tuig diha sa nagapanawng buluhaton, miingon: “Pagkabalo nako, nakurat ko.” Bisan pa niana, nahibalo siya sa kaayohan sa pagbansay sa batabatang mga brader para sa buluhaton, ug nagmatinumanon siya sa pag-alagad.

Si Russell, nga nag-alagad ingong nagapanawng tigdumala ug field instructor sa 40 ka tuig, miingon nga nadismayar silang magtiayon sa sinugdan. “Giapresyar gyod namo ang among pribilehiyo ug gibati namong kaya pa namo.” Gigamit ni Russell ug sa iyang asawa ang ilang pagbansay ug eksperyensiya diha sa lokal nga kongregasyon, nga nakapalipay sa mga igsoon.

Bisag dili ingon ana ang imong pagbati, ang usa ka estorya sa 2 Samuel makatabang nimo nga masabtan ang ilang gibati.

Hunahunaa ang panahon dihang mirebelde ang anak ni David nga si Absalom. Si David miikyas sa Jerusalem ug mipadulong sa Mahanaim, sidlakan sa Suba sa Jordan. Didto, si David ug ang iyang mga kauban may pipila ka panginahanglan. Nahinumdom ka ba sa sunod nga nahitabo?

Tulo ka tawo nianang lugara ang nanghatag nilag higdaanan, klaseklaseng pagkaon, ug gikinahanglang mga gamit. Usa nila si Barzilai. (2 Sam. 17:27-29) Dihang napakyas ang rebelyon ni Absalom, makabalik na si David sa Jerusalem, ug giubanan siya ni Barzilai hangtod sa Jordan. Gihangyo siya ni David nga mouban sa Jerusalem. Gitanyagan siya sa hari nga suplayag pagkaon, bisag si Barzilai “dato . . . kaayo” ug wala magkinahanglan ana. (2 Sam. 19:31-33, Ang Bag-ong Maayong Balita Biblia) Pero lagmit giapresyar sa hari ang kinaiya ug kaalam ni Barzilai. Nindot gyod unta nga pribilehiyo ang pagpuyo ug pagtrabaho diha sa palasyo!

Kay realistiko ug makasaranganon o nahibalo sa iyang limitasyon, si Barzilai miingon nga 80 anyos na siya. Ug siya midugang: “Makaila pa ba ako tali sa maayo ug sa daotan?” Unsay iyang gipasabot? Seguradong daghan siyag natigom nga kaalam tungod sa iyang taas nga pangedaron. Ug makahatag pa siyag maayong tambag, sama sa tigulang nga “mga ansiyano” nga mitambag kang Haring Rehoboam. (1 Hari 12:6, 7; Sal. 92:12-14; Prov. 16:31) Busa, ang giingon ni Barzilai bahin sa pagkaila sa maayo ug daotan lagmit  nagtumong sa pisikal nga epekto o limitasyon nga dala sa pagkatigulang. Siya miangkon nga naapektohan na ang iyang panglami ug pangdungog. (Eccl. 12:4, 5) Busa, si Barzilai mismo ang mihangyo nga dalhon ni David sa Jerusalem ang batabatang si Kimham, nga lagmit anak ni Barzilai.​—2 Sam. 19:35-40.

Ang kausaban tungod sa edad nga gihisgotan sa sinugdan nagpakita sa panglantaw nga parehas kang Barzilai. Siyempre sa atong panahon karon, dili lang ang sirkumstansiya ug abilidad sa usa ka brader ang angayng konsiderahon, sama sa kahimtang ni Barzilai. Kinahanglan nga realistikong konsiderahon kon unsa gyoy makaayo para sa matinumanong mga ansiyano sa tibuok kalibotan.

Kining makasaranganon nga tigulang nga mga brader nahibalo nga mas maandam ang organisasyon ni Jehova para sa umaabot nga pag-uswag kon ang ilang dugay nang responsibilidad dumalahon na sa batabatang mga brader. Kasagaran, ang tigulang nga mga brader ang nagbansay sa batabatang mga brader, sama sa pagbansay tingali ni Barzilai sa iyang anak ug sa pagbansay ni apostol Pablo kang Timoteo. (1 Cor. 4:17; Filip. 2:20-22) Gipamatud-an niining batabatang mga brader nga karon sila maoy “gasa nga mga lalaki,” ug makatabang sa ‘pagpalig-on sa lawas sa Kristo.’​—Efe. 4:8-12; itandi ang Numeros 11:16, 17, 29.

Daghan nga nagpasa sa pipila nila ka responsibilidad ang nakapahimulos sa bag-o o laing kahigayonan sa pag-alagad kang Jehova.

“Tungod sa akong bag-ong kahimtang, mas matabangan na nako ang dili Saksing bana sa mga sister sa among kongregasyon,” matod ni Marco, nga 19 ka tuig sa nagapanawng buluhaton.

“Bag-o namong tumong karon ang pagtabang sa mga dili aktibo ug pagdumalag dugang Bible study,” miingon si Geraldo, nga 28 ka tuig sa nagapanawng buluhaton. Siya mireport nga sila sa iyang asawa nagdumalag 15 ka Bible study ug daghang dili aktibo ang tigtambongan na.

Si Allan, nga gihisgotan ganina, miingon: “Karon, naa na miy kahigayonan nga mapadapat ang lainlaing paagi sa pagsangyaw. Nalingaw mi sa pag-cart ug pagsangyaw sa negosyohanan ug sa among mga silingan, nga ang duha nila mitambong na sa Kingdom Hall.”

Kon ikaw usa ka maunongong brader nga nakadawat ug bag-ong asaynment ug kaya pa sa imong kahimtang, may lain pang espesyal nga paagi nga makatabang ka. Makasuportar ka sa buluhaton ni Jehova pinaagi sa pagsulti sa imong nahibaloan ngadto sa batabatang mga brader sa kongregasyon. “Si Jehova nagbansay ug naggamit sa buotan, may talentong batabatang mga brader,” miingon si Russell nga gihisgotan ganina. “Ang mga igsoon nakabenepisyo sa ilang madasigong pagpanudlo ug pag-shepherding!”​—Tan-awa ang kahong “ Tabangi ang Batabatang mga Brader nga Mouswag.”

Kon bag-o ka pang nabalhin sa laing klase sa pag-alagad, magpabiling positibo. Tungod sa imong pagkugi, daghan ka nag natabangan ug nadasig, ug puwede nâ nimong ipadayon. Daghan na ang nagmahal nimo, ug seguradong padayon kang mahalon.

Labaw sa tanan, nakapalipay ka sa kasingkasing ni Jehova. ‘Dili niya kalimtan ang imong buhat ug ang gugma nga imong gipakita alang sa iyang ngalan, sa pagkaagi nga nag-alagad ka sa mga balaan ug nagpadayon  sa pag-alagad.’ (Heb. 6:10) Ang maong teksto nagpasalig nga bililhon kaayo ka niya ug dili niya kalimtan ang imong pagkugi sa una ug ang padayon nimong pagbuhat sa mga butang mga makapalipay niya!

Komosta kon dili ka apil niadtong nausab ang asaynment? Mahimong makabenepisyo gihapon ka. Sa unsang paagi?

Kon kauban mo sa usa ka matinumanon ug tigulang nga brader nga nausab ang asaynment, makabenepisyo ka sa iyang kahamtong ug kadaghan sa eksperyensiya. Pangayog tambag ug sugyot. Ug obserbahi kon giunsa niya paggamit ang iyang eksperyensiya diha sa iyang bag-ong asaynment.

Ikaw man tigulang nga nag-alagad sa bag-ong asaynment o kaha brader o sister nga mahimong makabenepisyo sa eksperyensiya sa mga tigulang, hinumdomi nga gipabilhan ni Jehova ang pagkamaunongon niadtong dugay nang nag-alagad kaniya ug nagpadayon sa pag-alagad.