1. Unsang makapalipay nga kamatuoran ang gipadayag sa Bibliya bahin kang Jehova?

GANAHAN ba ka nga hukman ka sa mga tawo base sa kolor sa imong panit, porma sa imong nawong, o gidak-on sa imong lawas? Seguradong dili. Busa malipay ta kay dili ta hukman ni Jehova base sa makita sa mga tawo kanato! Pananglitan, dihang nakita ni Samuel ang mga anak ni Jese, wala niya makita ang nakita ni Jehova. Giingnan ni Jehova si Samuel nga usa sa mga anak ni Jese ang mahimong hari sa Israel. Pero kinsa? Pagkakita ni Samuel sa kamagulangang anak ni Jese nga si Eliab, siya miingon: “Seguradong siya ang dinihogan ni Jehova.” Si Eliab morag angayan nga mahimong hari. “Apan si Jehova miingon kang Samuel: ‘Ayaw pagtan-aw sa iyang panagway ug sa iyang gitas-on, kay dili siya ang akong gipili.’” Unsay leksiyon? Si Jehova mipadayon: “Ang tawo nagatan-aw kon unsay makita sa mga mata, apan si Jehova nagatan-aw sa kasingkasing.”​—1 Sam. 16:1, 6, 7.

2. Base sa Juan 7:24, nganong dili nato hukman ang uban base sa ilang hitsura? Iilustrar.

² Kay dili hingpit, kitang tanan may tendensiya nga hukman ang uban base sa ilang hitsura. (Basaha ang Juan 7:24.) Pero gamay ra ang atong mahibaloan sa usa ka tawo kon magbase lang ta sa atong makita. Sa pag-ilustrar, bisan ang maayo kaayo ug eksperyensiyado nga doktor gamay rag mahibaloan bahin sa pasyente kon igo ra niya kining tan-awon. Kinahanglang maminaw siya pag-ayo aron mahibaloan niya ang nangaging problema sa panglawas sa pasyente, ang gibati niini bahin sa iyang kahimtang, o ang mga simtomas niini. Morekomendar pa gani siya nga magpa-X-ray ang pasyente aron makita ang sulod sa lawas niini. Kay kon dili, posibleng sayop nga tambal ang iyang mareseta. Sa susama, dili nato bug-os masabtan ang mga igsoon  kon magbase lang ta sa ilang hitsura. Kinahanglang ilhon nato kon unsa gyod ang ilang tinuod nga personalidad. Siyempre, dili ta makabasag kasingkasing, busa ang atong pagsabot kanila dili gyod parehas sa pagsabot ni Jehova. Pero himoon nato ang maarangan sa pagsundog kang Jehova. Sa unsang paagi?

3. Sa unsang paagi ang mga asoy sa Bibliya niining artikuloha makatabang nato sa pagsundog kang Jehova?

³ Sa unsang paagi si Jehova nagtratar sa iyang mga magsisimba? Iya silang paminawan. Iyang konsiderahon ang ilang kahimtang ug ang tanang butang nga nakaimpluwensiya kanila. Ug iya silang pakitaag kaluoy. Samtang hisgotan nato kon giunsa nâ niya paghimo kang Jonas, Elias, Agar, ug Lot, tan-awon nato kon sa unsang paagi masundog nato si Jehova sa atong pagtratar sa mga igsoon.

4. Nganong negatibo tingali ang atong panglantaw kang Jonas?

⁴ Kay kulang tag kahibalo bahin kang Jonas, maghunahuna tingali ta nga siya dili kasaligan, ug dili pa gani maunongon. Direkta siyang gisugo ni Jehova sa pagpahayag ug paghukom sa Nineve. Imbes mosunod, si Jonas misakay ug barko paingon sa laing direksiyon, ‘palayo kang Jehova.’ (Jon. 1:1-3) Hatagan pa kaha nimog kahigayonan si Jonas sa paghimo sa iyang asaynment? Tingali dili na. Pero si Jehova nakakitag mga rason nga hatagan pa siyag kahigayonan.​—Jon. 3:1, 2.

5. Unsay imong nakat-onan bahin kang Jonas base sa iyang giingon sa Jonas 2:1, 2, 9?

⁵ Diha sa mga pag-ampo ni Jonas, makita kon unsa gyod siyang matanga sa tawo. (Basaha ang Jonas 2:1, 2, 9.) Kana nga pag-ampo​—nga walay duhaduhang usa lang sa daghang pag-ampo ni Jonas​—makatabang nato nga makita kon unsa gyoy iyang personalidad, imbes isipon lang siya ingong usa ka tawo nga miikyas sa iyang asaynment. Ang iyang mga pulong nagpakita nga siya mapainubsanon, mapasalamaton, ug determinadong mosunod kang Jehova. Dili ikatingala nga si Jehova wala magpokus sa iyang sayop. Iya hinuong gitubag ang pag-ampo ni Jonas ug padayon niya siyang gigamit ingong propeta!

6. Nganong angay gyod tang maminaw pag-ayo?

⁶ Aron makapaminaw pag-ayo sa uban, kinahanglang mapaubsanon ta ug mapailobon. Dunay labing menos tulo ka rason kon nganong angay nato kanang himoon. Una, malikayan nato ang paghunahunag dili maayo bahin sa uban. Ikaduha, masabtan nato ang gibati ug motibo sa atong igsoon, ug kana makatabang  nato nga mahimong mas mabination kaniya. Ug ikatulo, kon ato siyang pasultihon, basin duna pa gani siyay mahibaloan bahin sa iyang kaugalingon. Usahay masabtan lang nato ang atong pagbati kon masulti na nato kini. (Prov. 20:5) Ang usa ka ansiyano sa Asia miadmitir: “Nahinumdom ko nga kas-a, nasayop ko kay misulti ko nga wala una maminaw. Giingnan nako ang usa ka sister nga kinahanglan niyang pauswagon ang iyang mga komento sa tigom. Sa ulahi, nahibal-an nako nga maglisod diay siyag basa ug kinahanglan siyang maningkamot pag-ayo aron makakomento.” Importante gyod nga ang matag ansiyano “maminaw” sa dili pa motambag!​—Prov. 18:13.

7. Unsay imong nakat-onan sa pagtratar ni Jehova kang Elias?

⁷ Ang pipila sa atong mga igsoon malisdan sa pagsulti sa ilang gibati tungod sa ilang kaagi, kultura, o personalidad. Unsay atong mahimo aron masulti nila kanato ang ilang gibati? Hinumdomi kon giunsa pagtratar ni Jehova si Elias dihang miikyas siya gikan kang Jezebel. Milabay pa ang daghang adlaw una nasulti ni Elias ngadto sa iyang langitnong Amahan ang tanan niyang gibati. Si Jehova naminaw pag-ayo. Dayon gidasig niya si Elias ug gihatagan ug importanteng asaynment. (1 Hari 19:1-18) Tingali nagkinahanglag panahon una mahimong komportable ang mga igsoon sa pagpakigsulti kanato. Pero kon mapailobon ta sama kang Jehova, sa ngadtongadto mosalig na sila kanato ug mosulti sa ilang gibati. Unya kon mosulti na sila, kinahanglan tang maminaw pag-ayo.

8. Sumala sa Genesis 16:7-13, giunsa pagtabang ni Jehova si Agar?

⁸ Si Agar, nga sulugoon ni Sarai, may gihimong dili maayo human siya maasawa ni Abram. Dihang nagmabdos siya, iyang gitamay si Sarai, kinsa walay anak. Gubot kaayo ang situwasyon nga sa ulahi, milayas si Agar kay gipakaulawan siya ni Sarai. (Gen. 16:4-6) Kay dili ta hingpit, maghunahuna tingali ta nga angay lang kang Agar ang nahitabo niya tungod sa iyang pagkagarbosa. Pero lahi ang hunahuna ni Jehova kang Agar. Nagpadala siyag anghel ngadto kaniya. Dihang nakita sa anghel si Agar, iyang gitabangan si Agar nga mag-usab sa iyang kinaiya ug gipanalanginan siya. Naamgohan ni Agar nga si Jehova nagtan-aw kaniya ug nahibalo sa tanan bahin sa iyang situwasyon. Tungod niana, napalihok siya sa pagtawag kang Jehova ingong “Diyos nga makakita sa tanan, . . . nga nakakita kanako.”​—Basaha ang Genesis 16:7-13.

9. Nganong gipakitaan sa Diyos ug kaayo si Agar?

⁹ Unsay nakita ni Jehova kang Agar? Nahibalo siya pag-ayo sa kaagi ni Agar ug sa tanang naeksperyensiyahan niini. (Prov. 15:3) Si Agar maoy Ehiptohanon nga nagpuyo sa Hebreohanong panimalay. Mibati kaha siya usahay nga dili siya dinawat? Gimingaw kaha siya sa iyang pamilya ug sa iyang lugar? Dili lang siya ang asawa ni Abram. Dihay panahon nga ang pipila sa matinumanong lalaki dili lang usay asawa. Pero dili kana ang orihinal nga katuyoan ni Jehova. (Mat. 19:4-6) Busa dili ikatingala nga kini nga kahimtang sagad moresultag pagselos ug pagdumot. Nahibalo si Jehova nga sayop ang pagtamay ni Agar kang Sarai, pero gikonsiderar niya ang gibati ug ang situwasyon ni Agar maong gipakitaan niya siyag kaayo.

10. Sa unsang paagi mailhan nato pag-ayo ang mga igsoon?

¹⁰ Masundog nato si Jehova kon atong sabton ang mga igsoon. Ilha pag-ayo ang mga igsoon. Pakig-estorya nila una ug human sa  tigom, pakigpartner nila sa ministeryo, ug kon posible, imbitaha silag pangaon. Kon imo nang himoon, tingali mahibaloan nimo nga ang sister nga morag dili mahigalaon maulawon diay, ang brader nga abi nimog materyalistiko mahinatagon diay kaayo, o ang pamilya nga sagad maulahi sa tigom ginalutos diay. (Job 6:29) Siyempre, dili ta angayng ‘manghilabot sa kalihokan sa ubang tawo.’ (1 Tim. 5:13) Pero maayo nga naa tay mahibaloan bahin sa atong mga igsoon ug sa mga sirkumstansiya nga nakaimpluwensiya sa ilang personalidad.

11. Nganong importante nga mailhan pag-ayo sa mga ansiyano ang mga karnero?

¹¹ Ang mga ansiyano ilabinang angayng makaila pag-ayo sa mga igsoon nga ilang giatiman. Konsideraha ang pananglitan ni Artur, nga tigdumala sa sirkito kaniadto. Siya ug ang laing ansiyano mibisita sa usa ka sister nga morag maulawon. “Nahibaloan namo nga ang iyang bana namatay wala madugay human sila maminyo,” si Artur miingon. “Bisan pa sa mga kalisdanan, napadako niya ang iyang duha ka anak nga babaye nga lig-on ug espirituwalidad. Pero karon, halap na ang iyang panan-aw ug nag-antos siya sa depresyon. Bisan pa niana, lig-on gihapon siyag gugma ug pagtuo kang Jehova. Naamgohan namo nga daghan diay kaayo mig makat-onan sa maayong ehemplo niini nga sister.” (Filip. 2:3) Gisundog niini nga tigdumala sa sirkito ang ehemplo ni Jehova. Si Jehova nakaila sa iyang mga karnero ug nahibalo sa ilang mga kasakit. (Ex. 3:7) Kon ang mga ansiyano nakaila pag-ayo sa mga karnero, mas makatabang sila kanila.

12. Unsay maayong resulta dihang naningkamot si Yip Yee nga mailhan ang usa ka sister sa ilang kongregasyon?

¹² Kon mailhan nimo pag-ayo ang igsoon nga imong gikalagotan, tingali mas masabtan nimo siya. Konsideraha ni nga pananglitan. “Naay sister sa among kongregasyon nga dako kaayog tingog,” miingon si Yip Yee nga taga-Asia. “Para nako, wala siyay maayong pamatasan. Pero dihang nagkapartner mi sa ministeryo, nahibaloan nako nga kaniadto motabang diay siya sa iyang ginikanan sa pagbaligyag isda sa merkado. Kinahanglan siyang mosultig kusog aron manawag ug kustomer.” Si Yip Yee midugang: “Akong nakat-onan nga kinahanglan nakong mahibaloan ang kaagi sa mga igsoon aron mas masabtan nako sila.” Gikinahanglan ang paningkamot aron mas mailhan ang mga igsoon. Pero kon sundon nimo ang tambag sa Bibliya nga buksan pag-ayo ang  imong kasingkasing, imong gisundog si Jehova, kinsa nahigugma sa “tanang matang sa tawo.”​—1 Tim. 2:3, 4; 2 Cor. 6:11-13.

13. Sumala sa Genesis 19:15, 16, unsay gihimo sa mga anghel dihang naglangaylangay si Lot, ug ngano?

¹³ Sa importanteng panahon sa kinabuhi ni Lot, siya naglangaylangay sa pagtuman sa sugo ni Jehova. Duha ka anghel ang mibisita kang Lot ug miingon nga siya ug ang iyang pamilya angayng mogawas sa Sodoma. Ngano? Sila miingon: “Among laglagon kining dapita.” (Gen. 19:12, 13) Pagkabanagbanag, si Lot ug ang iyang pamilya wala gihapon manghawa. Busa gipasidan-an pag-usab sa mga anghel si Lot. Pero “naglangaylangay gihapon siya.” Tingali maghunahuna ta nga gibalewala ra o gisupak pa gani ni Lot ang sugo ni Jehova. Pero wala mohunong si Jehova sa pagtabang kaniya. “Tungod sa kaluoy ni Jehova kaniya,” gihawiran sa mga anghel ang kamot sa pamilya ug gidala sila sa gawas sa siyudad.​—Basaha ang Genesis 19:15, 16.

14. Ngano kahang naluoy si Jehova kang Lot?

¹⁴ Tingali naluoy si Jehova kang Lot tungod sa daghang rason. Basig nagduhaduha pagbiya si Lot sa iyang balay kay nahadlok siya sa mga tawo sa gawas sa siyudad. Duna pay ubang kapeligrohan. Tingali nahibalo si Lot bahin sa duha ka hari nga nahulog sa mga bangag nga punog aspalto diha sa duol nga walog. (Gen. 14:8-12) Ingong bana ug amahan, seguradong nabalaka si Lot sa iyang pamilya. Dugang pa, dato si Lot busa posible nga duna siyay nindot nga balay sa Sodoma. (Gen. 13:5, 6) Siyempre, walay usa niana ang maayong rason nga dili dayon mosunod si Lot sa sugo ni Jehova. Pero wala magpokus si Jehova sa sayop ni Lot. Hinunoa, giisip niya siya nga “matarong.”​—2 Ped. 2:7, 8.

15. Imbes hukman ang lihok sa usa ka tawo, unsay angay natong himoon?

¹⁵ Imbes hukman ang mga lihok sa usa ka tawo, paningkamoti nga masabtan ang iyang gibati. Kanay gihimo ni Veronica, sister nga taga-Europe. “Naay sister nga morag sapoton,” siya miingon. “Pirme siyang magpalain  sa kaugalingon. Usahay mahadlok kong moduol niya. Pero naghunahuna ko, ‘Kon akoy naa sa iyang situwasyon, gusto gyod nako nga naa koy amiga.’ Busa midesisyon ko nga mangomosta niya. Ug gisultihan ko niya sa iyang gibati! Karon, mas nakasabot na ko niya.”

16. Nganong angay tang mag-ampo nga mahimong mas mabination?

¹⁶ Si Jehova lang ang bug-os nakasabot kanato. (Prov. 15:11) Busa hangyoa siya nga tabangan kang makita kon unsay iyang nakita sa uban ug masabtan kon sa unsang paagi magmabination ka kanila. Ang pag-ampo nakatabang sa sister nga si Anzhela nga mahimong mas mabination. Dihay sister sa ilang kongregasyon nga lisod ikasinabot. Si Anzhela miingon: “Sayon ra gyod untang manaway sa sister ug maglikay niya. Pero gihangyo nako si Jehova nga tabangan ko sa pagsabot niya.” Gitubag ba ni Jehova ang pag-ampo ni Anzhela? Siya miingon: “Nag-uban mi sa ministeryo ug human niana nag-estoryahanay mig pipila ka oras. Mabination kong naminaw niya. Karon, mas ganahan na ko niya, ug gusto nako siyang tabangan.”

17. Unsay angay natong determinasyon?

¹⁷ Dili maayong pilion lang nimo kon kinsa sa mga igsoon ang imong pakitaag pagkamabination. Silang tanan nag-atubang ug mga problema sama kang Jonas, Elias, Agar, ug Lot. Sa daghang higayon, sila ra poy nakaingon sa ilang problema. Ang tinuod, may mga higayon nga nahitabo pod na kanato. Busa makataronganon nga hangyoon ta ni Jehova sa pagpakitag simpatiya sa usag usa. (1 Ped. 3:8) Kon sundon nato si Jehova, mapalig-on nato ang panaghiusa sa atong nindot kaayo nga tibuok kalibotang pamilya. Busa sa atong pagtratar sa uban, hinaot nga magmadeterminado tang maminaw, magkat-on, ug magmabination.