BUG-AT kaayo sa kasingkasing ang kabalaka. (Prov. 12:25) Nakasulay na ba ka ana? Mibati ba ka nga morag di na nimo kaya? Kon mibati ka ana, wala ka mag-inusara. Daghan tingali nato ang nag-atiman ug masakiton, namatyan, nabiktima sa kalamidad, o nag-atubang ug lisod nga situwasyon maong nabug-atan ta sa pisikal, mental, ug emosyonal. Pero unsay makatabang aron di ta malumsan sa kabalaka? *

Naa tay makat-onan sa eksperyensiya ni Haring David. Daghan siyag naagian nga lisod nga mga situwasyon, ug naa pa gani mga higayon nga nameligro ang iyang kinabuhi. (1 Sam. 17:34, 35; 18:10, 11) Unsay gihimo ni David aron dili siya malumsan sa kabalaka? Unsaon nato siya pagsundog?

Nagdungandungan ang kalisdanan ni David. Pananglitan, konsideraha ang usa ka situwasyon samtang nagtagotago siya aron dili mapatay ni Haring Saul. Dihang si David ug ang iyang mga tawo mipauli sa Ziklag, nakurat kaayo sila kay gipangawat sa ilang mga kaaway ang ilang mga butang, gisunog ang ilang mga balay, ug gibihag ang ilang mga pamilya. Unsay reaksiyon ni David? “Si David ug ang iyang mga tawo mitiyabaw hangtod nga nahutdan na silag kusog sa paghilak.” Misamot pa gyod ang problema ni David kay ang iyang mga tawo “nag-ingon nga ila siyang batoon.” (1 Sam. 30:1-6) Busa tulo ka dagkong problema ang giatubang ni David: Nameligro ang iyang pamilya, nahadlok siya nga patyon siya sa iyang mga tawo, ug gigukod siya ni Haring Saul. Ma-imagine ba nimo kon unsa ka bug-at ang gibati ni David?

Unsay gihimo ni David? “Gipalig-on [dayon] ni David ang iyang kaugalingon pinaagi sa tabang ni Jehova nga iyang Diyos.” Giunsa kaha niya ni paghimo? Naandan ni David nga mag-ampo kang Jehova ug mamalandong kon giunsa Niya siya pagtabang sa una. (1 Sam. 17:37; Sal. 18:2, 6) Nakita ni David nga gikinahanglan niya ang giya ni Jehova, mao nga mikonsulta siya kang Jehova kon unsay angay niyang himoon. Human madawat ni David ang instruksiyon ni Jehova, milihok dayon siya. Unsay resulta? Siya ug ang iyang mga tawo gipanalanginan ni Jehova, ug nabawi nila ang ilang pamilya ug mga butang. (1 Sam. 30:7-9, 18, 19) Namatikdan ba nimo ang tulo ka butang nga gihimo ni David? Nag-ampo siya kang Jehova para sa tabang, namalandong siya kon giunsa siya pagtabang ni Jehova sa una, ug milihok siya subay sa giingon ni Jehova. Unsaon nato pagsundog si David? Konsideraha ang tulo ka paagi.

1. Pag-ampo. Dihang magsugod tag kabalaka, puwede tang mag-ampo kang Jehova nga tabangan ta ug giyahan kon unsay angayng himoon. Mogaan ang atong gibati kon dili nato dalidalion ang atong pag-ampo ug isulti nato ang tanang naa sa atong kasingkasing. Pero puwede pod ang mubo ug hilom nga pag-ampo kon mao ra nay itugot sa atong kahimtang anang panahona. Matag higayon nga mangayo tag tabang kang Jehova, atong gipakita nga naa tay pagsalig kaniya sama kang David, kinsa miingon: “Si Jehova mao ang akong dakong bato ug akong salipdanan ug ang Usa nga nagluwas kanako. Ang akong Diyos mao ang akong bato, kaniya ako modangop.” (Sal. 18:2) Makatabang ba gyod ang pag-ampo? Ang payunir nga sister nga si Kahlia miingon: “Inighuman nakog ampo, gaan kaayo ang akong paminaw.  Ang pag-ampo nakatabang nako nga masundog ang panghunahuna ni Jehova ug mas mosalig niya.” Oo, ang pag-ampo nindot kaayong regalo gikan kang Jehova nga makatabang nato dihang mabalaka ta.

2. Pamalandong. Naa ba kay mahinumdoman nga mga pagsulay nga wala unta nimo malahutay kon wala pa ka tabangi ni Jehova? Dihang atong pamalandongon kon giunsa ta pagtabang ni Jehova ug kon giunsa pod niya pagtabang ang iyang mga alagad sa una, magmalinawon ang atong hunahuna ug mas mosalig ta niya. (Sal. 18:17-19) “Gisulat nako ang akong mga pag-ampo nga gitubag ni Jehova,” miingon ang ansiyano nga si Joshua. “Nakatabang ni nga mahinumdom ko sa mga panahon nga naa koy espesipikong gihangyo kang Jehova, ug iya gyod ning gihatag.” Oo, kon atong pamalandongon kon giunsa ta pagtabang ni Jehova sa una, makahatag ni natog kusog nga masuklan ang atong mga kabalaka.

3. Lihok. Sa dili pa ta modesisyon kon unsay himoon, puwede tang mag-research sa Pulong sa Diyos para sa pinakamaayong giya. (Sal. 19:7, 11) Daghan ang miingon nga dihang nag-research sila bahin sa usa ka teksto, mas nasabtan nila kon unsaon ni pagpadapat. Ang ansiyano nga si Jarrod miingon: “Ang pag-research nakatabang nga molawom ang akong kahibalo sa usa ka teksto ug masabtan kon unsay ginaingon ni Jehova. Nakatabang pod ni nga mas matisok sa akong kasingkasing ang akong gibasa aron mas dali kong mosunod sa iyang giya.” Kon atong susihon ang Bibliya para sa giya ni Jehova ug sundon kana, mas dali natong masuklan ang kabalaka.

Nasabtan ni David nga gikinahanglan niya ang tabang ni Jehova aron masuklan niya ang iyang mga kabalaka. Naapresyar kaayo ni David ang Iyang tabang maong nakaingon siya: “Pinaagi sa gahom sa Diyos ako makakatkat ug paril. Ang matuod nga Diyos mao ang naghatag kanakog kusog.” (Sal. 18:29, 32) Mobati tingali ta nga ang atong mga kalisdanan morag paril nga dili makatkat. Pero sa tabang ni Jehova, mahimo nato nâ! Oo, kon moampo ta kang Jehova para sa tabang, mamalandong sa tanan niyang gihimo para nato, ug molihok subay sa iyang giya, segurado nga hatagan ta niyag kusog ug tudloan ta niya kon unsay himoon aron makaya nato ang atong mga kabalaka!