Sa maong kahimtang, isipon sa kongregasyon nga natapos na ang kanhing kaminyoon dihang ang lalaki nagminyo nag lain, ug isipon sa kongregasyon nga balido ang bag-ong kaminyoon. Aron masabtan kon nganong ingon ani ang atong panglantaw, atong konsiderahon ang giingon ni Jesus bahin sa diborsiyo ug pagminyog lain.

Sa Mateo 19:9, gisulti ni Jesus kon unsa ray Kasulatanhong basehanan nga puwedeng taposon ang kaminyoon. Siya miingon: “Si bisan kinsa nga makigdiborsiyo sa iyang asawa, gawas kon tungod sa seksuwal nga imoralidad, ug magminyog lain nakapanapaw.” Makat-onan nato sa giingon ni Jesus nga (1) ang seksuwal nga imoralidad mao ray Kasulatanhong basehanan nga puwedeng taposon ang kaminyoon pinaagig diborsiyo ug (2) ang lalaki nga makigdiborsiyo bisag walay Kasulatanhong basehanan ug magminyog lain sad-an sa pagpanapaw. *

Ang giingon ba ni Jesus nagpasabot nga kon ang lalaki makahimog seksuwal nga imoralidad ug makigdiborsiyo sa iyang asawa, naa siyay Kasulatanhong kagawasan nga magminyog lain? Depende. Dihang ang bana manapaw, ang iyang walay sala nga asawa modesisyon kon iya bang pasayloon ang iyang bana o dili. Kon dili niya pasayloon ang iyang bana ug magdiborsiyo sila, silang duha naa nay kagawasan nga magminyog lain dihang mahuman na ang proseso sa pagdiborsiyo.

Pero ang asawa nga walay sala dili tingali gustong matapos ang ilang kaminyoon ug andam siyang mopasaylo sa iyang bana. Pero komosta man kon ang nakasala nga bana dili na makig-uli sa iyang asawa bisag pasayloon unta siya, ug modesisyon gyod siya nga makigdiborsiyo? Kay andam mang pasayloon sa asawa ang iyang bana ug ipadayon ang kaminyoon, ang lalaki walay Kasulatanhong kagawasan nga magminyog lain. Kon modesisyon siya nga magminyog lain bisag wala siyay kagawasan sa paghimo ana, makasala na pod siyag pagpanapaw. Ang mga ansiyano magporma na pod ug hudisyal nga komite aron atimanon ang maong kaso.​—1 Cor. 5:1, 2; 6:9, 10.

Dihang ang lalaki magminyog lain bisag wala siyay Kasulatanhong kagawasan, unsay panglantaw sa kongregasyon sa iyang kanhing kaminyoon ug sa iyang bag-ong kaminyoon? Base sa Bibliya, balido pa ba ang kanhing kaminyoon? Ang walay sala nga asawa puwede pa bang modesisyon kon pasayloon niya o dili ang iyang kanhing bana? Ang bag-ong kaminyoon isipon ba nga mananapawon nga kaminyoon, buot ipasabot, isipon ba nga padayon silang naghimog seksuwal nga imoralidad?

Sa una, isipon sa kongregasyon ang bag-ong kaminyoon nga mananapawon nga kaminyoon kon ang walay sala nga asawa buhi pa, wala magminyo, ug wala makahimog seksuwal nga imoralidad. Pero dihang naghisgot si Jesus bahin sa diborsiyo ug pagminyog lain, wala siya maghisgot bahin sa walay sala nga asawa. Ang iya lang giingon mao nga kon ang lalaki makigdiborsiyo sa iyang asawa nga walay Kasulatanhong basehanan  unya magminyog lain, siya makapanapaw. Sa maong kahimtang, ang diborsiyo ug pagminyog lain, nga giingon ni Jesus nga pagpanapaw, nagtapos sa kanhing kaminyoon.

Dihang ang kaminyoon matapos tungod sa diborsiyo ug pagminyog lain, ang walay sala nga asawa wala nay kahigayonan sa pagdesisyon kon pasayloon ba niya o dili ang iyang kanhing bana. Mao nga dili na siya mabug-atan niana nga responsibilidad. Dugang pa, ang panglantaw sa kongregasyon sa bag-ong kaminyoon dili magdepende kon ang walay sala nga asawa patay na ba, nagminyog lain, o nakahimog seksuwal nga imoralidad. *

Sa nahisgotan na nga pananglitan, ang bana nakapanapaw, ug nagdiborsiyo sila sa iyang asawa. Pero komosta man kon ang bana wala makapanapaw pero nakigdiborsiyo siya ug nagminyog lain? O kaha ang bana wala makahimog seksuwal nga imoralidad sa wala pa makigdiborsiyo pero nakahimo siya ana human siya makigdiborsiyo, unya nagminyo siyag lain bisag andam unta siyang pasayloon sa iyang asawa? Niini nga mga pananglitan, ang diborsiyo ug pagminyog lain, nga maoy pagpanapaw, nagtapos sa kanhing kaminyoon. Ang bag-ong kaminyoon legal. Ang Mayo 15, 1980 nga Bantayanang Torre, panid 31, nag-ingon: “Karon siya nakasulod sa usa ka bag-ong kaminyoon ug busa yanong dili makawagtang niana ug mobalik sa kahimtang kaniadto; ang nag-unang kaminyoon natapos sa diborsiyo, panapaw ug pagkaminyo pag-usab.”

Kini nga kausaban wala magpasabot nga pakamenoson na sa usa ka Kristohanon ang pagkasagrado sa kaminyoon o ang pagkaseryoso sa pagpanapaw. Kon ang lalaki makigdiborsiyo nga walay Kasulatanhong basehanan ug magminyog lain bisag wala siyay Kasulatanhong kagawasan sa paghimo ana, ang mga ansiyano magpormag hudisyal nga komite kay nakapanapaw siya. (Kon Kristohanon pod ang bag-ong asawa, pormahan siyag hudisyal nga komite kay nakapanapaw pod siya.) Bisag ang bag-ong kaminyoon dili na isipon nga mananapawon nga kaminyoon, ang maong lalaki dili mahimong kuwalipikado sa espesyal nga mga pribilehiyo sa pag-alagad diha sa kongregasyon sulod sa daghang tuig. Dili pod siya kuwalipikado niini nga mga pribilehiyo hangtod nga dili mawala sa hunahuna sa mga tawo ang iyang nahimo o hangtod nga dili mabalik ang pagtahod sa mga tawo kaniya. Apil sa konsiderahon ang presenteng kahimtang sa asawa nga giluiban ug ang menor de edad nga mga anak nga tingali gibiyaan sa nakasala nga bana.​—Mal. 2:14-16.

Tungod sa seryosong mga resulta sa dili Kasulatanhong pagpakigdiborsiyo ug pagminyog lain, ang mga Kristohanon maalamon kon ilang sundon ang panglantaw ni Jehova bahin sa pagkasagrado sa kaminyoon.​—Eccl. 5:4, 5; Heb. 13:4.