1. Unsay situwasyon dihang gihimo ni Jesus ang iyang unang milagro?

 IMADYINA ang nahitabo sa hinapos sa 29 C.E. dihang gisugdan ni Jesus ang iyang ministeryo. Si Jesus, ang iyang inahan nga si Maria, ug ang pipila sa iyang mga tinun-an gidapit sa usa ka kombira sa kasal sa Cana, baryo nga amihanan sa Nasaret diin nagdako si Jesus. Higala ni Maria ang pamilya, ug klaro nga mitabang siya sa pag-atiman sa mga bisita. Pero sa kombira sa kasal, naay mitunghang problema nga posibleng makahatag ug kaulawan sa pamilya ug sa bag-ong gikasal​—nahurot ang bino. b Tingali wala sila magdahom nga sobra ka daghan ang bisita. Si Maria miduol dayon sa iyang anak ug miingon: “Wala na silay bino.” (Juan 2:1-3) Unsay gibuhat ni Jesus? Mihimo siyag talagsaon kaayong milagro​—ang tubig gihimo niyang “maayong bino.”​—Juan 2:9, 10.

2-3. (a) Giunsa paggamit ni Jesus ang iyang gahom? (b) Nganong makabenepisyo ta kon atong hisgotan ang mga milagro nga gihimo ni Jesus?

² Daghan pag milagro nga gihimo si Jesus panahon sa iyang ministeryo. c Gigamit niya ang iyang gahom aron tabangan ang libolibo ka tawo. Pananglitan, sa duha niya ka milagro, gipakaon niya ang 5,000 ka lalaki ug sa ulahi 4,000 ka lalaki. Pero kon apilon ug ihap ang mga babaye ug mga bata nga presente adtong panahona, moabot tingali ug kapig 27,000 ka tawo ang  iyang gipakaon. (Mat. 14:15-21; 15:32-38) Nianang panahona, daghan pong masakiton ang giayo ni Jesus. (Mat. 14:14; 15:30, 31) Seguradong nahingangha gyod ang mga tawo nga milagrosong giayo ug gipakaon ni Jesus!

³ Daghan tag makat-onan sa mga milagro nga gihimo ni Jesus. Niining artikuloha, atong hisgotan ang pipila ka leksiyon nga makapalig-on sa atong pagtuo. Dayon atong susihon kon unsaon nato pagsundog ang pagkamapainubsanon ug ang kaluoy nga gipakita ni Jesus dihang naghimo siyag mga milagro.

4. Ang mga milagro ni Jesus nagtudlo natog mga leksiyon bahin kang kinsa?

⁴ Ang mga milagro ni Jesus nagtudlo natog makapalig-on sa pagtuo nga mga leksiyon dili lang bahin niya, kondili bahin pod sa iyang Amahan. Ngano? Kay kang Jehova gikan ang gahom nga gigamit ni Jesus sa paghimog mga milagro. Ang Buhat 10:38 nag-ingon: “Ang Diyos nagdihog [kang Jesus ug] balaang espiritu ug gahom, ug gilibot niya ang kayutaan nga nagbuhat ug maayo ug nag-ayo sa tanang gisakit sa Yawa, kay ang Diyos nag-uban man kaniya.” Hinumdomi pod nga ang tanang gisulti ug gihimo ni Jesus​—apil ang iyang mga milagro—​nagpakita kon unsa gyoy panghunahuna ug pagbati sa iyang Amahan. (Juan 14:9) Hisgotan nato ang tulo ka leksiyon nga atong makat-onan sa mga milagro ni Jesus.

5. Unsay nagpalihok kang Jesus sa paghimog mga milagro? (Mateo 20:30-34)

⁵ Una, gimahal ta pag-ayo ni Jesus ug sa iyang Amahan. Sa dinhi pa si Jesus sa yuta, iyang gipakita nga gimahal gyod niya ang mga tawo pinaagi sa paggamit sa iyang gahom aron tabangan ang mga nag-antos. Pananglitan, dihay duha ka buta nga nagsigeg singgit aron mangayo niyag tabang. (Basaha ang Mateo 20:30-34.) Matikdi nga si Jesus “naluoy” nila ug dayon giayo sila. Ang Gregong pulong nga gihubad dinhi ug “naluoy” nagpasabot ug grabeng kaluoy nga bation sa usa ka tawo sulod mismo sa iyang lawas. Kana nga kaluoy, nga usa ka ekspresyon sa gugma, mao pod ang nagpalihok kang Jesus nga pakan-on ang mga gigutom ug ayohon ang usa ka sanlahon. (Mat. 15:32; Mar. 1:41) Makaseguro ta nga si Jehova, ang Diyos nga may “dakong kaluoy,” ug ang iyang Anak nagmahal pag-ayo nato ug nasakitan sila sa atong pag-antos. (Luc. 1:78; 1 Ped. 5:7) Naghinamhinam gyod sila nga taposon ang tanang pag-antos sa mga tawo!

6. Unsang gahom ang gihatag sa Diyos kang Jesus?

⁶ Ikaduha, ang Diyos naghatag kang Jesus ug gahom sa pagsulbad sa tanang problema sa mga tawo. Pinaagi sa iyang mga milagro, gipakita ni Jesus nga naa siyay gahom sa pagsulbad sa mga problema nga dili nato kayang sulbaron. Pananglitan, naa siyay gahom sa pagsulbad sa pinakahinungdan sa mga problema sa tawo​—ang napanunod nga sala ug ang mga epekto niini, ang sakit ug kamatayon. (Mat. 9:1-6; Roma 5:12, 18, 19) Ang iyang mga milagro nagpamatuod nga kaya niyang ayohon ang “tanang matang sa sakit” ug makabanhaw pa gani siyag mga patay. (Mat. 4:23; Juan 11:43, 44) Naa pod siyay gahom sa pagkontrol sa kusog kaayong mga unos ug sa pagpildi sa daotang mga espiritu. (Mar. 4:37-39; Luc. 8:2) Makapadasig gyong mahibaloan nga gihatagan ni Jehova ang iyang Anak ug ingon ana ka dakong gahom!

7-8. (a) Unsay gipasalig kanato sa mga milagro ni Jesus? (b) Unsa nga milagro ang gikahinaman nimo pag-ayo sa bag-ong kalibotan?

⁷ Ikatulo, makasalig gyod ta nga matuman ang tanang gisaad nga mga panalangin sa Gingharian sa Diyos. Ang mga milagro nga  gihimo ni Jesus kaniadto nagtudlo nato kon unsay iyang himoon sa tibuok yuta ingong langitnong Hari sa Gingharian sa Diyos. Konsideraha kon unsay atong maeksperyensiyahan ubos sa pagmando sa Kristo. Hingpit na ang atong panglawas kay wad-on niya ang tanang sakit ug mga depekto nga giantos sa katawhan. (Isa. 33:24; 35:5, 6; Pin. 21:3, 4) Wala nay kagutom ug wala nay mag-antos tungod sa mga kalamidad. (Isa. 25:6; Mar. 4:41) Malipay kaayo ta nga makita pag-usab ang atong mga minahal dihang banhawon sila gikan sa “handomanang mga lubnganan.” (Juan 5:28, 29) Unsa nga milagro ang gikahinaman nimo pag-ayo sa bag-ong kalibotan?

⁸ Dihang naghimog mga milagro si Jesus, iyang gipakita nga mapainubsanon kaayo siya ug maluluy-on​—mga hiyas nga angay natong sundogon. Maghisgot tag duha ka pananglitan. Unahon nato ang nahitabo sa kombira sa kasal sa Cana.

9. Unsay gihimo ni Jesus sa kombira sa kasal? (Juan 2:6-10)

⁹ Basaha ang Juan 2:6-10. Dihang nahurot ang bino sa kombira sa kasal, dili obligado si Jesus nga maghimog milagro. Ngano? Kay walay tagna diha sa Bibliya nga ang Mesiyas milagrosong maghimog bino. Pero hunahunaa ang imong bation kon imo tong kasal ug nahutdan mog ilimnon. Naluoy gyod tingali si Jesus sa pamilya, ilabina sa gikasal, ug dili  niya gusto nga maulawan sila. Busa sumala sa gihisgotan sa sinugdan, naghimo siyag milagro. Ang tubig​—nga mga 390 ka litro (103 ka galon)—​gihimo niyang maayo kaayong bino. Tingali naghimo siyag ingon adto ka daghang bino aron ang mabilin magamit pa sa sunod higayon o mabaligya pa gani sa bag-ong gikasal. Seguradong mapasalamaton kaayo ang bag-ong magtiayon!

10. Unsa ang pipila sa makapainteres nga detalye nga narekord sa Juan kapitulo 2? (Tan-awa sab ang hulagway.)

¹⁰ Hunahunaa ang pipila ka makapainteres nga detalye nga narekord sa Juan kapitulo 2. Namatikdan ba nimo nga dili si Jesus ang nagpunog tubig sa mga banga? Ang mga sulugoon ang iyang gisugo nga magpuno sa mga banga aron dili maadto kaniya ang atensiyon sa mga tawo. (Bersikulo 6, 7) Ug dihang ang tubig nahimo na niyang bino, dili si Jesus ang naghatod ug bino ngadto sa tigdumala sa kombira. Hinuon, iyang gisugo ang mga sulugoon sa paghimo ana. (Bersikulo 8) Seguradong wala ipataas ni Jesus ang baso sa bino atubangan sa mga bisita ug nanghambog, ‘Tilawi ang bino nga bag-o lang nakong gihimo!’

11. Unsay atong makat-onan sa milagro ni Jesus?

¹¹ Unsay atong makat-onan sa milagro nga gihimo ni Jesus? Makakat-on tag leksiyon bahin sa pagkamapainubsanon. Wala manghambog si Jesus sa iyang gihimo; gani, wala gyod siya manghambog sa bisan unsa nga iyang nalampos. Hinuon, mapainubsanon ug balikbalik niyang gihatag ang tanang himaya ug pasidungog ngadto sa iyang Amahan. (Juan 5:19, 30; 8:28) Masundog nato ang pagkamapainubsanon ni Jesus kon balanse tag panglantaw sa kaugalingon ug dili ta manghambog sa atong mga nalampos. Bisag unsay atong mahimo sa pag-alagad kang Jehova, manghambog ta dili sa atong kaugalingon, kondili sa gamhanang Diyos nga atong gialagaran. (Jer. 9:23, 24) Ihatag nato ang pasidungog nga angay kaniya. Kay kon buot hunahunaon, unsa may atong mahimo kon wala ang tabang ni Jehova?​—1 Cor. 1:26-31.

12. Unsa pay laing paagi nga masundog nato ang pagkamapainubsanon ni Jesus? Paghatag ug pananglitan.

¹² Konsideraha ang laing paagi nga masundog nato ang pagkamapainubsanon ni Jesus. Ibutang ta nga naay usa ka ansiyano nga naggahin ug dakong panahon aron tabangan ang batan-ong ministeryal nga alagad sa iyang unang pakigpulong publiko. Ingong resulta, ang batan-ong brader nakahatag ug maayong pakigpulong ug nadasig ang kongregasyon. Human sa tigom, naay miduol sa ansiyano ug miingon nga maayo kaayo ang pakigpulong sa batan-ong brader. Kinahanglan bang moingon ang ansiyano: ‘Aw, oo. Dugay god nako siyang gitabangan’? O mapainubsanon ba siyang moingon: ‘Bitaw. Maayo kaayo iyang pakigpulong’? Kon mapainubsanon ta, dili ta magdahom nga pasidunggan ta sa maayong mga butang nga atong gihimo para sa uban. Kontento na ta kay nahibalo ta nga nakita ug gipabilhan ni Jehova ang atong mga gihimo. (Itandi ang Mateo 6:2-4; Heb. 13:16) Seguradong malipay si Jehova kon atong sundogon ang pagkamapainubsanon ni Jesus.​—1 Ped. 5:6.

13. Unsay nakita ni Jesus duol sa siyudad sa Nain, ug unsay iyang gihimo? (Lucas 7:11-15)

¹³ Basaha ang Lucas 7:11-15. Imadyina ang nahitabo panahon sa ministeryo ni Jesus. Mibiyahe siya paingon sa Nain, usa ka siyudad sa Galilea nga duol sa Sunem, diin gibanhaw ni  propetang Eliseo ang anak sa usa ka babaye mga 900 ka tuig na ang milabay. (2 Hari 4:32-37) Samtang nagkaduol si Jesus sa ganghaan, nakakita siyag mga tawo nga nagdayong ug patay pagawas sa siyudad. Makapaguol kaayo ang esena​—namatay ang bugtong anak sa usa ka biyuda. Pero ang naghilak nga inahan wala mag-inusara. Kauban niya ang daghang tawo gikan sa siyudad. Gipahunong sila ni Jesus, ug dayon naa siyay talagsaong gihimo para sa naguol nga inahan​—gibanhaw niya ang anak sa biyuda! Kini ang una sa tulo ka pagkabanhaw nga gihimo ni Jesus nga espesipikong gihisgotan sa Ebanghelyo.

14. Unsa ang pipila ka makapainteres nga detalye nga narekord sa Lucas kapitulo 7? (Tan-awa sab ang hulagway.)

¹⁴ Konsideraha ang pipila ka makapainteres nga detalye sa Lucas kapitulo 7. Matikdi nga “pagkakita” ni Jesus sa naguol nga inahan, siya “naluoy” kaniya. (Bersikulo 13) Busa ang nakita ni Jesus​—tingali ang paghilak sa inahan samtang gidayongan ang patayng lawas sa iyang anak—​nakatandog pag-ayo sa iyang kasingkasing. Pero wala lang mobatig kaluoy si Jesus sa inahan; iyang gipakita ang iyang kaluoy. Nakig-estorya si Jesus kaniya ug giingnan siya sa makapahupayng tingog: “Ayaw nag hilak.” Dayon naa siyay gihimo aron tabangan ang inahan. Gibanhaw ni Jesus ang iyang anak ug “gihatag siya . . . sa iyang inahan.”​—Bersikulo 14, 15.

15. Unsay atong makat-onan sa milagro ni Jesus?

¹⁵ Unsay atong makat-onan sa pagbanhaw ni Jesus sa anak sa biyuda? Makat-onan nato nga kinahanglan tang magpakitag kaluoy o empatiya sa mga namatyan. Siyempre, dili ta makabanhaw ug mga patay sama kang Jesus. Pero masundog nato ang kaluoy ni Jesus sa mga namatyan kon abtik tang maniid. Makapakita tag empatiya pinaagi sa pagsulti ug paghimog mga butang nga makatabang ug makahupay nila. d (Prov. 17:17; 2 Cor. 1:3, 4; 1 Ped. 3:8) Bisan ang simpleng mga pulong ug buhat makadasig ug makahupay kaayo nila.

16. Unsay imong nakat-onan sa eksperyensiya sa inahan nga bag-o lang namatyag anak? (Tan-awa sab ang hulagway.)

 ¹⁶ Konsideraha ang usa ka eksperyensiya. Pipila ka tuig kaniadto, naay sister nga nakamatikod nga naghilak ang usa ka inahan samtang nanganta ang kongregasyon panahon sa tigom. Ang kanta naghisgot bahin sa pagkabanhaw, ug ang inahan bag-o lang namatyag anak nga babaye. Kay ang sister nahibalo niana, giadto dayon niya ang inahan, gihapohap siya, ug gikuyogan sa pagkanta. Ang inahan sa ulahi miingon: “Naapresyar gyod nako ang mga igsoon.” Nalipay kaayo siya nga mitambong siya sa tigom. “Makadawat gyod tag tabang diha sa Kingdom Hall,” siya miingon. Makaseguro ta nga nakita ug gipabilhan ni Jehova bisan ang simpleng mga butang nga atong gihimo aron magpakitag empatiya sa mga namatyan nga “naluya ang buot.”​—Sal. 34:18.

17. Unsay atong nakat-onan niining artikuloha?

¹⁷ Makapadasig gyod ang pagtuon bahin sa mga milagro ni Jesus nga mabasa sa Ebanghelyo. Nagtudlo ni nato nga gimahal ta pag-ayo ni Jehova ug Jesus, nga si Jesus naay gahom sa pagsulbad sa tanang problema sa mga tawo, ug nga hapit nang matuman ang gisaad nga mga panalangin sa Gingharian. Samtang atong tun-an ang maong mga milagro, atong pamalandongon kon unsaon nato pagsundog ang mga hiyas ni Jesus. Puwede nimong tun-an ang ubang milagro ni Jesus sa imong personal nga pagtuon o sa inyong pamilyahanong pagsimba. Susiha kon unsang mga leksiyon ang imong makat-onan ug isulti kana sa uban. Makapadasig gyod ang ingon ana nga mga panag-estoryahay!​—Roma 1:11, 12.

18. Unsay atong hisgotan sa sunod nga artikulo?

¹⁸ Ang ikatulo ug kataposang pagkabanhaw nga gihimo ni Jesus nahitabo sa hapit nang matapos ang iyang ministeryo. Pero niining higayona, suod niya nga higala ang iyang gibanhaw ug talagsaon pa gyod ang kahimtang. Unsang mga leksiyon ang atong makat-onan niana nga milagro? Ug unsaon nato pagpalig-on ang atong pagtuo sa pagkabanhaw? Hisgotan sa sunod nga artikulo ang tubag niana nga mga pangutana.