1. Unsay giingon sa usa ka bata nga nagpakita nga nagtuo gyod siya sa pagkabanhaw?

 ANG bata nga si Matthew naay grabeng sakit ug kadaghan nang naoperahan. Niadtong siyete anyos pa si Matthew, siya ug ang iyang pamilya nagtan-aw ug programa sa JW Broadcasting^®. Sa hapit nang mahuman ang programa, nakakita silag music video bahin sa pag-abiabi sa mga minahal nga gibanhaw. b Human sa programa, giduol ni Matthew ang iyang ginikanan, gigunitan ang ilang kamot, ug miingon: “Di ba Ma, Pa? Bisan pag mamatay ko, mabuhi ra ko pag-usab. Hulata lang ko; ma-okey ra ang tanan.” Ma-imagine ba ninyo ang gibati sa iyang ginikanan dihang nakita nila nga tinuod kaayo para sa ilang anak ang paglaom sa pagkabanhaw?

2-3. Nganong maayo nga mamalandong ta sa saad nga pagkabanhaw?

² Maayong mamalandong ta kanunay sa saad sa Bibliya nga pagkabanhaw. (Juan 5:28, 29) Ngano? Kay wala ta mahibalo sa posibleng mahitabo. Basig masakit ta ug mameligro ang atong kinabuhi, o kaha kalit tang mamatyag minahal. (Eccl. 9:11; Sant. 4:13, 14) Ang atong paglaom sa pagkabanhaw makatabang nga malahutay nato ang maong mga kalisdanan. (1 Tes. 4:13) Gipasaligan ta sa Bibliya nga ang atong langitnong Amahan nakaila pag-ayo nato ug gimahal ta niya pag-ayo. (Luc. 12:7) Hunahunaa kon unsa ka personal ang iyang pagkaila nato nga kaya niyang ibalik ang atong personalidad ug ang tanan natong memorya. Ug gimahal ta pag-ayo ni Jehova mao nga gihatagan ta niyag kahigayonan nga mabuhi hangtod sa hangtod. Banhawon pa gani ta niya kon gikinahanglan!

³ Niining artikuloha, hisgotan nato kon nganong makatuo ta sa saad nga pagkabanhaw. Dayon atong susihon ang makapalig-on  sa pagtuo nga asoy sa Bibliya diin mabasa ang atong temang teksto: “Mabanhaw ang imong igsoon.” (Juan 11:23) Makat-onan pod nato kon unsay atong buhaton aron mahimong mas tinuod kanato ang paglaom sa pagkabanhaw.

4. Aron makatuo sa usa ka saad, sa unsa ta angayng kombinsido? Paghatag ug pananglitan.

⁴ Aron makatuo sa usa ka saad, kinahanglang kombinsido ta nga gusto sa nagsaad nga tumanon ang iyang gisulti. Kinahanglang kombinsido pod ta nga naa siyay gahom o kaya niya nang tumanon. Pananglitan, imadyina nga ang imong balay naguba sa bagyo. Ang imong higala miduol nimo ug misaad, ‘Tabangan tikag tukod pag-usab sa imong balay.’ Sinsero siya, ug kombinsido ka nga gusto gyod siyang motabang. Kon maayo siya nga panday ug naa siyay mga tools, kabalo ka nga kaya pod ka niyang tabangan. Tungod ana, mituo ka sa iyang saad. Komosta ang saad sa Diyos bahin sa pagkabanhaw? Gusto ba gyod na niyang buhaton, ug naa ba gyod siyay gahom sa pagtuman niana?

5-6. Nganong makaseguro ta nga gusto gyong banhawon ni Jehova ang mga patay?

⁵ Gusto ba gyod ni Jehova nga banhawon ang mga patay? Siyempre. Iyang gigiyahan ang daghang magsusulat sa Bibliya sa pagsulat bahin sa iyang saad nga pagkabanhaw. (Isa. 26:19; Os. 13:14; Pin. 20:11-13) Ug dihang mosaad si Jehova, iya gyod nang tumanon. (Jos. 23:14) Gani, si Jehova naghinamhinam sa pagbanhaw sa mga patay. Nganong makaingon ta ana?

⁶ Konsideraha ang giingon ni Job. Segurado si Job nga bisan pag mamatay siya, si Jehova mangandoy nga makita siya pag-usab nga buhi. (Job 14:14, 15) Ingon ana pod ang pagbati ni Jehova sa tanan niyang alagad nga namatay. Naghinamhinam siya nga banhawon sila nga himsog ug malipayon. Komosta ang binilyon nga namatay nga wala makabatog kahigayonan nga makakat-on bahin kang Jehova? Gusto pod silang banhawon sa atong mahigugmaong Diyos. (Buh. 24:15) Gusto niya silang hatagag kahigayonan nga mahimong iyang mga higala ug mabuhi sa yuta hangtod sa hangtod. (Juan 3:16) Klaro nga gusto gyod ni Jehova nga banhawon ang mga patay.

7-8. Nganong makaseguro ta nga si Jehova naay gahom sa pagbanhaw sa mga patay?

⁷ Naa pod bay gahom si Jehova nga banhawon ang mga patay? Siyempre! Siya ang “Labing Gamhanan.” (Pin. 1:8) Busa kaya niyang pildihon ang bisan unsang kaaway, bisan ang kamatayon. (1 Cor. 15:26) Makapalig-on ug makapahupay gyod ang pagkahibalo niana. Konsideraha ang eksperyensiya ni Sister Emma Arnold. Siya ug ang iyang pamilya nakaatubang ug grabeng mga pagsulay niadtong Gubat sa Kalibotan II. Namatyan silag mga minahal sa kampo konsentrasyon sa Nazi. Aron hupayon ang iyang anak, si Emma miingon: “Kon ang mga namatay dili mabanhaw, nagpasabot na nga ang kamatayon mas gamhanan kay sa Diyos. Pero tinuod ba na?” Wala gyoy mas gamhanan pa kang Jehova! Ang labing gamhanang Diyos nga maoy naghatag sa kinabuhi makahimo sa pagbalik sa kinabuhi niadtong mga namatay.

⁸ Naa pay laing rason kon nganong makasalig ta nga ang Diyos makabanhaw gyod sa mga patay. Walay limitasyon ang memorya ni Jehova. Ang tanang bituon gitawag niya sa ilang ngalan. (Isa. 40:26) Dili pod siya malimot sa mga namatay. (Job 14:13; Luc. 20:37, 38) Mahinumdom siya bisan sa kinagamyang detalye niadtong iyang banhawon, apil ang ilang hitsura, personalidad, mga eksperyensiya, ug memorya.

9. Nganong nagtuo ka sa saad ni Jehova nga pagkabanhaw?

⁹ Klaro nga makasalig ta sa saad ni Jehova nga pagkabanhaw kay nahibalo ta nga gusto ug  kaya na niyang tumanon. Nia pay laing rason nga makasalig ta sa saad sa Diyos nga pagkabanhaw: Nahimo na kini ni Jehova. Sa kapanahonan sa Bibliya, daghang matinumanong tawo, apil si Jesus, ang gihatagan niyag gahom sa pagbanhawg mga patay. Susihon nato ang pagbanhaw nga gihimo ni Jesus nga narekord sa Juan kapitulo 11.

10. Unsay nahitabo samtang nagsangyaw si Jesus sa tabok sa Jordan atbang sa Betania, ug unsay iyang gihimo? (Juan 11:1-3)

¹⁰ Basaha ang Juan 11:1-3. Imadyina ang nahitabo sa Betania sa hinapos sa 32 C.E. Si Jesus naay suod nga mga higala niining lugara​—si Lazaro ug ang iyang duha ka igsoon, si Maria ug Marta. (Luc. 10:38-42) Pero nasakit si Lazaro, ug nabalaka ang iyang mga igsoon. Nagpadala silag mensahe kang Jesus nga tua sa tabok sa Jordan, nga mga duha ka adlaw baktason gikan sa Betania. (Juan 10:40) Makapaguol kay namatay si Lazaro niadtong mga orasa nga miabot ang mensahero kang Jesus. Pero bisag nahibalo si Jesus nga namatay na ang iyang higala, nagpabilin siya didto ug duha pa ka adlaw ayha siya mibiyahe paingon sa Betania. Maong pag-abot ni Jesus sa Betania, upat ka adlaw nang patay si Lazaro. Pero naay planong buhaton si Jesus nga makahatag ug kaayohan sa iyang mga higala ug makahimaya sa Diyos.​—Juan 11:4, 6, 11, 17.

11. Unsang leksiyon bahin sa pagkahimong maayong higala ang atong makat-onan niini nga hitabo?

¹¹ Naa tay makat-onan niini nga hitabo bahin sa pagkahimong maayong higala. Hunahunaa ni: Dihang si Maria ug Marta nagpadalag mensahe kang Jesus, wala sila mohangyo nga moadto si Jesus sa Betania. Igo lang silang miingon nga nasakit ang iyang suod nga higala. (Juan 11:3) Dihang namatay si Lazaro, puwede ra unta siyang banhawon ni Jesus bisan sa layo. Pero midesisyon si Jesus nga moadto sa Betania aron makauban ang iyang mga higala nga si Maria ug Marta. Naa ba kay higala nga andam motabang nimo bisag wala ka mohangyo? Nahibalo ka nga makasalig ka sa iyang tabang “panahon sa kalisdanan.” (Prov. 17:17) Sama kang Jesus, hinaot nga ingon ana pod ta nga klase sa higala. Karon, hisgotan natog balik ang asoy ug tan-awon kon unsay sunod nga nahitabo.

12. Unsay gisaad ni Jesus kang Marta, ug nganong makasalig siya niini nga saad? (Juan 11:23-26)

¹² Basaha ang Juan 11:23-26. Nahibaloan ni Marta nga duol na si Jesus sa Betania. Gisugat dayon niya si Jesus ug miingon: “Ginoo, kon dinhi pa ka, dili unta mamatay ang akong igsoon.” (Juan 11:21) Tinuod, kayang ayohon ni Jesus si Lazaro, pero labaw pa niana ang gusto niyang himoon. Siya misaad: “Mabanhaw ang imong igsoon.” Gihatagan pod niyag dugang rason si Marta nga mosalig sa iyang saad pinaagi sa pag-ingon: “Ako ang pagkabanhaw ug ang kinabuhi.” Oo, gihatagan siya sa Diyos ug gahom sa pagbanhaw sa mga patay. Una pa niana, gibanhaw niya ang usa ka dalagita wala madugay human kini mamatay. Gibanhaw pod niya ang usa ka batan-ong lalaki, posibleng sa adlaw nga namatay kini. (Luc. 7:11-15; 8:49-55) Pero kaya kaha niyang banhawon ang tawo nga upat  ka adlaw nang patay ug ang lawas nagsugod nag kadugta?

13. Sumala sa Juan 11:32-35, unsay gibati ni Jesus dihang nakita niya si Maria ug ang uban nga naghilak? (Tan-awa sab ang hulagway.)

¹³ Basaha ang Juan 11:32-35. Imadyina ang sunod nga nahitabo. Si Maria, ang laing igsoon ni Lazaro, misugat kang Jesus. Iyang gibalik ang giingon ni Marta: “Ginoo, kon dinhi pa ka, dili unta mamatay ang akong igsoon.” Siya ug ang iyang mga kauban naguol pag-ayo. Dihang nakita ug nadungog ni Jesus ang ilang paghilak, naguol siya pag-ayo. Naluoy kaayo siya sa iyang mga higala maong mihilak siya. Nakasabot siya kon unsa ka sakit nga mamatyag minahal. Seguradong gusto kaayo niyang wad-on ang hinungdan sa ilang paghilak!

14. Unsay atong makat-onan bahin kang Jehova sa reaksiyon ni Jesus sa paghilak ni Maria?

¹⁴ Ang reaksiyon ni Jesus sa paghilak ni Maria nagtudlo nato nga si Jehova maluluy-on kaayo nga Diyos. Nganong makaingon ta ana? Sa ato nang nakat-onan sa miaging artikulo, ang pagbati ug panghunahuna ni Jesus parehas gyod sa iyang Amahan. (Juan 12:45) Ug dihang mabasa nato nga si Jesus naluoy pag-ayo sa iyang naguol nga mga higala ug mihilak pa gani, makaingon pod ta nga si Jehova maluoy pod kaayo nato dihang makita ta niya nga mohilak tungod sa kaguol. (Sal. 56:8) Di ba magpalihok ni nimo nga mas makigsuod sa atong maluluy-on nga Diyos?

15. Sumala sa Juan 11:41-44, unsay nahitabo didto sa lubnganan ni Lazaro? (Tan-awa sab ang hulagway.)

¹⁵ Basaha ang Juan 11:41-44. Si Jesus miabot sa lubnganan ni Lazaro ug iyang gipakuha ang bato nga nagtabon sa lubnganan. Pero wala mouyon si Marta. Miingon siya nga ang lawas ni Lazaro baho na. Si Jesus mitubag: “Dili ba gisultihan ka nako nga kon motuo ka imong makita ang himaya sa Diyos?” (Juan 11:39, 40) Unya si Jesus mihangad sa langit ug miampo, nga nadungog sa mga tawo didto. Gusto niya nga si Jehova ang madayeg sa sunod nga mahitabo. Dayon siya misinggit: “Lazaro, gula ngari!” Ug si Lazaro migula sa lubnganan! Gibanhaw ni Jesus si Lazaro, nga para sa uban imposible kaayong mahitabo.—Tan-awa ang study note sa Juan 11:17.

16. Nganong ang Juan kapitulo 11 makapalig-on sa atong pagtuo sa pagkabanhaw?

 ¹⁶ Ang atong mabasa sa Juan kapitulo 11 makapalig-on sa atong pagtuo sa pagkabanhaw. Ngano? Hinumdomi ang saad ni Jesus kang Marta: “Mabanhaw ang imong igsoon.” (Juan 11:23) Sama sa iyang Amahan, gustong tumanon ni Jesus ang maong saad, ug kaya na niyang himoon. Ang iyang paghilak nagpakita nga gusto gyod niyang wad-on ang kamatayon ug ang kaguol nga resulta niini. Ug dihang migawas si Lazaro sa lubnganan, gipamatud-an na pod ni Jesus nga naa siyay gahom sa pagbanhawg mga patay. Hunahunaa pod ang gipahinumdom ni Jesus kang Marta: “Dili ba gisultihan ka nako nga kon motuo ka imong makita ang himaya sa Diyos?” (Juan 11:40) Naa gyod tay lig-ong mga rason nga mosalig nga matuman ang saad sa Diyos nga pagkabanhaw. Pero unsay atong buhaton aron mahimong mas tinuod kanato kini nga paglaom?

17. Unsay angay natong hinumdoman dihang magbasa tag mga asoy sa Bibliya bahin sa pagkabanhaw?

¹⁷ Basaha ug pamalandonga ang mga pagkabanhaw nga nahitabo kaniadto. Mabasa sa Bibliya ang walo ka pagkabanhaw nga nahitabo dinhi sa yuta. c Puwede nimong tun-an pag-ayo ang kada usa niana. Ug samtang magtuon ka, hinumdomi nga tinuod sila nga mga tawo—mga lalaki, babaye, ug bata. Pangitag mga leksiyon nga imong makat-onan. Hunahunaa kon sa unsang paagi ang matag usa niana nga mga pananglitan nagpakita nga gusto kaayo sa Diyos nga banhawon ang mga patay ug nga naa gyod siyay gahom sa pagbuhat niana. Labaw sa tanan, pamalandonga ang pinakaimportanteng pagkabanhaw—ang pagkabanhaw ni Jesus. Hinumdomi nga ang iyang pagkabanhaw nakita sa gatosan ka tawo ug naghatag ug lig-ong basehanan sa atong pagtuo.—1 Cor. 15:3-6, 20-22.

18. Unsay imong buhaton aron mapahimuslan nimo ang atong mga awit bahin sa pagkabanhaw? (Tan-awa sab ang footnote.)

 ¹⁸ Pahimusli ang “espirituwal nga mga awit” nga naghisgot sa paglaom sa pagkabanhaw. d (Efe. 5:19) Kini nga mga awit makatabang nga mahimong mas tinuod kanato ang pagkabanhaw ug makapalig-on sa atong pagtuo niining bililhon nga paglaom. Paminawa ni nga mga awit, praktisa ni, ug hisgoti ang kahulogan sa lyrics panahon sa inyong pamilyahanong pagsimba. I-memorize ang mga lyrics ug itisok ni sa imong hunahuna ug kasingkasing. Ug kon makaatubang kag pagsulay nga makapameligro sa imong kinabuhi o kaha mamatyan kag minahal, ang espiritu ni Jehova motabang nimo nga mahinumdom niini nga mga awit, nga makapahupay ug makapalig-on nimo.

19. Unsay puwede natong imadyinon bahin sa pagkabanhaw? (Tan-awa ang kahong “ Unsay Imong Ipangutana Nila?”)

¹⁹ Gamita ang imong imahinasyon. Gihatagan ta ni Jehova ug katakos nga ma-imagine ang atong kaugalingon sa bag-ong kalibotan. Ang usa ka sister miingon: “Sa sige nakog imagine sa akong kaugalingon sa bag-ong kalibotan, morag masimhotan na god nako ang humot nga mga bulak sa Paraiso.” Imadyina nga makita na nimo ang matinumanong mga lalaki ug babaye nga gihisgotan sa Bibliya. Kinsay gusto kaayo nimong makita? Unsay imong ipangutana niya? Imadyina pod nga makauban na nimo pag-usab ang imong namatay nga mga minahal. Hunahunaa kon unsa unyay mahitabo sa inyong reunion—ang imong unang isulti, ang hugot nga mga gakos, ug ang mga luha sa kalipay.

20. Unsay angay natong determinasyon?

²⁰ Mapasalamaton kaayo ta sa saad ni Jehova nga pagkabanhaw! Makasalig ta nga matuman gyod ni nga saad, kay gusto kaayo ning buhaton ni Jehova ug naa gyod siyay gahom nga himoon kini. Hinaot nga magmadeterminado ta nga padayong palig-onon ang atong pagtuo niining bililhon nga paglaom. Kon ato nang buhaton, mas masuod pa gyod ta sa atong Diyos kinsa nagsaad sa matag usa kanato, ‘Mabanhaw ang imong mga minahal!’