1. Nganong mokomento ta sa mga tigom?

 NGANONG motambong ta sa mga tigom? Una, aron madayeg si Jehova. (Sal. 26:12; 111:1) Motambong pod ta sa mga tigom aron madasig nato ang usag usa niining lisod nga mga panahon. (1 Tes. 5:11) Dihang moisa ta sa atong kamot ug mokomento, mahimo nato ning duha ka butang.

2. Kanus-a ta makakomento sa atong mga tigom?

² Kada semana, naa tay mga kahigayonan nga mokomento sa atong mga tigom. Pananglitan, sa hinapos sa semana, makakomento ta panahon sa Pagtuon sa Bantayanang Torre. Sa atong midweek nga mga tigom, makakomento ta sa Espirituwal nga mga Bahandi, Pagtuon sa Kongregasyon sa Bibliya, ug sa ubang bahin nga naay pangutanag tubag.

3. Nganong maglisod tingali ta sa paghatag ug komento, ug sa unsang paagi ang Hebreohanon 10:24, 25 makatabang nato?

³ Gusto natong tanan nga madayeg si Jehova ug madasig ang mga igsoon. Pero naa tingali makapugong nato sa paghatag ug komento. Basin kulbaan tang mokomento, o kaha gusto kaayo tang mokomento pero panagsa ra tang matawag. Unsay makatabang nato? Makatabang nato ang sulat ni apostol Pablo sa mga Hebreohanon. Gihisgotan niya kon unsa ka importante ang panagkatigom, ug siya miingon nga angay tang magpokus ‘sa pagdasig sa usag usa.’ (Basaha ang Hebreohanon 10:24, 25.) Dihang hinumdoman nato nga madasig ang mga nanambong bisan sa atong simpleng komento nga nagpakita sa atong pagtuo, madugangan ang atong kompiyansa nga mokomento. Ug kon dili ta pirmeng  matawag, malipay gihapon ta nga ang uban nakakomento.​—1 Ped. 3:8.

4. Unsang tulo ka punto ang hisgotan niini nga artikulo?

⁴ Niining artikuloha, unahon nato paghisgot kon sa unsang paagi madasig nato ang usag usa diha sa gamayng kongregasyon diin diyutay ra ang mokomento. Sunod, atong susihon kon unsaon nato pagdasig ang usag usa diha sa dakong kongregasyon diin daghan ang gustong mokomento. Dayon, atong hisgotan kon unsay atong mahimo aron ang atong mga komento tinuod nga makapadasig sa uban.

5. Unsaon nato pagdasig ang usag usa kon gamay ra ang nanambong?

⁵ Sa gamayng kongregasyon o grupo, ang tigdumala gamay rag kapilian sa mga mokomento. Usahay, kinahanglan tingali siyang maghulat nga naay moisa sa ilang kamot. Basin mahimong dugay ug laay ang tigom, nga dili kaayo makapadasig. Unsay imong mahimo? Puwede kang maningkamot nga moisa pirme sa imong kamot. Kon imo ning buhaton, posibleng madasig nimo ang uban nga mokomento pirme.

6-7. Unsay puwede natong himoon aron dili kaayo ta kulbaan nga mokomento?

⁶ Komosta kon makulbaan kaayo kang mokomento? Daghan ang mibati ana. Pero aron mas makadasig ka sa mga igsoon, puwede kang mangitag paagi aron dili kaayo ka makulbaan. Unsaon nimo na paghimo?

⁷ Makatabang ang pag-review sa mga sugyot nga gihisgotan sa nangaging mga isyu sa Bantayanang Torre. b Pananglitan, pangandam pag-ayo. (Prov. 21:5) Kon mas pamilyar ka sa tun-anan, mas naa kay kompiyansa nga mokomento. Dugang pa, mub-a lang ang imong komento. (Prov. 15:23; 17:27) Kon mubo ang imong tubag, dili kaayo ka kulbaan. Ang mubo nga komento, nga tingali usa o duha lang ka sentence, mas sayon sabton kay sa taas nga komento nga daghan kaayog punto. Kon mohatag kag mubong komento sa imong kaugalingong mga pulong, mapakita nimo nga nangandam ka pag-ayo ug nakasabot gyod ka sa tun-anan.

8. Unsay panglantaw ni Jehova sa atong sinserong mga paningkamot?

⁸ Komosta kon gihimo na nimo ni nga mga sugyot pero kulbaan gihapon kang mohatag ug kapin sa usa o duha ka komento? Makaseguro ka nga maapresyar ni Jehova ang imong sinserong mga paningkamot nga himoon ang imong maarangan. (Luc. 21:1-4) Gusto ni Jehova nga himoon nimo ang imong kinamaayohan, pero wala na magpasabot nga himoon nimo ang labaw kay sa imong makaya. (Filip. 4:5) Susiha kon unsay kaya nimong buhaton, paghimog tumong, ug pag-ampo nga hatagan kag kalmadong kasingkasing. Sa sinugdan, puwede nimong himoong tumong nga mohatag ug usa ka mubong komento.

9. Unsa tingali kahimtang diha sa dagkong kongregasyon?

⁹ Kon ang inyong kongregasyon daghag magmamantala, lahi tingali ang kahimtang. Basin daghang igsoon ang mopataas sa ilang kamot maong dili ka pirmeng matawag. Pananglitan, si Danielle ganahan kaayong  mokomento panahon sa tigom. c Giisip ni niya nga bahin sa iyang pagsimba ug paagi nga madasig niya ang uban ug mapalig-on ang iyang pagtuo sa mga kamatuoran sa Bibliya. Pero pagbalhin niya sa mas dakong kongregasyon, panagsa na lang kaayo siya matawag​—usahay di gani siya makakomento sa tibuok tigom. Siya miingon, “Maguol gyod ko kay morag naay pribilehiyo nga wala mahatag sa ako. Dihang pirme nang mahitabo, maghunahuna na ko kon gituyo ba na.”

10. Unsay puwede natong himoon aron makakomento gyod ta sa tigom?

¹⁰ Parehas ba mog gibati ni Danielle? Kon oo, basin maghunahuna ka nga di na lang mokomento ug maminaw na lang sa tigom. Pero ayaw padala sa imong gibati ug paningkamot gihapon nga mokomento. Unsay imong mahimo? Puwede kang mag-andam ug pipila ka komento kada tigom. Kon dili ka matawag sa unang mga parapo, makakomento gihapon ka sa sunod nga mga parapo. Dihang mangandam sa Pagtuon sa Bantayanang Torre, hunahunaa kon unsay koneksiyon sa matag parapo sa katibuk-ang tema sa artikulo. Kon imo nang himoon, makaandam kag maayong mga komento sa tibuok pagtuon. Puwede pod kang mag-andam ug komento sa mga parapo nga naghisgot sa lawom nga mga kamatuoran nga mas lisod ipatin-aw. (1 Cor. 2:10) Ngano? Kay gamay ra tingali ang mokomento nianang mga parapoha. Pero unsay imong buhaton kon gihimo na nimo ni nga mga sugyot ug wala gihapon ka matawag sa pipila na ka tigom? Sa dili pa magsugod ang tigom, puwede nimong duolon ang tigdumala ug sultihi siya kon asa nga parapo ka gustong motubag.

11. Unsay gidasig sa Filipos 2:4 nga atong buhaton?

¹¹ Basaha ang Filipos 2:4. Ubos sa paggiya sa Diyos, gidasig ni apostol Pablo ang mga Kristohanon nga hunahunaon ang kaayohan sa uban. Unsaon nato na pagpadapat panahon sa tigom? Atong hinumdoman nga sama nato, ang uban gusto pong mokomento.

12. Unsa ang usa ka maayong paagi nga madasig nato ang uban panahon sa tigom? (Tan-awa sab ang hulagway.)

 ¹² Hunahunaa ni. Dihang kauban nimo ang imong mga higala, ikaw ra bay magsigeg estorya? Siyempre dili! Gusto nimo nga naa pod silay higayon nga makaestorya. Ingon ana pod sa mga tigom. Gusto nato nga daghan pa ang makakomento. Gani, ang usa sa pinakamaayong paagi nga madasig nato ang mga igsoon mao ang paghatag nilag higayon nga mapahayag ang ilang pagtuo. (1 Cor. 10:24) Atong hisgotan kon unsaon nato na paghimo.

13. Unsay atong mahimo aron mas daghan ang makakomento?

¹³ Una, mohatag tag mubo lang nga mga komento aron naa pay panahon ang uban nga makakomento. Ang mga ansiyano ug ubang eksperyensiyadong magmamantala makahatag ug maayong ehemplo niining bahina. Bisag mubo ra ang imong komento, likayi ang paghisgot ug daghan kaayong punto. Kon hutdon nimog hisgot ang parapo, wala nay ikakomento ang uban. Pananglitan, niining parapoha, naay duha ka sugyot nga gihisgotan​—paghatag ug mubong komento ug likayi ang paghisgot ug daghan kaayong punto. Kon ikaw ang unang matawag niini nga parapo, puwede ba kang maghisgot ug usa lang ka punto?

14. Unsay atong konsiderahon dihang modesisyon kon kapila ta mopataas sa atong kamot? (Tan-awa sab ang hulagway.)

¹⁴ Maayong konsiderahon pod kon kapila ta mopataas sa atong kamot. Kon magsige tag pataas, basin mapresyur ang tigdumala nga tawgon ta pirme bisag wala pa makakomento ang uban. Tungod ani, basin mawad-an nag gana ang uban nga moisa sa ilang kamot.​—Eccl. 3:7.

15. (a) Unsay angay natong reaksiyon kon dili ta matawag? (b) Unsay angayng himoon sa mga tigdumala aron makapakitag konsiderasyon sa tanan ug daghan ang makakomento? (Tan-awa ang kahong “ Kon Ikaw ang Nagdumala.”)

¹⁵ Kon daghan ang mopataas sa ilang kamot  panahon sa pagtuon, panagsa ra tingali tang makakomento. Usahay, basig dili pa gani ta matawag sa tigdumala. Maguol tingali ta, pero dili ta angayng mahiubos kon dili ta matawag.​—Eccl. 7:9.

16. Unsaon nato pagdasig ang mga mikomento?

¹⁶ Kon panagsa ra kang matawag sa tigdumala, paminaw pag-ayo sa komento sa uban aron mapasalamatan nimo sila human sa tigom. Bisag wala ka makakomento, madasig gihapon nimo ang mga igsoon pinaagi sa imong komendasyon. (Prov. 10:21) Ang paghatag ug komendasyon maoy laing paagi nga makadasig ta sa uban.

17. (a) Unsaon pagtabang sa mga ginikanan ang ilang mga anak sa pag-andam ug haom nga mga komento? (b) Sumala sa video, unsa ang upat ka paagi sa pag-andam ug komento? (Tan-awa sab ang footnote.)

¹⁷ Unsay laing paagi nga makadasig ta sa uban panahon sa tigom? Kon ginikanan ka, tabangi ang imong gagmayng mga anak sa pag-andam ug mga komento nga haom sa ilang edad. (Mat. 21:16) Usahay, hisgotan panahon sa pagtuon ang seryosong mga butang, sama sa problema sa magtiayon o mga buhat nga gidumtan sa Diyos, pero naa tingali mga parapo nga makakomento ang  mga bata. Tabangi sab ang imong mga anak nga masabtan kon nganong naay mga panahon nga dili sila matawag dihang moisa sila sa ilang kamot. Makatabang ni nga dili mangluod ang imong mga anak kon dili sila matawag.—1 Tim. 6:18. d

18. Unsay atong mahimo aron dili mapokus sa atoa ang atong komento? (Proverbio 27:2)

¹⁸ Kitang tanan makaandam ug komento nga makapasidungog kang Jehova ug makadasig sa mga igsoon. (Prov. 25:11) Usahay puwede tang mohatag ug mubong personal nga eksperyensiya, pero angay natong likayan ang pagsigeg hisgot bahin sa atong kaugalingon. (Basaha ang Proverbio 27:2; 2 Cor. 10:18) Hinuon, angay tang magpokus kang Jehova, sa iyang Pulong, ug sa iyang katawhan. (Pin. 4:11) Siyempre, kon ang pangutana nagdasig nato nga mohatag ug personal nga komento, haom lang nga mao nay atong himoon. Ang pananglitan niini makita sa pangutana sa sunod nga parapo.

19. (a) Unsay resulta kon magpakita tag konsiderasyon sa tanang nanambong? (Roma 1:11, 12) (b) Unsay imong naapresyar bahin sa pagkomento sa tigom?

¹⁹ Bisag walay estriktong balaod kon unsaon paghatag ug komento, maningkamot ta nga madasig ang uban sa atong pagkomento. Puwede ning magpasabot nga mokomento ta pirme. O kaha makontento na ta sa mga higayon nga nakakomento ta ug malipay nga ang uban nahatagag higayon nga makakomento. Kon magpokus ta sa kaayohan sa uban panahon sa mga tigom, kitang tanan malipay nga “magdinasigay” sa usag usa.​—Basaha ang Roma 1:11, 12.