1-2. Unsay kinahanglan natong himoon samtang maghulat sa bag-ong kalibotan?

 MAPASALAMATON kaayo ta sa saad ni Jehova nga pulihan kining daotang sistema sa matarong nga bag-ong kalibotan. (2 Ped. 3:13) Bisag wala ta mahibalo kon kanus-a moabot ang bag-ong kalibotan, ang mga panghitabo karon nagpakita nga hapit na kaayo nang matuman.​—Mat. 24:32-34, 36; Buh. 1:7.

² Pero bisag dugay na ta sa kamatuoran, kinahanglang palig-onon nato ang atong pagtuo niana nga saad. Ngano? Kay bisan ang lig-ong pagtuo puwedeng mohuyang. Gani, si apostol Pablo miingon nga ang kakulang ug pagtuo mao “ang sala nga daling makalambod nato.” (Heb. 12:1) Aron dili mohuyang ang atong pagtuo, kinahanglang pamalandongon nato pirme ang mga ebidensiya nga hapit nang moabot ang bag-ong kalibotan.​—Heb. 11:1.

3. Unsay atong hisgotan niini nga artikulo?

³ Niining artikuloha, hisgotan nato ang tulo ka paagi nga mapalig-on nato ang atong pagtuo sa gisaad ni Jehova nga bag-ong kalibotan: (1) pagpamalandong sa lukat, (2) pagpamalandong sa gahom ni Jehova, ug (3) paggahin ug panahon sa espirituwal nga mga kalihokan. Dayon, hisgotan nato kon sa unsang paagi ang mensahe ni Jehova kang Habacuc makapalig-on sa atong pagtuo karon. Pero ato unang konsiderahon ang pipila ka situwasyon nga nagkinahanglag lig-ong pagtuo nga moabot gyod ang gisaad nga bag-ong kalibotan.

 MGA SITUWASYON NGA NAGKINAHANGLAG LIG-ONG PAGTUO

4. Unsang mga desisyon ang nagkinahanglag lig-ong pagtuo?

⁴ Kada adlaw, mohimo tag mga desisyon nga nagkinahanglag lig-ong pagtuo. Pananglitan, mohimo tag mga desisyon bahin sa pagpilig mga kauban, kalingawan, edukasyon, kaminyoon, mga anak, ug trabaho. Maayong pangutan-on nato ang atong kaugalingon: ‘Ang ako bang mga desisyon nagpakita nga nagtuo gyod ko nga temporaryo ra ning sistemaha ug hapit na ning pulihan sa bag-ong kalibotan sa Diyos? O ang ako bang mga desisyon naimpluwensiyahan sa mga tawo nga nagtuo nga ang kamatayon mao ang kataposan sa tanan?’ (Mat. 6:19, 20; Luc. 12:16-21) Makahimo tag maayo kaayong mga desisyon kon palig-onon nato ang atong pagtuo nga hapit nang moabot ang bag-ong kalibotan.

5-6. Nganong kinahanglang lig-on ang atong pagtuo panahon sa mga kalisdanan? Iilustrar.

⁵ Makaatubang pod tag mga kalisdanan nga nagkinahanglag lig-ong pagtuo. Tingali makaatubang tag mga paglutos, grabeng sakit, o ubang butang nga makapaluya nato. Sa primero, lig-on pa tingali tag determinasyon nga molahutay. Pero kon magdugay ang mga pagsulay​—nga maoy sagad mahitabo—​magkinahanglan gyod tag lig-ong pagtuo aron makalahutay ug padayong makaalagad kang Jehova nga malipayon.​—Roma 12:12; 1 Ped. 1:6, 7.

⁶ Dihang naa ta sa lisod kaayo nga situwasyon, bation tingali nato nga morag dili na moabot ang bag-ong kalibotan nga gisaad ni Jehova. Nagpasabot ba na nga huyang tag pagtuo? Dili ra pod. Niay ilustrasyon. Kon grabe kaayo ka init ang summer, maghunahuna tingali ta nga morag dili na matapos ang ting-init. Pero matapos gyod ni, ug moabot ang bugnawng panahon. Sa samang paagi, dihang naa ta sa grabeng kalisdanan, bation tingali nato nga morag dili na moabot ang bag-ong kalibotan. Pero kon lig-on ang atong pagtuo, nahibalo ta nga matuman gyod ang mga saad sa Diyos. (Sal. 94:3, 14, 15; Heb. 6:17-19) Kon ingon ana ka lig-on ang atong pagsalig, magpabiling una sa atong kinabuhi ang pagsimba kang Jehova.

7. Unsang panghunahuna ang angay natong likayan?

⁷ Nagkinahanglan pod tag lig-ong pagtuo aron makapadayon sa atong pagsangyaw. Daghan sa atong masangyawan ang naghunahuna nga ang “maayong balita” bahin sa bag-ong kalibotan nga gisaad sa Diyos imposibleng mahitabo. (Mat. 24:14; Ezeq. 33:32) Dili gyod nato tugotan nga maimpluwensiyahan ta sa ilang panghunahuna. Aron dili na mahitabo, kinahanglang padayon natong palig-onon ang atong pagtuo. Niay tulo ka paagi nga ato nang mahimo.

PAMALANDONGA ANG LUKAT

8-9. Nganong makapalig-on sa atong pagtuo ang pagpamalandong sa lukat?

⁸ Ang usa ka paagi nga mapalig-on nato ang atong pagtuo mao ang pagpamalandong sa lukat. Ang lukat maoy garantiya nga seguradong matuman ang mga saad sa Diyos. Kon atong hunahunaon pag-ayo kon nganong gihatag ang lukat ug kon unsa ka dako ang gisakripisyo ni Jehova, molig-on ang atong pagtuo nga matuman gyod ang gisaad sa Diyos nga kinabuhing walay kataposan sa usa ka nindot kaayo nga kalibotan. Nganong makaingon ta ana?

⁹ Unsa diay ka dako ang gisakripisyo ni Jehova aron mahatag ang lukat? Gipadala ni Jehova gikan sa langit ang iyang pinangga ug panganay nga Anak, ang iyang suod kaayo nga kauban, aron mahimong hingpit nga tawo. Samtang dinhi si Jesus sa yuta, naeksperyensiyahan niya ang tanang klase sa kalisdanan.  Dayon siya nag-antos ug nakaagom ug sakit kaayo nga kamatayon. Pagkadako sa gisakripisyo ni Jehova! Dili gyod tugotan sa atong mahigugmaong Diyos nga mag-antos ug mamatay ang iyang Anak aron lang hatagan tag maayong kinabuhi pero sa kadiyot ra kaayo nga panahon. (Juan 3:16; 1 Ped. 1:18, 19) Kay dako kaayo ang gibayad ni Jehova, seguroon gyod niya nga makabaton tag walay kataposang kinabuhi sa bag-ong kalibotan.

PAMALANDONGA ANG GAHOM NI JEHOVA

10. Sumala sa Efeso 3:20, unsay kayang himoon ni Jehova?

¹⁰ Ang ikaduhang paagi nga mapalig-on nato ang atong pagtuo mao ang pagpamalandong sa gahom ni Jehova. Tungod sa iyang gahom, kaya niyang tumanon ang tanan niyang gisaad. Tinuod, morag imposible para sa mga tawo ang walay kataposang kinabuhi sa bag-ong kalibotan. Pero si Jehova kanunayng nagsaad ug mga butang nga dili kayang tumanon sa mga tawo. Siyempre, siya ang Labing Gamhanan nga Diyos. (Job 42:2; Mar. 10:27) Magdahom ba ta nga mohimo siyag ordinaryo ra nga mga saad?​—Basaha ang Efeso 3:20.

11. Paghatag ug pananglitan sa talagsaong mga saad sa Diyos. (Tan-awa ang kahong “ Pipila sa Talagsaong mga Saad nga Natuman.”)

¹¹ Konsideraha ang pipila ka butang nga gisaad ni Jehova sa iyang mga alagad kaniadto nga morag imposibleng mahitabo. Iyang gipasaligan si Abraham ug Sara nga makabaton silag anak bisag tigulang na sila. (Gen. 17:15-17) Gipasaligan pod niya si Abraham nga ang iyang mga kaliwat makapanag-iya sa yuta sa Canaan. Sulod sa daghang katuigan nga naulipon sa Ehipto ang mga kaliwat ni Abraham, ang mga Israelinhon, morag imposibleng matuman ang maong saad. Pero nahitabo gyod to. Sa ulahi, si Jehova miingon nga ang tigulang nga si Elisabet makabaton ug anak. Giingnan pod niya si Maria, nga usa ka birhen, nga iyang ipanganak ang mismong anak sa Diyos. Pinaagi niini, matuman ang gisaad ni Jehova didto sa tanaman sa Eden libolibo ka tuig na ang milabay!​—Gen. 3:15.

12. Unsay gipasalig sa Josue 23:14 ug Isaias 55:10, 11 bahin sa gahom ni Jehova?

¹² Kon atong pamalandongon kon giunsa pagtuman ni Jehova ang iyang mga saad kaniadto, makita nato kon unsa siya ka gamhanan. Makapalig-on ni sa atong pagtuo nga tumanon gyod niya ang iyang saad nga bag-ong kalibotan. (Basaha ang Josue 23:14; Isaias 55:10, 11.) Tungod ana, mas matabangan nato ang uban nga makasabot nga ang iyang gisaad nga bag-ong kalibotan dili kay damgo lang o imahinasyon. Kini ang giingon ni Jehova bahin sa bag-ong langit ug bag-ong yuta: “Kining mga pulonga kasaligan ug matuod.”​—Pin. 21:1, 5.

PAGGAHIN UG DAKONG PANAHON SA ESPIRITUWAL NGA MGA KALIHOKAN

13. Sa unsang paagi ang mga tigom sa kongregasyon makapalig-on sa atong pagtuo? Ipatin-aw.

¹³ Ang ikatulong paagi nga mapalig-on nato ang atong pagtuo mao ang espirituwal nga mga kalihokan. Konsideraha pananglitan kon sa unsang paagi ta nakabenepisyo sa mga tigom sa kongregasyon. Si Anna, nga daghang dekada na sa bug-os panahong pag-alagad, miingon: “Ang mga tigom nakapalig-on pag-ayo sa akong pagtuo. Bisag dili kaayo hanas manudlo ang mamumulong o wala siyay bag-ong gihisgotan, sagad naa gihapon koy madungog nga makatabang nako nga mas masabtan ang kamatuoran sa Bibliya, ug kana nakapalig-on sa akong pagtuo.” b Mapalig-on pod ang atong pagtuo dihang maminaw ta sa komento sa atong mga igsoon.​—Roma 1:11, 12; 10:17.

14. Sa unsang paagi ang ministeryo makapalig-on sa atong pagtuo?

 ¹⁴ Mapalig-on sab nato ang atong pagtuo dihang makigbahin ta sa ministeryo. (Heb. 10:23) Si Barbara, nga kapig 70 ka tuig nang nag-alagad kang Jehova, miingon: “Nakapalig-on gyod sa akong pagtuo ang pagsangyaw. Dihang pirme nakong iestorya sa uban ang nindot nga mga saad ni Jehova, mas nahimong buhi ug lig-on ang akong pagtuo.”

15. Sa unsang paagi ang personal nga pagtuon makapalig-on sa atong pagtuo? (Tan-awa sab ang mga hulagway.)

¹⁵ Ang usa pa nga makapalig-on sa atong pagtuo mao ang personal nga pagtuon. Nakatabang kang Susan ang pag-eskedyul sa iyang personal nga pagtuon. Siya miingon: “Sa Dominggo, tun-an nako ang Bantayanang Torre para sa sunod semana. Sa Lunes ug Martes, mangandam ko sa midweek nga tigom. Sa ubang mga adlaw, naa koy study project.” Kay kanunay man niyang gisunod ang iyang eskedyul sa pagtuon, padayong napalig-on ni Susan ang iyang pagtuo. Si Irene, nga dugay nang nag-alagad sa world headquarters, miingon nga nakapalig-on sa iyang pagtuo ang pagtuon sa mga tagna sa Bibliya. Siya miingon: “Mahingangha gyod ko dihang makita nako nga natuman ang mga tagna ni Jehova bisan sa kinagamyang detalye.” c

“KINI MATUMAN GAYOD”

16. Nganong ang pasalig ni Jehova kang Habacuc makapalig-on nato karon? (Hebreohanon 10:36, 37)

¹⁶ Daghang alagad ni Jehova ang dugay nang nagpaabot nga matapos kining daotang kalibotan. Sa panglantaw sa tawo, morag nalangan ang katumanan sa saad sa Diyos. Nahibalo si Jehova sa gibati sa iyang mga alagad. Gani, iyang gipasaligan si propetang Habacuc: “Ang panan-awon nagpaabot sa gitakdang panahon niini, ug kini nagdali paingon sa kataposan niini, ug kini dili mamakak. Bisan pa kon malangan kini, padayon sa pagpaabot niini!  Kay kini matuman gayod. Kini dili maulahi!” (Hab. 2:3) Para lang ba kang Habacuc ang pasalig sa Diyos, o para pod ni nato karon? Ubos sa paggiya sa Diyos, gigamit ni apostol Pablo kining mga pulonga ngadto sa mga Kristohanon, kinsa nagpaabot sa bag-ong kalibotan. (Basaha ang Hebreohanon 10:36, 37.) Oo, makasalig ta nga bisan pag morag nalangan ang gisaad nga kaluwasan, “kini matuman gayod. Kini dili maulahi!”

17. Giunsa pagpadapat sa sister ang tambag ni Jehova kang Habacuc?

¹⁷ Gipadapat sa daghang alagad ni Jehova ang iyang tambag nga ‘padayong magpaabot’​—bisan pag molabay ang daghang katuigan. Pananglitan, si Louise nag-alagad kang Jehova sukad pa niadtong 1939. Siya miingon: “Niadtong panahona, nagdahom ko nga moabot ang Armagedon sa dili pa ko mahumag high school. Pero wala na mahitabo. Sulod sa daghang katuigan, nakatabang nako ang pagbasa bahin sa mga alagad sa Diyos nga nagpaabot​—sama ni Noe, Abraham, Jose, ug sa uban pa nga naghulat ug dugay ayha nila nadawat ang ganti nga gisaad ni Jehova. Ang pagsalig nga matuman ang mga saad nakatabang nako ug sa uban nga kanunayng maghunahuna nga hapit na kaayo ang bag-ong kalibotan.” Mouyon gyod ana ang ubang dugay nang mga alagad ni Jehova!

18. Sa unsang paagi ang pagpaniid sa kalalangan makapalig-on sa atong pagtuo nga moabot ang bag-ong kalibotan?

¹⁸ Tinuod, ang bag-ong kalibotan wala pa moabot. Pero matikdi ang mga butang nga naa karon​—ang mga bituon, kahoy, hayop, ug mga tawo. Seguradong walay bisan usa karon ang moingon nga dili tinuod kining mga butanga, bisan pag wala kini maglungtad kaniadto. Nakita nato ni karon kay gihimo ni Jehova kining tanan. (Gen. 1:1, 26, 27) Gusto sab sa atong Diyos nga magpatunghag bag-ong kalibotan. Iya gyod nang tumanon. Sa bag-ong kalibotan, hingpit na ang panglawas sa mga tawo ug malipayon silang mabuhi hangtod sa hangtod. Sama nga naglungtad karon ang uniberso, makasalig ta nga sa gitakdang panahon sa Diyos, moabot pod ang bag-ong kalibotan.​—Isa. 65:17; Pin. 21:3, 4.

19. Unsaon nimo pagpalig-on ang imong pagtuo?

¹⁹ Sa pagkakaron, pahimuslan nato ang kahigayonan nga mapalig-on ang atong pagtuo. Pabilhi ang lukat. Pamalandonga ang gahom ni Jehova. Paggahig dakong panahon sa espirituwal nga kalihokan. Kon imo nang himoon, maparehas ka sa mga alagad ni Jehova kinsa “nakadawat sa mga saad tungod sa ilang pagtuo ug mapailobong paghulat.”​—Heb. 6:11, 12; Roma 5:5.