1. Sa unsa ta kombinsido?

 INGONG katawhan ni Jehova, nahibalo ta nga gimahal ta niya ug gusto niya nga magmalipayon ta. (Roma 8:35-39) Kombinsido pod ta nga ang mga prinsipyo sa Bibliya kanunayng makahatag natog kaayohan kon atong ipadapat. (Isa. 48:17, 18) Pero komosta kon makaatubang tag mga problema nga wala nato damha?

2. Unsang mga problema ang atong maatubang, ug unsa tingali atong hunahunaon tungod ana?

² Ang tanang alagad ni Jehova nag-atubang ug mga problema. Pananglitan, basin nadismayar ta tungod sa usa ka membro sa pamilya. Tingali limitado na ang atong mahimo sa pag-alagad kang Jehova tungod sa grabeng sakit. Basig naapektohan kaayo ta sa kalamidad. O kaha gilutos ta tungod sa atong tinuohan. Kon mag-atubang tag ingon ana nga mga kahimtang, makahunahuna tingali ta: ‘Nganong nahitabo man ni nako? Naa ba koy nahimong sayop? Wala na ba ko uyoni ni Jehova?’ Mibati na pod ba ka ana? Kon mao, ayawg kaluya. Daghan sa maunongong alagad ni Jehova ang mibati pod ana.​—Sal. 22:1, 2; Hab. 1:2, 3.

3. Unsay atong makat-onan sa Salmo 34:19?

³ Basaha ang Salmo 34:19. Matikdi ang duha ka importanteng punto niini nga salmo: (1) Ang matarong nga mga tawo makaatubang ug mga problema. (2) Luwason ta ni Jehova gikan sa atong mga kalisdanan. Unsaon ta pagluwas ni Jehova? Ang usa ka paagi mao ang pagtabang kanato nga makabatog  balanseng panglantaw sa kinabuhi niining sistemaha. Tinuod, nagsaad si Jehova nga magmalipayon ta sa pag-alagad kaniya. Pero wala siya moingon nga dili na ta makaatubang ug mga problema. (Isa. 66:14) Gidasig ta niya nga magpokus sa umaabot​—sa panahon dihang maangkon na nato ang kinabuhing walay kataposan nga maoy gusto niya para nato. (2 Cor. 4:16-18) Sa pagkakaron, gitabangan ta niya nga makapadayon sa pag-alagad kada adlaw.​—Lam. 3:22-24.

4. Unsay atong hisgotan niining artikuloha?

⁴ Atong hisgotan kon unsay atong makat-onan sa matinumanong mga alagad ni Jehova sa panahon sa Bibliya ug sa atong panahon karon. Tingali makaatubang tag wala damhang mga problema. Pero kon mosalig ta kang Jehova, tabangan gyod ta niya. (Sal. 55:22) Samtang atong hisgotan ang ilang ehemplo, pangutan-a ang kaugalingon: ‘Unsa kahay akong buhaton kon ako ang naa sa ilang kahimtang? Sa unsang paagi ang ilang ehemplo nakapalig-on sa akong pagsalig kang Jehova? Unsang mga leksiyon ang puwede nakong ipadapat sa akong kinabuhi?’

5. Unsa nga mga kalisdanan ang giatubang ni Jacob tungod kang Laban? (Tan-awa ang hulagway sa atubangan sa magasin.)

⁵ Ang mga alagad ni Jehova sa panahon sa Bibliya nakaatubang ug mga kalisdanan nga wala nila damha. Konsideraha si Jacob. Gisugo siya sa iyang amahan nga mokuhag asawa gikan sa mga anak nga babaye ni Laban, kinsa nagsimba pod sa Diyos. Gipasaligan siya sa iyang amahan nga panalanginan siya pag-ayo ni Jehova. (Gen. 28:1-4) Busa mituman si Jacob. Mibiya siya sa Canaan ug mibiyahe sa lugar ni Laban, nga naay duha ka anak nga babaye​—si Lea ug Raquel. Nahigugma si Jacob kang Raquel, ang mas manghod nga anak ni Laban, ug misugot siya nga magtrabahog pito ka tuig kang Laban aron maminyoan si Raquel. (Gen. 29:18) Pero dili kana ang nahitabo. Gilimbongan ni Laban si Jacob maong naminyoan niya ang mas magulang nga si Lea. Misugot si Laban nga minyoan ni Jacob si Raquel human sa usa ka semana, pero kinahanglan na pod siyang motrabahog pito pa ka tuig. (Gen. 29:25-27) Gitikasan pod ni Laban si Jacob sa iyang suhol. Tanantanan, 20 ka tuig nga gilimbongan ni Laban si Jacob!​—Gen. 31:41, 42.

6. Unsa pang mga problema ang naatubang ni Jacob?

⁶ Daghan pag naatubang nga problema si Jacob. Dako ang iyang pamilya, pero dihay panahon nga ang iyang mga anak dili maayog relasyon sa usag usa. Gibaligya pa gani nila ang ilang igsoon nga si Jose ingong ulipon. Ang duha ka anak ni Jacob, si Simeon ug Levi, naghatag ug kaulawan sa pamilya ug sa ngalan ni Jehova. Gawas pa ana, namatay ang pinalanggang asawa ni Jacob nga si Raquel samtang nanganak kang Benjamin. Ug tungod sa grabeng gutom, napugos si Jacob nga mobalhin sa Ehipto dihang tigulang na siya.​—Gen. 34:30; 35:16-19; 37:28; 45:9-11, 28.

7. Giunsa pagpakita ni Jehova kang Jacob nga Iya siyang giuyonan?

⁷ Bisan pa sa tanang problema nga giatubang ni Jacob, wala gyod siya mawad-ig pagtuo kang Jehova ug sa Iyang mga saad. Busa gipakita ni Jehova kang Jacob nga giuyonan Niya siya. Pananglitan, bisag gitikasan siya ni Laban, gipanalanginan siya ni Jehova ug daghang materyal nga butang. Ug hunahunaa kon unsa ka mapasalamaton si Jacob kang Jehova dihang nakita niya pag-usab si Jose​—ang iyang anak nga abi niyag dugay nang namatay! Ang suod nga relasyon ni Jacob kang Jehova nakatabang aron malahutay niya ang mga kalisdanan. (Gen. 30:43; 32:9, 10; 46:28-30)  Kon pirme tang suod kang Jehova, malahutay pod nato ang wala damhang mga kalisdanan.

8. Unsay gusto kaayong himoon ni Haring David?

⁸ Hisgotan pod nato si Haring David. Wala niya mahimo ang tanan nga gusto niyang himoon sa pag-alagad kang Jehova. Pananglitan, gusto kaayo niyang magtukod ug templo para sa iyang Diyos. Iya nang gisulti kang propetang Natan. Ug si Natan miingon niya: “Buhata ang bisan unsa nga anaa sa imong kasingkasing, kay ang matuod nga Diyos nagauban kanimo.” (1 Cron. 17:1, 2) Seguradong nadasig si David sa giingon ni Natan. Posibleng nangandam dayon siya para niining dako nga proyekto.

9. Unsay reaksiyon ni David sa makapaguol nga balita?

⁹ Pero wala madugay, ang propeta ni Jehova mibalik nga may dalang makapaguol nga balita. “Niadto mismong gabhiona,” giingnan ni Jehova si Natan nga dili si David ang magtukod sa templo, kondili ang usa sa iyang mga anak. (1 Cron. 17:3, 4, 11, 12) Unsay reaksiyon ni David dihang nadawat niya kini nga mensahe? Giusab niya ang iyang tumong. Nagpokus siya sa pagtigom ug kuwarta ug materyales nga gikinahanglan sa iyang anak nga si Solomon para sa proyekto.​—1 Cron. 29:1-5.

10. Giunsa pagpanalangin ni Jehova si David?

¹⁰ Human dayon masultihi si David nga dili siya ang magtukod sa templo, si Jehova naghimog pakigsaad kaniya. Nagsaad si Jehova nga usa sa mga kaliwat ni David ang magmando hangtod sa hangtod. (2 Sam. 7:16) Sa bag-ong kalibotan, imadyina kon unsa ka malipayon si David dihang mahibaloan niya nga si Jesus, ang Hari panahon sa Usa ka Libo ka Tuig nga Pagmando, naggikan sa iyang pamilya! Ang ehemplo ni David nakatabang nato nga makita nga bisag dili nato mahimo ang tanan nga gusto natong himoon para kang Jehova, ang atong Diyos naa tingali giandam nga mga panalangin para nato nga wala nato damha.

11. Unsang panalangin ang nadawat sa mga Kristohanon sa unang siglo bisag wala moabot ang Gingharian sa panahon nga ilang gidahom? (Buhat 6:7)

¹¹ Ang mga Kristohanon sa unang siglo nakaatubang pod ug wala damhang mga kalisdanan. Pananglitan, naghinamhinam na kaayo silang moabot ang Gingharian sa Diyos, pero wala sila mahibalo kon kanus-a na mahitabo. (Buh. 1:6, 7) Busa unsay ilang gibuhat? Nagpabilin silang busy sa buluhatong pagsangyaw. Samtang nagkadaghan ang nasangyawan sa maayong balita, nakita nila nga gipanalanginan ni Jehova ang ilang mga paningkamot.​—Basaha ang Buhat 6:7.

12. Unsay gihimo sa mga Kristohanon sa unang siglo dihang naay nahitabong gutom?

¹² Sa unang siglo, dihay grabeng gutom nga nahitabo “sa tibuok yuta.” (Buh. 11:28) Ang mga Kristohanon niadtong panahona naapektohan sab. Ma-imagine ba nimo ang epekto niining grabeng gutom ngadto sa mga Kristohanon? Ang mga ulo sa pamilya seguradong nabalaka kon unsaon nila pagtagana para sa ilang pamilya. Ug komosta ang mga batan-on nga nagplanong magpalapad sa ilang ministeryo? Nakahunahuna kaha sila nga dili na lang una idayon ang ilang plano? Bisag unsa pay ilang kahimtang, ang mga Kristohanon nag-adjust sa ilang situwasyon. Padayon silang nagkugi sa pagsangyaw, ug malipayon nilang gitabangan ang ilang mga igsoon sa Judea.​—Buh. 11:29, 30.

13. Unsang mga panalangin ang naeksperyensiyahan sa mga Kristohanon panahon sa gutom?

¹³ Unsang mga panalangin ang naeksperyensiyahan sa mga Kristohanon panahon sa gutom? Para niadtong nakadawat ug mga hinabang, nakita nila nga wala gyod sila pasagdi ni Jehova. (Mat. 6:31-33) Seguradong nasuod sila sa mga igsoon nga mitabang nila. Ug kadtong  mihatag ug mga hinabang o miboluntaryo sa paghatod niini mibati pod ug kalipay tungod sa ilang paghatag. (Buh. 20:35) Silang tanan gipanalanginan ni Jehova kay nag-adjust sila sa bag-ong kahimtang.

14. Unsay nahitabo kang Bernabe ug apostol Pablo, ug unsay resulta? (Buhat 14:21, 22)

¹⁴ Ang mga Kristohanon sa unang siglo pirmeng makasinatig paglutos, usahay sa panahon nga wala nila damha. Konsideraha ang nahitabo kang Bernabe ug apostol Pablo samtang nagsangyaw sila sa Listra. Sa primero, giabiabi silag maayo niadtong mga naminaw nila. Pero sa ulahi, ang mga magsusupak “nangombinsir sa katawhan.” Tungod ana, ang pipila niadtong nag-abiabi nila miapil na hinuon pagbato kang Pablo hangtod nga nagtuo sila nga patay na siya. (Buh. 14:19) Pero si Bernabe ug Pablo nagpadayon ug sangyaw sa laing lugar. Unsay resulta? Natabangan nila ang “ubay-ubayng tawo nga mahimong tinun-an,” ug ang ilang mga pulong ug ehemplo nakadasig sa mga igsoon. (Basaha ang Buhat 14:21, 22.) Daghan ang nakabenepisyo kay si Bernabe ug Pablo wala mohunong sa pagsangyaw bisan pa sa paglutos. Kon padayon natong himoon ang buluhaton nga gisugo ni Jehova, panalanginan ta niya.

15. Unsay imong nakat-onan kang Brader A. H. Macmillan?

¹⁵ Sa mga tuig una pa ang 1914, ang katawhan ni Jehova naay gidahom nga mahitabo. Konsideraha ang pananglitan ni Brader A. H. Macmillan. Sama sa uban niadtong panahona, nagtuo si Brader Macmillan nga hapit na niyang madawat ang iyang langitnong ganti. Sa iyang pakigpulong niadtong Septiyembre 1914, siya miingon: “Mao na tingali ni ang kataposang pakigpulong nga akong ihatag.” Siyempre, dili pa to ang iyang kataposang pakigpulong. Sa ulahi, si Brader Macmillan misulat: “Tingali ang pipila namo eksayted ra kaayo sa paghunahuna nga mangadto na mi sa langit.” Siya midugang: “Ang kinahanglan natong buhaton mao ang padayong pagkugi sa buluhaton sa Ginoo.” Ug mao gyod nay gihimo ni Brader Macmillan. Nagkugi siya sa ministeryo. Nakapribilehiyo siya nga palig-onon ang daghang igsoon nga napriso tungod sa ilang neyutralidad. Ug padayon siyang mitambong sa mga tigom bisag tigulang na siya. Unsang panalangin ang nadawat ni Brader Macmillan kay gigamit niya ang iyang panahon sa pinakamaayong paagi samtang naghulat sa iyang ganti? Sa hapit na siyang mamatay niadtong 1966, siya misulat: “Ang akong pagtuo karon lig-on gihapon kaayo sama kaniadto.” Maayo gyod na nga ehemplo nga angay natong sundogon, ilabina kon wala ta magdahom nga kinahanglan diay tang molahutay ug dugay!​—Heb. 13:7.

16. Unsang wala damhang kalisdanan ang giatubang ni Herbert Jennings ug sa iyang asawa? (Santiago 4:14)

¹⁶ Daghan sa mga alagad ni Jehova ang nakasinatig wala damhang mga sakit. Pananglitan, sa estorya sa kinabuhi ni Brader Herbert Jennings, b iyang gisulti kon unsa sila ka malipayon sa iyang asawa sa ilang asaynment ingong mga misyonaryo sa Ghana. Pero paglabay sa panahon, nadayagnos siya nga naay grabeng mood disorder. Miingon si Brader Jennings nga wala sila magdahom nga kalit nga mausab ang ilang kahimtang, parehas sa giingon sa Santiago 4:14. (Basaha.) Pero mi-adjust sila sa situwasyon. Siya misulat: “Among gihikay ang pagbiya sa Ghana ug sa among daghang suod nga mga higala ug mibalik sa Canada [aron magpatambal].” Gitabangan ni Jehova si Brader Jennings ug ang iyang asawa nga makapadayon sa  pag-alagad nga matinumanon bisan pa sa kalisdanan nga ilang giatubang.

17. Sa unsang paagi ang ehemplo ni Brader Jennings nakatabang sa mga igsoon?

¹⁷ Ang giingon ni Brader Jennings diha sa iyang estorya sa kinabuhi nakadasig kaayo sa uban. Ang usa ka sister misulat: “Natandog kaayo ko sa iyang estorya. . . . Dihang nabasa nako nga gibuhian ni Brader Jennings ang iyang asaynment aron magpatambal, natabangan ko nga mahimong balanse sa akong situwasyon.” Mao pod nay giingon sa usa ka brader: “Human sa 10 ka tuig nga pag-alagad ingong ansiyano, kinahanglan nakong buhian ang akong pribilehiyo tungod sa akong mental nga sakit. Gibati nako nga wala na koy pulos. Na-depress kaayo ko ug dili na gani nako kayang mobasag estorya sa kinabuhi sa mga igsoon. . . . Pero ang paglahutay ni Brader Jennings nakadasig kaayo nako.” Kini nagpahinumdom nato nga kon molahutay ta sa wala damhang mga kalisdanan, makadasig ta sa uban. Bisag ang mga panghitabo sa atong kinabuhi lahi tingali sa atong gidahom, puwede gihapon tang mahimong maayong ehemplo sa pagtuo ug paglahutay.​—1 Ped. 5:9.

18. Sumala sa makita sa hulagway, unsay imong nakat-onan sa ehemplo sa usa ka biyuda sa Nigeria?

¹⁸ Ang dili maayong mga panghitabo sama sa COVID-19 nga pandemic nakaapektar sa daghang alagad ni Jehova. Pananglitan, ang usa ka biyuda sa Nigeria gamay na lang kaayog pagkaon ug kuwarta nga nabilin. Usa ka buntag, human nila maluto ang ilang kataposang takos sa bugas, gipangutana siya sa iyang anak kon unsay sunod nilang kaonon. Giingnan sa inahan ang iyang anak nga wala na silay laing kuwarta o pagkaon, pero ang ilang mahimo mao ang pagsundog sa babayeng balo sa Zarepta​—andamon nila ang ilang kataposang pagkaon ug bug-os nga mosalig kang Jehova. (1 Hari 17:8-16) Pero wala pa gani sila maghunahuna kon unsay ilang ipaniudto nianang adlawa, nakadawat silag hinabang gikan sa mga  igsoon. Ang hinabang naay pagkaon nga moabot ug kapig duha ka semana. Ang sister miingon nga naminaw gyod diay si Jehova sa iyang giingon ngadto sa iyang anak. Busa kon mosalig ta kang Jehova, ang wala damhang mga panghitabo makapasuod hinuon nato kaniya.​—1 Ped. 5:6, 7.

19. Unsang paglutos ang naeksperyensiyahan ni Aleksey Yershov?

¹⁹ Sa milabayng mga tuig, daghang igsoon ang nakasinatig mga paglutos nga wala tingali nila damha. Konsideraha ang nahitabo kang Brader Aleksey Yershov, nga nagpuyo sa Russia. Dihang nabawtismohan si Brader Yershov niadtong 1994, naa pay kagawasan ang mga alagad sa Diyos nianang nasora. Pero paglabayg pipila ka tuig, nausab ang situwasyon sa Russia. Niadtong 2020, gi-raid ang balay ni Brader Yershov ug gipanguha ang iyang mga butang. Paglabayg pipila ka bulan, gipasakaan siyag kaso sa gobyerno base sa mga video recording nga ilang nadawat. Ang nakapasamot pa gyod kay ang mga video girekord sa tawo nga nagpakaaron-ingnong interesado sa Bibliya sulod sa kapig usa ka tuig. Makapaguol gyod to!

20. Giunsa pagpalig-on ni Brader Yershov ang iyang relasyon kang Jehova?

²⁰ Naa bay maayong resulta ang paglutos nga naeksperyensiyahan ni Brader Yershov? Oo. Mas milig-on ang iyang relasyon kang Jehova. Siya miingon: “Mas pirme na ming mag-ampo sa akong asawa. Naamgohan nako nga di gyod nako ni kaya kon wala ang tabang ni Jehova.” Miingon pod siya: “Nakatabang gyod ang personal nga pagtuon aron dili ko maluya. Gipamalandong nako ang ehemplo sa matinumanong mga alagad kaniadto. Daghan kaayong pananglitan diha sa Bibliya ang nagpakita kon unsa ka importante nga magpabiling kalmado ug mosalig kang Jehova.”

21. Unsay atong nakat-onan niining artikuloha?

²¹ Unsay atong nakat-onan niining artikuloha? Nakita nato nga usahay, makaeksperyensiya gyod tag wala damhang mga problema niining sistemaha. Bisan pa niana, tabangan gyod ni Jehova ang iyang mga alagad kon mosalig sila kaniya. Sumala sa gihisgotan sa atong temang teksto, “daghan ang kalisdanan sa matarong, apan luwason siya ni Jehova gikan nianang tanan.” (Sal. 34:19) Hinaot nga padayon tang magpokus, dili sa atong mga problema, kondili sa gahom ni Jehova sa pagpalig-on kanato. Kon ato nang himoon, masulti pod nato ang giingon ni apostol Pablo: “Naa koy kusog sa pag-atubang sa tanang butang tungod kaniya nga naghatag nakog gahom.”​—Filip. 4:13.