1. Unsay gusto ni Jehova para nato?

 ANG usa sa pinakamalipayong hitabo para sa magtiayon mao ang pagkatawo sa ilang anak. Pero bisag gimahal sa mga ginikanan ang ilang bag-ong natawo nga anak, dili nila gusto nga magpabilin siyang bata hangtod sa hangtod. Gani, mabalaka gyod sila kon dili siya modako. Sa susama, malipay si Jehova dihang mosugod ta pagsunod kang Jesus, pero dili Niya gusto nga magpabilin tang bata sa espirituwal. (1 Cor. 3:1) Gusto niya nga mahimo tang ‘hamtong’ nga mga Kristohanon.—1 Cor. 14:20.

2. Unsay atong hisgotan niining artikuloha?

² Unsay gipasabot sa pagkahimong hamtong nga Kristohanon? Unsay atong himoon aron mohamtong sa espirituwal? Nganong makatabang ang gahing espirituwal nga pagkaon aron mohamtong ta? Ug nganong angay natong likayan ang sobrang pagsalig sa kaugalingon? Niining artikuloha, atong tubagon kini nga mga pangutana.

UNSAY GIPASABOT SA PAGKAHIMONG HAMTONG NGA KRISTOHANON?

3. Unsay gipasabot sa pagkahimong hamtong nga Kristohanon?

³ Sa Bibliya, ang Gregong pulong nga gihubad ug “hamtong” puwede sab magpasabot ug “hingpit,” “bug-os,” ug “walay nakulang.” a (1 Cor. 2:6) Mahimo tang hamtong nga mga Kristohanon kon dili ta magpabiling bata sa espirituwal, kondili maningkamot ta nga mahimong espirituwal nga mga tawo. Siyempre, bisag nakab-ot na nato ang maong tumong, dili ta angayng mohunong sa pag-uswag ingong mga Kristohanon. (1 Tim. 4:15) Kitang tanan, apil na ang mga bata pa sa pisikal, puwedeng mahimong hamtong sa espirituwal. Pero unsay nagpakita nga ang usa ka Kristohanon hamtong sa espirituwal?

4. Unsay nagpaila nga ang usa ka Kristohanon hamtong sa espirituwal?

 ⁴ Ang hamtong nga Kristohanon nagsunod sa tanang sugo sa Diyos ug dili mamili kon unsa ray iyang sundon. Siyempre, kay dili man siya hingpit, makahimo siyag mga sayop. Pero kada adlaw, naningkamot siya nga maghunahuna ug molihok uyon sa kabubut-on sa Diyos. Iyang gisul-ob ang bag-ong personalidad ug kanunayng naningkamot nga sundogon ang panghunahuna sa Diyos. (Efe. 4:​22-24) Gibansay niya ang iyang kaugalingon sa paghimog maalamong mga desisyon base sa mga balaod ug prinsipyo ni Jehova, busa wala siya magkinahanglan ug taas nga listahan sa mga butang nga angay o dili niya angayng himoon. Dihang makadesisyon siya nga himoon ang usa ka butang, naa siyay disiplina sa kaugalingon maong iya gyod nang buhaton.—1 Cor. 9:​26, 27.

5. Unsay posibleng mahitabo sa usa ka Kristohanon nga dili hamtong? (Efeso 4:​14, 15)

⁵ Sa laing bahin, ang Kristohanon nga dili hamtong dali rang mailad sa ‘panglingla’ ug “malimbongong mga taktika.” Motuo pod dayon siya sa dili tinuod nga mga impormasyon gikan sa media ug mga apostata. b (Basaha ang Efeso 4:​14, 15.) Siyay sagad nga hinungdan sa mga away, ug dali siyang magselos o masina, masuko, o madala sa tentasyon.—1 Cor. 3:3.

6. Iilustrar kon sa unsang paagi ang usa anam-anam nga mohamtong sa espirituwal. (Tan-awa sab ang hulagway.)

⁶ Sa nahisgotan na, ang espirituwal nga pag-uswag sa usa ka Kristohanon gipakasama sa pagtubo sa usa ka bata ngadto sa pagkahamtong. Ang bata kulang pag pagsabot, maong gikinahanglan niya ang proteksiyon ug paggiya sa mga hamtong. Sa pag-ilustrar, sultihan tingali sa mama ang iyang gamay pa nga anak nga mogunit sa iyang kamot samtang motabok sila sa karsada. Dihang modakodako na ang bata, basin tugotan na siya sa iyang mama nga motabok nga siyasiya na lang, pero pahinumdoman gihapon siya sa iyang mama nga seguroon nga walay sakyanan ayha siya motabok. Dihang mohamtong na ang bata, kabalo na siya kon unsaon paglikay niana nga mga kapeligrohan bisag dili na siya pahinumdoman. Klaro nga ang mga bata nagkinahanglag tabang sa mga hamtong aron makalikay sa peligrosong mga kahimtang. Ingon ana pod ang mga Kristohanon nga dili hamtong sa espirituwal. Nagkinahanglan silag tabang sa hamtong nga mga Kristohanon aron makalikay sa espirituwal nga kapeligrohan ug makahimog maalamong  mga desisyon. Sa laing bahin, dihang ang hamtong nga mga Kristohanon mohimog desisyon, susihon nila ang mga prinsipyo sa Bibliya aron masabtan ang panghunahuna ni Jehova ug dayon ila kining ipadapat.

7. Gikinahanglan ba sa hamtong nga mga Kristohanon ang tabang sa uban?

⁷ Nagpasabot ba ni nga ang hamtong nga Kristohanon wala magkinahanglag tabang sa uban? Wala. Usahay, ang hamtong nga Kristohanon magkinahanglan pod ug tabang. Pero dili siya magdahom nga sultihan siya sa uban kon unsay buhaton o ang uban ang modesisyon para niya, kay kana maoy kinaiya sa mga dili hamtong. Ingong hamtong nga Kristohanon, pahimuslan niya ang kaalam ug eksperyensiya sa uban, pero nahibalo pod siya nga gidahom ni Jehova nga siyay “magpas-an sa iyang kaugalingong palas-anon.”—Gal. 6:5.

8. Sa unsang paagi magkalahi ang hamtong nga mga Kristohanon?

⁸ Sama nga ang hamtong nga mga tawo lainlain ug hitsura, ang hamtong nga mga Kristohanon lainlain pod ug espirituwal nga mga hiyas. Ang uban maalamon, ug ang uban maisogon. Ang uban pod mahinatagon, ug ang uban maluluy-on. Dugang pa, dihang ang duha ka hamtong nga Kristohanon makaatubang ug parehas nga situwasyon, lainlain tingali ang ilang mahimong desisyon, pero parehas nga nahiuyon sa mga prinsipyo sa Bibliya. Mahitabo na ilabina kon kinahanglan silang mohimog desisyon base sa itugot sa ilang konsensiya. Tungod ana, dili nila hukman ang uban nga lahig desisyon. Hinuon, maningkamot sila nga magpabiling nahiusa.—Roma 14:10; 1 Cor. 1:10.

UNSAY ATONG HIMOON ARON MOHAMTONG SA ESPIRITUWAL?

9. Awtomatiko ba tang mohamtong sa espirituwal? Ipatin-aw.

⁹ Ang pagtubo sa pisikal natural nga mahitabo paglabay sa panahon, pero ang pagtubo sa espirituwal dili awtomatikong mahitabo. Pananglitan, ang mga igsoon sa Corinto midawat sa maayong balita, nagpabawtismo, nakadawat ug balaang espiritu, ug nakabenepisyo sa personal nga instruksiyon gikan kang apostol Pablo. (Buh. 18:​8-11) Pero paglabayg pipila ka tuig human sa ilang bawtismo, daghan ang dili gihapon hamtong sa espirituwal. (1 Cor. 3:2) Unsay atong himoon aron dili ni mahitabo kanato?

10. Unsay kinahanglan natong himoon aron mohamtong? (Judas 20)

¹⁰ Aron mohamtong ta, kinahanglang ugmaron una nato ang tinguha nga mahimong hamtong. Kadtong ganahang “magpabiling walay kasinatian,” o magpabiling bata sa espirituwal, dili mouswag. (Prov. 1:22) Dili nato gustong maparehas niadtong hamtong na sa pisikal pero nagdepende gihapon sa ilang mga ginikanan sa paghimog desisyon para nila. Hinuon, gusto natong maningkamot para sa atong kaugalingong pag-uswag. (Basaha ang Judas 20.) Kon sa pagkakaron, naningkamot pa ka nga mohamtong sa espirituwal, pag-ampo kang Jehova nga hatagan kag “tinguha ug kusog sa pagbuhat sa mga butang nga gusto niya.”—Filip. 2:13; footnote.

11. Sa unsang paagi ginatabangan ta ni Jehova nga mohamtong sa espirituwal? (Efeso 4:​11-13)

¹¹ Nahibalo si Jehova nga dili ta mohamtong sa espirituwal sa kaugalingon lang natong paningkamot. Ang mga magbalantay ug magtutudlo sa kongregasyon andam kaayong motabang nato nga mahimong “hamtong” sa espirituwal, “sama sa pagkahamtong sa Kristo.” (Basaha ang Efeso 4:​11-13.) Gihatag pod ni Jehova ang iyang balaang espiritu aron tabangan ta nga mabatonan ang “panghunahuna sa Kristo.” (1 Cor. 2:​14-16) Dugang pa, gigiyahan sa Diyos ang pagsulat sa upat ka Ebanghelyo aron masabtan nato kon sa unsang paagi si Jesus naghunahuna, misulti, ug milihok panahon sa iyang ministeryo dinhi sa yuta. Pinaagi sa pagsundog sa panghunahuna ug binuhatan ni  Jesus, makab-ot nimo ang imong tumong nga mahimong hamtong nga Kristohanon.

NGANONG MAKATABANG ANG GAHING ESPIRITUWAL NGA PAGKAON?

12. Unsa ang pangunang mga pagtulon-an bahin sa Kristo?

¹² Aron mouswag ta sa pagkahamtong, dili igo nga magpabilin lang ta sa pangunang mga pagtulon-an—ang mga butang nga “una natong nakat-onan bahin sa Kristo.” Ang pipila sa pangunang mga pagtulon-an mao ang paghinulsol, pagtuo, bawtismo, ug pagkabanhaw. (Heb. 6:​1, 2) Kini nga mga pagtulon-an mao ang pundasyon sa Kristohanong pagtuo. Kanay hinungdan nga dihang nagsangyaw si apostol Pedro panahon sa Pentekostes, kini nga mga butang ang iyang gitudlo. (Buh. 2:​32-35, 38) Kinahanglan natong dawaton kining panguna nga mga pagtulon-an aron mahimo tang mga tinun-an sa Kristo. Pananglitan, si Pablo nagpasidaan nga kadtong dili modawat sa pagtulon-an sa pagkabanhaw nagsalikway sa tibuok Kristohanong pagtulon-an. (1 Cor. 15:​12-14) Pero dili ta angayng makontento sa panguna lang nga mga kamatuoran.

13. Unsay angay natong himoon aron makabenepisyo sa gahing espirituwal nga pagkaon nga gihisgotan sa Hebreohanon 5:14? (Tan-awa sab ang hulagway.)

¹³ Dili sama sa pangunang mga doktrina, ang gahing espirituwal nga pagkaon wala lang maglakip sa mga balaod ni Jehova kondili sa iya pong mga prinsipyo, nga makatabang nato nga masabtan ang iyang panghunahuna. Aron makabenepisyo ta niana nga pagkaon, kinahanglan natong tun-an, pamalandongon, ug ipadapat ang atong nakat-onan sa Pulong sa Diyos. Kon ato nang buhaton, makakat-on ta sa paghimog mga desisyon nga makapalipay kang Jehova. c—Basaha ang Hebreohanon 5:14.

14. Giunsa pagtabang ni Pablo ang mga taga-Corinto nga mouswag sa pagkahamtong?

¹⁴ Ang dili hamtong nga mga Kristohanon sagad malisdan sa paghimog hustong desisyon dihang kinahanglan nilang sabton kon unsaon pagpadapat ang mga prinsipyo sa Bibliya. Kon walay espesipikong balaod ang Bibliya, ang uban basin maghunahuna nga puwede nilang buhaton ang bisan unsa nga ilang gusto. Ang uban tingali mangitag balaod bisag dili ni kinahanglan. Pananglitan, ang mga Kristohanon sa  Corinto lagmit nangayog balaod kang Pablo kon puwede ba nilang kaonon ang pagkaon nga gihalad ngadto sa mga idolo. Imbes sultihan sila kon unsay angay nilang buhaton, giila ni Pablo nga ang matag usa naay “katungod sa pagpili” base sa itugot sa ilang konsensiya. Gihisgotan ni Pablo ang mga prinsipyo nga makatabang sa matag usa sa paghimog desisyon nga dili makahasol sa ilang konsensiya, ug sa samang higayon, dili makapandol sa uban. (1 Cor. 8:​4, 7-9) Pinaagi ana, gitabangan ni Pablo ang mga taga-Corinto nga mohamtong sa espirituwal ug gamiton ang ilang katakos sa panghunahuna imbes magdepende sa uban o mangitag mga balaod.

15. Giunsa pagtabang ni Pablo ang Hebreohanong mga Kristohanon nga mouswag sa espirituwal?

¹⁵ Makakat-on tag importanteng leksiyon sa gisulat ni Pablo ngadto sa Hebreohanong mga Kristohanon. Ang uban nila wala magpadayon sa pag-uswag sa espirituwal. Gani, ‘nagkinahanglan na sab silag gatas, dili sa gahing [espirituwal nga] pagkaon.’ (Heb. 5:12) Wala sila mikat-on ug midawat sa bag-ong mga butang nga anam-anam nga gipadayag ni Jehova pinaagi sa kongregasyon. (Prov. 4:18) Pananglitan, daghang Hudiyo ang nagpasiugda gihapon sa Moisesnong Balaod bisag giwala na ang Balaod mga 30 ka tuig sa miagi pinasukad sa halad sa Kristo. (Roma 10:4; Tito 1:10) Taas na unta kaayo nga panahon ang 30 ka tuig aron masabtan ug dawaton sa Hudiyong mga Kristohanon ang bag-ong kahikayan, maong haom lang gyod nga gipahinumdoman sila ni Pablo. Bisan kinsa nga nakabasa sa sulat ni Pablo ngadto sa mga Hebreohanon makaingon gyod nga kini nga basahon naay gahing espirituwal nga pagkaon. Mao gyod toy gikinahanglan sa mga Kristohanon aron mapalig-on ang ilang pagtuo nga labaw gyod ang Kristohanong kahikayan sa pagsimba ug aron mahatagan silag kaisog nga magpadayon sa pagsangyaw bisan pa sa pagsupak sa mga Hudiyo.—Heb. 10:​19-23.

LIKAYI ANG SOBRANG PAGSALIG SA KAUGALINGON

16. Gawas nga mouswag ta sa pagkahamtong, unsa pay kinahanglan natong himoon?

¹⁶ Gawas nga maningkamot ta nga mohamtong, kinahanglang maningkamot pod ta nga magpabiling hamtong. Aron mahimo ni, kinahanglan natong likayan ang sobrang pagsalig sa kaugalingon. (1 Cor. 10:12) Kinahanglang ‘padayon [natong] sulayan’ ang atong kaugalingon aron maseguro nato nga wala ta mohunong sa pag-uswag.—2 Cor. 13:5.

17. Nganong ang sulat ni Pablo sa mga taga-Colosas nagpakita nga importante ang pagpabiling hamtong?

 ¹⁷ Sa iyang sulat sa mga taga-Colosas, gipasiugda pag-usab ni Pablo kon unsa ka importante ang pagpabiling hamtong. Bisag hamtong na sila nga mga Kristohanon, gipasidan-an sila ni Pablo nga mag-amping pag-ayo aron dili sila maimpluwensiyahan sa panghunahuna sa kalibotan. (Col. 2:​6-10) Ug si Epafras, nga lagmit nakaila pag-ayo sa mga igsoon sa kongregasyon, kanunayng nag-ampo nga sila ‘magpabiling hamtong.’ (Col. 4:12) Unsay punto niini? Si Pablo ug Epafras parehong nahibalo nga ang pagpabiling hamtong nagkinahanglag personal nga paningkamot ug tabang sa Diyos. Gusto nila nga ang mga taga-Colosas magpabiling hamtong nga mga Kristohanon bisag unsa pang pagsulay ang ilang giatubang.

18. Unsay posibleng mahitabo sa hamtong nga Kristohanon? (Tan-awa sab ang hulagway.)

¹⁸ Gipasidan-an ni Pablo ang mga Hebreohanon nga ang hamtong nga Kristohanon posibleng mawad-an sa pag-uyon sa Diyos hangtod sa hangtod kon dili siya mag-amping. Ang kasingkasing sa usa ka Kristohanon posibleng motig-a pag-ayo maong dili siya maghinulsol ug makadawat sa kapasayloan sa Diyos. Maayo na lang kay ang mga Hebreohanon wala moabot nianang puntoha. (Heb. 6:​4-9) Komosta kadtong mga dili aktibo o napalagpot pero maghinulsol sa ulahi? Ang ilang mapainubsanong paghinulsol magpakita nga lahi sila niadtong gitumong ni Pablo sa iyang sulat. Siyempre, dihang mobalik sila kang Jehova, magkinahanglan sila sa iyang tabang. (Ezeq. 34:​15, 16) Ang mga ansiyano puwedeng mohangyog hamtong nga igsoon aron tabangan sila nga mabalik ang ilang espirituwal nga kalig-on.

19. Unsay angay natong himoong tumong?

¹⁹ Kon tumong nimo nga mahimong hamtong nga Kristohanon, kaya nimo nang kab-oton! Padayong tun-i ang gahing espirituwal nga pagkaon ug paningkamoti nga mas masundog pa ang panghunahuna ni Jehova. Ug kon hamtong na ka, himoa ang tanan aron magpabilin kang hamtong nga Kristohanon.