Nahibalo Ka Ba?
Nganong naay mga dili Israelinhon nga apil sa mga sundalo ni Haring David?
APIL sa dili Israelinhong mga sundalo ni David mao si Zelek nga Ammonhanon, si Urias nga Hitihanon, ug si Itma nga Moabihanon. a (1 Cron. 11:39, 41, 46) Apil pod sa kasundalohan ni David ang mga “Keretnon, Peletnon, ug . . . Gitihanon.” (2 Sam. 15:18) Ang mga Keretnon ug Peletnon gituohan nga konektado sa mga Filistehanon. (Ezeq. 25:16) Ang mga Gitihanon naggikan sa Gat, nga siyudad sa mga Filistehanon.—Jos. 13:2, 3; 1 Sam. 6:17, 18.
Nganong giapil ni David sa iyang kasundalohan ang mga dili Israelinhon? Kay kabalo siya nga maunongon sila kaniya ug ilabina kang Jehova. Pananglitan, bahin sa mga Keretnon ug Peletnon, ang The New Interpreter’s Dictionary of the Bible nag-ingon: “Sila nagpabiling maunongon kang David bisan sa lisod kaayong mga kahimtang panahon sa iyang pagmando.” Giunsa nila pagpakita ang ilang pagkamaunongon? Dihang “ang tanang lalaki sa Israel” mibiya kang Haring David ug misunod sa “tawong burokinto nga ginganlag Sheba,” ang mga Keretnon ug Peletnon miunong kang David ug mitabang aron mahunong ang pagrebelde ni Sheba. (2 Sam. 20:1, 2, 7) Sa laing higayon, ang anak ni Haring David nga si Adonias misulay pag-ilog sa trono. Pero ang mga Keretnon ug Peletnon nagpabiling maunongon kang David ug mitabang sa pag-entrono kang Solomon, ang usa nga gipili ni Jehova nga mahimong sunod nga hari.—1 Hari 1:24-27, 38, 39.
Naa pay laing dili Israelinhong sundalo nga miunong gyod kang David—si Itai nga Gitihanon. Dihay higayon nga ang anak ni David nga si Absalom mirebelde ug naningkamot nga makuha ang suporta sa mga tawo sa Israel aron himoon siyang hari. Pero si Itai ug ang 600 pa ka Gitihanon misuportar kang Haring David. Sa primero, giingnan ni David si Itai nga kay dili siya Israelinhon, dili siya kinahanglang moapil sa pagpakig-away. Pero si Itai miingon: “Ingon nga si Jehova buhi ug ingon nga ang akong ginoong hari buhi, bisan asa moadto ang akong ginoong hari, moadto usab ang imong alagad. Andam kong mamatay uban nimo!”—2 Sam. 15:6, 18-21.
Si Itai maunongon kang David, ang hari nga gidihogan ni Jehova
Bisag ang mga Keretnon, Peletnon, ug Gitihanon dili mga Israelinhon, ilang giila nga si Jehova ang matuod nga Diyos ug si David ang dinihogan ni Jehova. Seguradong mapasalamaton kaayo si David niini nga mga sundalo nga miunong gyod niya!
a Ang balaod sa Diyos nga narekord sa Deuteronomio 23:3-6 nag-ingon nga walay Ammonhanon ug Moabihanon ang puwedeng mahimong sakop sa kongregasyon ni Jehova. Pero posible nga ang gipasabot niini nga balaod mao nga dili sila mahimong bug-os nga membro sa nasod sa Israel sa legal nga paagi. Bisan pa ana, puwede silang makig-uban o mopuyo uban sa katawhan sa Diyos. Tan-awa ang Pagtugkad sa Kasulatan, Tomo 1, panid 118.
