1. Unsay gihimo sa daghan aron mapauswag ang ilang pag-alagad kang Jehova?

 DAGHAN tag buluhaton samtang nagkaduol ang kataposan niining sistemaha. (Mat. 24:14; Luc. 10:2; 1 Ped. 5:2) Gusto natong moalagad kang Jehova kutob sa atong maarangan. Daghan ang nagpalapad sa ilang ministeryo. Ang pipila gustong magpayunir. Ang uban gustong mag-alagad sa Bethel o moboluntaryo sa pagpanukod ug teokratikanhong mga pasilidad. Ug daghang brader ang nangab-ot aron mahimong ministeryal nga alagad o ansiyano. (1 Tim. 3:1, 8) Malipay gyod si Jehova nga makita ang iyang katawhan nga kinabubut-ong nag-alagad kaniya!—Sal. 110:3; Isa. 6:8.

2. Unsa tingali atong bation kon dili nato makab-ot ang pipila nato ka espirituwal nga mga tumong?

² Apan maluya tingali ta kon taudtaod na tang naningkamot pero wala gihapon nato makab-ot ang pipila nato ka espirituwal nga mga tumong. O tingali madismayar ta kon tungod sa edad o sa ubang sirkumstansiya, dili ta mokuwalipikar sa pipila ka pribilehiyo. (Prov. 13:12) Mao nay kahimtang ni Melissa. * Gusto unta niyang mag-alagad sa Bethel o moeskuwela sa School for Kingdom Evangelizers, pero siya miingon: “Lapas na ko sa gitakdang edad. Karon, kutob na lang ko sa pagpangandoy sa maong mga pribilehiyo. Usahay, madismayar ko.”

3. Unsa tingali kinahanglang buhaton sa uban aron mokuwalipikar sa pipila ka pribilehiyo?

³ Ang uban nga bata pa ug himsog kinahanglan tingaling mohamtong ug mag-ugmad ug pipila ka hiyas una sila mokuwalipikar alang sa dugang mga pribilehiyo. Pananglitan, ang pipila tingali  intelihente, dali rang makadesisyon, ug andam motrabaho. Pero basin kinahanglan silang makakat-on nga mahimong mas mapailobon, mas maampingon sa ilang trabaho, ug mas matinahoron sa uban. Kon maningkamot ka nga maugmad ang gikinahanglang mga hiyas, basin hatagan kag pribilehiyo sa panahon nga wala nimo damha. Tagda ang eksperyensiya ni Nick. Sa 20 anyos pa siya, nadismayar kaayo siya kay wala siya matudlo ingong ministeryal nga alagad. Siya miingon, “Naa gyod tingali sa akong kaugalingon ang problema.” Pero wala mosurender si Nick. Gipahimuslan niya ang mga pribilehiyo nga puwede niyang mabatonan. Karon, membro na siya sa usa ka Komite sa Sangang Buhatan.

4. Unsay hisgotan niining artikuloha?

⁴ Nadismayar ka ba kay wala pa nimo makab-ot ang usa ka espirituwal nga tumong? Kon mao, iampo nâ kang Jehova. (Sal. 37:5-7) Dugang pa, pangayog sugyot sa hamtong nga mga igsoon kon unsaon nimo pagpauswag ang imong pag-alagad sa Diyos, ug dayon paningkamoti pag-ayo nga ipadapat ang ilang tambag. Kon buhaton nâ nimo, basin madawat nimo ang maong pribilehiyo o makab-ot ang maong tumong. Pero sama sa kahimtang ni Melissa, nga gihisgotan ganina, imposible tingali nga mabatonan nimo karon ang pribilehiyo nga gusto nimo. Busa, sa unsang paagi magmalipayon gihapon ka? Aron matubag kana, hisgotan niining artikuloha (1) kon unsay makahatag nimog kalipay, (2) kon unsaon pagpauswag ang imong kalipay, ug (3) kon unsang mga tumong ang makadugang sa imong kalipay.

5. Aron magmalipayon, sa unsa ta angayng magpokus? (Ecclesiastes 6:9)

⁵ Gipakita sa Ecclesiastes 6:9 kon unsay makahatag natog kalipay. (Basaha.) Ang tawo nga “malipay sa kon unsay makita sa mata” mobatig katagbawan sa iyang nabatonan, sama sa iyang presenteng mga sirkumstansiya. Pero, ang tawo nga nagtinguha sa mga butang nga dili mabatonan dili gyod matagbaw. Busa, unsay atong makat-onan? Aron magmalipayon, kinahanglan nga magpokus ta sa kon unsay atong nabatonan ug sa mga tumong nga puwede natong makab-ot.

6. Unsang ilustrasyon ang atong hisgotan, ug unsay atong makat-onan niana?

⁶ Posible ba gyod nga matagbaw ta sa mga butang nga ato nang nabatonan? Daghan ang naghunahuna nga dili nâ posible kay natural lang nga ganahan tang mokat-on ug bag-ong mga butang. Pero sa pagkatinuod, posible nâ. Puwede tang mobatig tinuod nga kalipay sa “makita sa [atong] mata.” Sa unsang paagi mahimo nato kana? Aron atong mahibaloan, hisgotan nato ang ilustrasyon ni Jesus sa mga talanton nga mabasa sa Mateo 25:14-30. Atong makat-onan kon sa unsang paagi magmalipayon ta ug mahimo pa ganing mas malipayon sa atong presenteng kahimtang.

7. Sumaryoha ang ilustrasyon ni Jesus bahin sa mga talanton.

⁷ Sa ilustrasyon, ang usa ka tawo hapit nang molangyaw. Sa wala pa siya mogikan, iyang gipatawag ang iyang mga ulipon ug gihatagan ang matag usa kanila ug mga talanton nga ilang inegosyo. * Kay nahibalo ang tawo nga ang iyang mga ulipon lainlaig katakos, gihatagan niya ang usa ka ulipon ug lima ka talanton, ang lain duha, ug ang ikatulo nga ulipon usa ka talanton. Ang unang duha ka ulipon nagkugi aron motubo ang kuwarta sa ilang agalon. Pero, ang ikatulong ulipon walay gibuhat sa kuwarta nga gihatag kaniya, busa gitangtang siya sa trabaho.

8. Nganong nalipay kaayo ang unang ulipon diha sa ilustrasyon?

⁸ Tingali nalipay kaayo ang unang ulipon nga  gihatagan siya sa iyang agalon ug lima ka talanton. Dako kaayo nâ nga kantidad, ug nagpakita nâ nga may pagsalig gyod kaniya ang iyang agalon! Pero komosta ang ikaduhang ulipon? Puwede unta siyang madismayar kay ang iyang nadawat nga talanton dili parehas ka daghan sa nadawat sa unang ulipon. Pero unsay iyang gibuhat?

9. Unsay wala giingon ni Jesus bahin sa ikaduhang ulipon? (Mateo 25:22, 23)

⁹ Basaha ang Mateo 25:22, 23. Wala moingon si Jesus nga ang ikaduhang ulipon nasuko ug naglagot kay duha ra ka talanton ang iyang nadawat. Ug wala moingon si Jesus nga nagreklamo ang ulipon: ‘Mao ra ni ako? Makahimo man sab ko sa mahimo sa ulipon nga nakadawat ug lima ka talanton! Kon naghunahuna ang akong agalon nga dili ko maayong trabahador, maypag ilubong na lang nako ning duha ka talanton ug magtrabaho para sa akong kaugalingon.’

10. Unsay gihimo sa ikaduhang ulipon sa iyang mga talanton?

¹⁰ Sama sa unang ulipon, giseryoso pag-ayo sa ikaduhang ulipon ang responsibilidad nga gihatag kaniya ug naghago siya para sa iyang agalon. Ingong resulta, nadoble niya ang talanton sa iyang agalon. Gigantihan sa agalon ang ulipon tungod sa paghago niini. Gawas nga nalipay ang agalon, giisip pa gyod niya ang ulipon nga takos modawat ug dugang responsibilidad!

11. Sa unsang paagi mapauswag nato ang atong kalipay?

¹¹ Sa susama, mapauswag nato ang atong kalipay pinaagi sa pagkugi pag-ayo sa bisan unsang asaynment nga ihatag kanato diha sa pag-alagad kang Jehova. ‘Magmaokupado pag-ayo’ sa buluhatong pagsangyaw, ug makigbahin  sa bug-os sa mga buluhaton sa kongregasyon. (Buh. 18:5; Heb. 10:24, 25) Pangandam pag-ayo para sa mga tigom aron makahatag kag makapalig-ong mga komento. Seryosoha ang bisan unsang bahin sa estudyante nga ihatag kanimo panahon sa midweek nga tigom. Kon hangyoon ka sa pagtabang sa usa ka buluhaton diha sa kongregasyon, abot sa hustong oras ug ipakita nga kasaligan ka. Ayaw pakamenosa ang bisan unsang asaynment nga ihatag kanimo, nga maghunahunang dili ni nimo angayng gahinag panahon. Paningkamot nga mouswag ang imong mga kahanas. (Prov. 22:29) Kon magkugi ka pag-ayo sa imong espirituwal nga mga kalihokan ug asaynment, mas paspas ang imong pag-uswag ug mas magmalipayon ka. (Gal. 6:4) Mas sayon pod para nimo nga magmalipayon dihang ang uban makadawat ug pribilehiyo nga gusto unta nimong madawat.—Roma 12:15; Gal. 5:26.

12. Unsay gibuhat sa duha ka Saksi aron mouswag ang ilang kalipay?

¹² Nahinumdom mo kang Melissa, ang sister nga miingon nga gusto unta niyang mag-alagad sa Bethel o moeskuwela sa School for Kingdom Evangelizers? Bisag dili posible nga madawat niya ang maong mga pribilehiyo, siya miingon: “Nagkugi ko sa akong pagpayunir ug sa pagpakigbahin sa tanang paagi sa pagsangyaw. Nakahatag ni nakog dakong kalipay.” Ug unsay gibuhat ni Nick aron mawala ang iyang pagkadismayar dihang wala siya matudlo ingong ministeryal nga alagad? “Nagpokus ko sa mga pribilehiyo nga puwede nakong mabatonan—pagpakigbahin sa ministeryo ug paghatag ug makapadasig nga mga komento panahon sa tigom. Miaplay sab ko sa Bethel ug nadawat ko pagkasunod tuig.”

13. Unsay resulta kon magkugi ka sa imong asaynment karon? (Ecclesiastes 2:24)

¹³ Kon magkugi ka pag-ayo sa imong asaynment karon, makadawat kaha kag dugang mga responsibilidad sa umaabot? Puwede nang mahitabo, sama sa kahimtang ni Nick. Pero kon dili, sama kang Melissa, mouswag gihapon ang imong kalipay, ug mobati kag dakong katagbawan ug kalamposan. (Basaha ang Ecclesiastes 2:24.) Dugang pa, seguradong malipay ka pag-ayo sa pagkahibalo nga ang imong mga paningkamot nakapahimuot sa atong Agalon, si Jesu-Kristo.

14. Unsay angay natong hinumdoman maylabot sa atong espirituwal nga mga tumong?

¹⁴ Kon magpokus ta sa atong asaynment karon, nagpasabot ba nâ nga dili na ta mangitag mga paagi nga mapalapad ang atong pag-alagad kang Jehova? Wala! Angay tang magtakdag mga tumong nga makatabang nato nga mahimong mas mabungahon diha sa ministeryo ug mas matinabangon sa atong mga igsoon. Makab-ot nato ang maong mga tumong kon kita maalamon ug mapainubsanong magpokus sa pagtabang sa uban imbes magpokus sa atong kaugalingon.—Prov. 11:2; Buh. 20:35.

15. Unsa ang pipila ka tumong nga makatabang nimo sa pagpauswag sa imong kalipay?

¹⁵ Unsang mga tumong ang puwede nimong kab-oton? Hangyoa si Jehova nga tabangan ka nga mahibaloan kon unsang mga tumong ang puwede nimong makab-ot. (Prov. 16:3; Sant. 1:5) Puwede ba nimong kab-oton ang usa sa mga tumong nga gihisgotan sa  unang parapo niining artikuloha—pag-oksilyare payunir o pag-regular payunir, pag-alagad sa Bethel, o pagpakigbahin sa mga proyekto sa pagpanukod? O basin puwede kang magtuon ug bag-ong pinulongan aron mapakaylap ang maayong balita o makasangyaw pa gani sa langyawng teritoryo. Mahibalo kag dugang bahin niini pinaagi sa pagbasa sa kapitulo 10 sa librong Organisado Aron Buhaton ang Kabubut-on ni Jehova ug sa pagpakig-estorya sa mga ansiyano sa inyong  kongregasyon. * Samtang maningkamot ka sa pagkab-ot sa maong mga tumong, madayag ang imong pag-uswag ug madugangan ang imong kalipay.

16. Unsay imong buhaton kon sa pagkakaron dili nimo makab-ot ang usa ka tumong?

¹⁶ Pero komosta kon sa pagkakaron dili nimo makab-ot ang usa sa mga tumong nga nahisgotan na? Puwede kang magtakdag laing tumong nga makab-ot nimo. Tagda ang mosunod nga mga pananglitan.

17. Sumala sa 1 Timoteo 4:13, 15, unsa tingali buhaton sa usa ka brader aron mahimo siyang mas maayong magtutudlo?

¹⁷ Basaha ang 1 Timoteo 4:13, 15. Kon bawtismado ka nga brader, puwede nimong mapauswag ang imong katakos sa pagpakigpulong ug pagpanudlo. Ngano? Tungod kay kon maningkamot ka nga mapauswag ang imong katakos sa pagbasa, pagpakigpulong, ug pagpanudlo, mas makatabang ka niadtong maminaw kanimo. Puwede nimong himoong tumong ang pagtuon ug pagpadapat sa matag katakos sa pagpanulti nga gihisgotan sa brosyur nga Mahimong Hanas sa Pagbasa ug Pagpanudlo. Tagsatagsaa pagtuon ang matag katakos, pagpraktis pirme sa balay, ug paningkamoti nga mapadapat kana sa dihang mopakigpulong ka. Pangayog sugyot gikan sa katabang nga magtatambag o sa ubang ansiyano kinsa “naghago sa pagpanulti ug pagpanudlo.” * (1 Tim. 5:17) Ayaw pagpokus sa pagpadapat lang sa leksiyon gikan sa brosyur kondili sa pagtabang sab sa imong mga mamiminaw nga mapalig-on ang ilang pagtuo o mapalihok sila sa pag-aplikar  sa ilang nakat-onan. Kon buhaton nâ nimo, mouswag ang imong kalipay ug ang ilaha.

18. Unsay makatabang kanato sa pagkab-ot sa atong mga tumong diha sa ministeryo?

¹⁸ Kitang tanan gisugo sa pagsangyaw ug paghimog mga tinun-an. (Mat. 28:19, 20; Roma 10:14) Gusto ba nimong pauswagon ang imong kahanas niining importante kaayo nga buluhaton? Pagtakdag espesipikong mga tumong samtang imong tun-an ug ipadapat ang imong makat-onan sa brosyur nga Pagpanudlo. Makakuha kag dugang praktikal nga mga sugyot gikan sa Atong Kristohanong Kinabuhi ug Ministeryo—Workbook sa Tigom ug sa mga video sa sampol nga pagpakig-estorya nga ipakita diha sa midweek nga mga tigom. Sulayi ang lainlaing pamaagi aron mahibaloan nimo kon unsay mas epektibo sa inyong teritoryo. Kon sundon nimo kini nga mga sugyot, seguradong bation nimo ang dili hitupngang kalipay kay nahimo kang mas maayong magsasangyaw ug magtutudlo.—2 Tim. 4:5.

19. Sa unsang paagi maugmad nimo ang Kristohanong mga hiyas?

¹⁹ Sa dihang magtakdag mga tumong, ayawg kalimti nga usa sa labing importante mao ang pag-ugmad ug Kristohanong mga hiyas. (Gal. 5:22, 23; Col. 3:12; 2 Ped. 1:5-8) Unsay imong buhaton aron makab-ot ang maong tumong? Ibutang ta nga gusto nimong molig-on ang imong pagtuo. Puwede nimong basahon ang mga artikulo diha sa atong mga publikasyon nga naghatag ug praktikal nga mga sugyot kon unsaon pagpalig-on ang imong pagtuo. Seguradong makabenepisyo ka sa pagtan-aw sa mga video sa JW Broadcasting^® bahin sa mga igsoon nga nagpakitag talagsaong pagtuo samtang nag-atubang ug lainlaing pagsulay. Dayon konsideraha ang mga paagi nga masundog nimo ang ilang pagtuo.

20. Sa unsang paagi madugangan ang atong kalipay ug mamenosan ang atong pagkadismayar?

²⁰ Seguradong kitang tanan gustong mohimog labaw pa para kang Jehova kay sa atong mahimo karon. Sa bag-ong kalibotan, makahimo na ta sa pag-alagad kaniya sa bug-os. Sa pagkakaron, kon pahimuslan nato ang bisan unsang kahigayonan nga bukas kanato, puwedeng madugangan ang atong kalipay ug mamenosan ang atong pagkadismayar. Labaw sa tanan, atong mapasidunggan ug madayeg si Jehova, ang atong “malipayong Diyos.” (1 Tim. 1:11) Busa maningkamot ta nga magmalipayon sa mga pribilehiyo nga atong nabatonan!