1. Unsang tentasyon ang giatubang ni Jose, ug unsay iyang gihimo?

 SI Jose nga anak ni Jacob nag-atubang ug tentasyon. “Dulog nako,” miingon ang asawa sa iyang agalon nga si Potipar. Mibalibad si Jose. Naa tingali maghunahuna, ‘Nganong wala man mosugot si Jose?’ Wala si Potipar adtong panahona. Gawas pa, ulipon ra si Jose. Busa posibleng lisodlisoron gyod siya sa asawa sa iyang agalon kon mobalibad siya. Pero wa gyod magpadala si Jose bisag gibalikbalikan siyag tental. Ngano? Siya miingon: “Dili ko makaako sa pagbuhat niining dakong pagkadaotan ug magpakasala sa Diyos!”—Gen. 39:7-12.

2. Giunsa pagkahibalo ni Jose nga sala ang pagpanapaw?

² Giunsa pagkahibalo ni Jose nga giisip sa iyang Diyos nga “dakong pagkadaotan” ang pagpanapaw? Ang Moisesnong Balaod nga dunay klarong sugo, “Ayawg panapaw,” gisulat mga 200 pa ka tuig sa ulahi. (Ex. 20:14) Bisan pa ana, nakaila pag-ayo si Jose kang Jehova maong nahibalo siya nga gidumtan ni Jehova ang pagpanapaw. Pananglitan, seguradong nahibalo si Jose nga gusto ni Jehova nga ang kaminyoon maoy panaghiusa tali lang sa usa ka lalaki ug usa ka babaye. Ug seguradong nakadungog si Jose sa duha ka higayon nga giprotektahan ni Jehova ang iyang lola sa tuhod nga si Sara aron dili siya mahilabtan sa uban. Giprotektahan pod sa Diyos ang iyang lola nga si Rebeca. (Gen. 2:24; 12:14-20; 20:2-7; 26:6-11) Dihang gipamalandong ni Jose ang maong mga panghitabo, seguradong nasabtan niya kon unsay husto ug sayop sa panan-aw sa Diyos. Kay gimahal ni Jose ang iyang Diyos nga si Jehova, determinado  siyang mosunod kon unsay matarong sa panglantaw ni Jehova.

3. Unsay atong hisgotan niining artikuloha?

³ Gihigugma ba nimo ang pagkamatarong? Siyempre! Pero dili ta hingpit, ug kon dili ta mag-amping, posibleng maimpluwensiyahan ta sa panglantaw sa kalibotan bahin sa pagkamatarong. (Isa. 5:20; Roma 12:2) Busa atong hisgotan kon unsa ang pagkamatarong ug kon unsay kaayohan kon ato ning higugmaon. Dayon, atong hisgotan ang tulo ka paagi nga mapalig-on nato ang atong gugma sa mga sukdanan ni Jehova.

4. Unsang sayop nga ideya ang gihunahuna sa uban bahin sa matarong nga tawo?

⁴ Para sa uban, kon maghisgot ug tawong matarong, ilang mahunahunaan ang tawo nga mapahitas-on, hinawayon, o nagtuo nga mas matarong siya kay sa uban. Pero dili ganahan ang Diyos ug ingon ana nga mga kinaiya. Sa dinhi pa si Jesus sa yuta, wala siya malipay sa mga lider sa relihiyon nga nagbuotbuot ug ilang kaugalingong mga sukdanan sa pagkamatarong. (Eccl. 7:16; Luc. 16:15) Ang tinuod nga matarong nga tawo dili gyod maghunahuna nga mas matarong siya kay sa uban.

5. Sumala sa Bibliya, unsa ang pagkamatarong? Paghatag ug pananglitan.

⁵ Ang pagkamatarong nindot kaayong hiyas. Sa simpleng pagkasulti, nagpasabot nig pagbuhat kon unsay matarong sa panan-aw ni Jehova nga Diyos. Sa Bibliya, ang mga pulong para sa “pagkamatarong” nagpasabot sa pagkinabuhi uyon sa kinalabwang sukdanan—ang mga sukdanan ni Jehova. Pananglitan, gisugo ni Jehova ang mga negosyante sa paggamit ug ‘tukma nga timbangan.’ (Deut. 25:15) Ang orihinal nga Hebreohanong pulong nga gihubad ug “tukma” puwede pong hubaron nga “matarong.” Busa ang usa ka Kristohanon nga gustong mahimong matarong atubangan sa Diyos kinahanglang magmatinud-anon sa tanan niyang transaksiyon sa negosyo. Ang matarong nga tawo nahigugma sab sa hustisya, ug dili siya malipay nga makitang gidaogdaog ang uban. Ug konsiderahon sa matarong nga tawo kon unsay panglantaw ni Jehova sa mga desisyon nga iyang himoon ‘aron bug-os niya Siyang mapalipay.’—Col. 1:10.

6. Nganong makasalig ta sa mga sukdanan ni Jehova sa husto ug sayop? (Isaias 55:8, 9)

⁶ Sumala sa Bibliya, si Jehova ang Tinubdan sa pagkamatarong. Tungod ana, gitawag siyag “puy-anan sa pagkamatarong.” (Jer. 50:7) Kay si Jehova ang Maglalalang, siya lang ang may katungod nga magtakdag mga sukdanan kon unsay husto ug sayop. Si Jehova hingpit. Busa ang iyang panglantaw sa kon unsay husto ug sayop mas labaw kay sa atoa, kay kita makasasala ug dili hingpit. (Prov. 14:12; basaha ang Isaias 55:8, 9.) Pero kay gibuhat ta sumala sa larawan sa Diyos, kaya natong sundon ang iyang mga sukdanan sa pagkamatarong. (Gen. 1:27) Kay gimahal nato ang atong Amahan, gusto nato siyang sundogon kutob sa maarangan.—Efe. 5:1.

7. Nganong nagkinahanglan tag kasaligang mga standard o sukdanan? Iilustrar.

⁷ Makaayo nato ang pagsunod sa mga sukdanan ni Jehova sa husto ug sayop. Ngano? Imadyina kon unsay mahitabo kon ang kada bangko lainlaig standard sa pagtino sa bili sa kuwarta o ang kada construction company naay kaugalingong standard sa mga sukod. Puwerte gyong gubota! Ug kon ang mga doktor ug nars dili mosunod sa espesipikong standard sa pag-atiman ug pagtambal sa pasyente, posibleng moresulta nig kamatayon. Busa ang kasaligang mga standard o sukdanan makapanalipod gyod nato. Ingon ana pod ang mga sukdanan sa Diyos sa husto ug sayop; makapanalipod ni nato.

8. Unsang mga panalangin ang madawat niadtong nahigugma sa pagkamatarong?

 ⁸ Panalanginan ni Jehova kadtong naningkamot nga mosunod sa iyang mga sukdanan. Siya nagsaad: “Ang mga matarong manag-iya sa yuta, ug sila magpuyo niini hangtod sa hangtod.” (Sal. 37:29) Ma-imagine ba nimo ang panaghiusa, kalinaw, ug kalipay dihang ang tanan mosunod sa mga sukdanan ni Jehova? Mao nay kinabuhi nga gusto ni Jehova para nimo. Busa angay gyod natong higugmaon ang pagkamatarong! Unsaon nato pagpalig-on ang atong gugma sa pagkamatarong? Hisgotan nato ang tulo ka paagi.

9. Unsay makatabang nato nga higugmaon ang pagkamatarong?

⁹ Paagi 1: Higugmaa si Jehova, ang nagtakda sa mga sukdanan. Aron mapalihok ta sa paghigugma sa pagkamatarong, kinahanglang palawmon nato ang atong gugma kang Jehova, kinsa nagtakda sa mga sukdanan sa husto ug sayop. Samtang magkalalom ang atong gugma kang Jehova, magkalalom pod ang atong tinguha nga magkinabuhi uyon sa iyang matarong nga mga sukdanan. Hunahunaa ni: Kon gihigugma pa ni Adan ug Eva si Jehova, wala unta nila supaka ang iyang matarong nga balaod.—Gen. 3:1-6, 16-19.

10. Unsay gihimo ni Abraham aron mas masabtan niya ang panghunahuna ni Jehova?

¹⁰ Dili gyod nato gustong sundogon ang sayop ni Adan ug Eva. Malikayan nato nâ kon padayon tang magkat-on bahin kang Jehova, magpakitag apresasyon sa iyang mga hiyas, ug maningkamot nga masabtan ang iyang panghunahuna. Samtang himoon nato nâ, seguradong magkalalom ang atong gugma kang Jehova. Tagda pananglitan si Abraham. Gimahal gyod niya si Jehova. Bisan pag wala kaayo siya kasabot sa mga desisyon ni Jehova, wala mosupak si Abraham. Hinuon, naningkamot siya nga mas mailhan si Jehova. Pananglitan, dihang nahibaloan ni Abraham ang desisyon ni Jehova nga laglagon ang Sodoma ug Gomora, sa sinugdan nahadlok siya nga ang “Maghuhukom sa tibuok yuta” maglaglag sa matarong uban sa daotan. Para kang Abraham, dili to makataronganon maong mapainubsanon siyang misukna kang Jehova ug sunodsunod nga pangutana. Mapailobon siyang gitubag ni Jehova. Sa ulahi, nasabtan ni Abraham nga ginasusi ni Jehova ang kasingkasing sa matag tawo ug dili gyod Niya apilon ang inosente dihang silotan Niya ang nakasala.—Gen. 18:20-32.

11. Giunsa pagpakita ni Abraham ang iyang gugma ug pagsalig kang Jehova?

¹¹ Dakog epekto kang Abraham ang iyang pagpakig-estorya kang Jehova bahin sa Sodoma ug Gomora. Tungod adto, mas gihigugma ug gitahod niya ang iyang Amahan. Pipila ka tuig sa ulahi, nasulayan pag-ayo ang pagsalig ni Abraham kang Jehova. Gisugo siya ni Jehova nga ihalad ang iyang pinalanggang anak nga si Isaac. Pero kay mas nailhan na ni Abraham ang iyang Diyos, wala na siya mangutana adtong higayona. Gituman dayon ni Abraham ang gisugo ni Jehova kaniya. Bisan pa niana, ma-imagine nato nga daw gikumot ang iyang kasingkasing samtang nangandam sa maong sugo. Seguradong gipamalandong ni Abraham ang iyang mga nakat-onan bahin kang Jehova. Nahibalo siya nga dili gyod mohimo si Jehova ug bisan unsa nga dili matarong o dili mahigugmaon. Sumala ni apostol Pablo, nahibalo si Abraham nga si Jehova makahimo sa pagbanhaw sa iyang pinalanggang anak nga si Isaac. (Heb. 11:17-19) Kon buot hunahunaon, si Jehova nagsaad nga si Isaac mahimong amahan sa usa ka nasod, ug adtong panahona, wala pay anak si Isaac. Gimahal ni Abraham si Jehova,  busa misalig siya nga kanunayng himoon sa iyang Amahan kon unsay matarong. Tungod sa iyang pagtuo, mituman siya bisag lisod tong himoon.—Gen. 22:1-12.

12. Unsaon nato pagsundog si Abraham? (Salmo 73:28)

¹² Unsaon nato pagsundog si Abraham? Sama niya, kinahanglang padayon tang magkat-on bahin kang Jehova. Samtang himoon nato nâ, mas masuod ta kaniya ug mas molalom ang atong gugma kaniya. (Basaha ang Salmo 73:28.) Mabansay sab ang atong konsensiya nga molihok uyon sa panghunahuna sa Diyos. (Heb. 5:14) Ingong resulta, dili ta magpadala kon dunay motental nato sa paghimog dili maayo. Dili gyod nato gusto nga mohimog bisan unsa nga makapasakit sa atong Amahan ug makadaot sa atong relasyon kaniya. Pero unsa pay atong himoon aron mapakita nato nga atong gihigugma ang pagkamatarong?

13. Unsay atong buhaton aron mahimo nato kon unsay matarong? (Proverbio 15:9)

¹³ Paagi 2: Paningkamot nga maugmad kada adlaw ang gugma sa pagkamatarong. Kon gusto natong molig-on ang atong kaunoran, kinahanglan tang maningkamot nga mag-ehersisyo kada adlaw. Ingon ana pod kon bahin sa pag-ugmad sa atong gugma sa mga sukdanan ni Jehova sa pagkamatarong; kinahanglang maningkamot ta nga himoon nâ kada adlaw. Dili nâ lisod himoon. Si Jehova makataronganon, ug wala gyod siya magdahom nga mohimo ta ug labaw sa atong maarangan. (Sal. 103:14) Iya tang gipasaligan nga “gihigugma Niya ang naghimog matarong.” (Basaha ang Proverbio 15:9.) Kon naghimo tag espesipikong tumong sa pag-alagad kang Jehova, padayon tang maningkamot sa pagkab-ot niini. Ingon ana sab ang atong buhaton aron mahimo nato kon unsay matarong. Ug si Jehova nagpasalig nga mapailobon siyang motabang nato aron anam-anam tang mouswag.—Sal. 84:5, 7.

14. Unsay gitumong sa “pagkamatarong ingong panagang sa dughan,” ug nganong kinahanglan nato ni?

¹⁴ Mahigugmaon tang gipahinumdoman ni Jehova nga dili bug-at ang paghimo kon unsay matarong. (1 Juan 5:3) Usa ni ka proteksiyon nga atong gikinahanglan matag adlaw. Hinumdomi ang espirituwal nga armadura  nga gihisgotan ni apostol Pablo. (Efe. 6:14-18) Unsa nga bahin sa armadura ang nanalipod sa kasingkasing sa sundalo? Ang “pagkamatarong ingong panagang sa dughan,” nga nagtumong sa matarong nga mga sukdanan ni Jehova. Sama nga ang panagang sa dughan manalipod sa literal nga kasingkasing, ang matarong nga mga sukdanan ni Jehova manalipod sab sa imong simbolikong kasingkasing, ang imong pangsulod nga pagkatawo. Busa importante nga apil sa imong armadura ang pagkamatarong ingong panagang sa dughan!—Prov. 4:23.

15. Unsaon nato pagsul-ob ang pagkamatarong ingong panagang sa dughan?

¹⁵ Unsaon nimo pagsul-ob ang pagkamatarong ingong panagang sa dughan? Imo ning mahimo pinaagi sa pagkonsiderar sa mga sukdanan ni Jehova dihang mohimo kag mga desisyon kada adlaw. Dihang magdesisyon kon unsay estoryahan, musika nga paminawon, kalingawan nga tan-awon, o libro nga basahon, pangutan-a una ang imong kaugalingon: ‘Unsa may akong ipasulod sa akong kasingkasing? Giuyonan ba ni Jehova? O nagpasiugda nig imoralidad, kapintasan, kahakog, kadalo—mga butang nga giisip ni Jehova nga dili matarong?’ (Filip. 4:8) Kon ang imong mga desisyon uyon sa kabubut-on ni Jehova, ang imong kasingkasing mapanalipdan sa iyang matarong nga mga sukdanan.

16-17. Sa unsang paagi ang Isaias 48:18 nagpasalig nato nga posible ang pagkinabuhi uyon sa mga sukdanan ni Jehova hangtod sa hangtod?

¹⁶ Nabalaka ba ka kon makapadayon ka sa pagkinabuhi uyon sa matarong nga mga sukdanan ni Jehova kada adlaw? Tagda ang ilustrasyon nga gigamit ni Jehova diha sa Isaias 48:18. (Basaha.) Si Jehova nagsaad nga ang atong pagkamatarong “mahisama sa mga balod sa dagat.” Imadyina nga nagbarog ka sa baybayon, nga nagtan-aw sa mga balod. Samtang tua ka didto, mabalaka ba ka nga moabot ang panahon nga wala nay mga balod? Dili! Nahibalo ka nga sukad pa sa una, naa nay mga balod sa maong baybayon, ug segurado ka nga magpadayon ni.

¹⁷ Ang imong pagkamatarong mahisama sa mga balod sa dagat! Sa unsang paagi? Dihang kinahanglan kang mohimog desisyon, konsideraha una kon unsay panghunahuna ni Jehova, ug sunda kana. Bisag unsa pa ka lisod ang desisyon, ang imong mahigugmaong Amahan kanunayng mohatag nimog kusog ug motabang nimo aron padayon kang magkinabuhi kada adlaw sumala sa iyang matarong nga mga sukdanan.—Isa. 40:29-31.

18. Nganong dili nato angayng hukman ang uban base sa atong kaugalingong mga sukdanan?

¹⁸ Paagi 3: Ilha nga si Jehova lang ang may katungod sa paghukom. Samtang naningkamot ta sa pagkinabuhi uyon sa matarong nga mga sukdanan ni Jehova, angay natong likayan nga hukman ang uban ug maghunahuna nga mas matarong ta kay kanila. Imbes manghukom, nga daw naa tay katungod sa paghimo niana base sa atong kaugalingong mga sukdanan, angay natong hinumdoman nga si Jehova ang “Maghuhukom sa tibuok yuta.” (Gen. 18:25) Wala ta hatagi ni Jehova ug katungod sa paghukom. Gani, gisugo ta ni Jesus: “Ayaw na panghukom aron dili mo hukman.”—Mat. 7:1. *

19. Giunsa pagpakita ni Jose nga may pagsalig siya sa paghukom ni Jehova?

¹⁹ Konsiderahon nato pag-usab ang pananglitan sa matarong nga si Jose. Wala niya hukmi ang uban, bisan kadtong mihimo niyag daotan. Gibuhatan siyag dili maayo sa iya mismong  mga igsoon, gibaligya siya ingong ulipon, ug gipatuo nila ang ilang amahan nga patay na siya. Pipila ka tuig sa ulahi, si Jose ug ang iyang pamilya nagkita pag-usab. Niadtong panahona, si Jose usa na ka gamhanang magmamando, ug puwede untang hukman niya ang iyang mga igsoon ug manimalos kanila. Nahadlok ang mga igsoon ni Jose nga basig baslan niya sila bisan pag nagbasol sila sa ilang gihimo. Pero gipasaligan sila ni Jose: “Ayaw mog kahadlok. Diyos ba ko nga maghukom ninyo?” (Gen. 37:18-20, 27, 28, 31-35; 50:15-21) Mapainubsanong giila ni Jose nga si Jehova lang ang may katungod sa paghukom.

20-21. Unsay atong himoon aron dili ta maghunahuna nga mas matarong ta kay sa uban?

²⁰ Sama kang Jose, si Jehova ang atong pahukmon. Pananglitan, dili ta maghunahuna nga nahibalo ta sa motibo sa mga igsoon. Dili ta makabasag kasingkasing; si Jehova lang ang ‘nagasusi sa mga motibo.’ (Prov. 16:2) Iyang gimahal ang tanang tawo, bisag unsa pay ilang kagikan ug kultura. Ug gidasig ta ni Jehova nga ‘buksan pag-ayo ang atong kasingkasing.’ (2 Cor. 6:13) Busa angay natong higugmaon ang tanang igsoon imbes hukman sila.

²¹ Nagpasabot sab ni nga di nato hukman kadtong dili alagad sa Diyos. (1 Tim. 2:3, 4) Hukman ba nimo ang imong dili magtutuong paryente ug moingon, “Dili gyod nâ siya ma-Saksi”? Dili, kay wala tay katungod nga manghukom. Gani, ang paghimo ana nagpakita nga naghunahuna ta nga mas matarong ta kay kaniya. Si Jehova naghatag gihapon sa “tanang tawo” ug kahigayonan nga maghinulsol. (Buh. 17:30) Hinumdomi kanunay nga kadtong naghunahuna nga mas matarong sila kay sa uban giisip ni Jehova nga dili matarong.

22. Nganong determinado ka nga higugmaon ang pagkamatarong?

²² Hinaot ang atong gugma sa mga sukdanan ni Jehova sa pagkamatarong makapalipay nato ug makadasig sa uban, nga motabang nila nga mas masuod nato ug sa atong Diyos. Hinaot magpabilin tang “gigutom ug giuhaw sa pagkamatarong.” (Mat. 5:6) Makasalig ka nga nakita ni Jehova ang imong mga paningkamot, ug nalipay gyod siya sa imong pag-uswag. Bisag nagkagrabe ang pagkadili-matarong niining kalibotana, ayawg kaluya! Hinumdomi kanunay nga “si Jehova nahigugma sa mga matarong.”—Sal. 146:8.