1. Unsa nay nahimo sa daghang batan-on?

 KADA tuig, linibo ka batan-ong Kristohanon ang mabawtismohan. Bawtismado na ba pod ka? Kon oo, ang mga igsoon sa kongregasyon nalipay para nimo, ug nalipay pod si Jehova! (Prov. 27:11) Hunahunaa kon unsa nay imong nahimo. Kugi kang nagtuon sa Bibliya, tingali sulod sa pipila ka tuig. Tungod sa imong pagtuon, nakombinsir ka nga ang Bibliya mao ang Pulong sa Diyos. Pero labaw sa tanan, nailhan nimo ug gihigugma ang Awtor sa Bibliya. Milalom ang imong gugma kang Jehova, mao nga gipahinungod nimo ang imong kinabuhi kaniya ug nagpabawtismo. Maayo kaayo ang imong desisyon!

2. Unsay atong hisgotan niining artikuloha?

 ² Seguradong kadaghan nang nasulayan ang imong pagtuo sa wala pa ka magpabawtismo. Pero samtang magkadugay, makaatubang na pod kag laing mga pagsulay. Si Satanas maningkamot nga mobugnaw ang imong gugma kang Jehova ug mohunong ka sa pag-alagad Kaniya. (Efe. 4:14) Ayaw gyod tugoti nga mahitabo nâ. Unsay makatabang nimo nga magmaunongon kang Jehova ug matuman ang imong panaad nga moalagad kaniya? Kinahanglang “magpadayon [ka] sa pag-uswag” aron mahimong hamtong nga Kristohanon. (Heb. 6:1) Pero unsaon nâ nimo paghimo?

3. Unsay angayng himoon sa tanang Kristohanon human sa ilang bawtismo?

³ Human sa bawtismo, kitang tanan kinahanglang magpadapat sa tambag ni apostol Pablo sa mga Kristohanon sa Efeso.  Iyang gidasig sila nga mahimong “hamtong” nga mga Kristohanon. (Efe. 4:13) Sa ato pa, kinahanglang magpadayon sila sa pag-uswag. Gipakasama ni Pablo ang atong pag-uswag ingong Kristohanon ngadto sa pagtubo sa usa ka bata. Ang bag-ong natawo nga bata gimahal ug gipasigarbo sa iyang ginikanan, pero dili puwedeng magpabilin siyang bata hangtod sa hangtod. Sa ngadtongadto, kinahanglan niyang wad-on ang “mga kinaiya sa usa ka bata.” (1 Cor. 13:11) Parehas pod ana ang mga Kristohanon. Human sa bawtismo, kinahanglang padayon tang mouswag. Atong hisgotan ang pipila ka sugyot nga makatabang nato nga mouswag.

4. Unsang hiyas ang makatabang nimo nga mouswag sa espirituwal? Ipatin-aw. (Filipos 1:9)

⁴ Palaloma ang imong gugma kang Jehova. Gihigugma na nimo pag-ayo si Jehova. Pero puwede pang mapalalom ang imong gugma kaniya. Unsaon man? Gihisgotan ni apostol Pablo ang usa ka paagi diha sa Filipos 1:9. (Basaha.) Si Pablo nag-ampo nga ang gugma sa mga taga-Filipos “modagaya pa.” Busa puwede pa natong mapalalom ang atong gugma. Mahimo nato nâ pinaagi sa pagbaton ug “tukmang kahibalo ug bug-os nga pagsabot.” Kon mas mailhan nato si Jehova, mas molalom ang atong gugma kaniya ug mas maapresyar nato ang iyang personalidad ug mga pamaagi. Mas modako ang atong tinguha nga mapalipay siya, ug dili gyod nato gusto nga mohimog bisan unsa nga makapaguol niya. Maningkamot ta nga masabtan kon unsay iyang kabubut-on ug kon unsaon nato nâ paghimo.

5-6. Unsay atong himoon aron molalom ang atong gugma kang Jehova? Ipatin-aw.

⁵ Molalom ang atong gugma kang Jehova dihang mas mailhan nato ang iyang Anak, nga hingpit nga nagsundog sa personalidad sa iyang Amahan. (Heb. 1:3) Ang kinamaayohang paagi nga mailhan nato si Jesus mao ang pagtuon sa upat ka Ebanghelyo. Kon wa pa nimo mabatasan ang pagbasag Bibliya kada adlaw, puwede nimo ning sugdan karon pinaagi sa pagbasa sa mga asoy bahin kang Jesus. Samtang magbasa ka, matikdi pag-ayo ang iyang mga hiyas. Sayon siyang duolon; iyang gikugos ang mga bata. (Mar. 10:13-16) Buotan siya, maong dili magkinto ang iyang mga tinun-an. Dili sila mahadlok nga mosulti kaniya sa ilang gihunahuna. (Mat. 16:22) Kini nga mga hiyas gisundog ni Jesus sa iyang langitnong Amahan. Si Jehova dali pod kaayong duolon. Makaampo ta niya. Puwede natong isulti kaniya ang tanan. Makasalig ta nga dili ta niya hukman. Iya tang gimahal, ug naghunahuna siya sa atong kaayohan.—1 Ped. 5:7.

⁶ Si Jesus maluluy-on sa mga tawo. Si apostol Mateo miingon: “Pagkakita niya sa mga tawo, siya naluoy kanila kay sila pinanitan ug nagkatibulaag samag mga karnero nga walay magbalantay.” (Mat. 9:36) Ug unsa poy pagbati ni Jehova? Si Jesus miingon: “Dili gayod buot sa akong Amahan nga anaa sa langit nga malaglag bisan usa lang niining ubos nga mga tawo.” (Mat. 18:14) Makapalipay kaayo nâ! Samtang mas mailhan nato si Jesus, magkalalom pod ang atong gugma kang Jehova.

7. Sa unsang paagi makatabang nimo ang pagpakig-uban sa hamtong nga mga Kristohanon?

⁷ Makakat-on pod ka nga mahimong mas mahigugmaon ug hamtong nga Kristohanon dihang makig-uban ka sa hamtong nga mga igsoon sa inyong kongregasyon ug mailhan nimo sila. Matikdi kon unsa sila ka malipayon. Wala sila magmahay sa ilang desisyon nga moalagad kang Jehova. Pangutan-a  sila sa ilang mga eksperyensiya sa pag-alagad kang Jehova. Pangayog tambag nila dihang kinahanglan kang mohimog importanteng desisyon. Hinumdomi nga “naay kalamposan kon daghan ang magtatambag.”—Prov. 11:14.

8. Unsay puwede nimong himoon kon nagduhaduha ka sa giingon sa Bibliya?

⁸ Daoga ang imong mga pagduhaduha. Sa nahisgotan sa  parapo 2, si Satanas maningkamot nga dili ka mouswag sa espirituwal. Ang usa niya ka paagi mao ang pagtanom ug mga pagduhaduha bahin sa imong mga nakat-onan sa Bibliya. Pananglitan, sultihan tingali ka sa ubang tawo ug mga ideya nga nagpasipala sa Diyos, sama sa teoriya sa ebolusyon. Niadtong bata pa ka, tingali wala ka maghunahuna niini. Pero karon, basig ginatudloan ka bahin niini diha sa eskuwelahan. Tingali ang ginaingon sa imong mga titser bahin sa ebolusyon morag katuohan. Pero posible nga wala nila susiha ang ebidensiya nga naay Maglalalang. Hinumdomi ang prinsipyo sa Proverbio 18:17: “Ang mounag presentar sa iyang kaso morag husto, hangtod moabot ang pikas partido ug kuwestiyonon siya.” Imbes tuohan dayon ang mga gitudlo sa eskuwelahan, tun-i pag-ayo kon unsay giingon sa Pulong sa Diyos, ang Bibliya. Pag-research sa atong mga publikasyon. Pakig-estorya sa mga igsoon nga nagtuo kaniadto sa ebolusyon. Pangutan-a sila kon unsay nakapakombinsir nila nga naa gyoy Maglalalang nga nagmahal nato. Makatabang ni nimo nga masusi ang mga ebidensiya.

9. Unsay imong nakat-onan sa eksperyensiya ni Melissa?

⁹ Ang sister nga si Melissa natabangan sa iyang pag-research bahin sa creation, o paglalang. * Siya miingon: “Sa eskuwelahan, ang ebolusyon gitudlo nga mora nig tinuod. Sa primero, dili ko gustong mag-research kay nahadlok ko nga basig makombinsir na hinuon ko nga tinuod ang ebolusyon. Pero naghunahuna pod ko nga gusto ni Jehova nga naay basehanan ang atong mga gituohan. Busa nag-research ko. Gibasa nako ang librong Is There a Creator Who Cares About You? ug mga brosyur nga Gilalang ba ang Kinabuhi? ug The Origin of Life—Five Questions Worth Asking. Nakatabang gyod to nako. Maayo untag gihimo nako to dayon.”

10-11. Unsay makatabang nimo nga magpabiling hinlo sa moral? (1 Tesalonica 4:3, 4)

 ¹⁰ Isalikway ang dili maayong panggawi. Kon batan-on ka, kusog kaayo ang seksuwal nga pagbati, ug tingali presyuron ka nga mohimog seksuwal nga imoralidad. Gusto ni Satanas nga madaog ka sa imong gibati. Unsay makatabang nimo nga magpabiling hinlo sa moral? (Basaha ang 1 Tesalonica 4:3, 4.) Sa imong mga pag-ampo, isulti kang Jehova kon unsa gyoy imong gibati, ug hangyoa siya nga palig-onon ka. (Mat. 6:13) Hinumdomi nga dili ka hukman ni Jehova. Hinuon, gusto niya nga tabangan ka. (Sal. 103:13, 14) Ang Bibliya makatabang pod nimo. Si Melissa, nga gihisgotan ganina, nalisdan sa pagwala sa imoral nga mga hunahuna. Siya miingon: “Ang pagbasa sa Bibliya kada adlaw nakatabang nga dili ko madaog sa akong sayop nga mga tinguha. Nagpahinumdom ni nako nga iya ko ni Jehova, ug gusto nakong alagaran siya.”—Sal. 119:9.

¹¹ Ayawg soloha ang imong mga problema. Isulti nâ sa imong ginikanan. Tinuod, dili nâ sayon ug maulaw tingali ka, pero kinahanglan nimo nang himoon. Si Melissa miingon: “Nag-ampo ko nga hatagan ko ni Jehova ug kaisog, ug dayon gisulti nako kang Papa ang akong problema. Human ana, nahuwasan ko. Nahibalo ko nga proud si Jehova nako.”

12. Unsay imong buhaton aron makahimo kag maayong mga desisyon?

¹² Magpagiya sa mga prinsipyo sa Bibliya. Paglabay sa panahon, tugotan ra unya ka sa imong ginikanan sa paghimog kaugalingong mga desisyon. Pero limitado pa ang imong mga eksperyensiya sa kinabuhi. Unsay imong buhaton aron dili ka makahimog mga desisyon nga makadaot sa imong relasyon kang Jehova? (Prov. 22:3) Gisulti sa sister nga si Kari kon unsay nakatabang niya sa paghimog mas maayong mga desisyon. Nasabtan niya nga ang hamtong nga mga Kristohanon wala magkinahanglag balaod sa matag situwasyon. Siya miingon: “Kinahanglan nakong masabtan ang mga prinsipyo sa Bibliya imbes mosunod lang sa mga balaod.” Dihang magbasa kag Bibliya, pangutan-a ang kaugalingon: ‘Unsay gitudlo niini bahin sa panghunahuna ni Jehova? Naa ba ni mga prinsipyo nga makatabang nako sa paghimo kon unsay husto? Kon naa, unsay kaayohan kon ako ning ipadapat?’ (Sal. 19:7; Isa. 48:17, 18) Pinaagi sa pagbasa sa Bibliya ug pagpamalandong sa mga prinsipyo niini, makahimo kag mga desisyon nga makapalipay kang Jehova. Samtang padayon kang mouswag, makita nimo nga wala ka magkinahanglag balaod sa matag situwasyon, kay nakasabot ka sa panghunahuna ni Jehova.

13. Sa unsang paagi ang maayong mga higala makatabang nimo? (Proverbio 13:20)

¹³ Pagpilig mga higala nga nahigugma kang Jehova. Sa nahisgotan na, ang pagpilig maayong mga higala makatabang nimo nga mahimong hamtong nga Kristohanon. (Basaha ang Proverbio 13:20.) Pananglitan, ang sister nga si Sara dili na kaayo malipayon. Dayon, naay nahitabo nga nakatabang niya nga mabalik ang iyang kalipay. Siya miingon: “Nakakita kog maayong mga higala nga mao gyoy akong gikinahanglan adtong panahona. Naay batan-ong sister nga kauban nako nga magtuon sa Bantayanang Torre kada semana. Naa pod koy laing higala nga mitabang nako aron makakomento ko sa mga tigom. Tungod sa akong mga higala, mas giseryoso nako ang personal nga pagtuon ug pag-ampo. Mas milig-on ang akong relasyon kang Jehova ug nabalik ang akong kalipay.”

14. Unsay gihimo ni Julien aron makakitag maayong mga higala?

 ¹⁴ Unsay imong himoon aron makakita kag mga higala nga maayog impluwensiya nimo? Si Julien, nga usa ka ansiyano, miingon: “Sa batan-on pa ko, nasuod ko sa mga igsoon nga nakauban nako sa pagsangyaw. Dasig kaayo sila, ug nakatabang sila nako nga mag-enjoy sa ministeryo. Tungod adto, gihimo nakong tumong ang bug-os panahong pagministeryo. Nakita pod nako nga wala kaayo koy maayong mga higala sa una kay nakigsuod ko niadto lang mga kaedad nako. Sa ulahi, nakakita pod kog maayong mga higala sa Bethel. Ang ilang ehemplo nakatabang nako sa pagpilig mas maayong kalingawan, ug mas nakapasuod ni nako kang Jehova.”

15. Unsay gipasidaan ni Pablo kang Timoteo? (2 Timoteo 2:20-22)

¹⁵ Unsay imong himoon kon naay indibiduwal sa kongregasyon nga dili maayog impluwensiya nimo? Nahibalo si Pablo nga ang uban diha sa kongregasyon sa unang siglo dili maayog espirituwalidad, maong iyang gipasidan-an si Timoteo nga dili makigsuod nila. (Basaha ang 2 Timoteo 2:20-22.) Bililhon kaayo ang atong relasyon kang Jehova. Naningkamot ta pag-ayo nga masuod kaniya, maong dili gyod ta makigsuod niadtong makadaot sa atong relasyon sa atong langitnong Amahan.—Sal. 26:4.

16. Unsang mga tumong ang angay nimong pilion?

¹⁶ Paghimog mapuslanong mga tumong. Pagpilig mga tumong nga makapalig-on sa imong pagtuo ug makatabang nimo nga mohamtong sa espirituwal. (Efe. 3:16) Pananglitan, puwede nimong pauswagon ang imong personal nga pagtuon ug pagbasa sa Bibliya. (Sal. 1:2, 3) O puwede nimong pauswagon ang kalidad sa imong mga pag-ampo ug himoon ning mas regular. Tingali kinahanglang mas mag-amping ka sa pagpilig kalingawan ug sa paggamit sa imong panahon. (Efe. 5:15, 16) Malipay si Jehova dihang makita niya nga naningkamot ka nga mouswag.

17. Unsay kaayohan kon motabang ka sa uban?

¹⁷ Mahimo kang mas hamtong nga Kristohanon dihang motabang ka sa uban. Si Jesus miingon: “Dunay labaw nga kalipay sa paghatag  kay sa pagdawat.” (Buh. 20:35) Malipay gyod ka kon gamiton nimo ang uban nimong panahon ug kusog sa pagtabang sa uban. Pananglitan, puwede nimong tabangan ang mga tigulang ug infirm sa inyong kongregasyon. Tingali puwede nimo silang tabangan sa pagpamalit o tudloan sila kon unsaon paggamit sa ilang gadyet. Kon brader ka, himoang tumong nga mahimong ministeryal nga alagad aron mas makatabang ka sa mga igsoon. (Filip. 2:4) Makapakita pod kag gugma sa mga dili Saksi pinaagi sa pagsangyaw sa maayong balita sa Gingharian. (Mat. 9:36, 37) Kon posible, himoang tumong ang bug-os panahong pag-alagad.

18. Sa unsang paagi ang bug-os panahong ministeryo makatabang nimo nga mouswag?

¹⁸ Ang bug-os panahong ministeryo makahatag nimog daghang kahigayonan nga mouswag. Kon payunir ka, naa kay kahigayonan nga moeskuwela sa School for Kingdom Evangelizers. Puwede pod kang moboluntaryo sa Bethel o sa mga proyekto sa pagpanukod. Ang batan-ong payunir nga si Kaitlyn miingon: “Ang pagpakig-uban sa eksperyensiyadong mga igsoon diha sa ministeryo nakatabang gyod nako nga mohamtong human sa bawtismo. Ang ilang ehemplo nakadasig nako nga palawmon ang akong kahibalo sa Bibliya ug pauswagon ang akong pagpanudlo.”

19. Unsang mga panalangin ang imong madawat samtang padayon kang mouswag sa espirituwal?

¹⁹ Samtang padayon kang mouswag sa espirituwal, makadawat kag daghang panalangin. Dili mausik ang imong pagkabatan-on sa mga tumong nga dili makahatag nimog tinuod nga kalipay. (1 Juan 2:17) Malikayan nimo ang kasakit nga resulta sa paghimog sayop nga mga desisyon. Hinuon, tinuod kang magmalamposon ug magmalipayon. (Prov. 16:3) Ang imong maayong ehemplo makadasig sa mga igsoon, batan-on man o tigulang. (1 Tim. 4:12) Ug labaw sa tanan, mabatonan nimo ang kalinaw ug katagbawan kay napalipay nimo si Jehova ug naa kay suod nga relasyon kaniya.—Prov. 23:15, 16.