1. Unsay kaayohan kon mag-estoryahanay ta kon sa unsang paagi nakakat-on ta sa “kamatuoran”?

 “SA UNSANG paagi ka nakakat-on sa kamatuoran?” Seguradong kadaghan na kang gipangutana ana. Usa nâ sa kasagarang mga pangutana sa mga igsoon dihang mag-ilaila. Ganahan tang mahibalo kon sa unsang paagi nailhan sa mga igsoon si Jehova ug kon nganong ila siyang gimahal. Ug ganahan pod tang moestorya nila kon unsa ka importante nato ang kamatuoran. (Roma 1:11) Tungod ani nga panag-estoryahay, mapahinumdoman ta kon unsa ka bililhon ang kamatuoran. Mahimo pod tang mas determinado nga ‘padayong maglakaw sa kamatuoran’—sa ato pa, padayon tang magkinabuhi sa paagi nga makapalipay kang Jehova ug moresulta sa iyang panalangin ug pag-uyon.—3 Juan 4.

2. Unsay atong hisgotan niining artikuloha?

² Niining artikuloha, atong hisgotan ang pipila ka rason kon nganong gimahal nato ang kamatuoran. Dayon, hisgotan nato kon sa unsang paagi padayon natong mapakita nga ato ning gimahal. Seguradong ang paghisgot ani makapalalom sa atong apresasyon sa gihimo ni Jehova aron makabig ta sa kamatuoran. (Juan 6:44) Modasig pod ni nato nga isulti sa uban ang kamatuoran.

3. Unsa ang kinalabwang rason nga gimahal nato ang kamatuoran?

³ Daghag rason kon nganong gimahal nato ang kamatuoran. Ang kinalabwang rason mao ang atong gugma kang Jehova nga Diyos, ang Tinubdan sa kamatuoran. Pinaagi sa iyang Pulong,  ang Bibliya, nailhan nato siya dili lang ingong gamhanang Magbubuhat sa langit ug yuta, kondili ingong atong langitnong Amahan nga nagmahal pag-ayo kanato. (1 Ped. 5:7) Nahibalo ta nga ang atong Diyos “maluluy-on ug mabination, dili daling masuko ug dagaya sa maunongong gugma ug kamatuoran.” (Ex. 34:6) Gihigugma ni Jehova ang hustisya. (Isa. 61:8) Masakitan siya dihang makita niya nga nag-antos ta, ug andam siya—ug naghinamhinam—nga taposon ang tanang pag-antos sa iyang gitakdang panahon. (Jer. 29:11) Naghinamhinam pod ta nga moabot nang panahona! Usa nâ ka rason nga gimahal nato pag-ayo si Jehova!

4-5. Nganong ang atong paglaom gipakasama ni apostol Pablo sa angkla?

⁴ Unsa pay laing rason nga gimahal nato ang kamatuoran? Ang kamatuoran makahatag natog kaayohan. Niay usa ka pananglitan. Apil sa kamatuoran sa Bibliya mao ang atong paglaom sa umaabot. Aron ipakita kon unsa ka bililhon ang maong paglaom, si apostol Pablo misulat: “Kining paglaom nga atong nabatonan samag angkla sa atong kinabuhi, nga segurado ug lig-on.” (Heb. 6:19) Sama nga ang angkla makatabang aron ang barko dili mapadpad sa bagyo, ang atong paglaom nga gibase sa Bibliya makatabang aron makabarog ta sa mga pagsulay.

⁵ Gipakita sa konteksto nga si Pablo naghisgot bahin sa langitnong paglaom nga gipaabot sa dinihogang mga Kristohanon. Pero ang iyang giingon mapadapat sab sa mga Kristohanon nga dunay paglaom nga mabuhi sa walay kataposan sa Paraiso nga yuta. (Juan 3:16) Seguradong ang pagkahibalo nga naa tay paglaom nga mabuhi sa walay kataposan naghatag ug kahulogan sa atong kinabuhi.

6-7. Sa unsang paagi nakatabang kang Yvonne ang pagkahibalo sa kamatuoran bahin sa umaabot?

⁶ Tagda ang eksperyensiya sa sister nga si Yvonne. Wala siya magdako sa kamatuoran, ug niadtong bata pa siya, mahadlok siyang mamatay. Naa siyay nabasahan nga di gyod niya malimtan: “Moabot ang panahon nga wala na unyay ugma.” Siya miingon: “Wala ko makatulog sa akong nabasa, ug nagsige kog hunahuna bahin sa umaabot. ‘Mao ra ba gyod ni ang kinabuhi sa tawo?’ nakahunahuna ko. ‘Unsa may katuyoan nga nabuhi ko?’ Dili ko gustong mamatay!”

⁷ Dayon niadtong tin-edyer na si Yvonne, naa siyay naestorya nga mga Saksi ni Jehova. Siya miingon: “Sukad adto, mituo na ko sa paglaom nga mabuhi sa walay kataposan sa Paraiso dinhi sa yuta.” Sa unsang paagi ang kamatuoran nakatabang niya? Siya midugang: “Makatulog na kog tarong magabii kay wala na ko mabalaka bahin sa umaabot o sa kamatayon.” Klaro nga gimahal ni Yvonne ang kamatuoran, ug nalipay kaayo siya nga isulti ngadto sa uban ang paglaom sa umaabot.—1 Tim. 4:16.

8-9. (a) Sa usa sa mga ilustrasyon ni Jesus, sa unsang paagi gipabilhan sa tawo ang bahandi nga iyang nakaplagan? (b) Para nimo, unsa ka bililhon ang kamatuoran?

⁸ Apil sab sa kamatuoran sa Bibliya ang maayong balita bahin sa Gingharian sa Diyos. Ang kamatuoran bahin sa Gingharian gipakasama ni Jesus sa natago nga bahandi. Sa Mateo 13:44, si Jesus miingon: “Ang Gingharian sa langit nahisamag bahandi nga gilubong sa uma nga nakalotan sa usa ka tawo ug gitabonag balik; ug tungod sa iyang kalipay, siya milakaw ug gibaligya ang tanan niyang kabtangan ug gipalit ang uma.” Matikdi nga ang tawo wala mangita sa bahandi. Pero dihang iya ning nakaplagan, mihimo siyag dagkong sakripisyo aron iya ning mabatonan. Gani, gibaligya niya ang tanan niyang kabtangan. Ngano? Kay nahibalo siya kon unsa ka bililhon ang maong bahandi. Mas labaw nig bili kay sa bisan unsa nga iyang gisakripisyo.

⁹ Mao ba pod nay imong gibati bahin sa  kamatuoran? Aw siyempre! Nahibalo ta nga walay bisan unsang butang nga gitanyag niining kalibotana ang makalabaw sa atong kalipay sa pag-alagad kang Jehova karon ug sa paglaom nga mabuhi sa walay kataposan ubos sa pagmando sa Gingharian. Ang pribilehiyo nga mahimong suod nga higala ni Jehova mas labaw pa kay sa bisan unsa nga atong isakripisyo. Mabatonan nato ang kinadak-ang kalipay kon ‘bug-os nato siyang mapalipay.’—Col. 1:10.

10-11. Unsay nakapalihok kang Michael sa paghimog dagkong kausaban sa iyang kinabuhi?

¹⁰ Daghan nato ang mihimog dagkong sakripisyo aron uyonan ni Jehova. Gibiyaan sa uban ang ilang nindot nga mga propesyon. Ang uban mihunong sa pagpangagpas nga madato. Ang uban pod mihimog mga kausaban sa ilang kinabuhi dihang nakakat-on sila bahin kang Jehova. Mao nay gihimo ni Michael. Wala siya magdako sa kamatuoran. Niadtong batan-on siya, gibansay siya nga mahimong karatista. Siya miingon: “Gipanghambog nako ang akong lig-on nga lawas. Usahay, bation nako nga way makapildi nako.” Pero dihang nagtuon siyag Bibliya, nakat-onan ni Michael ang panglantaw ni Jehova sa kapintasan. (Sal. 11:5) Bahin sa magtiayong Saksi nga nag-Bible study niya, si Michael miingon: “Wala gyod ko nila ingna nga biyaan nako ang karate; padayon lang ko nilang gitun-an sa Bibliya.”

¹¹ Dihang mas nailhan ni Michael si Jehova, mas milalom ang iyang gugma Kaniya. Natandog kaayo siya sa kaluoy ni Jehova sa Iyang mga magsisimba. Sa ngadtongadto, naamgohan ni Michael nga kinahanglan siyang mohimog importante kaayong desisyon. Siya miingon: “Nahibalo ko nga ang pagbiya sa karate mao ang kinalisdang desisyon nga akong himoon. Pero nahibalo sab ko nga makapalipay ni kang Jehova, ug kombinsido ko nga dili masayang ang bisan unsang sakripisyo nga akong himoon sa pag-alagad kaniya.” Para kang Michael, bililhon kaayo ang kamatuoran nga iyang nakaplagan, maong andam siya nga mohimog dagkong kausaban sa iyang kinabuhi.—Sant. 1:25.

12-13. Sa unsang paagi ang Bibliya nakatabang kang Mayli?

¹² Aron ipakita kon unsa ka importante ang kamatuoran, gipakasama kini sa Bibliya sa usa ka lampara nga naghatag ug kahayag sa ngitngit nga lugar. (Sal. 119:105; Efe. 5:8) Si Mayli, nga taga-Azerbaijan, mapasalamaton sa Pulong sa Diyos kay naghatag nig kahayag sa iyang kinabuhi. Ang iyang mga ginikanan dili parehas ug relihiyon. Ang iyang papa Muslim, ug ang iyang mama Hudiyo. Siya miingon: “Motuo kog Diyos, pero daghan kog gikalibgan. Nakapangutana ko, ‘Nganong gibuhat man sa Diyos ang mga tawo, ug nganong mag-antos man ang tawo sa tibuok niyang kinabuhi ug dayon sakiton hangtod sa hangtod sa impiyerno?’ Ang uban nag-ingon nga ang tanang nagakahitabo pagbuot sa Diyos, maong nakahunahuna ko, ‘Buot bang ipasabot gikontrolar sa Diyos ang mga tawo, unya malipay siyang magtan-aw nila nga nag-antos?’”

¹³ Nangita si Mayli ug tubag sa iyang mga pangutana. Sa ngadtongadto, nagpa-Bible study siya ug nahimong Saksi ni Jehova. “Ang makapakombinsir nga eksplinasyon sa Bibliya nakapausab gyod sa akong panglantaw sa kinabuhi,” siya miingon. “Sakto kaayo ang mga eksplinasyon sa Pulong sa Diyos, ug tungod ana, naa na koy kalinaw sa hunahuna.” Sama kang Mayli, atong gidayeg si Jehova, ang “Usa nga nagtawag [kanato] gikan sa kangitngit ngadto sa iyang kahibulongang kahayag.”—1 Ped. 2:9.

14. Unsaon nato pagpalalom ang atong gugma sa kamatuoran? (Tan-awa sab ang kahong “ Ang Kamatuoran sa Bibliya Gipakasama sa Uban Pang Butang.”)

¹⁴ Pipila lang ni ka pananglitan nga nagpakita kon unsa ka importante ang kamatuoran. Seguradong naa pa kay ubang mahunahunaan. Puwede nimo ning himoon nga project sa imong  personal nga pagtuon aron mahibaloan nimo ang uban pang rason kon nganong angay natong mahalon ang kamatuoran. Kon mas molalom ang atong gugma sa kamatuoran, mas mangita tag mga paagi nga mapakita nato ang atong gugma para niini.

15. Unsa ang usa ka paagi nga mapakita nato nga gimahal nato ang kamatuoran?

¹⁵ Mapakita nato nga gimahal nato ang kamatuoran kon regular natong tun-an ang Bibliya ug ang atong mga publikasyon. Bisag unsa na ta ka dugay sa kamatuoran, daghan pa tag angayng kat-onan. Ang unang isyu niining magasina nag-ingon: “Ang kamatuoran morag gamayng bulak nga napalibotan ug halos natabonan sa labong kaayong mga sagbot sa kabakakan. Aron imo ning makaplagan, kinahanglan nimo ning pangitaon. . . . Aron imo ning makuha, kinahanglan kang maningkamot. Ayawg kakontento sa usa lang ka bulak sa kamatuoran. . . . Pangita pag dugang aron mas daghan kag makuha.” Ang pagtuon nagkinahanglag paningkamot, pero dili gyod ka magmahay sa resulta.

16. Unsang paagi sa pagtuon ang epektibo para nimo? (Proverbio 2:4-6)

¹⁶ Ang uban nato dili ganahang magbasa  ug magtuon. Pero gidasig ta ni Jehova nga ‘padayong mangita’ aron mas masabtan nato ang kamatuoran. (Basaha ang Proverbio 2:4-6.) Kon maningkamot ta, makabenepisyo gyod ta. Kon bahin sa personal nga pagbasa sa Bibliya, si Corey miingon nga magpokus siya sa usa ka teksto. Siya miingon: “Basahon nako ang tanang footnote ug cross-reference ug mag-research kog dugang. . . . Daghan kaayo kog nakat-onan niini nga paagi sa pagtuon!” Bisag unsa pang paagi ang atong gamiton, mapakita nato nga atong gimahal ang kamatuoran kon mogahin tag panahon ug maningkamot sa pagtuon niini.—Sal. 1:1-3.

17. Unsay gipasabot sa pagkinabuhi uyon sa kamatuoran? (Santiago 1:25)

¹⁷ Siyempre, dili igo nga basta nagtuon lang ta sa kamatuoran. Aron makabenepisyo pag-ayo, kinahanglan tang magkinabuhi uyon sa kamatuoran, sa ato pa, kinahanglan natong ipadapat ang atong nakat-onan. Nianang paagiha lang nga ang kamatuoran makahatag natog tinuod nga kalipay. (Basaha ang Santiago 1:25.) Unsaon nato pagseguro nga nagkinabuhi ta uyon sa kamatuoran? Usa ka brader miingon nga maayong susihon nato ang atong kaugalingon kon unsa nay atong pag-uswag ug kon unsa pay angay natong pauswagon. Si apostol Pablo miingon: “Bisan unsang pag-uswag ang atong nahimo, ipadayon nato kini.”—Filip. 3:16.

18. Nganong naningkamot ta nga ‘padayong maglakaw sa kamatuoran’?

¹⁸ Hunahunaa ang mga kaayohan sa atong pagpaningkamot nga ‘padayong maglakaw sa kamatuoran’! Nabatonan nato ang mas maayong kinabuhi, ug napalipay pa gyod nato si Jehova ug ang mga igsoon. (Prov. 27:11; 3 Juan 4) Mao ni ang kinalabwang mga rason kon nganong gimahal nato ang kamatuoran ug nagkinabuhi ta uyon niini!