TUN-ANANG ARTIKULO 33
Si Jehova Nagbantay sa Iyang Katawhan
“Ang mata ni Jehova nagtan-aw niadtong mga nahadlok kaniya.”—SAL. 33:18.
AWIT 4 Magbalantay Ko si Jehova
SUMARYO *
1. Nganong mihangyo si Jesus kang Jehova nga bantayan ang iyang mga sumusunod?
SA GABII una mamatay si Jesus, siya mihangyo sa iyang langitnong Amahan. Iyang gihangyo si Jehova nga bantayan ang iyang mga sumusunod. (Juan 17:15, 20) Siyempre, si Jehova kanunayng nagbantay—nag-atiman ug nanalipod—sa iyang katawhan. Pero nahibalo si Jesus nga ang iyang mga sumusunod makaatubang ug grabeng pagsupak gikan kang Satanas. Nahibalo sab si Jesus nga gikinahanglan nila ang tabang ni Jehova aron masuklan ang mga pag-atake sa Yawa.
2. Sumala sa Salmo 33:18-20, nganong dili ta angayng mahadlok dihang makaatubang ug mga kalisdanan?
2 Ang kalibotan ni Satanas mao ang hinungdan sa daghang kalisdanan sa tinuod nga mga Kristohanon karon. Kini nga mga kalisdanan puwedeng makapaluya nato ug magsulay pa gani sa atong pagkamaunongon kang Jehova. Pero niini nga artikulo, atong makat-onan nga dili ta angayng mahadlok. Si Jehova nagbantay nato. Iyang nakita ang atong mga kalisdanan ug andam siyang motabang nato. Atong susihon ang duha ka pananglitan diha sa Bibliya nga nagpakita nga si Jehova “nagtan-aw [o, nagbantay] niadtong mga nahadlok kaniya.”—Basaha ang Salmo 33:18-20.
DIHANG MOBATING NAG-INUSARA
3. Nganong usahay mobati ta nga nag-inusara?
3 Bisag bahin ta sa usa ka dakong espirituwal nga pamilya, may mga panahong mobati tang nag-inusara. Pananglitan, ang mga batan-on posibleng mobati nga nag-inusara dihang magpatin-aw sa ilang tinuohan ngadto sa ilang mga classmate o dihang mobalhin silag kongregasyon. Ang uban nato tingali naguol o na-depress, ug naghunahuna nga iluom na lang ang maong mga pagbati. Tingali dili nato ni isulti sa uban kay nabalaka ta nga basig dili ta nila masabtan. Ug usahay basig nagduhaduha ta kon duna bay nagmahal nato. Ang pagbati nga nag-inusara, bisan unsa pa may hinungdan niini, makapabalaka nato ug mopabati nato nga wala na tay paglaom. Dili gusto ni Jehova nga kanay atong bation. Nganong makaingon ta ana?
4. Nganong si propetang Elias miingon: “Ako na lay nahibilin”?
4 Konsideraha ang matinumanong tawo nga si Elias. Kapig 40 ka adlaw siya nga mipanaw aron makaikyas kang Jezebel, kinsa mibahad nga patyon siya. (1 Hari 19:1-9) Sa ulahi, nakaabot siya sa usa ka langob. Didto, siya miingon kang Jehova: “Ako na lay nahibilin [nga propeta].” (1 Hari 19:10) Ang tinuod, duna pay ubang propeta. Pananglitan, giluwas ni Abdias ang 100 ka propeta gikan sa kamot ni Jezebel. (1 Hari 18:7, 13) Pero nganong mibati man si Elias nga nag-inusara? Naghunahuna ba siya nga patay na ang tanang propeta nga giluwas ni Abdias? Mibati kaha siya nga nag-inusara kay walay miduyog niya sa pag-alagad kang Jehova, bisan pag napamatud-an didto sa Bukid sa Carmelo nga si Jehova mao ang matuod nga Diyos? Mibati kaha siya nga walay nahibalo nga nameligro pag-ayo ang iyang kinabuhi, o kaha naghunahuna siya nga walay nagmahal niya? Wala hisgoti sa asoy kon nganong si Elias mibati nga nag-inusara. Pero segurado ta nga nasabtan ni Jehova ang gibati ni Elias ug nahibalo gyod Siya kon unsaon pagtabang kaniya.
Unsang leksiyon ang atong makat-onan sa paagi ni Jehova sa pagtabang kang Elias, ug nganong makapahupay nâ dihang mobati tang nag-inusara? (Tan-awa ang parapo 5-6)
5. Sa unsang paagi gipasaligan ni Jehova si Elias nga wala siya mag-inusara?
5 Gitabangan ni Jehova si Elias sa daghang paagi. Iyang gidasig si Elias nga isulti ang iyang gibati. Kaduha siya nangutana kang Elias: “Nag-unsa ka dinhi?” (1 Hari 19:9, 13) Sa matag higayon nga gipahungaw ni Elias ang iyang gibati, naminaw si Jehova kaniya. Dayon gipabati ni Jehova kang Elias nga naa Siya ug nga gamhanan kaayo Siya. Iya pong gipasaligan si Elias nga naa pay daghang Israelinhon nga nagsimba Kaniya. (1 Hari 19:11, 12, 18) Seguradong nahuwasan si Elias human niya ipahungaw kang Jehova ang iyang gibati ug human madungog ang Iyang tubag. Gihatagan pod ni Jehova si Elias ug pipila ka importanteng asaynment. Iyang gisugo siya sa pagdihog kang Hazael ingong hari sa Sirya, kang Jehu ingong hari sa Israel, ug kang Eliseo ingong propeta. (1 Hari 19:15, 16) Gitabangan ni Jehova si Elias sa pagpokus sa positibong mga butang pinaagi sa paghatag kaniya niini nga mga asaynment. Gitagan-an sab siya sa Diyos ug suod nga higala, si Eliseo. Sa unsang paagi tabangan ka ni Jehova dihang mobati ka nga nag-inusara?
6. Unsay puwede nimong iampo dihang mobati ka nga nag-inusara? (Salmo 62:8)
6 Gidasig ka ni Jehova nga moampo kaniya. Iyang nakita ang imong mga kalisdanan ug gipasaligan ka niya nga maminaw siya sa imong mga pag-ampo sa bisan unsang panahon. (1 Tes. 5:17) Malipay siya nga mamati sa pag-ampo sa iyang mga magsisimba. (Prov. 15:8) Unsay puwede nimong iampo dihang mobati kang nag-inusara? Ipahungaw kang Jehova ang imong gibati, sama sa gihimo ni Elias. (Basaha ang Salmo 62:8.) Isulti kaniya ang imong mga gikabalak-an. Pangayog tabang kang Jehova kon unsay imong himoon. Pananglitan, kon mahadlok kang mosulti sa imong mga classmate bahin sa imong tinuohan, hangyoa si Jehova nga hatagan kag kaisog nga mosulti. Puwede kang mangayo niyag kaalam aron mapatin-aw nimo ang imong tinuohan sa matinahorong paagi. (Luc. 21:14, 15) Kon na-depress ka, hangyoa si Jehova nga tabangan ka nga makig-estorya sa usa ka hamtong nga igsoon bahin sa imong gibati. Puwede nimong hangyoon si Jehova nga tabangan ang maong igsoon nga maminaw ug mosabot nimo. Busa ipahungaw kang Jehova ang imong gibati, matikdi kon giunsa niya pagtubag ang imong mga pag-ampo, ug dawata ang tabang sa uban. Kon imo nang himoon, dili na kaayo ka mobati nga nag-inusara.
Nangita ba kag mga paagi nga makagahin ug dugang panahon sa ministeryo kauban ang mga igsoon? (Tan-awa ang parapo 7)
7. Unsay imong nakat-onan kang Mauricio?
7 Kitang tanan gihatagan ni Jehova ug mapuslanong buluhaton. Makasalig ka nga iyang nakita ug giapresyar ang tanan nimong ginahimo diha sa kongregasyon ug sa ministeryo. (Sal. 110:3) Kon busy ta sa espirituwal nga mga buluhaton, makatabang ni nato dihang mobati tang nag-inusara. Ngano? Tagda ang pananglitan sa batan-ong brader nga si Mauricio. * Wala madugay human mabawtismohi si Mauricio, ang usa sa iyang suod nga mga higala anam-anam nga mibiya sa kamatuoran. “Dihang nakita nako nga iyang gibiyaan si Jehova, nawad-an kog pagsalig sa kaugalingon,” miingon si Mauricio. “Nagduhaduha ko kon matuman ba nako ang akong panaad dihang nagpahinungod ko ug kon makapabilin kong bahin sa pamilya ni Jehova. Mibati kong nag-inusara ug naghunahuna ko nga walay makasabot sa akong gibati.” Unsay nakatabang kang Mauricio? Siya miingon: “Migahin kog dugang panahon sa ministeryo. Nakatabang to nako nga dili magpokus sa akong kaugalingon ug sa akong gibati. Samtang nakig-uban ko sa mga igsoon diha sa ministeryo, nagmalipayon ko ug wala na kaayo mobati nga nag-inusara.” Bisag dili nato aktuwal nga makauban ang mga igsoon sa pagsangyaw, mapalig-on ta dihang makig-uban ta nila sa mga kalihokan sama sa letter writing ug telephone witnessing. Unsa pay nakatabang kang Mauricio? Siya miingon: “Mas nagkugi ko sa mga buluhaton sa kongregasyon. Gihimo nako ang akong kinamaayohan sa pagpangandam ug paghatag sa akong mga bahin sa tigom. Tungod niini nga mga bahin, gibati nako nga gipabilhan ko ni Jehova ug sa uban.”
DIHANG MALUYA TUNGOD SA GRABENG MGA PAGSULAY
8. Unsay posible natong bation tungod sa grabeng mga pagsulay?
8 Nagdahom ta nga makaatubang tag mga pagsulay niining kataposang mga adlaw. (2 Tim. 3:1) Pero tingali makalitan gihapon ta kay wala ta mahibalo kon unsa nga pagsulay ang moabot o kon kanus-a nâ mahitabo. Mahimong kalit tang makaatubang ug problema sa kuwarta, madayagnos nga naay grabeng sakit, o mamatyag minahal. Niana nga mga panahon, mahimong maluya ta o malumsan sa kabalaka, ilabina kon nagsunodsunod o nagdungan ang mga pagsulay. Pero hinumdomi nga si Jehova nahibalo sa atong kahimtang, ug iya tang tabangan nga malahutay ang bisan unsang pagsulay.
9. Unsa nga mga pagsulay ang nasinatian ni Job?
9 Hunahunaa kon giunsa pagtabang ni Jehova ang matinumanong si Job. Nakasinati siyag sunodsunod nga grabeng mga pagsulay. Sa usa lang ka adlaw, nabalitaan ni Job nga ang tanan niyang kahayopan gikawat ug gipatay. Namatay pod ang iyang mga sulugoon, ug ang nakapait pa, apil pod ang iyang pinalanggang mga anak. (Job 1:13-19) Human adto, samtang nagbangotan pa si Job, gihampak siya ug ngutngot kaayong mga hubag. (Job 2:7) Grabe kaayo ang nasinatian ni Job mao nga siya nakaingon: “Gikasilagan ko ang akong kinabuhi; dili na ko gustong mabuhi.”—Job 7:16.
Aron pasaligan si Job sa gugma ug pag-atiman ni Jehova, Iyang gisultihan siya kon giunsa Niya pag-atiman ang Iyang mga linalang sa daghang paagi (Tan-awa ang parapo 10)
10. Giunsa pagtabang ni Jehova si Job nga makalahutay sa mga pagsulay? (Tan-awa ang hulagway sa atubangan sa magasin.)
10 Nakita ni Jehova ang mga kalisdanan ni Job. Kay gimahal ni Jehova si Job, Iya siyang gitabangan aron makalahutay sa mga pagsulay. Si Jehova nakigsulti kang Job ug gipahinumdoman siya sa Iyang walay kinutobang kaalam ug sa Iyang gugma ug pag-atiman sa Iyang mga linalang. Iyang gihisgotan ang daghang makapahingangha nga mga mananap. (Job 38:1, 2; 39:9, 13, 19, 27; 40:15; 41:1, 2) Gigamit sab ni Jehova ang matinumanong batan-on nga si Elihu aron lig-onon ug hupayon si Job. Gipasaligan siya ni Elihu nga gantihan gyod ni Jehova ang pagkamalahutayon sa Iyang mga magsisimba. Pero gipalihok sab ni Jehova si Elihu nga tambagan si Job. Gitabangan ni Elihu si Job nga dili sobrang maghunahuna sa iyang kaugalingon. Iyang gipahinumdoman si Job kon unsa siya ka gamay kon itandi kang Jehova, ang Maglalalang sa uniberso. (Job 37:14) Gihatagan pod ni Jehova si Job ug asaynment; gipaampo siya alang sa iyang tulo ka higala nga nakasala. (Job 42:8-10) Sa unsang paagi tabangan ta karon ni Jehova dihang mag-atubang tag lisod nga mga pagsulay?
11. Sa unsang paagi ang Bibliya makatabang nato dihang mag-atubang tag mga pagsulay?
11 Dili direktang makig-estorya si Jehova kanato sama sa Iyang gihimo kang Job, pero makig-estorya Siya nato pinaagi sa Iyang Pulong, ang Bibliya. (Roma 15:4) Gihupay ta niya pinaagi sa paghatag natog paglaom sa umaabot. Tagda ang pipila ka punto gikan sa Bibliya nga makapahupay nato dihang mag-atubang tag mga pagsulay. Diha sa Kasulatan, gipasaligan ta ni Jehova nga walay bisan unsa—bisag grabeng mga pagsulay—ang ‘makabulag nato gikan sa iyang gugma.’ (Roma 8:38, 39) Gipasaligan sab ta niya nga siya “duol sa tanang nagatawag kaniya” pinaagi sa pag-ampo. (Sal. 145:18) Si Jehova miingon nga kon mosalig ta niya, makalahutay ta sa bisan unsang pagsulay ug magmalipayon gihapon ta bisag nag-antos. (1 Cor. 10:13; Sant. 1:2, 12) Gipahinumdoman pod ta sa Pulong sa Diyos nga ang mga pagsulay temporaryo ug kadiyot lang kon itandi sa walay kataposang ganti nga iyang ihatag nato. (2 Cor. 4:16-18) Si Jehova nagsaad nga iyang wagtangon ang hinungdan sa tanan natong kalisdanan—si Satanas nga Yawa ug ang mga daotan sama niya. (Sal. 37:10) Naka-memorize ba kag pipila ka makapahupay nga mga teksto sa Bibliya nga makatabang nimo nga makalahutay sa mga pagsulay sa umaabot?
12. Unsay gidahom ni Jehova nga atong buhaton aron makabenepisyo ta pag-ayo sa iyang Pulong?
12 Gidahom ni Jehova nga maggahin tag panahon para sa regular nga pagtuon sa Bibliya ug sa pagpamalandong sa atong gibasa. Dihang ipadapat nato ang atong nakat-onan, mas molig-on ang atong pagtuo ug mas masuod ta sa atong langitnong Amahan. Tungod niana, mas determinado tang molahutay sa mga pagsulay. Hatagan sab ni Jehova ug balaang espiritu kadtong nagasalig sa iyang Pulong. Ug ang maong espiritu makahatag natog “gahom nga labaw sa kasarangan” aron malahutay ang bisan unsang pagsulay.—2 Cor. 4:7-10.
13. Sa unsang paagi ang espirituwal nga pagkaon nga gitagana sa “matinumanon ug maalamong ulipon” makatabang nato nga malahutay ang mga pagsulay?
13 Sa tabang ni Jehova, ang “matinumanon ug maalamong ulipon” naghimog daghang artikulo, video, ug musika nga makatabang aron molig-on ang atong pagtuo ug makapabilin tang suod kang Jehova. (Mat. 24:45) Kinahanglang pahimuslan nato pag-ayo ang maong mga tagana. Usa ka sister sa United States miingon nga mapasalamaton kaayo siya sa tanang espirituwal nga pagkaon. Siya miingon: “Sulod sa akong 40 ka tuig nga pag-alagad kang Jehova, kadaghan nasulayan ang akong integridad.” Nakaatubang siyag daghang pagsulay—ang iyang lolo gipatay sa usa ka hubog nga drayber, ang iyang mga ginikanan namatay tungod sa grabeng sakit, ug kaduha siya nakanser. Unsay nakatabang niya nga makalahutay? Siya miingon: “Wa gyod ko pasagdi ni Jehova. Ang espirituwal nga pagkaon nga iyang gitagana pinaagi sa matinumanon ug maalamong ulipon nakatabang nako nga makalahutay. Tungod niini, makasulti ko sa giingon ni Job: ‘Hangtod nga ako mamatay, dili gyod nako wad-on ang akong integridad!’”—Job 27:5.
Sa unsang paagi makatabang ta sa uban diha sa kongregasyon? (Tan-awa ang parapo 14)
14. Giunsa paggamit ni Jehova ang mga igsoon aron tabangan ta panahon sa mga pagsulay? (1 Tesalonica 4:9)
14 Gibansay ni Jehova ang iyang katawhan sa pagpakitag gugma ug sa paghupay sa usag usa sa lisod nga mga panahon. (2 Cor. 1:3, 4; basaha ang 1 Tesalonica 4:9.) Agig pagsundog kang Elihu, ang mga igsoon andam nga motabang aron magpabilin tang maunongon bisan sa mga kalisdanan. (Buh. 14:22) Pananglitan, tagda kon sa unsang paagi ang mga igsoon nakadasig ug nakatabang kang Diane nga magpabiling lig-on sa espirituwal dihang ang iyang bana grabeng nasakit. Siya miingon: “Di gyod to lalim. Pero gibati gyod namo ang tabang ug gugma ni Jehova niadtong lisod nga mga panahon. Gitabangan mi sa mga igsoon sa among kongregasyon. Ila ming giduaw, gitawagan, ug gigakos, ug mao toy gikinahanglan namo aron makalahutay. Kay dili man ko kamaong modrayb, gitabangan ko sa mga igsoon aron makatambong ko sa tigom ug makasangyaw.” Panalangin gyod nga nahimo tang bahin sa usa ka mahigugmaong espirituwal nga pamilya!
MAPASALAMATON SA GUGMA UG PAG-ATIMAN NI JEHOVA
15. Nganong kombinsido ta nga makaya nato ang mga kalisdanan?
15 Kitang tanan makaatubang ug mga pagsulay. Pero sa ato nang nakat-onan, wala ta mag-inusara kay si Jehova samag usa ka mahigugmaong amahan nga kanunayng nagbantay nato. Siya nagauban kanato, ug andam siyang maminaw sa atong mga hangyo ug motabang nato. (Isa. 43:2) Kombinsido ta nga makaya nato ang mga kalisdanan kay siya dagayang nagtagana sa tanan natong gikinahanglan aron makalahutay ta. Gitugotan ta niya nga makaampo, ug gitagana niya ang Bibliya, dagayang espirituwal nga pagkaon, ug mahigugmaong mga igsoon aron tabangan ta panahon sa kalisdanan.
16. Unsay atong himoon aron padayon tang higugmaon ug atimanon ni Jehova?
16 Mapasalamaton kaayo ta nga duna tay langitnong Amahan nga nagbantay, o nag-atiman nato! ‘Ang atong kasingkasing nagsadya kaniya.’ (Sal. 33:21) Mapakita nato nga atong giapresyar ang gugma ug pag-atiman ni Jehova kon pahimuslan nato ang tanan niyang tagana aron tabangan ta. Kinahanglan pod tang maningkamot nga dili mopalayo sa Diyos. Sa ato pa, padayon natong himoon ang atong maarangan sa pagsunod kang Jehova ug sa pagbuhat kon unsay matarong. Kon ato nang himoon, iya tang atimanon hangtod sa hangtod!—1 Ped. 3:12.
AWIT 30 Akong Amahan, Akong Diyos ug Higala