• “Gibati nako nga morag balikbalik nga nanapaw ang akong bana.”

• “Gibati nako nga wala na ganahi nako ang akong bana ug wala koy pulos. Naulaw ko sa akong kaugalingon.”

• “Dili nako ni kayang iestorya sa uban. Walay nahibalo nga nag-antos ko.”

• “Morag walay pagtagad si Jehova nako.”

Gipakita niini nga mga komento kon unsa ka grabe ang pag-antos sa asawa dihang ang bana motan-awg pornograpiya. Ug kon sekreto ning ginabuhat sa bana, tingali sulod na sa daghang bulan o tuig, basig bation sa asawa nga dili na siya makasalig niya. Miingon ang usa ka asawa, “Wala gyod diay ko kaila sa akong bana. Nakahunahuna ko: ‘Unsa pa kahay iyang gitago nako?’”

Kining artikuloha gisulat para sa asawa kansang bana nagatan-awg pornograpiya. a Hisgotan niini ang mga prinsipyo sa Bibliya nga makahupay, magpasalig niya sa tabang ni Jehova, makapabalik sa iyang kalinaw ug kalipay, ug makapalig-on niya sa espirituwal. b

Bisag dili nimo makontrol ang tanang ginabuhat sa imong bana, naa kay mahimo aron mamenosan ang kasakit nga imong gibati ug magmalinawon ang imong hunahuna. Konsideraha ang mosunod.

Ayawg basola ang imong kaugalingon. Tingali bation sa asawa nga siyay hinungdan nga ang iyang bana nagatan-awg pornographiya. Si Alice c mibati nga naa tingali kulang niya maong dili kontento niya ang iyang bana. Naghunahuna siya, ‘Nganong sa laing babaye man motan-aw ang akong bana imbes nako?’ Basolon pod sa ubang asawa ang ilang kaugalingon kay mibati sila nga ang ilang reaksiyon nakapasamot hinuon sa problema. Si Danielle miingon, “Nasuko kaayo ko sa iyang gihimo maong gibati nako nga nakapasamot hinuon ko sa problema.”

Kon kana poy imong gibati, hinumdomi nga dili ka basolon ni Jehova sa binuhatan sa imong bana. Ang Santiago 1:14 nag-ingon: “Ang matag usa masulayan dihang siya ginadani ug ginahaylo sa iyang kaugalingong tinguha.” (Roma 14:12; Filip.  2:12) Dili ka basolon ni Jehova, hinuon pabilhan niya ang imong pagkamaunongon kaniya.—2 Cron. 16:9.

Makatabang pod tingali ang paghunahuna nga ang pagtan-aw sa bana ug pornograpiya wala magpasabot nga naay kulang sa iyang asawa. Ang mga eksperto niini nga topiko miingon nga ang pornograpiya makapukaw ug grabeng seksuwal nga mga pantasya, nga walay babaye ang makatagbaw.

Likayi ang sobrang kabalaka. Si Catherine miingon nga nagsige na lang siyag hunahuna bahin sa pagtan-aw sa iyang bana ug pornograpiya. Si Frances miingon: “Mabalaka gyod ko dihang dili ko mahibalo kon asa ang akong bana. Dili ko mahimutang tibuok adlaw.” Ang ubang asawa maulaw pag-ayo dihang kauban nila ang mga igsoon nga posibleng nahibalo sa problema sa ilang bana. Ang uban pong asawa miangkon nga mibati silang nag-inusara kay morag walay nakasabot sa ilang situwasyon.

Normal ra na nga mga pagbati. Pero kon magpokus ka ana, mosamot ra ang imong kabalaka. Mas maayong magpokus ka sa imong relasyon kang Jehova. Makatabang na nga mahimo kang lig-on sa pag-atubang sa imong situwasyon.—Sal. 62:2; Efe. 6:10.

Makatabang pod nimo ang pagbasa ug pagpamalandong bahin sa mga babaye diha sa Bibliya nga nahupayan pinaagi sa pag-ampo kang Jehova. Dili sa tanang panahon nga gitangtang ni Jehova ang ilang problema, pero gihatagan sila ni Jehova ug kalinaw. Pananglitan, “pait kaayo ang gibati ni Ana” sa iyang situwasyon. Pero human sa iyang ‘taas nga pag-ampo kang Jehova,’ mibati siyag kalinaw bisan pag wala siya mahibalo kon unsay mahitabo sa iyang situwasyon.—1 Sam. 1:10, 12, 18; 2 Cor. 1:3, 4.

Pangayog tabang sa mga ansiyano sa inyong kongregasyon. Sila ‘samag silonganan gikan sa hangin, usa ka dangpanan gikan sa bagyo.’ (Isa. 32:2, mga footnote) Basin naa pa gani silay isugyot nga sister nga kasultihan nimo sa imong gibati ug makahupay nimo.—Prov. 17:17.

Matabangan kaha nimo ang imong bana nga mohunong sa pagtan-awg pornograpiya? Tingali. Gipakita sa Bibliya nga sa pagsulbad ug problema o pagpildig kaaway, “ang duha mas maayo kay sa usa.” (Eccl. 4:9-12) Base sa mga pagtuon, sagad maayo ang resulta dihang ang magtiayon magtinabangay aron mahunong ang pagkaadik sa bana sa pornograpiya ug mabalik ang pagsalig sa iyang asawa kaniya.

Siyempre, magdepende gyod na pag-ayo kon ang imong bana sinsero ug determinado nga mohunong sa pagtan-awg pornograpiya. Mihangyo na ba siya  kang Jehova nga tabangan siyang masuklan ang tentasyon, ug nangayo na ba siyag tabang sa mga ansiyano? (2 Cor. 4:7; Sant. 5:14, 15) Mihimo na ba siyag mga paagi aron malikayan ang tentasyon? Pananglitan, gilimitahan ba niya ang paggamit ug gadyet ug gilikayan ang mga situwasyon nga makatental niya? (Prov. 27:12) Andam ba siyang modawat sa imong tabang ug bug-os nga magmatinud-anon kanimo? Kon oo, posibleng matabangan nimo siya.

Sa unsang paagi? Konsideraha ni nga pananglitan. Si Felicia naminyo kang Ethan, kinsa naadik sa pornograpiya sa bata pa siya. Gipaningkamotan ni Felicia nga dili malisdan ang iyang bana nga mosulti bahin sa iyang balikbalik nga tinguha sa pagtan-awg pornograpiya. Si Ethan miingon: “Ginasulti nako ang tanan sa akong asawa. Mahigugmaon ko niyang gitabangan sa pagbutang ug mga limitasyon ug pirme ko niyang komostahon bahin ana. Gitabangan pod ko niya nga dili magsigeg Internet.” Siyempre, sakit para kang Felicia nga naay tinguha si Ethan nga motan-awg pornograpiya. “Pero,” miingon siya, “ang kasuko ug kasakit nga akong gibati dili makatabang niya nga padayong likayan kini nga bisyo. Human namo maestoryahi ang iyang kahuyangan, andam na pod siyang motabang nako nga masagubang ang kasakit nga akong gibati.”

Kana nga mga panag-estoryahay makatabang sa bana nga dili na motan-awg pornograpiya, ug makatabang pod sa asawa nga mabalik ang iyang pagsalig kaniya. Kon ang bana andam mosulti bahin sa iyang mga kahuyangan, adlaw-adlawng kalihokan, ug kon asa siya, wala na siyay ginatago sa iyang asawa.

Sa imong tan-aw, matabangan kaha nimo ang imong bana nianang paagiha? Kon oo, puwede ninyong basahon ug hisgotan kini nga artikulo nga magkauban. Himoon niyang tumong nga biyaan ang pornograpiya ug mabalik ang imong pagsalig kaniya. Imbes masuko siya kay gusto nimong makig-estorya bahin niini, angay niyang sabton kon nganong apektado kaayo ka ani nga problema. Himoon pod nimong tumong nga tabangan siya sa iyang mga paningkamot ug hatagan siyag kahigayonan nga mabalik ang imong pagsalig kaniya. Kinahanglan ninyong mahibaloan kon unsay hinungdan nga motan-awg pornograpiya ang usa ka tawo ug kon unsaon paghunong ani nga bisyo. d

Kon nabalaka ka nga basig maglalis mo sa imong bana dihang inyo ning estoryahan, puwede mong moduol sa ansiyano nga komportable mo. Hangyoa  siya nga kuyogan ug giyahan mo sa inyong panag-estoryahay. Hinumdomi nga bisag nahunong na sa imong kapikas ang pagkaadik sa pornograpiya, dili pa tingali dihadiha nga mabalik ang imong pagsalig. Ayawg kaluya. Matikdi ang ginagmay nga pag-uswag sa inyong relasyon. Dahoma nga kon magpailob mo, ang inyong kaminyoon anam-anam nga molig-on pag-usab paglabay sa panahon.—Eccl. 7:8; 1 Cor. 13:4.

Kon ang imong bana motan-aw pag-usab ug pornograpiya, nagpasabot ba ni nga dili siya mahinulsolon o wala nay paglaom ang iyang situwasyon? Dili ra man. Ilabina kon naadik siyag pornograpiya, basin kinahanglan ni niyang suklan sa tibuok niyang kinabuhi. Bisag nakalikay na siya ani sa pipila ka tuig, tingali makatan-aw na pod siyag balik. Aron dili na ni mahitabo pag-usab, kinahanglang dugangan pa niya ang iyang mga paningkamot; tingali estrikto gihapon niyang sundon ang iyang mga limitasyon bisan pag morag nadaog na niya ang iyang kahuyangan. (Prov. 28:14; Mat. 5:29; 1 Cor. 10:12) Kinahanglan niyang ugmaron ang ‘bag-ong panghunahuna’ ug ‘dumtan ang daotan’—ang pornograpiya ug ubang hugaw nga bisyo nga konektado niini sama sa masturbasyon. (Efe. 4:23; Sal. 97:10; Roma 12:9) Andam ba siyang mohimo niining tanan? Kon oo, naay paglaom nga mahunong ra gyod niya ang iyang bisyo. e

Pero komosta kon ang imong bana walay interes nga suklan ang iyang kahuyangan? Normal lang nga balikbalik tingali kang madismayar, masuko, ug mobating giluiban. Itugyan ang tanan kang Jehova aron mobati kag kalinaw sa hunahuna. (1 Ped. 5:7) Padayong palig-ona ang imong relasyon kang Jehova pinaagi sa pagtuon, pag-ampo, ug pagpamalandong. Kon imo nang himoon, makasalig ka nga tabangan gyod ka niya. Sumala sa Isaias 57:15, siya nagpuyo uban sa mga makaluluoy ug sa “mga nahugno,” ug iyang gipalig-on sila. Paningkamot nga mahimong mas maayong Kristohanon. Pangayog tabang sa mga ansiyano. Ug padayong molaom nga sa umaabot, magbag-o ra ang imong bana.—Roma 2:4; 2 Ped. 3:9.