Nianang artikuloha, atong nakat-onan nga usa ra gyod ang isyu nga giatubang sa tanang intelihenteng linalang: ang pagbalaan sa mahimayaong ngalan ni Jehova. Ang isyu sa pagkasoberano—nga ang paagi sa pagmando ni Jehova mao ang pinakamaayo—maoy usa ka bahin nianang dako nga isyu. Sa susama, ang isyu maylabot sa integridad sa tawo maoy usa pod ka bahin nianang dako nga isyu.

Nganong gipasiugda na man nato karon nga ang kinadak-ang isyu nasentro sa ngalan ni Jehova ug sa pagbalaan niini? Susihon nato ang tulo ka rason.

Una, giatake ni Satanas ang ngalan, o reputasyon, ni Jehova sa tanaman sa Eden. Pinaagi sa malimbongong pangutana ni Satanas kang Eva, gipalutaw ni Satanas nga si Jehova dili mahinatagon nga Diyos, kinsa nagbutang ug dili makataronganong mga restriksiyon sa Iyang mga sakop. Dayon direktang gikontra ni Satanas ang giingon ni Jehova, nga sama bag bakakon ang Diyos. Busa gidaot niya ang ngalan ni Jehova. Siya nahimong “Yawa,” nga nagpasabot ug “tigbutangbutang.” (Juan 8:44) Kay mituo si Eva sa mga bakak ni Satanas, misupak siya sa Diyos ug mirebelde sa pagkasoberano ni Jehova. (Gen. 3:1-6) Hangtod karon, gidaot ni Satanas ang ngalan sa Diyos pinaagi sa pagpakaylap ug mga bakak bahin sa personalidad ni Jehova. Kadtong motuo sa maong mga bakak mas dakog purohan nga mosupak kang Jehova. Busa para sa katawhan sa Diyos, ang pagdaot sa balaang ngalan ni Jehova mao ang pinakagrabeng inhustisya. Kini ang pinakahinungdan sa tanang pag-antos ug pagkadaotan sa kalibotan.

Ikaduha, alang sa kaayohan sa tanang linalang, determinado si Jehova nga ibindikar ang iyang ngalan, nga limpiyohan kini gikan sa tanang pasipala. Kini ang pinakaimportante kang Jehova. Busa siya miingon: “Balaanon gyod nako ang akong halangdong ngalan.” (Ezeq. 36:23) Ug giklaro ni Jesus kon unsay kinahanglang unahog ampo sa tanang matinumanong alagad ni Jehova. Siya miingon: “Balaanon unta ang imong ngalan.” (Mat. 6:9) Ang Bibliya balikbalik nga nagpasiugda kon unsa ka importante ang pagbalaan sa ngalan ni Jehova. Niay pipila ka pananglitan: “Ihatag kang Jehova ang himaya nga angay sa iyang ngalan.” (1 Cron. 16:29; Sal. 96:8) “Pag-awit mog mga pagdayeg sa iyang mahimayaong ngalan.” (Sal. 66:2) “Himayaon nako ang imong ngalan hangtod sa hangtod.” (Sal. 86:12) Ug usa sa mga higayon nga si Jehova mismo misulti gikan sa langit nahitabo sa templo sa Jerusalem, diin si Jesus miingon: “Amahan, himayaa ang imong ngalan.” Ug si Jehova mitubag: “Gihimaya na nako kini, ug himayaon nako kini pag-usab.”—Juan 12:28. a

Ikatulo, ang katuyoan ni Jehova kanunay nga konektado sa iyang ngalan, o reputasyon. Konsideraha kini: Human sa Usa ka Libo ka Tuig nga Pagmando sa Kristo ug sa kataposang pagsulay, unsay sunod nga mahitabo? Ang intelihenteng mga linalang padayon bang magkabahinbahin sa dakong isyu, ang pagbalaan sa ngalan ni Jehova?  Aron matubag na nga pangutana, atong balikan ang duha ka isyu nga konektado niana—ang integridad sa tawo ug ang pagkasoberano ni Jehova. Ang mga tawo ba nga napamatud-ang matinumanon padayong makaatubang ug mga pagsulay sa ilang integridad? Dili. Sila hingpit na ug bug-os nang nasulayan. Gihatagan na silag kinabuhing walay kataposan. Magpadayon pa ba ang isyu bahin sa pagkasoberano ni Jehova ug ang pagkabahinbahin sa intelihenteng mga linalang? Dili. Nianang panahona, napamatud-an na ang pagkamatarong ug pagkalabaw sa paagi sa pagmando ni Jehova. Pero komosta ang ngalan ni Jehova?

Nianang panahona, ang ngalan ni Jehova bug-os nang mabalaan ug ang tanan mahibalo na sa kamatuoran bahin kaniya. Pero ang ngalan ni Jehova padayon nga makakuhag atensiyon sa tanan niyang matinumanong alagad sa langit ug sa yuta. Ngano? Kay ilang makita nga si Jehova padayong mohimog makapahinganghang mga butang. Konsideraha kini: Kay mapainubsanong ibalik ni Jesus ang tanang pagmando ngadto kang Jehova, “ang Diyos mahimong tanang butang ngadto sa tanan.” (1 Cor. 15:28) Human niana, ang mga tawo sa yuta malipay pag-ayo sa “mahimayaong kagawasan sa mga anak sa Diyos.” (Roma 8:21) Ug bug-os nang tumanon ni Jehova ang dugay na niyang katuyoan, nga ang tanang intelihenteng linalang sa langit ug yuta magkahiusa ingong usa ka dakong pamilya.—Efe. 1:10.

Dihang mahitabo na kining tanan, unsay bation sa pamilya ni Jehova sa langit ug sa yuta? Seguradong gusto kaayo nato nga padayong dayegon ang mahimayaong ngalan ni Jehova. Si salmistang David napalihok sa pagsulat: “Madayeg unta si Jehova nga Diyos . . . Madayeg unta ang iyang mahimayaong ngalan hangtod sa hangtod.” (Sal. 72:18, 19) Sa walay kataposan, padayon tang makakitag bag-o ug makapalipayng mga rason nga himoon kana.

Ang ngalan ni Jehova nagrepresentar sa tanang bahin sa iyang personalidad. Ang iyang ngalan ilabinang nagpahinumdom nato sa iyang gugma. (1 Juan 4:8) Kanunay tang mahinumdom nga gilalang ta ni Jehova tungod sa iyang gugma, nga iyang gitagana ang halad lukat tungod sa iyang gugma, ug nga matarong ang iyang paagi sa pagmando tungod sa iyang gugma. Ug padayon natong makita ang dakong gugma ni Jehova kanato. Tungod ana, mapalihok ta nga mas makigsuod sa atong Amahan ug moawit ug mga pagdayeg sa iyang mahimayaong ngalan hangtod sa hangtod.—Sal. 73:28.