1. Naa pa bay paglaom para niadtong mga nakahimog seryosong sala?

 SA MIAGING artikulo, atong nakita kon giunsa pagdumala ni apostol Pablo ang usa ka kaso sa seryosong sala sa Corinto. Ang nakasala dili mahinulsolon ug kinahanglang tangtangon gikan sa kongregasyon. Pero sama sa gipakita sa temang teksto niining artikuloha, ang uban nga nakahimog seryosong sala puwedeng matabangan nga maghinulsol. (Roma 2:4) Sa unsang paagi ang mga ansiyano makatabang nila sa paghinulsol?

2-3. Unsay angay natong himoon kon atong nahibaloan nga ang usa ka igsoon nakahimog seryosong sala, ug ngano?

² Aron matabangan sa mga ansiyano ang nakasala, kinahanglan silang mahibalo sa nahitabo. Busa unsay atong himoon kon nahibaloan nato nga ang usa ka igsoon nakahimog seryosong sala, nga tungod niana puwede siyang matangtang sa kongregasyon? Angay nato siyang dasigon nga moduol sa mga ansiyano alang sa tabang.—Isa. 1:18; Buh. 20:28; 1 Ped. 5:2.

³ Pero komosta kon ang nakasala dili motug-an sa mga ansiyano? Kon mao, kita ang motug-an sa mga ansiyano aron ang igsoon makadawat sa gikinahanglang tabang. Pinaagi niana, atong gipakita nga gimahal nato ang atong igsoon. Kon ang nakasala magpadayon sa iyang daotang binuhatan, mosamot ka daot ang iyang relasyon kang Jehova. Basin madaot pod niya ang reputasyon sa kongregasyon. Maong dili gyod ta mahadlok nga mohimog aksiyon kay gimahal nato si Jehova ug ang igsoon nga nakasala.—Sal. 27:14.

 KON SA UNSANG PAAGI MATABANGAN SA MGA ANSIYANO ANG MGA NAKAHIMOG SERYOSONG SALA

4. Unsay tumong sa mga ansiyano dihang makig-estorya sila niadtong nakahimog seryosong sala?

⁴ Kon naay igsoon nga makahimog seryosong sala, ang lawas sa mga ansiyano magpilig tulo ka kuwalipikadong ansiyano nga magsilbi ingong komite. a Kini nga mga brader kinahanglan nga makasaranganon ug mapainubsanon. Maningkamot sila nga tabangan ang nakasala nga maghinulsol, pero nahibalo sila nga dili nila siya mapugos nga magbag-o. (Deut. 30:19) Nahibalo ang mga ansiyano nga dili tanang nakasala maghinulsol sama kang Haring David. (2 Sam. 12:13) Ang uban nila tingali dili maminaw sa tambag ni Jehova. (Gen. 4:​6-8) Bisan pa niana, tumong sa mga ansiyano nga tabangan kutob sa mahimo ang nakasala nga maghinulsol. Unsang mga prinsipyo ang makatabang nila dihang makig-estorya sila sa nakasala?

5. Unsay angayng hinumdoman sa mga ansiyano dihang makig-estorya sila sa nakasala? (2 Timoteo 2:​24-26) (Tan-awa sab ang hulagway.)

⁵ Isipon sa mga ansiyano ang nakasala ingong bililhong karnero nga nawala. (Luc. 15:​4, 6) Busa dihang makig-estorya sila sa nakasala, dili sila mosultig sakit nga mga pulong o trataron siya sa dili mahigugmaong paagi. Dili pod nila isipon nga ang ilang pagpakig-estorya maoy aron lang makakuhag impormasyon ug mahibalo sa nahitabo. Hinuon, ilang ipakita ang mga hiyas nga gihisgotan sa 2 Timoteo 2:​24-26. (Basaha.) Ang mga ansiyano magpabiling lumo, kalmado, ug buotan samtang maningkamot sila nga matandog ang kasingkasing sa nakasala.

6. Sa unsang paagi maandam sa mga ansiyano ang ilang kasingkasing sa dili pa makig-estorya sa nakasala? (Roma 2:4)

⁶ Andamon sa mga ansiyano ang ilang kasingkasing. Maningkamot sila nga sundogon si Jehova sa ilang pagpakiglabot sa nakasala, ug hinumdoman ang giingon ni Pablo: “Tungod sa pagkamaayo sa Diyos gusto niyang tabangan ka nga maghinulsol.” (Basaha ang Roma 2:4.) Angayng hinumdoman sa mga ansiyano nga ang panguna nilang responsibilidad mao ang pagkahimong magbalantay ubos sa paggiya sa Kristo. (Isa. 11:​3, 4; Mat. 18:​18-20) Sa dili pa sila makig-estorya sa nakasala, ang komite mag-ampo nga makab-ot nila ang ilang tumong: ang pagtabang sa nakasala nga maghinulsol. Mag-research sila sa Bibliya ug sa atong mga publikasyon  ug mag-ampo nga hatagan silag pagsabot. Konsiderahon nila ang kagikan ug kahimtang sa nakasala nga posibleng nakaapektar sa iyang panghunahuna, kinaiya, ug binuhatan.—Prov. 20:5.

7-8. Sa unsang paagi masundog sa mga ansiyano ang pailob ni Jehova dihang makig-estorya sila sa nakasala?

⁷ Sundogon sa mga ansiyano ang pailob ni Jehova. Hinumdoman nila kon unsay gihimo ni Jehova kaniadto sa pagtabang sa mga nakasala. Pananglitan, si Jehova mapailobong nakig-estorya kang Cain, nagpasidaan niya sa mga kapeligrohan sa sala, ug naghatag niyag paglaom nga mauyonan pag-usab. (Gen. 4:​6, 7) Si Jehova nagtambag kang David pinaagi kang propetang Natan, kinsa migamit ug ilustrasyon aron matandog ang kasingkasing sa hari. (2 Sam. 12:​1-7) Ug si Jehova “padayon” ug “balikbalik” nga nagpadala sa iyang mga propeta ngadto sa masinupakong nasod sa Israel. (Jer. 7:​24, 25) Wala niya hulata nga maghinulsol una ang iyang katawhan ayha pa siya mitabang nila. Hinuon, siya ang unang milihok aron tabangan sila nga maghinulsol.

⁸ Sa samang paagi, dihang ang mga ansiyano motabang niadtong nakahimog seryosong sala, sundogon nila ang ehemplo ni Jehova. Sama sa giingon sa 2 Timoteo 4:​2, makig-estorya sila sa nakasala nga igsoon “uban ang dakong pailob.” Busa ang usa ka ansiyano kinahanglang magpabiling kalmado, nga mapailobong magdasig sa nakasala nga himoon kon unsay husto. Kon ang ansiyano masuko o maglagot, basin dili na hinuon maminaw ang nakasala o mapandol pa gani.

9-10. Sa unsang paagi matabangan sa mga ansiyano ang igsoon nga masabtan kon unsay posibleng hinungdan nga nakahimo siyag sala?

⁹ Maningkamot ang mga ansiyano nga mahibaloan ang posibleng mga hinungdan kon nganong nahimo ang sala. Pananglitan, ang igsoon ba anam-anam nga naluya sa espirituwal kay gipasagdan na niya ang iyang personal nga pagtuon ug tagsa na lang mosangyaw? Usahay na lang ba siya moampo kang Jehova ug dili na kinasingkasing? Wala na ba siya maningkamot nga suklan ang sayop nga mga tinguha? Dili ba maayo ang iyang gipili nga mga kauban o kalingawan, ug sa unsang paagi nakaapektar ni sa iyang kasingkasing? Nasabtan ba niya nga ang iyang dili maalamong mga desisyon ug aksiyon nakapasakit sa iyang Amahan, si Jehova?

¹⁰ Pinaagi sa pagsuknag mga pangutana nga dili ra morag nagsukitsukit, matabangan sa mga ansiyano ang igsoon nga makita kon unsay posibleng mga hinungdan kon nganong nakahimo siyag sala. (Prov. 20:5) Dugang pa, sama sa gihimo ni Natan kang David, ang mga ansiyano puwedeng mogamit ug mga ilustrasyon aron maamgohan sa igsoon nga sayop ang iyang gihimo. Tingali sa unang pagpakig-estorya pa lang, ang igsoon magpakita nag tinuod nga kaguol tungod sa iyang nahimo. Basin maghinulsol pa gani siya.

11. Giunsa pagtratar ni Jesus ang mga makasasala?

¹¹ Maningkamot ang mga ansiyano nga sundogon si Jesus. Gitabangan sa nabanhawng si Jesus si Saulo nga taga-Tarso pinaagi sa pagpangutana: “Saulo, Saulo, nganong ginalutos ko nimo?” Kining makapahunahuna nga pangutana nakatabang kang Saulo nga masabtan nga sayop ang iyang gihimo. (Buh. 9:​3-6) Ug bahin sa “babaye nga si Jezebel,” si Jesus miingon: “Gihatagan nako siyag panahon nga maghinulsol.”—Pin. 2:​20, 21.

12-13. Sa unsang paagi mahatagan sa mga ansiyano ang nakasala ug panahon nga maghinulsol? (Tan-awa sab ang hulagway.)

¹² Ingong pagsundog kang Jesus, ang mga ansiyano dili dayon maghunahuna nga ang nakasala dili gyod maghinulsol. Tingali ang  pipila maghinulsol sa una pa lang nga pagpakig-estorya sa komite, pero ang uban nagkinahanglan tingalig dugang panahon. Busa puwedeng hikayon sa mga ansiyano nga estoryahon pag-usab ang nakasala. Basin human sa unang pagpakig-estorya, ang nakasala nga igsoon makapamalandong sa gisulti sa mga ansiyano. Tingali, mapainubsanon siyang moduol kang Jehova diha sa pag-ampo ug mangayog pasaylo. (Sal. 32:5; 38:18) Busa sa sunod nga pagpakig-estorya kaniya, tingali lahi na ang iyang tinamdan kay sa niadtong una siyang giestorya.

¹³ Aron tabangan ang nakasala nga maghinulsol, ang mga ansiyano magpakitag kaayo ug empatiya. Malaomon sila nga panalanginan ni Jehova ang ilang mga paningkamot ug nga ang nakasala nga igsoon makaamgo sa iyang nahimo ug maghinulsol.—2 Tim. 2:​25, 26.

14. Kinsay angayng pasidunggan kon maghinulsol ang nakasala, ug ngano?

¹⁴ Malipay kaayo ta kon ang nakasala maghinulsol! (Luc. 15:​7, 10) Kinsa ang angayng pasidunggan? Ang mga ansiyano ba? Matikdi kon unsay giingon ni Pablo bahin sa mga makasasala: “Tingalig itugot sa Diyos nga sila maghinulsol.” (2 Tim. 2:25) Busa klaro nga si Jehova ang angayng pasidunggan ug dili si bisan kinsang tawo, kay si Jehova ang nagtabang sa makasasala nga magbag-o sa iyang panghunahuna ug tinamdan. Gihisgotan ni Pablo ang maayong mga resulta sa paghinulsol—makatabang ni sa nakasala nga makabaton ug mas tukmang kahibalo sa kamatuoran, makaamgo sa iyang nahimong sala, ug makaikyas sa mga lit-ag ni Satanas.—2 Tim. 2:26.

15. Sa unsang paagi ang mga ansiyano padayong makatabang sa mahinulsolong makasasala?

¹⁵ Kon ang nakasala maghinulsol, ang komite maghikay ug mga pag-shepherding aron padayon siyang matabangan sa pagsukol sa mga lit-ag ni Satanas ug matul-id ang iyang dalan. (Heb. 12:​12, 13) Siyempre, dili isulti sa mga ansiyano kang bisan kinsa ang sala nga nahimo sa igsoon. Pero unsa tingali ang kinahanglang mahibaloan sa kongregasyon?

 “BADLONGA ATUBANGAN SA TANAN”

16. Kinsa ang “tanan” nga gitumong ni Pablo sa 1 Timoteo 5:20?

¹⁶ Basaha ang 1 Timoteo 5:20. Giingnan ni Pablo ang iyang isigkaansiyano nga si Timoteo nga badlongon atubangan sa tanan “kadtong mga nagpakasala.” Kinsa man ning “tanan” nga iyang gitumong? Kanunay ba ning nagpasabot sa tibuok kongregasyon? Wala. Ang iyang gitumong mao kadtong pipila nga tingali nahibalo sa nahimong sala—tingali kadtong mga nakasaksi o kadtong mga gitug-anan sa nakasala. Ang mga ansiyano magpahibalo nila sa pribado nga naatiman na ang kaso ug natabangan na ang nakasala.

17. Kon ang seryosong sala nabaniog diha sa kongregasyon o posibleng mabaniog, unsang pahibalo ang himoon, ug ngano?

¹⁷ Pero usahay, ang sala nabaniog diha sa kongregasyon o posibleng mabaniog. Niini nga kahimtang, ang giingon ni Pablo nga “tanan” nagtumong sa tibuok kongregasyon. Busa ang usa ka ansiyano magpahibalo diha sa kongregasyon nga ang igsoon gibadlong. Ngano? Gisulti ni Pablo ang rason: “Ingong pasidaan para sa uban” aron dili sila mohimog sala.

18. Unsay himoon sa mga ansiyano kon ang bawtismadong menor de edad makahimog seryosong sala? (Tan-awa sab ang hulagway.)

¹⁸ Komosta kon makahimog seryosong sala ang bawtismadong menor de edad—kadtong wala pay 18 anyos? Ang lawas sa mga ansiyano mag-asayn ug duha ka ansiyano nga makig-estorya sa menor de edad ug sa iyang Kristohanong mga ginikanan. b Susihon sa mga ansiyano kon unsa nay gihimo sa mga ginikanan  sa pagtabang sa ilang anak nga maghinulsol. Kon ang menor de edad maayog tinamdan ug misanong sa paningkamot sa iyang mga ginikanan, ang duha ka ansiyano mahimong modesisyon nga dili na mohimog dugang aksiyon. Haom lang ni kay ang mga ginikanan ang gihatagan sa Diyos ug responsibilidad sa pagtul-id sa ilang mga anak sa mahigugmaong paagi. (Deut. 6:​6, 7; Prov. 6:20; 22:6; Efe. 6:​2-4) Human niana, komostahon panagsa sa mga ansiyano ang mga ginikanan aron maseguro nga ang menor de edad padayong makadawat sa gikinahanglang tabang. Pero komosta kon ang bawtismadong menor de edad dili mahinulsolon ug magpadayon sa iyang daotang binuhatan? Niana nga kahimtang, ang komite sa mga ansiyano makig-estorya niya kauban sa iyang Kristohanong mga ginikanan.

“SI JEHOVA MABINATION KAAYO UG MALULUY-ON”

19. Sa unsang paagi masundog sa mga ansiyano si Jehova dihang makig-estorya sila sa nakasala?

¹⁹ Ang mga ansiyano nga mag-alagad ingong komite gihatagan ni Jehova ug responsibilidad nga paneguroon nga magpabiling hinlo ang kongregasyon. (1 Cor. 5:7) Pero gusto pod nila nga matabangan kutob sa mahimo ang nakasala nga maghinulsol. Busa ang mga ansiyano magpabiling positibo ug malaomon nga ang nakasala maghinulsol. Ngano? Kay gusto nilang sundogon si Jehova, kinsa “mabination kaayo ug maluluy-on.” (Sant. 5:11) Matikdi kon sa unsang paagi pod ni gipakita ni apostol Juan ngadto sa iyang mga isigka-Kristohanon. Siya misulat: “Mga anak, ako nagsulat kaninyo niining mga butanga aron dili mo makasala. Apan kon dunay makasala, duna tay magtatabang ngadto sa Amahan, si Jesu-Kristo, ang usa nga matarong.”—1 Juan 2:1.

20. Unsay atong hisgotan sa kataposang artikulo niini nga isyu sa magasin?

²⁰ Makapaguol kay naay mga panahon nga ang usa ka Kristohanon dili gyod maghinulsol. Tungod niana, kinahanglan siyang tangtangon gikan sa kongregasyon. Unsay himoon sa mga ansiyano niini nga kahimtang? Ato nang hisgotan sa kataposang artikulo niini nga isyu sa magasin.