TUN-ANANG ARTIKULO 31
AWIT 12 Si Jehova ang Bantogang Diyos
Kon Unsay Gihimo ni Jehova sa Pagluwas sa Makasasalang Katawhan
“Gihigugma pag-ayo sa Diyos ang kalibotan mao nga gihatag niya ang iyang bugtong nga Anak.”—JUAN 3:16.
POKUS
Kon unsay gihimo ni Jehova aron tabangan ta nga masuklan ang sala ug kon sa unsang paagi iyang gipaposible nga mabuhi ta hangtod sa hangtod, nga dili na maulipon sa sala.
1-2. (a) Unsa ang sala, ug sa unsang paagi ato ning madaog? (Tan-awa sab ang “Termino Gipatin-aw.”) (b) Unsay atong hisgotan niini nga artikulo ug sa ubang mga artikulo niini nga isyu sa Bantayanang Torre? (Tan-awa sab ang “Para sa mga Magbabasa” niini nga isyu.)
GUSTO ba kang mahibalo kon unsa ka dako ang gugma ni Jehova nga Diyos kanimo? Niay maayong paagi aron mahibaloan nimo ang tubag: Tun-i kon unsay iyang gihimo sa pagluwas nato gikan sa sala ug kamatayon. Ang sala a maoy bangis nga kaaway nga dili gyod nimo mapildi sa kaugalingon lang nimong paningkamot. Kitang tanan makasala kada adlaw, ug kita mamatay tungod sa sala. (Roma 5:12) Pero naay maayong balita. Sa tabang ni Jehova, mapildi nato ang sala. Segurado gyod na!
2 Sulod na sa mga 6,000 ka tuig, si Jehova nga Diyos padayong nagtabang sa mga tawo nga masuklan ang sala. Ngano? Kay gimahal ta niya. Gimahal niya ang mga tawo sukad pa sa sinugdan, ug daghan na siyag gihimo aron tabangan ta nga masuklan ang sala. Nahibalo ang Diyos nga ang sala moresultag kamatayon, ug dili niya gusto nga mamatay ta. Gusto niya nga mabuhi ta hangtod sa hangtod. (Roma 6:23) Ug mao nay gusto niya para nimo. Niining artikuloha, atong hisgotan ang tulo ka pangutana: (1) Unsay gihimo ni Jehova aron hatagag paglaom ang makasasalang katawhan? (2) Sa unsang paagi nabatonan sa makasasalang mga tawo sa panahon sa Bibliya ang pag-uyon ni Jehova? (3) Unsay gihimo ni Jesus aron maluwas ang makasasalang katawhan?
UNSAY GIHIMO NI JEHOVA ARON HATAGAG PAGLAOM ANG MAKASASALANG KATAWHAN?
3. Sa unsang paagi ang atong unang mga ginikanan nahimong makasasala?
3 Dihang gilalang ni Jehova ang unang lalaki ug babaye, gusto niya nga magmalipayon sila. Gipapuyo niya sila sa nindot kaayo nga lugar, gihiusa sa kaminyoon, ug gihatagag nindot kaayo nga asaynment. Ilang pun-on ang yuta sa ilang mga kaliwat ug himoong paraiso ang tibuok yuta sama sa tanaman sa Eden. Usa lang ka butang ang iyang gidili, ug iya silang gipasidan-an nga kon ila nang supakon ug tinuyong morebelde kaniya, sila mamatay. Nahibalo ta kon unsay sunod nga nahitabo. Misulod sa esena ang usa ka daotang anghel nga walay gugma sa Diyos o kanila, ug gitental sila sa pagpakasala. Makapaguol kay si Adan ug Eva nagpadaog sa maong tentasyon. Imbes mosalig sa ilang langitnong Amahan, sila nagpakasala. Ug sa ato nang nahibaloan, natuman gyod ang giingon ni Jehova. Sukad niadtong adlawa, naagoman nila ang pait nga mga resulta sa ilang sala: sila natigulang ug sa ngadtongadto namatay.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Nganong gidumtan ni Jehova ang sala ug gitabangan ta nga masuklan kini? (Roma 8:20, 21)
4 Gipasulat ni Jehova ang maong makapaguol nga hitabo para sa atong kaayohan. Makatabang ni nato nga masabtan kon nganong gidumtan niya pag-ayo ang sala. Ang sala nagpahilayo nato sa atong Amahan ug miresultag kamatayon. (Isa. 59:2) Kana ang rason kon nganong si Satanas, ang rebelyosong anghel nga maoy hinungdan niining tanan, ganahan kaayo sa sala ug padayong nagtental sa mga tawo sa paghimo niini. Dihang nakasala si Adan ug Eva, nagtuo tingali si Satanas nga napugngan na niya ang katuyoan ni Jehova para sa katawhan. Pero wala niya masabti kon unsa ka mahigugmaon si Jehova. Wala gyod usba sa Diyos ang iyang katuyoan para sa mga kaliwat ni Adan ug Eva. Tungod sa iyang gugma sa katawhan, naghatag dayon siyag paglaom para sa tanan. (Basaha ang Roma 8:20, 21.) Nahibalo si Jehova nga ang ubang kaliwat ni Adan ug Eva mopili sa paghigugma kaniya ug mangayo sa iyang tabang aron masuklan ang sala. Busa ingong ilang Amahan ug Maglalalang, mihimo siyag paagi aron mapahigawas sila gikan sa sala ug masuod kaniya. Unsay gihimo ni Jehova aron maposible kanang tanan?
5. Kanus-a unang gihisgotan ni Jehova ang paglaom para sa makasasalang katawhan? Ipatin-aw. (Genesis 3:15)
5 Basaha ang Genesis 3:15. Unang gihisgotan ni Jehova ang maong paglaom dihang gipahayag niya ang silot nga maagoman ni Satanas sa umaabot. Ang Diyos nagtagna bahin sa usa ka “kaliwat” nga maoy magluwas sa katawhan. Kini nga kaliwat maglaglag kang Satanas ug magtapos sa tanang pagkadaotan nga nagsugod didto sa Eden. (1 Juan 3:8) Pero sa dili pa kana mahitabo, ang kaliwat makasinatig pag-antos. Samaran siya ni Satanas, nga maoy hinungdan sa iyang kamatayon. Sakit gyod kaayo na para kang Jehova. Pero agwantahon na ni Jehova aron ang katawhan maluwas gikan sa sala ug kamatayon.
SA UNSANG PAAGI NABATONAN SA MAKASASALANG MGA TAWO SA PANAHON SA BIBLIYA ANG PAG-UYON NI JEHOVA?
6. Unsay gihimo ni Abel, Noe, ug sa ubang matinumanong mga alagad aron masuod kang Jehova?
6 Paglabay sa daghang katuigan, anam-anam nga gipadayag ni Jehova kon sa unsang paagi ang makasasalang katawhan masuod kaniya. Si Abel, ang ikaduhang anak ni Adan ug Eva, mao ang unang tawo nga nagpakitag pagtuo kang Jehova human sa rebelyon sa Eden. Kay gimahal ni Abel si Jehova ug gusto niya nga mapalipay Siya ug masuod Kaniya, nagtanyag siyag halad. Si Abel maoy usa ka magbalantay, maong mikuha siyag pipila ka nating karnero, giihaw kini, ug gihalad kang Jehova. Unsay pag-isip ni Jehova niana? Iyang ‘giuyonan si Abel ug ang iyang halad.’ (Gen. 4:4) Gipakita pod ni Jehova ang iyang pag-uyon sa mga halad nga gitanyag sa mga tawo nga nahigugma ug misalig kaniya—sama kang Noe. (Gen. 8:20, 21) Gidawat ni Jehova ang maong mga halad, nga nagpakita nga puwedeng mabatonan sa makasasalang katawhan ang iyang pag-uyon ug masuod kaniya. b
7. Unsay atong makat-onan sa kaandam ni Abraham nga ihalad ang iyang kaugalingong anak?
7 Gisugo ni Jehova si Abraham, usa ka tawo nga may talagsaong pagtuo, sa paghimog butang nga lisod kaayo—ang paghalad sa iyang kaugalingong anak nga si Isaac. Seguradong mao to ang pinakalisod nga asaynment nga nadawat ni Abraham. Bisan pa niana, andam siyang motuman sa sugo ni Jehova. Pero sa dihang iya na untang patyon ang iyang anak, gipugngan siya sa Diyos. Kini nga hitabo nagpakita kon unsa poy andam himoon ni Jehova—andam niyang ihatag ang iyang pinalanggang Anak ingong halad. Ingon ana gyod ka dako ang gugma ni Jehova sa katawhan.—Gen. 22:1-18.
8. Sa unsa nagrepresentar ang daghang halad nga gitanyag ubos sa Balaod? (Levitico 4:27-29; 17:11)
8 Katuigan sa ulahi, ang Balaod nga gihatag ngadto sa nasod sa Israel nagsugo sa pagtanyag ug daghang halad aron matabonan ang sala sa katawhan sa Diyos. (Basaha ang Levitico 4:27-29; 17:11.) Ang maong mga halad nagrepresentar sa mas dakong halad nga maoy bug-os magtabon sa sala sa katawhan. Gigiyahan sa Diyos ang mga propeta sa pagsulat nga ang gisaad nga kaliwat, ang espesyal nga Anak sa Diyos, kinahanglang mag-antos ug mamatay. Patyon siya samag halad nga karnero. (Isa. 53:1-12) Hunahunaa ni: Si Jehova mihimog kahikayan aron ang iyang pinalanggang Anak mahimong halad nga magluwas sa katawhan—apil ka—gikan sa sala ug kamatayon!
UNSAY GIHIMO NI JESUS SA PAGLUWAS NATO?
9. Unsay giingon ni Juan nga Tigbawtismo bahin kang Jesus? (Hebreohanon 9:22; 10:1-4, 12)
9 Niadtong 29 C.E., si Juan nga Tigbawtismo miingon bahin kang Jesus nga Nasaretnon: “Tan-awa, ang Kordero sa Diyos nga magpapas sa sala sa kalibotan!” (Juan 1:29) Kini nga mga pulong nagpakita nga si Jesus mao ang dugay nang gitagna nga kaliwat. Itanyag niya ang iyang kinabuhi ingong halad. Sa kataposan, miabot na gyod ang kaliwat nga bug-os magluwas sa katawhan gikan sa sala.—Basaha ang Hebreohanon 9:22; 10:1-4, 12.
10. Giunsa pagpakita ni Jesus nga siya ‘mianhi sa pagdapit’ sa mga makasasala?
10 Gihatagag espesyal nga pagtagad ni Jesus ang mga tawo nga mibating nabug-atan tungod sa ilang makasasalang kahimtang ug gidapit niya sila nga mahimong iyang sumusunod. Nahibalo siya nga ang sala mao gyoy hinungdan sa pag-antos sa katawhan. Maong naningkamot siya nga matabangan ilabina kadtong mga tawo nga nailhang makasasala. Pinaagig ilustrasyon, siya miingon: “Ang mga tawong himsog wala magkinahanglag doktor, apan kadto lang mga masakiton.” Siya midugang: “Mianhi ko sa pagdapit, dili sa mga tawong matarong, kondili sa mga makasasala.” (Mat. 9:12, 13) Mao gyod nay gihimo ni Jesus. Mahigugmaon niyang gipasaylo ang mga sala sa babaye nga naghugas sa iyang mga tiil pinaagig mga luha. (Luc. 7:37-50) Gitudloan pod ni Jesus ug importanteng mga kamatuoran ang babayeng Samarianhon didto sa atabay, bisag nahibalo siya sa iyang imoral nga pagkinabuhi. (Juan 4:7, 17-19, 25, 26) Gihatagan pa gani sa Diyos si Jesus ug gahom sa pagbanhaw sa pipila ka lalaki, babaye, ug mga bata nga namatay. Kini nagpakita nga si Jesus naay gahom sa pagtapos sa pinakapait nga resulta sa sala—ang kamatayon.—Mat. 11:5.
11. Nganong ang makasasalang mga tawo komportable rang moduol kang Jesus?
11 Dili ikatingala nga bisan ang mga tawo nga giisip nga makasasala komportable ra kang Jesus. Siya nagpakitag kaluoy ug empatiya kanila, maong dili sila maikog nga moduol niya. (Luc. 15:1, 2) Gikomendahan ug gipanalanginan sila ni Jesus tungod sa pagtuo nga ilang gipakita kaniya. (Luc. 19:1-10) Hingpit gyod niyang gipakita kon unsa ka maluluy-on ang iyang Amahan. (Juan 14:9) Pinaagi sa pulong ug buhat, gipakita ni Jesus nga ang iyang maluluy-ong Amahan nahigugma sa mga tawo ug gustong motabang nila nga masuklan ang sala. Gitabangan niya ang makasasalang mga tawo nga magbag-o ug mosunod kaniya.—Luc. 5:27, 28.
12. Unsay giingon ni Jesus bahin sa iyang kamatayon?
12 Nahibalo si Jesus kon unsay mahitabo niya sa umaabot. Sa pipila ka higayon, gisultihan niya ang iyang mga sumusunod nga siya budhian ug patyon diha sa estaka. (Mat. 17:22; 20:18, 19) Nahibalo siya nga ang iyang paghalad sa iyang kinabuhi magpapas sa sala sa kalibotan, sama sa giingon ni Juan nga Tigbawtismo ug sa mga propeta kaniadto. Miingon pod si Jesus nga dihang mahalad na niya ang iyang kinabuhi, iyang “kabigon ang tanang matang sa tawo” ngadto kaniya. (Juan 12:32) Mapalipay sa makasasalang mga tawo si Jehova kon ilang dawaton si Jesus ingong Ginoo ug sundon ang iyang ehemplo. Kon ila nang himoon, sila ‘mapagawas gikan sa sala.’ (Roma 6:14, 18, 22; Juan 8:32) Busa kinabubut-on ug maisogong giatubang ni Jesus ang iyang pait nga kamatayon aron maluwas ta.—Juan 10:17, 18.
13. Sa unsang paagi namatay si Jesus, ug unsay gitudlo niini kanato bahin kang Jehova nga Diyos? (Tan-awa sab ang hulagway.)
13 Si Jesus gibudhian, gidakop, gibiaybiay, gibutangbutangan, gihukmang sad-an, ug gipaantos pag-ayo. Dayon gidala siya sa mga sundalo ngadto sa dapit diin siya patyon ug gilansang siya sa estaka. Samtang giantos niya kining tanan, naay nagtan-aw niya nga mas labawng nasakitan—si Jehova nga Diyos. Hunahunaa lang: Walay kinutoban ang gahom ni Jehova ug gimahal kaayo niya ang iyang Anak. Pero nganong wala man niya gamita ang iyang gahom aron taposon ang pag-antos sa iyang pinalanggang Anak? Tungod kay gimahal ta niya. Si Jesus miingon: “Gihigugma pag-ayo sa Diyos ang kalibotan mao nga gihatag niya ang iyang bugtong nga Anak aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.”—Juan 3:16.
Dihang gitugotan ni Jehova nga mamatay ang iyang Anak, giagwanta niya ang grabeng kasakit aron mapahigawas ta gikan sa sala ug kamatayon (Tan-awa ang parapo 13)
14. Unsay gipamatud-an sa halad ni Jesus?
14 Ang paghalad ni Jesus sa iyang kinabuhi mao ang kinadak-ang pamatuod kon unsa ka dako ang gugma ni Jehova sa mga kaliwat ni Adan ug Eva. Pamatuod ni nga gimahal ka pag-ayo ni Jehova. Dili lalim ang iyang sakripisyo kay giagwanta niya ang grabeng kasakit aron maluwas ka gikan sa sala ug kamatayon. (1 Juan 4:9, 10) Oo, gusto niyang tabangan ang kada usa nato nga masuklan ang sala ug madaog kini!
15. Unsay angay natong buhaton aron makabenepisyo ta sa regalo sa Diyos nga halad lukat ni Jesus?
15 Regalo gyod sa Diyos para nato ang halad lukat sa iyang bugtong Anak. Tungod niini, mapasaylo ang atong mga sala. Pero aron pasayloon ta sa Diyos, naa tay angayng buhaton. Unsa kana? Gisulti ni Juan nga Tigbawtismo ug ni Jesu-Kristo ang tubag: “Paghinulsol mo, kay ang Gingharian sa langit haduol na.” (Mat. 3:1, 2; 4:17) Busa importante gyod ang paghinulsol aron masuklan nato ang sala ug masuod sa atong mahigugmaong Amahan. Pero unsay gipasabot sa paghinulsol, ug sa unsang paagi makatabang ni nato nga masuklan ang atong makasasalang kahimtang? Tubagon na sa sunod nga tun-anang artikulo.
AWIT 18 Mapasalamaton sa Lukat
a TERMINO GIPATIN-AW: Sa Bibliya, ang pulong “sala” nagtumong sa sayop nga mga buhat o dili pagsunod sa moral nga mga sukdanan ni Jehova. Pero ang pulong “sala” puwede pong magtumong sa dili hingpit o makasasalang kahimtang nga atong napanunod gikan kang Adan. Ang napanunod nga sala mao ang hinungdan kon nganong kitang tanan mamatay.
