1-2. (a) Unsay panglantaw ni Jehova sa tinuyong pagpakasala? (b) Unsay gusto ni Jehova nga himoon sa mga nakasala?

 SI Jehova dili konsentidor nga Diyos; iyang gidumtan ang sala. (Sal. 5:​4-6) Gusto niya nga sundon nato ang iyang matarong nga mga sukdanan nga naa sa Bibliya. Siyempre, nahibalo si Jehova nga dili ta hingpit ug dili nato bug-os masunod ang iyang mga sugo. (Sal. 130:​3, 4) Pero dili pod niya konsentihon ang “mga tawong dili diyosnon nga naghimo sa [Iyang] dili hitupngang pagkamaayo . . . ingong pasangil sa walay kaulaw nga paggawi.” (Jud. 4) Gani ang Bibliya naghisgot bahin sa “kalaglagan sa mga tawong dili diyosnon” panahon sa gubat sa Diyos nga gitawag ug Armagedon.—2 Ped. 3:7; Pin. 16:16.

² Pero, dili gusto ni Jehova nga naay si bisan kinsa nga malaglag. Sa nahisgotan na sa miaging mga artikulo, ang Bibliya klarong nag-ingon nga “gusto niya nga ang tanan maghinulsol.” (2 Ped. 3:9) Ang mga ansiyano nagsundog kang Jehova samtang mapailobon silang naningkamot nga tabangan ang mga nakasala nga magbag-o ug makabaton pag-usab sa pag-uyon ni Jehova. Makapaguol kay ang uban dili gustong magbag-o. (Isa. 6:9) Ang uban nagpadayon sa ilang daotang binuhatan bisan pa sa balikbalik nga paningkamot sa mga ansiyano nga tabangan sila nga maghinulsol. Unsay himoon sa mga ansiyano niana nga kahimtang?

 “TANGTANGA ANG TAWONG DAOTAN”

3. (a) Unsay giingon sa Bibliya nga angayng himoon ngadto sa dili mahinulsolong makasasala? (b) Nganong makaingon ta nga ang nakasala ang mipili nga matangtang siya sa kongregasyon?

³ Kon ang nakasala dili mahinulsolon, kinahanglang sundon sa mga ansiyano ang direksiyon nga giingon sa 1 Corinto 5:13: “Tangtanga ang tawong daotan gikan sa inyong taliwala.” Sa tinuod lang, ang nakasala ang mipili niana; iya rang giani kon unsay iyang gipugas. (Gal. 6:7) Nganong makaingon ta niana? Kay wala niya dawata ang balikbalik nga paningkamot sa mga ansiyano nga tabangan siya nga maghinulsol. (2 Hari 17:​12-15) Ang iyang binuhatan nagpakita nga gipili niya nga dili mosunod sa mga sukdanan ni Jehova.—Deut. 30:​19, 20.

4. Nganong kinahanglang ipahibalo nga ang dili mahinulsolong makasasala gitangtang sa kongregasyon?

⁴ Kon ang dili mahinulsolong makasasala gitangtang gikan sa kongregasyon, ipahibalo diha sa kongregasyon nga dili na siya Saksi ni Jehova. a Himoon ni nga pahibalo dili aron pakaulawan ang nakasala, kondili aron masunod sa kongregasyon ang Kasulatanhong sugo nga “mohunong na sa pagpakig-uban” sa maong tawo ug “dili gani mokaon uban” niya. (1 Cor. 5:​9-11) Dunay maayong rason kon nganong gihatag kana nga sugo. Si apostol Pablo misulat: “Ang diyutayng lebadura magpatubo sa tibuok minasa.” (1 Cor. 5:6) Ang dili mahinulsolong mga makasasala makapahuyang sa determinasyon niadtong mga naningkamot nga mosunod sa matarong nga mga sukdanan ni Jehova.—Prov. 13:20; 1 Cor. 15:33.

5. Unsay angay natong panglantaw niadtong gitangtang gikan sa kongregasyon, ug ngano?

⁵ Busa unsay angay natong panglantaw sa usa ka isigkamagtutuo nga gitangtang gikan sa kongregasyon? Bisan tuod mohunong na ta sa pagpakig-uban kaniya, dili ta angayng maghunahuna nga wala na siyay paglaom. Hinuon, isipon nato siya nga samag karnero nga nawala nga puwede rang makabalik. Hinumdomi nga kini nga karnero nagpahinungod sa iyang kaugalingon kang Jehova. Ugaling lang kay sa pagkakaron, wala niya tumana ang iyang panaad kang Jehova, maong naa siya sa peligroso nga kahimtang. (Ezeq. 18:31) Pero si Jehova maluluy-on ug naghatag pa siyag panahon kaniya nga makabalik. Busa unsaon pagtabang sa mga ansiyano kadtong natangtang gikan sa kongregasyon?

KON UNSAON PAGTABANG SA MGA ANSIYANO KADTONG NATANGTANG SA KONGREGASYON

6. Unsay himoon sa mga ansiyano aron matabangan ang usa nga natangtang sa kongregasyon?

⁶ Kon ang usa matangtang gikan sa kongregasyon, pasagdan na lang ba siya sa mga ansiyano nga maningkamot rag iya aron makabalik kang Jehova? Dili! Dihang pahibaloon sa komite sa mga ansiyano ang dili mahinulsolong makasasala nga tangtangon siya gikan sa kongregasyon, ila siyang sultihan kon unsay iyang himoon aron makabalik. Gawas pa ana, sagad sultihan sa mga ansiyano ang nakasala nga sila makig-estorya niya pag-usab human sa pipila ka bulan aron makita kon naa na ba siyay gihimong kausaban. Kon ang nakasala mosugot nga makig-estorya pag-usab, nianang panahona ang mga ansiyano kinasingkasing nga magdasig niya nga maghinulsol ug mobalik. Bisan kon nianang  panahona wala gihapon siya magbag-o, ang mga ansiyano maningkamot nga estoryahon siya pag-usab sa sunod nga mga higayon.

7. Unsaon pagsundog sa mga ansiyano ang pagkamaluluy-on ni Jehova dihang motabang sila niadtong mga natangtang sa kongregasyon? (Jeremias 3:12)

⁷ Ang mga ansiyano naningkamot sa pagsundog sa pagkamaluluy-on ni Jehova samtang tabangan nila kadtong natangtang sa kongregasyon. Pananglitan, wala hulata ni Jehova nga maghinulsol una ang iyang masinupakong katawhan sa karaang Israel ayha pa siya mitabang nila. Hinuon, siya ang unang mihimog paagi aron matabangan sila bisag wala pa sila magpakitag bisan unsang ilhanan sa paghinulsol. Sa nahisgotan na sa ikaduhang artikulo niini nga serye, gipakita ni Jehova kon unsa siya ka maluluy-on pinaagi sa pagsugo kang propetang Oseas nga makig-uli sa iyang asawa, kinsa niadtong panahona padayon pang nagpakasala. (Os. 3:1; Mal. 3:7) Masundog sa mga ansiyano si Jehova kon kinasingkasing gyod ang ilang tinguha nga makabalik ang nakasala ug kon dili nila siya lisodlisoron aron makabalik.—Basaha ang Jeremias 3:12.

8. Sa unsang paagi ang ilustrasyon ni Jesus bahin sa milayas nga anak nagtabang nato nga mas masabtan kon unsa ka maluluy-on si Jehova? (Lucas 15:7)

⁸ Matikdi ang reaksiyon sa amahan diha sa ilustrasyon ni Jesus bahin sa milayas nga anak, nga gihisgotan sa ikaduhang artikulo niini nga serye. Dihang nakita sa amahan ang iyang anak nga nagpadulong, siya “midagan ug migakos sa iyang anak ug mapinanggaong mihalok kaniya.” (Luc. 15:20) Matikdi nga wala hulata sa amahan nga mangayo unag pasaylo ang iyang anak. Hinuon ang amahan midagan aron sugaton ang iyang anak, kay gimahal niya ang iyang anak. Ang mga ansiyano naningkamot pod nga ipakita ang susamang pagbati para niadtong mibiya sa kongregasyon. Gusto nila nga kining nawala nga mga karnero mobalik kang Jehova. (Luc. 15:​22-24, 32) Si Jehova, si Jesus, ang mga anghel, ug ang tibuok kongregasyon malipay gyod kon ang nakasala mobalik.—Basaha ang Lucas 15:7.

9. Giunsa pagpakita ni Jehova nga gusto gyod niya nga mobalik ang nakasala?

⁹ Sa ato nang nahisgotan, si Jehova dili gyod magkonsentir sa dili mahinulsolong makasasala. Pero dili gyod niya sila talikdan. Gusto niya nga mobalik sila kaniya. Sa Oseas 14:​4, atong mabasa kon unsay pagbati ni Jehova sa mahinulsolong mga makasasala: “Ayohon nako ang ilang pagkadili-matinumanon. Higugmaon nako sila nga kinabubut-on, kay ang akong kasuko . . . nawala na.” Kusganon gyod ni nga pahinumdom para sa mga ansiyano nga molihok dayon sa pagtabang niadtong nagpakitag bisan gamay pa lang nga ilhanan sa paghinulsol. Ug kusganon pod ni nga pagdasig para niadtong mibiya kang Jehova nga dili maglangan sa pagbalik.

10-11. Unsaon pagtabang sa mga ansiyano kadtong dugay nang natangtang sa kongregasyon?

¹⁰ Komosta kadtong dugay nang natangtang sa kongregasyon, tingali daghang tuig na ang milabay? Basin wala na sila magbuhat sa sala nga maoy hinungdan sa ilang pagkatangtang. Basin gani wala na sila kahinumdom sa hinungdan kon nganong natangtang sila. Bisag unsa pa may kahimtang, maningkamot ang mga ansiyano nga pangitaon ug duawon kini nga mga indibiduwal. Sa maong mga pagduaw, ang mga ansiyano puwede pa ganing moampo uban nila ug kinasingkasing nga magdasig nila nga mobalik sa kongregasyon. Siyempre kon ang usa dugay nang nawala sa kongregasyon, seguradong luya kaayo siya sa espirituwal. Busa kon gusto niyang mobalik sa kongregasyon, puwedeng hikayon sa mga ansiyano  nga naay modumala niyag pagtuon sa Bibliya bisag wala pa siya mapasig-uli. Sa tanang kahimtang, ang mga ansiyano maoy mag-asayn kon kinsay modumala sa pagtuon.

¹¹ Ingong pagsundog sa kaluoy ni Jehova, ang mga ansiyano maningkamot gyod nga pangitaon kadtong mga mibiya kang Jehova ug dasigon sila nga mobalik kaniya. Kon ang nakasala maghinulsol ug mobiya sa iyang daotang binuhatan, puwede na dayon siyang ipasig-uli.—2 Cor. 2:​6-8.

12. (a) Unsa nga mga situwasyon nga ilabinang mag-amping ang mga ansiyano? (b) Nganong dili ta angayng maghunahuna nga naay klase sa mga sala nga imposibleng mapasaylo ni Jehova? (Tan-awa sab ang footnote.)

¹² Pero naay mga situwasyon nga ilabinang mag-amping ang mga ansiyano sa dili pa nila ipasig-uli ang nakasala. Pananglitan, kon ang  usa nag-abuso ug bata, o apostata, o nanglingla aron matapos ang kaminyoon, seguroon sa mga ansiyano kon tinuod ba gyod siyang naghinulsol. (Mal. 2:14; 2 Tim. 3:6) Kinahanglan nilang panalipdan ang panon. Pero angay pod natong hinumdoman nga dawaton ni Jehova si bisan kinsa nga nagpakitag tinuod nga paghinulsol ug mihunong na sa pagbuhat ug daotan. Busa bisag mag-amping ang mga ansiyano kon bahin niadtong mga nanglingla sa uban, dili gyod sila angayng maghunahuna nga kini nga klase sa mga makasasala dili mapasaylo ni Jehova. b—1 Ped. 2:10.

KON UNSAY MAHIMO SA KONGREGASYON

13. Unsay kalainan sa atong pagtratar niadtong mga nabadlong ug niadtong mga natangtang sa kongregasyon?

¹³ Sa nahisgotan na sa miaging artikulo, usahay naay himoong pahibalo nga ang usa gibadlong. Sa maong kahimtang, puwede gihapon tang makig-uban niya kay nahibalo ta nga naghinulsol na siya ug iya nang gibiyaan ang iyang daotang binuhatan. (1 Tim. 5:20) Bahin gihapon siya sa kongregasyon, ug nagkinahanglan siyag pagdasig gikan sa pagpakig-uban sa mga igsoon. (Heb. 10:​24, 25) Pero dili ingon niana ang kahimtang kon ang usa gitangtang sa kongregasyon. Kita “mohunong na sa pagpakig-uban” niya ug “dili gani mokaon uban sa ingon niana nga tawo.”—1 Cor. 5:11.

14. Sa unsang paagi magamit sa mga Kristohanon ang ilang nabansay sa Bibliya nga konsensiya dihang makiglabot niadtong natangtang sa kongregasyon? (Tan-awa sab ang hulagway.)

¹⁴ Nagpasabot ba ni nga dili na gyod nato puwedeng tagdon o estoryahon kadtong natangtang sa kongregasyon? Wala. Siyempre, atong likayan ang pagpakig-uban niya. Pero ang mga Kristohanon makagamit sa ilang nabansay sa Bibliya nga konsensiya sa pagdesisyon kon imbitahon ba nila sa tigom ang usa nga natangtang—tingali ilang paryente o suod nga higala kaniadto. Komosta kon motambong siya? Kaniadto, dili gyod nato tagdon ang maong tawo. Pero karon, gamiton sa matag Kristohanon ang iyang nabansay sa Bibliya nga konsensiya niining bahina. Ang uban modesisyon tingali nga tagdon o estoryahon ang maong tawo diha sa tigom. Pero dili ta makig-estorya niyag dugay o makig-uban niya sa ubang mga kahimtang.

15. Unsa nga klase sa mga makasasala ang gihisgotan sa 2 Juan 9-11? (Tan-awa sab ang kahong “ Parehas ra ba nga Klase sa Sala ang Gihisgotan ni Juan ug Pablo?”)

 ¹⁵ Ang uban tingali makapangutana, ‘Dili ba ang Bibliya nag-ingon man nga ang Kristohanon nga mangomosta niana nga klase sa tawo makaambit sa iyang daotang mga buhat?’ (Basaha ang 2 Juan 9-11.) Ang konteksto niini nga teksto nagpakita nga ang gitumong dinhi mao kadtong mga apostata ug kadtong aktibong nagdasig sa uban sa paghimog daotan. (Pin. 2:20) Busa kon ang usa aktibong nagpasiugdag apostatang mga pagtulon-an o nagdasig sa uban sa paghimog daotan, dili siya angayng duawon sa mga ansiyano. Siyempre, naa gihapon siyay paglaom nga maghinulsol. Pero samtang wala pa na mahitabo, dili gyod nato siya tagdon o imbitahon sa mga tigom.

SUNDOGA ANG PAGKAMALULUY-ON NI JEHOVA

16-17. (a) Unsay gusto ni Jehova nga himoon sa mga makasasala? (Ezequiel 18:32) (b) Sa unsang paagi mapakita sa mga ansiyano nga sila mga isigkamagbubuhat ni Jehova?

¹⁶ Unsay atong nakat-onan niining lima ka artikulo nga atong nahisgotan? Dili gyod gusto ni Jehova nga naay malaglag. (Basaha ang Ezequiel 18:32.) Gusto niya nga ang mga makasasala mapasig-uli kaniya. (2 Cor. 5:20) Mao nay hinungdan nga sukad pa kaniadto, si Jehova balikbalik nga nag-awhag sa iyang masinupakong katawhan—ug sa masinupakong mga indibiduwal—nga maghinulsol ug mobalik kaniya. Gihatagan pod ni Jehova ang mga ansiyano ug dakong pribilehiyo nga mahimong iyang mga isigkamagbubuhat. Mahimo nila ni pinaagi sa pagpaningkamot nga tabangan ang mga nakasala nga maghinulsol.—Roma 2:4; 1 Cor. 3:9.

¹⁷ Imadyina ang kalipay sa langit dihang ang mga makasasala maghinulsol! Malipay gyod ang atong langitnong Amahan, si Jehova, sa matag higayon nga mobalik ang iyang nawalang mga karnero. Molalom gyod ang atong gugma kang Jehova samtang padayon natong pamalandongon ang iyang dakong kaluoy ug dili hitupngang pagkamaayo.—Luc. 1:78.