Dayag nga wala. Ang Yawa wala moingon kang Eva nga kon mokaon siya sa bunga nga gidili sa Diyos, ang iya rang lawas ang mamatay pero may dili makitang parte niya (kanang gitawag karon sa uban ug kalag nga dili mamatay) nga magpadayong buhi sa laing kalibotan. Pinaagi sa halas, si Satanas miingon nga kon kaonon ni Eva ang bunga nianang kahoya, ‘dili [gyod] siya mamatay.’ Iyang gipatuo si Eva nga padayon siyang mabuhi ug mahimong mas maayo pa ang iyang kinabuhi sa yuta​—kinabuhi nga wala magdepende sa Diyos.​—Gen. 2:17; 3:3-5.

Kon ang bakak nga doktrina bahin sa kalag nga dili mamatay wala maggikan sa Eden, kanus-a man diay ni nagsugod? Wala ta makaseguro. Pero nahibalo ta nga ang tanang bakak nga pagsimba nahanaw dihang miabot ang Lunop sa adlaw ni Noe. Walay nagpabiling bakak nga relihiyosong ideya human sa Lunop kay si Noe lang ug ang iyang pamilya ang naluwas, ug silang tanan tinuod nga mga magsisimba.

Busa ang pagtulon-an karon bahin sa kalag nga dili mamatay lagmit nagsugod human sa Lunop. Dihang gilibog sa Diyos ang mga pinulongan sa Babel ug nagkatibulaag ang mga tawo “sa tibuok yuta,” seguradong dala nila ang ideya nga ang tawo dunay dili mamatay nga kalag. (Gen. 11:8, 9) Bisag kanus-a pa nagsugod kining bakak nga ideya, segurado ta nga ang “amahan sa bakak,” si Satanas nga Yawa, maoy nagpasiugda niini ug nalipay siya nga mikaylap kini pag-ayo.​—Juan 8:44.