1-2. (a) Unsang selebrasyon ang ginasaulog sa ubang nasod, ug unsa ang tuig sa Pagsadya? (Tan-awa ang kahong “ Unsa ang Tuig sa Pagsadya?”) (b) Unsay gihisgotan ni Jesus diha sa Lucas 4:16-18?

SA PIPILA ka nasod, dunay ginahimong espesyal nga selebrasyon para sa ika-50 ka tuig nga pagmando sa usa ka hari o rayna. Kini nga selebrasyon lagmit dangtan ug usa ka adlaw, usa ka semana, o mas taas pa, pero sa ngadtongadto matapos kini, ug dayon malimtan ra sa mga tawo.

² Sa karaang Israel, duna pod silay espesyal nga selebrasyon kada 50 ka tuig​—ang tuig sa Pagsadya. Kini nga selebrasyon naghatag sa mga Israelinhon ug kagawasan. Nganong angay tang mainteres niana? Kay kana magpahinumdom nato sa mas nindot nga tagana ni Jehova para sa walay kataposang kagawasan nga atong mapahimuslan bisan karon, kagawasan nga gihisgotan sab ni Jesus.​—Basaha ang Lucas 4:16-18.

3. Sumala sa Levitico 25:8-12, sa unsang paagi ang mga Israelinhon nakabenepisyo sa tuig sa Pagsadya?

³ Mas masabtan nato ang gipasabot ni Jesus bahin sa kagawasan pinaagi sa pagkonsiderar sa tuig sa Pagsadya nga gihikay sa Diyos para sa iyang katawhan kaniadto. Giingnan ni Jehova ang mga Israelinhon: “Balaanon ninyo ang ika-50 nga tuig ug ipahibalo nga may kagawasan na ang tanang molupyo sa yuta. Kini maoy tuig sa Pagsadya para kaninyo, ug ang matag usa mobalik sa iyang yuta ug mouli sa iyang pamilya.” (Basaha ang Levitico 25:8-12.) Sa miaging artikulo, atong gihisgotan kon sa unsang paagi ang mga Israelinhon nakabenepisyo sa senemanang Igpapahulay. Pero sa unsang paagi nakabenepisyo ang mga Israelinhon sa tuig sa Pagsadya? Aw,  ibutang ta nga ang usa ka Israelinhon nakautang, maong napugos siya pagbaligya sa iyang yuta aron mabayran kini. Sa tuig sa Pagsadya, ang yuta iuli kaniya. Busa ang tawo ‘makabalik sa iyang yuta,’ ug sa ulahi mapanunod sa iyang mga anak kanang yutaa. Sa laing kahimtang, ang usa ka tawo nga magkalisodlisod mapugos tingali sa pagbaligya sa iyang anak​—o bisan sa iyang kaugalingon—​sa pagkaulipon aron makabayad sa iyang utang. Sa tuig sa Pagsadya, ang ulipon “mouli sa iyang pamilya.” Walay usa nga mahimong ulipon hangtod sa hangtod, nga wala nay paglaom! Mahunahunaon gyod si Jehova!

4-5. Nganong importante nga mokat-on ta bahin sa tuig sa Pagsadya?

⁴ Unsay laing benepisyo sa tuig sa Pagsadya? Si Jehova miingon: “Walay mahimong pobre ninyo, kay panalanginan gyod mo ni Jehova sa yuta nga ihatag ni Jehova nga inyong Diyos ingong inyong panulondon.” (Deut. 15:4) Lahi gyod kana sa nagakahitabo sa kalibotan karon, diin ang mga dato mosamot ka dato ug ang pobre mosamot ka pobre!

⁵ Ingong mga Kristohanon, dili ta ilalom sa Moisesnong Balaod. Nagpasabot ni nga wala ta magsunod sa kahikayan sa tuig sa Pagsadya bahin sa pagpahigawas sa mga ulipon, pagkanselar sa mga utang, ug pag-uli sa napanunod nga yuta. (Roma 7:4; 10:4; Efe. 2:15) Bisan pa niana, duna tay rason nga mokat-on bahin sa tuig sa Pagsadya. Ngano? Tungod kay puwede tang makabaton ug kagawasan nga magpahinumdom nato sa kahikayan nga gihimo ni Jehova para sa mga Israelinhon.

6. Sa unsa kinahanglang ipahigawas ang katawhan?

⁶ Kitang tanan kinahanglang ipahigawas gikan sa usa ka pintas kaayo nga matang sa pagkaulipon​—ang pagkaulipon sa sala. Tungod sa atong pagkamakasasala, kita matigulang, masakit, ug mamatay. Makita sa daghan nga tinuod ni dihang sila manamin o magpatambal sa doktor. Kita maguol sab dihang makasala ta. Si apostol Pablo miingon nga siya ‘nabihag sa balaod sa sala nga anaa sa iyang lawas.’ Siya midugang: “Makaluluoy kaayo ko!  Kinsay moluwas nako gikan niining lawasa nga maoy hinungdan sa akong kamatayon?”​—Roma 7:23, 24.

7. Unsay gitagna ni Isaias bahin sa kagawasan?

⁷ Ikalipay nga ang Diyos naghimog kahikayan aron kita maluwas o mapahigawas sa sala. Kini nga kagawasan nahimong posible tungod kang Jesus. Kapig 700 ka tuig sa wala pa moanhi si Jesus sa yuta, si propetang Isaias nagtagna ug nindot kaayong kagawasan. Kana nga kagawasan mas dakog malampos kay sa kagawasan panahon sa tuig sa Pagsadya sa Israel. Siya misulat: “Ang espiritu sa Soberanong Ginoong Jehova ania kanako, kay si Jehova nagdihog kanako sa pagpahayag sa maayong balita ngadto sa maaghop. Gipadala ko niya sa pag-ayo sa dugmok ug kasingkasing, sa pagmantala sa kagawasan sa mga binihag.” (Isa. 61:1) Kang kinsa mapadapat ang maong tagna?

8. Kang kinsa mapadapat ang tagna ni Isaias bahin sa kagawasan?

⁸ Kanang importanteng tagna bahin sa kagawasan nagsugod pagkatuman human sugdi ni Jesus ang iyang ministeryo. Dihang miadto si Jesus sa sinagoga sa iyang lungsod sa Nasaret, iyang gibasa ang maong tagna ni Isaias ngadto sa mga Hudiyo nga nagtigom didto. Gipadapat ni Jesus sa iyang kaugalingon kining mga pulonga: “Ang espiritu ni Jehova ania kanako, kay siya nagdihog kanako sa pagpahayag sa maayong balita ngadto sa mga kabos. Gipadala ko niya sa pagmantala sa kagawasan sa mga binihag ug sa pagpasig-uli sa panan-aw sa mga buta, sa pagpahigawas sa mga dinaogdaog, ug sa pagwali bahin sa dalawatong panahon ni Jehova.” (Luc. 4:16-19) Giunsa pagtuman ni Jesus ang maong tagna?

9. Unsang matanga sa kagawasan ang gilaoman sa daghang tawo sa panahon ni Jesus?

⁹ Ang kagawasan nga gitagna ni Isaias ug gibasa ni Jesus nagsugod pagkatuman sa unang siglo. Gipamatud-an kana ni Jesus dihang siya miingon: “Niining adlawa natuman ang kasulatan nga bag-o lang ninyong nadungog.” (Luc. 4:21) Daghan niadtong nakadungog sa gibasa ni Jesus tingali naglaom nga mahigawas gikan sa gobyerno sa Roma. Tingali parehas silag gibati sa duha ka tawo nga miingon: “Siya ang among gilaoman nga magluwas sa Israel.” (Luc. 24:13, 21) Pero nahibalo ta nga wala awhaga ni Jesus ang iyang mga sumusunod sa pagrebelde sa pintas nga pagmando sa mga Romano. Iya hinuong gisugo sila nga ibayad “sa Cesar ang iya sa Cesar.” (Mat. 22:21)  Giunsa pagpahigawas ni Jesus ang mga tawo niadtong panahona?

10. Sa unsa gipahigawas ni Jesus ang mga tawo?

¹⁰ Ang Anak sa Diyos mianhi aron tabangan ang mga tawo nga makabaton ug kagawasan sa duha ka paagi. Una, gitabangan ni Jesus ang mga tawo nga mahigawas sa sayop nga mga pagtulon-an sa mga lider sa relihiyon. Daghang Hudiyo kaniadto ang naulipon sa mga tradisyon ug sayop nga mga pagtulon-an. (Mat. 5:31-37; 15:1-11) Kadtong nag-angkong espirituwal nga mga tiggiya samag mga buta. Kay ilang gisalikway ang Mesiyas ug ang espirituwal nga kahayag nga iyang gitanyag, sila nagpabilin sa kangitngit ug sala. (Juan 9:1, 14-16, 35-41) Pinaagi sa pagtudlo sa kamatuoran ug paghatag ug maayong ehemplo, gipakita ni Jesus sa mapainubsanong mga tawo kon sa unsang paagi mahigawas sila sa bakak nga mga pagtulon-an.​—Mar. 1:22; 2:23–3:5.

11. Unsa ang ikaduhang paagi nga si Jesus nagtaganag kagawasan?

¹¹ Ikaduha, gipaposible ni Jesus nga ang mga tawo mahigawas sa pagkaulipon sa napanunod nga sala. Pinasukad sa halad ni Jesus, mahimong pasayloon sa Diyos ang mga sala niadtong nagpakitag pagtuo ug nagdawat sa lukat nga Iyang gitagana. (Heb. 10:12-18) Si Jesus miingon: “Kon ang Anak magpahigawas kaninyo, kamo tinuod nga gawasnon.” (Juan 8:36) Kana nga kagawasan mas labaw gayod kay sa bisan unsa nga puwedeng mabatonan sa mga Israelinhon sa tuig sa Pagsadya! Pananglitan, ang tawo nga napahigawas sa tuig sa Pagsadya puwedeng maulipon pag-usab, ug sa ngadtongadto, siya mamatay.

12. Kinsay unang nakabenepisyo sa kagawasan nga gimantala ni Jesus?

¹² Niadtong Pentekostes 33 C.E., gidihogan ni Jehova ug balaang espiritu ang mga apostoles ug ang ubang matinumanong lalaki ug babaye. Iyang gisagop sila ingong iyang mga anak aron nga sa umaabot, sila mabanhaw ngadto sa langit ug maghari kauban ni Jesus. (Roma 8:2, 15-17) Sila ang unang nakabenepisyo sa kagawasan nga gimantala ni Jesus sa sinagoga sa Nasaret. Sila wala na maulipon sa sayop nga mga pagtulon-an ug dili Kasulatanhong mga kostumbre sa Hudiyong mga lider sa relihiyon. Giisip pod sila sa Diyos nga napahigawas na sa sala nga moresultag kamatayon. Ang simbolikong tuig sa Pagsadya nga nagsugod dihang gidihogan ang mga sumusunod sa Kristo niadtong 33 C.E. matapos dihang mahuman na ang Usa ka Libo ka Tuig nga Pagmando ni Jesus. Unsa nay malampos nianang panahona?

13-14. Gawas sa dinihogang mga Kristohanon, kinsa pay makadawat sa kagawasan nga gimantala ni Jesus?

¹³ Karon, milyonmilyong sinsero nga mga tawo gikan sa tanang kanasoran ang sakop sa “ubang mga karnero.” (Juan 10:16) Wala sila pilia sa Diyos nga maghari sa langit uban ni Jesus. Hinuon, ang Bibliya nag-ingon nga sila may paglaom nga mabuhi sa walay kataposan sa yuta. Mao ba nay imong paglaom?

¹⁴ Bisan karon, nadawat na nimo ang pipila ka benepisyo nga nabatonan sa mga dinihogan. Pinaagi sa imong pagtuo sa giula nga dugo ni Jesus, makapangayo kag kapasayloan sa imong mga sala. Ingong resulta, mabatonan nimo ang pag-uyon sa Diyos ug ang maayong konsensiya. (Efe. 1:7; Pin. 7:14, 15) Hunahunaa sab ang mga panalangin nga imong natagamtam kay napahigawas na ka sa dili Kasulatanhong mga pagtulon-an. Si Jesus miingon: “Kamo mahibalo sa kamatuoran, ug ang kamatuoran magpahigawas kaninyo.” (Juan 8:32) Makapalipay gyod nâ nga kagawasan!

15. Unsang kagawasan ug mga panalangin ang atong madahom sa umaabot?

¹⁵ Makadahom ka ug mas labawng kagawasan sa umaabot. Sa dili madugay, laglagon ni Jesus ang tanang bakak nga relihiyon ug ang daotang pagmando sa tawo. Panalipdan sa Diyos ang “usa ka dakong panon” nga nag-alagad kaniya, ug iyang ipatagamtam kanila ang  mga panalangin sa paraisong yuta. (Pin. 7:9, 14) Daghan kaayo ang banhawon ug hatagag kahigayonan nga mahigawas sa tanang epekto sa sala ni Adan.​—Buh. 24:15.

16. Unsang nindot kaayong kagawasan ang madawat sa mga tawo sa umaabot?

¹⁶ Panahon sa Usa ka Libo ka Tuig nga Pagmando, tabangan ni Jesus ug sa iyang kaubang mga magmamando ang katawhan nga mahimong hingpit sa pisikal ug espirituwal. Kini nga panahon sa pagpasig-uli ug sa kagawasan mahisama sa tuig sa Pagsadya sa Israel. Ang tanang maunongong alagad ni Jehova mahimo na unyang hingpit, walay sala.

17. Unsay gitagna sa Isaias 65:21-23 bahin sa katawhan sa Diyos? (Tan-awa ang hulagway sa atubangan sa magasin.)

¹⁷ Ang kinabuhi sa yuta nianang panahona gitagna sa Isaias 65:21-23. (Basaha.) Kini nga kinabuhi wala magpasabot nga wala na tay buhaton. Hinuon, gipakita sa Bibliya nga ang katawhan sa Diyos duna unyay mapuslanon ug makapatagbawng buluhaton. Inigkatapos sa Usa ka Libo ka Tuig nga Pagmando, makaseguro ta nga “ang kalalangan ipagawas sab gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”​—Roma 8:21.

18. Nganong makasalig ta nga duna tay makapalipayng kaugmaon?

¹⁸ Sama nga si Jehova mihimog kahikayan aron dunay panahon ang mga Israelinhon sa pagtrabaho ug sa pagpahulay, mao pod nay iyang himoon sa iyang katawhan sa Usa ka Libo ka Tuig nga Pagmando sa Kristo. Segurado nga duna unyay panahon para sa espirituwal nga mga kalihokan. Ang pagsimba sa Diyos gikinahanglan aron magmalipayon ta karon, ug sa bag-ong kalibotan duna tay panahon para niana. Oo, ang tanang may pagtuo magmalipayon panahon sa Usa ka Libo ka Tuig nga Pagmando sa Kristo kay kitang tanan duna unyay makapatagbawng buluhaton ug espirituwal nga kalihokan.