Matubag ba nimo kining mga pangutanaha base sa Ang Bantayanang Torre sa 2019?

Unsay kahulogan niini nga saad sa Diyos: “Walay hinagiban nga gibuhat batok kanimo ang magmalamposon”? (Isa. 54:17)

Makasalig ta nga proteksiyonan ta sa Diyos batok sa mga puwersa nga malaglagon sama sa “huros sa mga malupigon.” (Isa. 25:4, 5) Ang atong mga kaaway dili gyod makahimog permanenteng kadaot kanato.​—w19.01, p. 6-7.

Sa unsang paagi ang pagpakiglabot sa Diyos ngadto sa mga Canaanhon ug sa masinupakong mga Israelinhon nagpakita sa iyang hustisya?

Gihukman sa Diyos kadtong naghimog makaluod nga seksuwal nga mga buhat o kadtong nagmaltratar sa mga babaye ug mga bata. Gipanalanginan niya ang mga tawo nga masinugtanon kaniya ug patas nga nagtratar sa uban.​—w19.02, p. 22-23.

Unsay atong himoon kon presente ta dihang mag-ampo ang dili magtutuo?

Puwede tang maghilom lang ug magmatinahoron pero dili ta mosultig “amen” o makiggunitay. Sa hilom, puwede tang mohimog kaugalingong pag-ampo.​—w19.03, p. 31.

Unsa ka seryoso ang pag-abuso ug bata?

Ang pag-abuso ug bata maoy sala batok sa biktima, kongregasyon, sekular nga awtoridad, ug sa Diyos. Sa mga dapit diin dunay balaod nga isumbong sa awtoridad kon may giakusahag pag-abuso, ang mga ansiyano mosunod niana.​—w19.05, p. 9-10.

Sa unsang paagi imong mabag-o o mapauswag ang imong panghunahuna?

Kini ang importanteng mga lakang: Pag-ampo kang Jehova. Pamalandong, nga ang tumong mao ang pagsusi sa kaugalingon. Piliag maayo ang imong mga higala.​—w19.06, p. 11.

Unsay atong mahimo karon aron makapangandam sa paglutos?

Kinahanglang mas makigsuod ta kang Jehova. Magmasaligon nga siya nahigugma nato ug dili gyod motalikod kanato. Basaha ang Bibliya kada adlaw, ug pag-ampo kanunay. Magmasaligon nga ang tanang panalangin sa Gingharian matuman gayod. Memoryaha ang imong paboritong mga teksto ug awit sa pagdayeg.​—w19.07, p. 2-4.

Unsay atong mahimo sa pagtabang sa atong pamilya nga maluwas?

Importante nga magpakita tag empatiya, maayong ehemplo, pailob, ug pagkamaayo.​—w19.08, p. 15-17.

Giunsa ta pagpalagsik, ingon sa gisaad ni Jesus sa Mateo 11:28?

Duna tay mahigugmaon nga Kristohanong mga tigdumala, pinakamaayong mga higala, ug pinakamaayong buluhaton.​—w19.09, p. 23.

Sa unsang paagi ang Diyos makahatag nato sa tinguha ug kusog sa pagbuhat sa iyang gusto? (Filip. 2:13)

Samtang magbasa ta sa Pulong sa Diyos ug mamalandong niini, ang Diyos makapalig-on nato, nga maghatag nato sa tinguha ug kusog nga buhaton ang iyang gusto. Ang iyang espiritu makapauswag sa atong mga katakos.​—w19.10, p. 21.

Unsang maalamong mga lakang ang angay natong himoon sa dili pa mohimog seryosong desisyon?

Mao ni ang lima ka lakang: Pag-research pag-ayo. Pag-ampo alang sa kaalam. Analisaha ang imong mga motibo. Magmaespesipiko. Magmarealistiko.​—w19.11, p. 27-29.

Ang gisulti ba ni Satanas kang Eva maoy sinugdanan sa ideya nga ang kalag dili mamatay?

Dayag nga dili. Si Satanas wala mag-ingon nga lawas ra ni Eva ang mamatay. Hinuon, ang iyang giingon mao nga si Eva dili mamatay. Ang tanang bakak nga relihiyosong ideya nahanaw dihang miabot ang Lunop. Busa, ang pagtulon-an bahin sa kalag nga dili mamatay lagmit mitungha una pa ipatibulaag sa Diyos ang mga tawo nga nagtukod sa torre sa Babel.​—w19.12, p. 15.