1-2. Unsay atong hisgotan niining artikuloha?

USAHAY, maghunahuna tingali ta nga ang kinabuhi mubo ra ug “punog kasakit.” (Job 14:1) Maong may mga higayon nga mobati tag kaluya sa buot. Daghang alagad ni Jehova kaniadto ang mibatig sama niana. Ang uban gusto pa ganing mamatay. (1 Hari 19:2-4; Job 3:1-3, 11; 7:15, 16) Pero si Jehova​—ang Diyos nga ilang gisaligan—​kanunayng naghupay ug nagpalig-on kanila. Ang ilang mga kasinatian gisulat aron sa paghupay ug pagtudlo kanato.​—Roma 15:4.

² Niining artikuloha, atong hisgotan ang pipila ka alagad ni Jehova nga nakalahutay sa mga kalisdanan nga makapaluya sa buot. Sila si Jose nga anak ni Jacob, ang biyudang si Noemi ug ang iyang umagad nga si Ruth, ang Levihanon nga nagsulat sa Salmo 73, ug si apostol Pedro. Giunsa sila pagpalig-on ni Jehova ug unsay atong makat-onan sa ilang mga kasinatian? Ang mga tubag niana magpasalig kanato nga “si Jehova duol niadtong mga dugmok ug kasingkasing,” ug “iyang luwason kadtong mga naluya ang buot.”​—Sal. 34:18.

3-4. Unsay nahitabo kang Jose sa batan-on pa siya?

³ Si Jose mga 17 anyos dihang nagdamgo siyag duha ka damgo, nga parehong gikan sa Diyos. Kini nga mga damgo nagpakita nga moabot ang adlaw nga si Jose mahimong tinahod diha sa iyang pamilya. (Gen. 37:5-10) Pero wala madugay human magdamgo si Jose, kalit nga nausab ang iyang kinabuhi. Imbes tahoron siya, ang iyang mga igsoon nagbaligya kaniya ingong ulipon. Ngadtongadto, nahimo siyang ulipon sa usa ka Ehiptohanong opisyal nga si Potipar. (Gen. 37:21-28) Sa mubo nga panahon, nausab pag-ayo ang kinabuhi ni Jose, gikan sa usa ka  anak nga pinangga sa amahan ngadto sa usa ka ubos nga ulipon sa paganong opisyal sa palasyo sa Ehipto.​—Gen. 39:1.

⁴ Misamot pa ang mga problema ni Jose. Ang asawa ni Potipar nag-akusar kang Jose nga gisulayan kuno siyag lugos niini. Pero wala susiha ni Potipar kon unsay tinuod nga nahitabo. Iya hinuong gipabilanggo si Jose, ug didto gikadenahan kini. (Gen. 39:14-20; Sal. 105:17, 18) Imadyina ang gibati sa batan-ong si Jose dihang giakusahan siya nga misulay pagpanglugos. Ug hunahunaa ang pasipala nga posibleng gipahinabo niana sa ngalan ni Jehova. May rason gyod si Jose nga mobatig kaluya.

5. Unsay gibuhat ni Jose aron dili siya mobatig grabeng kaluya?

⁵ Sa dihang si Jose naulipon ug sa ulahi napriso, wala kaayo siyay mahimo aron mausab ang iyang kahimtang. Unsay nakatabang niya sa pagpabiling positibo? Imbes magpokus sa kon unsay dili niya mahimo, gihimo niya ang iyang maarangan sa gipabuhat kaniya. Labaw sa tanan, kanunayng giisip ni Jose si Jehova ingong labing importanteng Persona sa iyang kinabuhi. Tungod niana, gipanalanginan ni Jehova ang tanang gibuhat ni Jose.​—Gen. 39:21-23.

6. Sa unsang paagi tingali nakapahupay kang Jose ang iyang mga damgo?

⁶ Posibleng nadasig si Jose sa paghunahuna sa iyang mga damgo kaniadto. Gipaila sa maong mga damgo nga makita niya pag-usab ang iyang pamilya ug mausab ang iyang kahimtang. Ug mao gyod nay nahitabo. Sa dihang si Jose mga 37 anyos na, ang iyang mga damgo anam-anam nga natuman sa talagsaong paagi!​—Gen. 37:7, 9, 10; 42:6, 9.

7. Sumala sa 1 Pedro 5:10, unsay makatabang nato sa paglahutay sa mga kalisdanan?

⁷ Ang atong makat-onan. Ang nahitabo kang Jose nagpahinumdom kanato nga niining kalibotana, makasinati tag inhustisya. Basin mapasakitan pa gani ta sa mga igsoon.  Pero kon isipon nato si Jehova ingong atong Bato, o Dangpanan, dili ta maluya pag-ayo o mohunong sa pag-alagad kaniya. (Sal. 62:6, 7; basaha ang 1 Pedro 5:10.) Hinumdomi sab nga si Jose mga 17 anyos tingali dihang gipakitaan siya ni Jehova ug espesyal nga pagtagad. Busa si Jehova may pagsalig sa iyang batan-ong mga alagad. Karon, daghang batan-on ang sama kang Jose. Sila may pagtuo sab kang Jehova. Ang pipila kanila gipriso pa gani kay wala nila ikompromiso ang ilang pagkamaunongon sa Diyos.​—Sal. 110:3.

8. Unsay nahitabo kang Noemi ug Ruth?

⁸ Tungod sa grabeng gutom, si Noemi ug ang iyang pamilya mibiya sa ilang pinuy-anan sa Juda ug mipuyo sa Moab ingong mga langyaw. Didto, ang bana ni Noemi nga si Elimelek namatay, ug nabinlan siyag duha ka anak nga lalaki. Sa ulahi, ang iyang mga anak naminyog Moabihanong mga babaye, si Ruth ug Orpa. Mga 10 ka tuig sa ulahi, ang mga anak ni Noemi nangamatay sab, ug wala silay mga anak. (Ruth 1:1-5) Imadyina ang kaguol niining tulo ka babaye! Siyempre, si Ruth ug Orpa puwedeng magminyo pag-usab. Pero kinsa may mag-atiman sa tigulang nga si Noemi? Naguol pag-ayo si Noemi nga dihay higayon nga siya nakaingon: “Ayaw ko tawgag Noemi. Tawga kog Mara, kay gitugot sa Labing Gamhanan nga mahimong pait kaayo ang akong kinabuhi.” Human niining makapaguol nga mga panghitabo, si Noemi nakadesisyon nga mobalik sa Betlehem, ug si Ruth miuban kaniya.​—Ruth 1:7, 18-20.

9. Sumala sa Ruth 1:16, 17, 22, sa unsang paagi gidasig ni Ruth si Noemi?

⁹ Unsay nakatabang kang Noemi? Ang maunongong gugma. Pananglitan, si Ruth nagpakitag maunongong gugma kang Noemi kay wala siya mobiya kaniya. (Basaha ang Ruth 1:16, 17, 22.) Sa Betlehem, naghago pag-ayo si Ruth sa pagpanghagdaw ug sebada para kaniya ug kang Noemi. Tungod niana, nakita sa tanan nga si Ruth buotan ug kugihan nga babaye.​—Ruth 3:11; 4:15.

10. Sa unsang paagi gipakita ni Jehova ang iyang gugma sa mga pobre sama kang Noemi ug Ruth?

¹⁰ Si Jehova naghatag sa mga Israelinhon ug balaod nga nagpakita sa iyang gugma sa mga pobre sama kang Noemi ug Ruth. Iyang giingnan ang iyang katawhan nga dihang mag-ani sila, dili nila hutdon ug ani ang daplin sa ilang uma aron dunay mahagdaw ang mga pobre. (Lev. 19:9, 10) Busa si Noemi ug Ruth dili kinahanglang magpakilimos ug pagkaon. Makakuha silag pagkaon nga dili ra maulawan.

11-12. Sa unsang paagi napalipay ni Boaz si Noemi ug Ruth?

¹¹ Ang tag-iya sa uma nga ginahagdawan ni Ruth mao ang datong tawo nga si Boaz. Naapresyar kaayo niya ang pagkamaunongon ug gugma ni Ruth kang Noemi, mao nga iyang gipalit ang panulondon sa pamilya ni Noemi ug gipangasawa si Ruth. (Ruth 4:9-13) Nakabaton silag anak, si Obed, kinsa nahimong lolo ni Haring David.​—Ruth 4:17.

¹² Imadyina ang kalipay ni Noemi dihang gikugos niya ang gamayng bata nga si Obed ug gipasalamatan si Jehova! Pero mas magmalipayon pa gyod si Noemi ug Ruth dihang mabanhaw sila ug mahibaloan nila nga si Obed nahimong katigulangan sa Gisaad nga Mesiyas, si Jesu-Kristo!

13. Unsay atong makat-onan sa kasinatian ni Noemi ug Ruth?

¹³ Ang atong makat-onan. Dihang makasinati tag mga kalisdanan, basin maluya ta, maguol pa gani kaayo. Tingali maghunahuna ta nga dili na gyod masulbad ang atong mga problema. Nianang mga panahona, kinahanglan nga bug-os tang mosalig sa atong langitnong Amahan ug magpabiling suod sa mga igsoon.  Siyempre, dili tingali wad-on ni Jehova ang atong problema. Pananglitan, wala niya banhawa ang bana ug mga anak ni Noemi. Pero tabangan ta niyang makalahutay, tingali pinaagi sa maunongong gugma nga gipakita sa mga igsoon.​—Prov. 17:17.

14. Nganong naluya pag-ayo ang usa ka Levihanon?

¹⁴ Usa ka Levihanon ang nagsulat sa Salmo 73. Busa, duna siyay talagsaong pribilehiyo nga mag-alagad diha sa dapit sa pagsimba kang Jehova. Pero dihay higayon nga naluya siya pag-ayo. Ngano? Nasina siya sa mga daotan ug sa mga mapahitas-on, dili tungod kay gusto niyang mohimog daotan, kondili tungod kay morag mas maayo ang ilang kinabuhi. (Sal. 73:2-9, 11-14) Morag naa nila ang tanan​—kuwarta, maayong kinabuhi, ug walay mga kabalaka. Tungod kay morag malamposon kaayo ang ilang kinabuhi, naluya pag-ayo ang salmista nga siya nakaingon: “Kawang lang nga gihuptan nakong putli ang akong kasingkasing ug gihunawan nako ang akong mga kamot aron ipaila nga wala koy sala.” Klaro, nameligro gyod ang iyang espirituwalidad.

15. Sumala sa Salmo 73:16-19, 22-25, unsay gihimo sa Levihanon nga nagsulat niini nga salmo aron dili na siya maluya?

¹⁵ Basaha ang Salmo 73:16-19, 22-25. Ang Levihanon “misulod . . . sa dakong sangtuwaryo sa Diyos.” Didto, tingali uban sa iyang mga isigkamagsisimba, kalmado niyang napamalandong ang iyang situwasyon, nahunahuna kini pag-ayo, ug giampo kini kang Jehova. Tungod niana, nakita niya nga dili maalamon ang iyang panghunahuna ug hapit na siyang mahilayo kang Jehova. Nakaamgo pod siya nga ang mga daotan naa sa “danlog nga dapit” ug modangat sa ilang “makalilisang nga kataposan.” Aron dili na siya masina ug maluya, kinahanglang sundogon sa Levihanong salmista ang panglantaw ni Jehova. Dihang iya ning gihimo, wala na siya matugaw, ug malipayon na siya. Siya miingon: “Gawas [kang Jehova], wala na koy gitinguha sa yuta.”

16. Unsay atong makat-onan sa usa ka Levihanon?

¹⁶ Ang atong makat-onan. Dili gyod ta angayng masina sa mga daotan nga morag  malamposon sa kinabuhi. Ang ilang kalipay dili tinuod ug temporaryo lang; wala silay dumalayong kaugmaon. (Eccl. 8:12, 13) Kon masina ta nila, maluya ta, ug basig madaot pa gani ang atong relasyon kang Jehova. Busa kon masina ka sa morag malamposon nga kinabuhi sa mga daotan, buhata ang gihimo sa Levihanon. Sunda ang mahigugmaong tambag sa Diyos ug pakig-uban niadtong nagabuhat sa kabubut-on ni Jehova. Kon higugmaon nimo si Jehova labaw kay sa bisan unsa, mabatonan nimo ang tinuod nga kalipay. Ug makapabilin ka sa dalan padulong sa “tinuod nga kinabuhi.”​—1 Tim. 6:19.

17. Unsay mga rason kon nganong naluya si Pedro?

¹⁷ Si apostol Pedro dasig nga tawo, pero dihay mga higayon nga siya nakasulti o nakahimog mga butang nga wala hunahunaa, ug iya ning gibasolan sa ulahi. Pananglitan, dihang gisultihan ni Jesus ang iyang mga apostoles nga siya mag-antos ug mamatay, gibadlong siya ni Pedro ug giingnan: “Dili gayod kana mahitabo kanimo.” (Mat. 16:21-23) Gitul-id ni Jesus si Pedro. Dihang may mga tawo nga miabot aron dakpon si Jesus, milihok dayon si Pedro ug iyang gitigbas ang dalunggan sa ulipon sa hataas nga saserdote. (Juan 18:10, 11) Gitul-id na sab ni Jesus si Pedro. Dugang pa, nanghambog si Pedro nga bisan pag ang ubang apostoles mobiya sa Kristo, dili gyod nâ niya himoon! (Mat. 26:33) Pero sobrag pagsalig si Pedro sa iyang kaugalingon. Wala madugay nianang gabhiona, nahadlok siya pag-ayo ug iyang gilimod ang iyang Agalon sa tulo ka higayon. Tungod sa grabeng kaguol, si Pedro “migawas ug mihilak pag-ayo.” (Mat. 26:69-75) Tingali naghunahuna siya kon mapasaylo pa ba siya ni Jesus.

18. Sa unsang paagi gitabangan ni Jesus si Pedro nga dili na maluya?

¹⁸ Pero wala tugoti ni Pedro nga maluya siya pag-ayo ug moundang na sa pag-alagad kang Jehova. Bisag nasipyat, naningkamot siya nga  mahibalik ang iyang kadasig, ug sa ulahi kauban na sab siya sa ubang apostoles. (Juan 21:1-3; Buh. 1:15, 16) Unsay nakatabang niya? Si Jesus daan nang nag-ampo nga unta ang pagtuo ni Pedro dili moangka, ug gidasig ni Jesus si Pedro nga mobalik ug palig-onon ang iyang mga igsoon. Gitubag ni Jehova ang maong kinasingkasing nga pag-ampo. Sa ulahi, nagpakita si Jesus kang Pedro, tingali aron sa pagdasig kaniya. (Luc. 22:32; 24:33, 34; 1 Cor. 15:5) Nagpakita sab si Jesus sa tanang apostoles human sila mangisda sa tibuok gabii nga walay kuha. Niining panahona, gihatagan ni Jesus si Pedro ug kahigayonan nga ipahayag ang iyang gugma Kaniya. Gipasaylo ni Jesus ang iyang minahal nga higala ug gihatagan siyag dugang buluhaton.​—Juan 21:15-17.

19. Unsay atong makat-onan sa Salmo 103:13, 14 bahin sa panglantaw ni Jehova kanato dihang makasala ta?

¹⁹ Ang atong makat-onan. Ang pagtratar ni Jesus kang Pedro nagpakita nga si Jesus maluluy-on kaayo, sama sa iyang Amahan. Busa kon masayop ta, dili ta angayng maghunahuna nga dili na gyod ta pasayloon ni Jehova. Angay natong hinumdoman nga mao nay gusto ni Satanas nga atong hunahunaon. Hinunoa, maningkamot ta nga lantawon ang atong kaugalingon​—ug kadtong nakasala kanato—​sama sa panglantaw sa atong maluluy-on ug mahigugmaon nga langitnong Amahan.​—Basaha ang Salmo 103:13, 14.

20. Unsay atong hisgotan sa sunod nga artikulo?

²⁰ Ang kasinatian ni Jose, Noemi ug Ruth, sa Levihanon, ug ni Pedro nagpasalig nato nga “si Jehova duol niadtong mga dugmok ug kasingkasing.” (Sal. 34:18) Usahay, tugotan niya nga makasinati tag mga kalisdanan ug mobatig kaluya sa buot. Bisan pa niana, kon kita molahutay sa mga kalisdanan sa tabang ni Jehova, ang atong pagtuo molig-on. (1 Ped. 1:6, 7) Sa sunod nga artikulo, mahibaloan pa nato kon sa unsang paagi si Jehova nagtabang sa iyang maunongong mga alagad nga naluya, tingali tungod sa mga kahuyangan o sa lisod nga mga kahimtang.