Nabasa ba nimog maayo ang mga isyu sa Ang Bantayanang Torre niining tuiga? Sulayi kon makatubag ka sa mosunod nga mga pangutana:

Unsaon nato pagtratar ang dinihogang mga Kristohanon?

Giapresyar nato ang ilang pagtuo, pero dili nato sila hatagan ug sobrang atensiyon. Likayan nato ang ‘pagdayeg ug mga personalidad.’ (Jud. 16, footnote) Dili ta mangutana nilag personal nga mga butang bahin sa ilang paglaom.​—w20.01, p. 29.

Nganong makatuo ka nga personal kang nailhan ni Jehova?

Gipadayag sa Bibliya nga nakita na ka niya bisan sa wala pa ka matawo. Ug naminaw siya sa imong mga pag-ampo. Nahibalo siya kon unsay naa sa imong hunahuna ug kasingkasing, ug ang imong paggawi makaapektar kaniya. (1 Cron. 28:9; Prov. 27:11) Gikabig ka niya.​—w20.02, p. 12.

Unsay pipila ka pananglitan kon kanus-a ta angayng mosulti ug kon kanus-a ta angayng maghilom?

Malipayon tang mosulti bahin kang Jehova. Mosulti ta dihang makita nato nga dunay ginahimo ang usa nga moresulta sa seryosong sala. Ang mga ansiyano mosulti aron sa paghatag ug tambag kon gikinahanglan. Dili ta mosulti aron mangayo (o mohatag) ug mga detalye bahin sa atong buluhaton diha sa mga lugar nga kini gidili. Dili nato isulti ang kompidensiyal nga mga butang.​—w20.03, p. 20-21.

Sa unsang paagi ang mga dulon sa Joel kapitulo 2 lahi sa mga dulon sa Pinadayag kapitulo 9?

Ang Joel 2:20-29 nag-ingon nga ipahilayo, o abogon, sa Diyos ang mga dulon ug siya nagsaad nga iyang ibalik ang nawala tungod sa pag-atake niini. Human niana, ibubo sa Diyos ang iyang espiritu. Natuman kana dihang gisulong sa Babilonya ang Israel ug natuman sab kana sa ulahi. Sa Pinadayag 9:1-11, ang mga dinihogan sa atong panahon gipakasama sa mga dulon samtang ilang gipahayag ang mga paghukom sa Diyos batok niining daotang sistema, nga nagpahinabog grabeng kasakit sa mga nagsuportar niini nga sistema.​—w20.04, p. 3-6.

Kinsa ang hari sa amihanan karon?

Ang Russia ug ang mga kaalyado niini. Sila direktang nakiglabot sa katawhan sa Diyos, nga nagdili sa buluhatong pagsangyaw ug nagdumot sa mga Saksi. Ang hari sa amihanan nakigkompetensiya sa hari sa habagatan.​—w20.05, p. 12-13.

Ang siyam ba ka hiyas nga gihisgotan sa Galacia 5:22, 23 mao ra ang mga bahin sa “bunga sa espiritu”?

Dili. Ang balaang espiritu motabang nato sa pag-ugmad sa ubang maayong hiyas, sama sa pagkamatarong. (Efe. 5:8, 9)​—w20.06, p. 17.

Unsay usa ka kapeligrohan sa pag-post ug impormasyon online bahin sa imong kaugalingon?

Ang imong gi-post basin maghatag ug impresyon nga hambogiro ka, dili mapainubsanon.​—w20.07, p. 6-7.

Unsay makat-onan sa Kristohanong mga ministro sa hanas nga mga mangingisda?

Ang mga mangingisda mangisda kon asa ug kanus-a sila makakitag isda. Nabansay sila sa paggamit sa saktong galamiton. Ug maisogon silang mangisda bisag mag-usab-usab ang kahimtang. Mahimo sab nato nâ sa atong ministeryo.​—w20.09, p. 5.

Unsa ang pipila ka paagi nga matabangan nato ang atong mga Bible study nga molawom ang ilang gugma kang Jehova?

Puwede nato silang dasigon sa pagbasa sa Bibliya adlaw-adlaw ug sa pagpamalandong sa ilang nabasa. Puwede pod nato silang tudloan kon unsaon pag-ampo.​—w20.11, p. 4.

Kinsay apil sa giingon: “Diha sa Kristo ang tanan pagabuhion”?​—1 Cor. 15:22.

Si apostol Pablo wala mag-ingon nga ang tanang tawo banhawon. Siya nagtumong sa dinihogang mga Kristohanon kinsa “nabalaan ug nahiusa kang Kristo Jesus.” (1 Cor. 1:2; 15:18)​—w20.12, p. 5-6.

Unsay buhaton sa mga dinihogan human sila ‘mausab sa pagpamilok sa mata, panahon sa kataposang trompeta’?​—1 Cor. 15:51-53.

Sila motabang sa Kristo sa pagbantay sa katawhan pinaagig bunal nga puthaw. (Pin. 2:26, 27)​—w20.12, p. 12-13.