1. Unsay mahitabo kanato kon maluya ta?

KADA adlaw, duna tay mga problema, ug naningkamot ta nga malamposon kanang maatubang. Pero lisod atubangon ang atong mga problema dihang luya ta. Busa kinahanglan natong isipon ang kaluya ingong kawatan, nga magkuha sa atong pagsalig, kaisog, ug kalipay. Ang Proverbio 24:10 ug ang footnote niini nag-ingon: “Kon maluya ka panahon sa kalisdanan, modiyutay ang imong kusog.” Oo, kon maluya ta, mawad-an tag kusog ug malisdan ta sa pag-atubang sa atong mga problema.

2. Unsay makapaluya nato, ug unsay atong hisgotan niining artikuloha?

² Daghag rason kon nganong maluya ta​—usahay tungod sa atong kaugalingon, usahay tungod sa uban. Apil tingali niana ang atong kasaypanan, kahuyangan, ug dili maayong panglawas. O maluya tingali ta kay wala ihatag kanato ang asaynment nga gusto natong madawat diha sa pag-alagad kang Jehova, o kay ang kadaghanan sa mga tawo sa atong teritoryo dili maminaw sa mensahe nga atong gisangyaw. Niining artikuloha, atong hisgotan ang pipila ka butang nga atong mahimo aron mawala ang atong gibati nga kaluya.

3. Unsay makatabang nato aron dili ta sobrang maguol tungod sa atong kasaypanan?

³ Dali ra kaayo tang mobatig sobrang kaguol tungod sa atong kasaypanan ug kahuyangan. Busa, maghunahuna tingali ta nga tungod sa atong kasaypanan, dili na ta papuy-on ni Jehova sa Paraiso. Peligroso ang maong panghunahuna. Unsay angay natong panglantaw sa atong kasaypanan? Gipakita sa Bibliya nga gawas kang Jesu-Kristo, ang tanang tawo “nakasala.” (Roma 3:23) Pero ang Awtor sa Bibliya dili magpokus sa atong kasaypanan o magdahom ug kahingpitan. Hinuon, siya usa ka mahigugmaong  Amahan nga gustong motabang nato. Mapailobon sab siya. Nakita niya ang atong mga paningkamot nga madaog ang atong kahuyangan ug ang atong sobrang kaguol tungod sa atong kasaypanan, ug andam siyang motabang kanato.​—Roma 7:18, 19.

4-5. Base sa 1 Juan 3:19, 20, unsay nakatabang sa duha ka sister nga dili madaog sa ilang kaluya?

⁴ Tagda ang pananglitan ni Deborah ug Maria. * Sa bata pa si Deborah, wala siya pakitaig pagmahal sa iyang pamilya, ug ubos ang ilang panglantaw kaniya. Talagsa ra kaayo siyang komendahan. Busa negatibo siyag panglantaw sa iyang kaugalingon. Bisag gamayng sayop lang ang iyang mahimo, mobati siya nga wâ na gyod siyay nahimong maayo. Mao pod nay problema ni Maria. Ang iyang pamilya ubos ug panglantaw kaniya. Tungod niana, mibati siyang walay pulos. Bisan dihang nabawtismohan na siya, mibati siyang dili takos nga magdala sa ngalan sa Diyos.

⁵ Pero kining duha ka sister wala mohunong sa pag-alagad kang Jehova. Ngano? Kay ilang gitugyan ang ilang palas-anon kang Jehova pinaagi sa kinasingkasing nga pag-ampo. (Sal. 55:22) Ilang nakat-onan nga ang atong mahigugmaong langitnong Amahan nahibalo sa epekto sa atong dili maayong mga kasinatian ug negatibong panghunahuna. Pero nakita pod niya ang atong maayong mga hiyas​—mga hiyas nga tingali wala nato makita sa atong kaugalingon.​—Basaha ang 1 Juan 3:19, 20.

6. Unsa tingali bation sa usa dihang mahimo na pod niya ang mao ra gihapon nga sayop?

⁶ Ang usa nga naningkamot nga mahunong ang daotang buhat tingali makahimo na pod sa mao ra gihapon nga sayop ug madismayar sa iyang kaugalingon. Siyempre, natural lang nga makonsensiya ta dihang makasala. (2 Cor. 7:10) Pero dili ta angayng mobati ug sobrang pagkakonsensiya ug hukman ang kaugalingon, nga maghunahuna: ‘Pakyas gyod ko. Di na gyod ko mapasaylo ni Jehova.’ Dili kana maayo nga panghunahuna, ug basin makapahunong na hinuon nâ kanato sa pag-alagad kang Jehova. Hinumdomi ang giingon sa Proverbio 24:10​—modiyutay ang atong kusog dihang maluya ta. Busa “husayon nato ang mga butang” uban kang Jehova pinaagi sa pag-ampo ug pagpangayog pasaylo kaniya. (Isa. 1:18) Dihang makita ni Jehova nga naghinulsol gyod ka, pasayloon ka niya. Dugang pa, duol sa mga ansiyano. Mapailobon ka nilang tabangan aron maulian ka sa espirituwal.​—Sant. 5:14, 15.

7. Nganong dili ta angayng maluya kon naningkamot tang mohimo sa kon unsay husto?

⁷ Si Jean-Luc, ansiyano nga taga-France, moingon niadtong naningkamot nga madaog ang ilang kahuyangan: “Ang matarong nga tawo sa  panglantaw ni Jehova, dili kadtong di gyod makasala, kondili kadtong nagbasol sa iyang kasaypanan ug naningkamot nga magbag-o.” (Roma 7:21-25) Busa kon naningkamot ka nga madaog ang usa ka kahuyangan, ayaw paghunahuna nga wala kay pulos. Hinumdomi nga walay usa kanato ang makabaton ug matarong nga baroganan atubangan sa Diyos sa kaugalingon lang natong paningkamot. Kitang tanan nagkinahanglan sa dili hitupngang pagkamaayo sa Diyos pinaagi sa lukat.​—Efe. 1:7; 1 Juan 4:10.

8. Dihang maluya ta, kang kinsa ta makapangayog tabang?

⁸ Makaduol ta sa mga igsoon​—sa atong espirituwal nga pamilya—​kinsa makadasig kanato! Maminaw sila dihang nagkinahanglan tag kaestorya, ug makadasig sila kanato. (Prov. 12:25; 1 Tes. 5:14) Si Joy, sister nga taga-Nigeria nga naningkamot nga madaog ang kaluya sa buot, miingon: “Mag-unsa na lang kaha ko kon wala pa ang mga igsoon? Ang pagdasig nga akong nadawat sa mga igsoon nagpakita nga gitubag ni Jehova ang akong mga pag-ampo. Nakakat-on pa gani ko nila kon unsaon pagdasig kadtong mga naluya.” Pero kinahanglan natong hinumdoman nga dili sa tanang higayon nga mahibaloan sa atong mga igsoon nga nagkinahanglan tag pagdasig. Busa kinahanglan tingali nga kitay mounag duol sa usa ka hamtong nga igsoon ug sultihan siya nga nagkinahanglan tag tabang.

9. Sa unsang paagi makadasig nato ang Salmo 41:3 ug 94:19?

⁹ Pangayog tabang kang Jehova. Kon dili maayo ang atong paminaw, ug ilabina kon dugay na tang nag-antos sa usa ka sakit, lisod tingaling magpabiling positibo. Bisag dili ta ayohon ni Jehova sa milagrosong paagi karon, iya tang hupayon ug hatagag kusog aron makalahutay. (Basaha ang Salmo 41:3; 94:19.) Pananglitan, palihokon tingali niya ang atong mga isigkamagtutuo sa pagtabang kanato sa atong mga buluhaton sa balay o sa pagpamalit. Mahimong palihokon niya ang mga igsoon sa pag-ampo uban kanato. O ipahinumdom niya kanato ang makapahupayng mga pulong sa Bibliya, sama sa nindot nga paglaom nga sa umaabot nga bag-ong kalibotan, makabaton tag hingpit nga kinabuhi nga walay balatian ug kasakit.​—Roma 15:4.

10. Unsay nakatabang kang Isang nga dili madaog sa kaluya human siya maaksidente?

¹⁰ Si Isang, nga taga-Nigeria, naaksidente ug tungod niana naparalisar siya. Giingnan siya sa iyang doktor nga dili na gyod siya makalakaw. “Nadugmok ang akong kasingkasing ug naluya ko,” miingon si Isang. Pero nagpadaog ba siya sa kaluya? Wala! Unsay nakatabang niya? “Kami sa akong asawa wala gyod mohunong sa pag-ampo kang Jehova ug sa pagtuon sa iyang Pulong,” mipatin-aw si Isang. “Naningkamot sab mi nga magmapasalamaton sa mga panalangin nga among nadawat, apil na ang among paglaom nga mabuhi sa bag-ong kalibotan sa Diyos.”

11. Sa unsang paagi nagpabiling malipayon si Cindy bisag nakasinati siyag grabeng sakit?

¹¹ Si Cindy, nga taga-Mexico, nadayagnos nga may sakit nga makamatay. Sa unsang paagi siya nakalahutay? Samtang didto siya sa ospital, gihimo niyang tumong nga naa siyay masangyawan kada adlaw. Siya misulat: “Nakatabang ni nako nga magpokus sa uban imbes sa operasyon, sa kon unsa ka sakit ang akong gibati, o sa kon unsa ka grabe ang akong balatian. Mao ni ang akong ginahimo: Dihang makig-estorya ko sa mga doktor o nars, komostahon nako ang ilang pamilya. Dayon, pangutan-on nako sila kon nganong gipili nila kining lisod nga trabaho. Human niana, dali rang mahibaloan kon unsang mga topiko ang makapainteres nila. Daghan kanila ang miingon nga talagsa ra nga  dunay pasyente nga mangomosta nila, ug daghan ang nagpasalamat nako kay naghunahuna ko nila. Ang uban mihatag pa gani sa ilang adres o numero sa telepono. Busa niining lisod nga yugto sa akong kinabuhi, gitabangan ko ni Jehova nga makalahutay. Ug bisan ako nasorpresa nga malipayon gihapon kaayo ko!”​—Prov. 15:15.

12-13. Sa unsang paagi ang pipila ka masakiton o tigulang nakasangyaw gihapon, ug unsay resulta?

¹² Ang mga masakiton o mga tigulang maluya tingali kay limitado na ang ilang mahimo sa ministeryo. Bisan pa niana, daghan ang nakakitag mga paagi sa pagsangyaw. Sa United States, ang sister nga si Laurel 37 ka tuig nga naghigda sulod sa iron lung, makina nga motabang niya sa pagginhawa. Siya may kanser sab, kadaghan maoperahi, ug may grabeng mga sakit sa panit. Pero kining grabe nga mga problema wala makapugong niya sa pagsangyaw. Gisangyawan niya ang mga nars ug ang uban pa nga mobisita sa iyang balay. Unsay resulta? Nakatabang siya ug labing menos 17 ka tawo nga makakat-on bahin sa Bibliya! *

¹³ Si Richard, usa ka ansiyano sa France, dunay praktikal nga sugyot para niadtong dili makabiya sa ilang balay o naa na lang sa nursing home. “Maayo kon magdispley silag mga libro ug magasin. Dihang makita ni sa mga tawo, posibleng mangutana sila ug masugdan ang panaghisgot. Makadasig ni sa atong minahal nga mga igsoon nga dili na makapamalaybalay.” Kadtong dili makabiya sa balay makasangyaw gihapon pinaagi sa sulat o telepono.

14. Unsang maayong ehemplo ang gihatag ni Haring David?

¹⁴ Tungod sa pangedaron, panglawas, o ubang hinungdan, dili tingali ihatag kanato ang usa ka asaynment o pribilehiyo diha sa kongregasyon o sirkito. Kon mao nay atong kahimtang, makakat-on ta kang Haring David. Dihang giingnan siya nga dili siya ang motukod sa templo sa Diyos​—butang nga gusto kaayo niyang himoon—​bug-os niyang gisuportahan ang gipili sa Diyos para sa maong asaynment. Daghan pa ganig giamot si David para sa maong proyekto. Maayo gyod siyang ehemplo para kanato!​—2 Sam. 7:12, 13; 1 Cron. 29:1, 3-5.

15. Sa unsang paagi gidaog ni Hugues ang kaluya?

¹⁵ Tungod sa mga problema sa panglawas, si Hugues, brader nga taga-France, miundang sa pagkaansiyano, ug dili na gani siya makahimo bisan sa simpleng mga buluhaton sa balay. Siya misulat: “Sa primero, naluya kaayo ko ug mibating way pulos. Pero sa ngadtongadto, nakita nako nga importanteng dawaton ang akong mga limitasyon. Ug nagmalipayon ko sa kon  unsay akong mahimo diha sa pag-alagad kang Jehova. Determinado ko nga dili mosurender. Sama kang Gideon ug sa iyang 300 ka sundalo​—nga ang tanan gipangkapoy—​magpadayon ko sa pagpakigbisog!”​—Maghu. 8:4.

16. Unsay atong makat-onan sa mga anghel?

¹⁶ Ang matinumanong mga anghel maoy maayong ehemplo. Panahon sa pagmando ni Haring Ahab, si Jehova nangayog sugyot sa mga anghel kon unsaon paghaylo ang daotang hari. Ang pipila ka anghel mihatag ug mga sugyot. Pero usa lang ka anghel ang gipili sa Diyos ug giingnan siya nga molampos ang iyang sugyot. (1 Hari 22:19-22) Naluya ba ang ubang matinumanong mga anghel, tingali naghunahuna, ‘Nganong nagkapoykapoy pa man kog sugyot?’ Siyempre wala nâ nila buhata. Ang mga anghel mapainubsanon kaayo ug gusto nilang ihatag kang Jehova ang tanang kadungganan.​—Maghu. 13:16-18; Pin. 19:10.

17. Unsay angay natong buhaton kon maluya ta kay wala nato madawat ang pipila ka pribilehiyo sa pag-alagad?

¹⁷ Hinumdomi nga ang atong kinadak-ang pribilehiyo mao ang pagdala sa ngalan sa Diyos ug ang pagsangyaw sa iyang Gingharian. Puwede tang makadawat ug pribilehiyo, puwede pod nang mawala kanato. Pero dili nâ maoy makapahimo natong bililhon sa Diyos, kondili ang atong pagkamapainubsanon. Kon mapainubsanon ta, mahalon ta ni Jehova ug sa mga igsoon. Busa hangyoa si Jehova nga tabangan ka sa pagpabiling mapainubsanon. Hunahunaa ang daghang maayong ehemplo sa pagkamapainubsanon nga narekord diha sa iyang Pulong. Magmaandam sa pag-alagad sa mga igsoon sa bisan unsang paagi nga imong maarangan.​—Sal. 138:6; 1 Ped. 5:5.

18-19. Sa unsang paagi magmalipayon ka sa imong ministeryo bisan pag ang mga tawo sa inyong teritoryo morag dili interesado?

¹⁸ May higayon ba nga naluya ka kay ang mga tawo sa inyong teritoryo morag dili interesado o kay kadaghanan sa mga balay walay tawo? Sa ingon ana nga mga kahimtang, unsay atong himoon aron magpabilin tang malipayon o mahimo pa ganing mas malipayon? Ang pipila ka praktikal nga mga sugyot makita diha sa kahong “Mga Paagi sa Pagpauswag sa Imong Ministeryo.” Importante sab nga mabatonan nato ang hustong panglantaw sa atong ministeryo. Unsay gipasabot niana?

 ¹⁹ Padayong magpokus diha sa pagsangyaw sa ngalan sa Diyos ug sa Gingharian. Si Jesus klarong miingon nga pipila lang ang mosubay sa dalan sa kinabuhi. (Mat. 7:13, 14) Sa dihang magsangyaw ta, pribilehiyo nga makauban nato sa buluhaton si Jehova, Jesus, ug ang mga anghel. (Mat. 28:19, 20; 1 Cor. 3:9; Pin. 14:6, 7) Ginakabig ni Jehova kadtong gustong moalagad niya. (Juan 6:44) Busa kon ang usa ka tawo dili maminaw sa atong mensahe niining higayona, basin sa sunod maminaw na siya.

20. Sa unsang paagi ang Jeremias 20:8, 9 makatabang nato aron madaog ang kaluya?

²⁰ Daghan tag makat-onan kang propetang Jeremias. Giasayn siya sa lisod kaayo nga teritoryo. Ang mga tawo nag-insulto ug nagyagayaga niya “sa tibuok adlaw.” (Basaha ang Jeremias 20:8, 9.) Dihay higayon nga naluya kaayo siya nga gusto na niyang mosurender. Pero wala nâ niya buhata. Ngano? Ang “pulong ni Jehova” nahisamag nagdilaab nga kalayo sa kasingkasing ni Jeremias, ug dili niya kini mapugngan! Mahisama ta niya kon atong pun-on ang atong hunahuna ug kasingkasing sa Pulong sa Diyos pinaagi sa pagtuon sa Bibliya kada adlaw ug pagpamalandong niana. Ingong resulta, madugangan ang atong kalipay, ug posible nga mas daghan ang maminaw kanato.​—Jer. 15:16.

21. Sa unsang paagi madaog nato ang kaluya sa buot bisag unsa pay hinungdan niana?

²¹ “Ang kaluya sa buot mahimong gamiton ni Satanas ingong hinagiban aron mosurender ta,” miingon si Deborah nga gihisgotan ganina. Pero ang mga hinagiban ni Satanas dili magsilbi kang Jehova nga Diyos. Busa dihang maluya ka tungod sa bisan unsang rason, pangayog tabang kang Jehova. Tabangan ka niya nga madaog ang imong kasaypanan ug kahuyangan. Suportahan ka niya dihang masakit ka. Tabangan ka niya nga makabaton ug balanseng panglantaw bahin sa mga pribilehiyo sa pag-alagad. Ug tabangan ka niya nga makabaton ug positibong panglantaw sa imong ministeryo. Dugang pa, pag-ampo sa imong langitnong Amahan ug isulti kaniya kon unsa gyoy imong gibati. Sa iyang tabang, madaog nimo ang kaluya sa buot.