Si Jehova nag-awhag sa mga Israelinhon nga mahimong balaang katawhan. Aron tabangan sila nga mahimong balaan, giingnan niya sila: “Ayaw pagsuroysuroy aron butangbutangan ang uban. Ayawg ipameligro ang kinabuhi sa imong isigkatawo. Ako si Jehova.”—Lev. 19:2, 16.

Ang orihinal nga Hebreohanong pulong nga gihubad dinhi ug “ipameligro” puwede pong hubaron ug “motindog batok.” Unsay gipasabot niini? Ang Jewish nga libro nga naghisgot bahin sa basahon sa Levitico nag-ingon: “Kining bahina sa bersikulo . . . dili sayon hubaron kay lisod mahibaloan kon unsay gipasabot sa Hebreohanong termino [nga gigamit dinhi], nga sa literal nagkahulogang ‘ayawg tindog ibabaw, tupad, duol.’”

Ang pipila ka eksperto sa Bibliya naghunahuna nga ang maong mga pulong konektado sa nag-unang bersikulo nga nag-ingon: “Kinahanglang walay inhustisya ang inyong paghukom. Ayaw ninyog dapigi ang pobre tungod lang kay pobre siya ug ayawg pabori ang dato. Kinahanglang matarong ang inyong paghukom sa inyong isigkatawo.” (Lev. 19:15) Kon mao, ang sugo diha sa bersikulo 16 nga dili “ipameligro” ang kinabuhi sa laing tawo mahimong magpasabot nga ang katawhan sa Diyos dili angayng mohimog bisan unsa nga makadaot sa laing tawo, diha man sa mga husay sa korte, diha sa negosyo, o sulod sa pamilya. Dili sab sila angayng manglimbong aron makabentaha. Siyempre, dili nato angayng buhaton ang maong mga butang, pero dunay mas maayong paagi sa pagsabot niana nga ekspresyon.

Konsideraha ang unang bahin nianang bersikuloha. Ang Diyos nagsugo sa iyang katawhan nga dili magsuroysuroy aron butangbutangan ang uban. Ang pagbutangbutang mas daotan kay sa pagtabitabi kay moresulta nig mas dakong kadaot. (Prov. 10:19; Eccl. 10:12-14; 1 Tim. 5:11-15; Sant. 3:6) Ang tigbutangbutang sagad tinuyong mosultig bakak aron daoton ang reputasyon sa lain. Tingali mohatag siyag bakak nga testimonya batok sa laing tawo, bisan pag ang paghimo niana magpameligro sa kinabuhi nianang tawhana. Hinumdomi nga dihay mga tigbutangbutang nga nagsultig bakak bahin kang Nabot, ug tungod niana siya gibato bisag walay sala. (1 Hari 21:8-13) Oo, ang tigbutangbutang nagpameligro sa kinabuhi sa laing tawo, ingon sa gihisgotan sa ikaduhang bahin sa Levitico 19:16.

Dugang pa, butangbutangan tingali sa usa ang laing tawo tungod kay gidumtan niya kini. Sa 1 Juan 3:15, atong mabasa: “Kadtong nagdumot sa iyang igsoon maoy mamumuno, ug nahibalo mo nga walay mamumuno nga makadawat ug kinabuhing walay kataposan.” Matikdi nga human moingon ang Diyos, “Ayawg ipameligro ang kinabuhi sa imong isigkatawo,” siya midugang: “Ayawg dumti ang imong igsoon.”—Lev. 19:17.

Busa, ang sugo sa Levitico 19:16 naghatag ug puwersadong tambag sa mga Kristohanon. Kinahanglang isalikway nato ang daotang mga hunahuna ug dili gyod magbutangbutang. Kon atong “ipameligro ang kinabuhi” sa lain, sa ato pa, kon butangbutangan nato siya kay dili ta ganahan niya o nasina ta kaniya, puwedeng magpamatuod ni nga gidumtan nato siya. Kinahanglan gyod nang likayan sa mga Kristohanon.—Mat. 12:36, 37.