Nabasa ba nimog maayo ang mga isyu sa Ang Bantayanang Torre niining tuiga? Sulayi kon makatubag ka sa mosunod nga mga pangutana:

Unsay gipasalig sa Santiago 5:11 dihang kini miingon nga si Jehova “mabination kaayo” ug “maluluy-on”?

Nahibalo ta nga ang pagkamaluluy-on ni Jehova magpalihok niya sa pagpasaylo sa atong kasaypanan. Ang Santiago 5:11 nagpasalig sab kanato nga tungod sa iyang pagkamabination, andam siyang motabang kanato. Maayong sundogon nato siya.—w21.01, p. 21.

Nganong giestablisar ni Jehova ang kahikayan sa pagkaulo?

Gibuhat niya kana tungod sa gugma. Tungod niini nga kahikayan, ang iyang maunongong pamilya makalihok sa malinawon, hapsay nga paagi. Ang matag membro sa pamilya nga mosunod niini nga kahikayan nahibalo kon kinsay mohimo sa kataposang mga desisyon ug kon kinsay angayng manguna sa pagpatuman sa maong mga desisyon.—w21.02, p. 3.

Nganong angayng mag-amping ang mga Kristohanon sa paggamit ug electronic messaging app?

Kon ang usa ka Kristohanon mogamit sa maong mga app, kinahanglang mag-amping siya sa pagpilig mga higala. Mas lisod nang buhaton sa dagkong group chat. (1 Tim. 5:13) Anaa sab ang mga kapeligrohan nga makapasag dili kompirmadong mga impormasyon ug magamit ang mga igsoon diha sa atong contact list para sa komersiyal nga katuyoan.—w21.03, p. 31.

Unsa ang pipila ka rason kon nganong gitugotan sa Diyos si Jesus nga mag-antos ug mamatay?

Una, si Jesus kinahanglang ilansang sa estaka aron mapahigawas ang mga Hudiyo gikan sa tunglo. (Gal. 3:10, 13) Ikaduha, gibansay ni Jehova si Jesus para sa papel niini ingong Hataas nga Saserdote. Ug ikatulo, ang pagkamaunongon ni Jesus hangtod sa kamatayon nagpamatuod nga ang mga tawo makapabiling matinumanon bisan sa grabeng mga pagsulay. (Job 1:9-11)—w21.04, p. 16-17.

Unsay imong mahimo kon wala kaayo kay makaplagang mga tawo diha sa ministeryo?

Puwede nimo silang sulayan pagduaw sa oras nga posibleng naa sila sa balay. Puwede pod kang mosulay ug sangyaw sa laing lokasyon. Ug puwede nimong sulayan ang laing mga paagi, sama sa paghimog sulat.—w21.05, p. 15-16.

Unsay gipasabot ni apostol Pablo dihang siya miingon: “Pinaagi sa balaod ako namatay sa balaod”? (Gal. 2:19)

Gipadayag sa Moisesnong Balaod ang pagkadili-hingpit sa mga tawo ug kini nagtultol sa Israel ngadto sa Kristo. (Gal. 3:19, 24) Kanay hinungdan nga gidawat ni Pablo ang Kristo. Sa pagbuhat niana, si Pablo “namatay sa balaod”; wala na siya mailalom niini.—w21.06, p. 31.

Unsang ehemplo sa paglahutay ang gipakita ni Jehova?

Gilahutay ni Jehova ang pagpasipala sa iyang ngalan, pagsupak sa iyang pagkasoberano, pagrebelde sa pipila niya ka anak, ang mga bakak sa yawa, pag-antos sa iyang mga alagad, pagkanahimulag niya sa iyang mga higala nga nangamatay, pagdaogdaog nga ginahimo sa mga daotan, ug ang pagdaot sa iyang kalalangan.—w21.07, p. 9-12.

Unsang maayong ehemplo sa pagpailob ang gipakita ni Jose?

Milahutay siya sa dili maayong pagtratar kaniya sa iyang mga igsoon. Ug siya sayop nga giakusahan ug napriso sa Ehipto sulod sa daghang tuig.—w21.08, p. 12.

Unsang simbolikong pag-uyog ang gitagna sa Haggeo 2:6-9, 20-22?

Ang mga nasod dili maayog reaksiyon sa pagsangyaw bahin sa Gingharian, pero daghang tawo ang nakabig ngadto sa kamatuoran. Sa dili madugay, ang mga nasod makasinatig kataposang pag-uyog dihang sila pagalaglagon.—w21.09, p. 15-19.

Nganong dili ta angayng mohunong sa pagsangyaw?

Nakita ni Jehova ang atong mga paningkamot, ug nalipay siya. Kon dili ta maluya o mohunong, atong madawat ang kinabuhing walay kataposan.—w21.10, p. 25-26.

Sa unsang paagi ang Levitico kapitulo 19 makatabang nato sa pagpadapat sa tambag: “Magmabalaan kamo sa tanan ninyong panggawi”? (1 Ped. 1:15)

Ang maong bersikulo posibleng gikutlo gikan sa Levitico 19:2. Ang kapitulo 19 dunay daghang pananglitan kon sa unsang paagi ikapadapat nato ang 1 Pedro 1:15 sa atong adlaw-adlawng pagkinabuhi.—w21.12, p. 3-4.