1. Unsa ang “kalinaw nga gikan sa Diyos,” ug unsay kaayohan kon naa ta niini? (Filipos 4:6, 7)

 NAAY klase sa kalinaw nga wala mahibaloi sa mga tawo sa kalibotan. Kini ang “kalinaw nga gikan sa Diyos,” nga mabatonan lang niadtong naay suod nga relasyon sa langitnong Amahan. Kon naa tay kalinaw nga gikan sa Diyos, dili kaayo ta mabalaka. (Basaha ang Filipos 4:6, 7.) Naa tay suod nga relasyon niadtong nahigugma kaniya. Ug suod pod ta sa “Diyos sa kalinaw.” (1 Tes. 5:23) Kon mailhan nato ang atong Amahan ug mosalig ug motuman ta niya, ang kalinaw nga gikan sa Diyos makapakalma nato dihang naa ta sa lisod nga kahimtang.

2. Nganong makaseguro ta nga puwede natong mabatonan ang kalinaw nga gikan sa Diyos?

² Posible ba gyod nga mabatonan nato ang kalinaw nga gikan sa Diyos bisan pa sa kalisdanan sama sa kalamidad, kagubot, paglutos, o pagkaylap sa sakit? Kini nga mga kalisdanan makapahadlok nato. Pero gitambagan ni Jesus ang iyang mga sumusunod: “Ayaw mog kabalaka o kahadlok.” (Juan 14:27) Makapalipay nga gisunod sa mga igsoon ang tambag ni Jesus. Sa tabang ni Jehova, nagmalinawon sila samtang nagsagubang ug grabeng mga pagsulay.

3. Sa unsang paagi ang epidemya o pandemic makawala sa atong kalinaw?

³ Mausab gyod ang kinabuhi panahon sa epidemya o pandemic. Konsideraha ang epekto sa COVID-19. Sumala sa usa ka surbi, kapig katunga sa mga gipangutana ang miingon nga nalisdan silag katulog panahon sa pandemic. Midaghan pod ang nakasinatig grabeng kabalaka, depresyon, pag-abuso sa droga  ug alkoholikong ilimnon, ug pagpanagmal diha sa pamilya. Daghan sab ang misulayg hikog. Kon dunay sakit nga mokaylap sa inyong lugar, unsay imong himoon aron dili ka sobrang mabalaka ug mabatonan nimo ang kalinaw nga gikan sa Diyos?

4. Nganong ang pagkahibalo sa tagna ni Jesus bahin sa kataposang mga adlaw makahatag natog kalinaw?

⁴ Gitagna ni Jesus nga sa kataposang mga adlaw, duna unyay mga kamatay, o pagkaylap sa sakit, “sa lainlaing dapit.” (Luc. 21:11) Sa unsang paagi makahatag ug kalinaw ang pagkahibalo niana? Dili na ta matingala dihang mokaylap ang mga sakit. Nahibalo ta nga nagakahitabo ni sumala sa giingon ni Jesus. Busa sundon nato ang iyang tambag para niadtong nagkinabuhi panahon sa kataposan: “Ayaw mog kahadlok.”​—Mat. 24:6.

5. (a) Base sa Filipos 4:8, 9, unsay angay natong iampo kon may sakit nga mokaylap? (b) Sa unsang paagi ang pagpaminawg audio recording sa Bibliya makatabang nimo?

⁵ Dihang may sakit nga mokaylap, mahimong mabalaka kaayo ta ug mahadlok. Mao nay nahitabo sa sister nga si Desi. b Ang iyang uyoan, ig-agaw, ug doktor namatay tungod sa COVID-19, ug nahadlok siya nga matakdag virus ug mapasa ni niya sa iyang edarang inahan. Tungod pod sa pandemic, nameligro siya nga mawad-ag trabaho. Busa nabalaka siya kon unsa unyay iyang ipalit ug pagkaon ug ibayad sa abang sa balay. Tungod niini dili kaayo siya katulog. Pero nabatonan pag-usab ni Desi ang kalinaw sa hunahuna. Sa unsang paagi? Espesipiko niyang giampo kang Jehova nga mahimo siyang kalmado ug maghunahuna siyag positibong mga butang. (Basaha ang Filipos 4:8, 9.) Naminaw siya kang Jehova pinaagig mga audio recording sa Bibliya. Siya miingon, “Ang kalmadong tingog sa mga magbabasa nakahupay sa akong kabalaka ug nagpahinumdom nako nga gimahal ko ni Jehova.”​—Sal. 94:19.

6. Sa unsang paagi makatabang nimo ang personal nga pagtuon ug pagtambong sa mga tigom?

⁶ Kon kaylap ang sakit, mausab tingali ang imong rutina, pero paningkamoting magpadayon ang imong personal nga pagtuon o pagtambong sa mga tigom. Ang mga eksperyensiya diha sa atong mga publikasyon ug video magpahinumdom nimo nga ang mga igsoon nagpabiling matinumanon bisan pa sa samang mga kalisdanan. (1 Ped. 5:9) Ang mga tigom makatabang nimo sa paghunahunag makapadasig nga mga butang gikan sa Bibliya. Pinaagi sab niini, madasig ka ug imong madasig ang uban. (Roma 1:11, 12) Dihang mamalandong ka kon giunsa pagtabang ni Jehova ang iyang mga alagad dihang sila  nasakit, nahadlok, o nag-inusara, molig-on ang imong pagtuo ug pagsalig nga tabangan sab ka niya.

7. Unsay imong makat-onan kang apostol Juan?

⁷ Paningkamoting magpadayon ang imong komunikasyon sa mga igsoon. Kon may sakit nga mokaylap, kinahanglan tingali natong mag-physical distancing bisag mga igsoon ang atong kauban. Tungod ana, bation tingali nimo ang gibati ni apostol Juan. Gusto niyang makigkita sa iyang higala nga si Gayo. (3 Juan 13, 14) Pero nahibalo si Juan nga niadtong panahona, dili pa posible nga magkita sila. Busa gihimo ni Juan kon unsay puwede niyang himoon; iyang gisulatan si Gayo. Kon dili posible nga personal mong mag-uban sa mga igsoon, puwede nimo silang tawagan sa telepono, i-video call, i-text, o i-chat. Kon makig-estorya ka sa mga igsoon, dili na kaayo ka mobatig kamingaw ug mahimo kang mas kalmado. Kon nabalaka ka pag-ayo, pakig-estorya sa mga ansiyano, ug dawata ang ilang pagdasig.​—Isa. 32:1, 2.

8. Sa unsang paagi ang kalamidad makapawala sa imong kalinaw?

⁸ Kon nakasinati kag baha, linog, o sunog, tingali mobati kag grabeng kabalaka ug kahadlok bisag dugay na tong nahitabo. Kon namatyan ka o nadaot ang imong balay o kabtangan, tingali naguol ka, nawad-ag paglaom, o nasuko pa gani. Wala nâ magpasabot nga materyalistiko ka o kulag pagtuo. Dili lalim ang imong naagian, ug normal lang nga negatibo tingali ang imong reaksiyon. (Job 1:11) Pero posible gihapon nga magmalinawon ka. Sa unsang paagi?

9. Giunsa ta pag-andam ni Jesus sa mga kalamidad?

⁹ Hinumdomi ang gitagna ni Jesus. Dili sama sa uban nga nagtuo nga dili sila maapektohag kalamidad, nahibalo ta nga modaghan ang kalamidad sa atong panahon, ug posible nga makaeksperyensiya ta niini. Giingnan ni Jesus ang iyang mga sumusunod nga mahitabo ang “dagkong linog” ug ubang kalamidad sa dili pa moabot ang kataposan. (Luc. 21:11) Nagtagna pod siya nga ‘mograbe ang kalapasan,’ sama sa krimen, kapintasan, ug terorismo. (Mat. 24:12) Wala gyod moingon si Jesus nga kon makasinati tag kalamidad, tungod nâ kay gipasagdan ta ni Jehova. Gani, daghang matinumanong mga alagad ni Jehova ang nakaeksperyensiya niana. (Isa. 57:1; 2 Cor. 11:25) Tingali dili ta milagrosong panalipdan ni Jehova sa tanang kalamidad, pero hatagan ta niya sa atong gikinahanglan aron magpabilin tang kalmado ug malinawon.

10. Nganong ang pagpangandam karon nagpakita nga naa tay pagtuo kang Jehova? (Proverbio 22:3)

¹⁰ Mas sayon ang pagpabiling kalmado panahon sa emerhensiya kon nakapangandam ta daan. Pero ang pagpangandam ba nagpasabot nga kulang tag pagtuo kang Jehova? Wala. Gani, ang pagpangandam nagpakita nga naa tay pagsalig nga iya tang atimanon. Sa unsang paagi? Ang Pulong sa Diyos nagtambag nato nga mangandam sa mga kalamidad. (Basaha ang Proverbio 22:3.) Ug diha sa atong mga publikasyon, tigom, ug mga pahibalo, ang organisasyon sa Diyos pirmeng nagdasig nato nga mangandam sa emerhensiya. c Naa ba tay pagsalig kang Jehova? Kon oo, sundon nato ang maong tambag karon​—samtang wala pay kalamidad.

11. Unsay imong makat-onan kang Margaret?

¹¹ Konsideraha ang eksperyensiya sa sister nga si Margaret. Gipabakwet sa awtoridad  ang mga tawo sa ilang lugar tungod sa wildfire, o sunog sa lasang. Kay nagdungan ug pamakwet ang mga tawo, trapik kaayo ang dalan. Puwerteng bagaa sa itom nga aso, ug si Margaret natanggong sa iyang sakyanan. Pero wala siya maunsa kay nakapangandam siya. Sa iyang bag, nagbutang siya daan ug mapa aron iyang matan-aw enkasog kinahanglan siyang moagig laing ruta. Iya na ganing gisulayan sa una kini nga ruta aron sayon ni niyang masundan kon naay emerhensiya. Tungod sa pagpangandam ni Margaret, nakalingkawas siya sa kalamidad.

12. Nganong angay tang mosunod sa mga instruksiyon?

¹² Aron maprotektahan ta ug ang uban, ang mga awtoridad mohatag tingalig instruksiyon bahin sa curfew, pagbakwet, o uban pa. Ang uban maglangaylangay tungod sa mga butang nga dili nila mabiyaan. Pero unsa may angayng himoon sa mga Kristohanon? Giingnan ta sa Bibliya: “Tungod sa Ginoo pasakop mo sa matag awtoridad nga gihimo sa tawo, sa hari man kay labaw siya o sa mga gobernador nga gipadala niya.” (1 Ped. 2:13, 14) Ang organisasyon sa Diyos naghatag pod ug instruksiyon aron maprotektahan ta. Kanunay tang gipahinumdoman nga ihatag nato sa mga ansiyano ang atong kinabag-ohang contact information aron dali tang makontak panahon sa emerhensiya. Nahimo na ba nâ nimo? Tingali makadawat sab tag instruksiyon bahin sa pagpabilin sa balay, pagbakwet, ug pagkuhag mga hinabang o kon kanus-a ug kon unsaon pagtabang ang uban. Kon dili nato ni sundon, atong mapameligro ang atong kinabuhi ug ang kinabuhi sa mga ansiyano. Hinumdomi nga kining matinumanong mga brader nagabantay kanato. (Heb. 13:17) Matod ni Margaret, “Makaingon gyod ko nga ang akong pagsunod sa instruksiyon sa mga ansiyano ug sa organisasyon nakaluwas sa akong kinabuhi.”

13. Unsay nakahatag ug kalipay ug kalinaw sa daghang Kristohanon nga namakwet?

¹³ Daghang igsoon nga namakwet tungod sa kalamidad, gubat, o kagubot ang naningkamot nga magpasibo sa ilang bag-ong kahimtang ug mihimo dayon sa mga buluhaton sa Gingharian. Sama sa unang mga Kristohanon nga nagkatibulaag tungod sa paglutos, padayon silang “nagpahayag sa maayong balita bahin sa pulong.” (Buh. 8:4) Ang pagsangyaw  nakatabang nila nga magpokus sa Gingharian imbes sa ilang lisod nga kahimtang. Tungod ana, wala mawala ang ilang kalipay ug kalinaw.

14. Nganong ang paglutos posibleng makawala sa atong kalinaw?

¹⁴ Kon lutoson ta, posibleng dili na nato mahimo ang mga butang nga makahatag natog kalinaw. Malipay ta dihang duna tay kagawasan nga magtigom, mosangyaw, ug mohimo sa adlaw-adlaw natong buluhaton nga dili mahadlok nga basig dakpon ta. Kon dili na ni nato mahimo, basig mabalaka ta ug mahadlok kon unsa unyay mahitabo. Normal lang nga mobati ta ana. Pero angay tang magbantay. Miingon si Jesus nga ang paglutos puwedeng mahimong hinungdan nga ang iyang mga sumusunod mapandol o maluya sa pag-alagad. (Juan 16:1, 2) Busa unsay atong himoon aron magmalinawon gihapon ta bisan pa sa paglutos?

15. Nganong dili ta angayng mahadlok nga lutoson? (Juan 15:20; 16:33)

¹⁵ Ang Pulong sa Diyos nag-ingon: “Ang tanan nga nagkinabuhi nga nahiusa kang Kristo Jesus ug may debosyon ngadto sa Diyos lutoson sab.” (2 Tim. 3:12) Ang brader nga si Andrei dili katuo nga mahitabo nâ dihang gidili ang atong buluhaton didto sa ilang nasod. Siya miingon: “Sa kadaghang Saksi diri, unsaon nila pagdakop tanan?” Pero imbes mahimong kalmado, ang iyang pangatarongan nakapabalaka hinuon niya. Ang ubang brader misalig kang Jehova, ug wala sila maghunahuna nga dili sila dakpon. Gidawat nila nga posible silang dakpon, pero wala kaayo sila mabalaka kon itandi kang Andrei. Busa iyang gisundog ang ilang panghunahuna, ug gisalig niya ang tanan sa Diyos. Tungod adto, mibati siyag kalinaw, ug malipayon na siya karon bisan sa mga kalisdanan. Puwede pod tang mobati ana. Bisag giingnan ta ni Jesus nga makadahom tag paglutos, gipasaligan pod ta niya nga makapabilin tang matinumanon.​—Basaha ang Juan 15:20; 16:33.

16. Unsa nga instruksiyon ang kinahanglan natong sundon panahon sa paglutos?

¹⁶ Dihang ang atong buluhaton idili o may restriksiyon, makadawat tingali tag instruksiyon gikan sa sangang buhatan ug mga ansiyano. Kini nga instruksiyon gihatag aron  panalipdan ta, maseguro nga padayon tang makadawat ug espirituwal nga pagkaon, ug tabangan ta nga makapadayon sa pagsangyaw kutob sa mahimo. Paningkamoti nga masunod ang instruksiyon nga imong nadawat, bisan pag wala kaayo ka makasabot kon nganong gihatag ni. (Sant. 3:17) Ug ayaw gyod paghatag ug impormasyon bahin sa atong mga igsoon o mga kalihokan sa kongregasyon niadtong walay katungod nga mahibalo niini.​—Eccl. 3:7.

17. Sama sa mga apostoles sa unang siglo, unsay atong determinasyon?

¹⁷ Usa sa pangunang mga rason nga nakiggubat si Satanas sa katawhan sa Diyos mao ang ilang “buluhaton sa pagpamatuod bahin kang Jesus.” (Pin. 12:17) Pero ayawg kahadlok kang Satanas ug sa iyang kalibotan. Ang pagsangyaw ug pagtudlo bisan pa sa pagsupak makahatag natog kalipay ug kalinaw. Dihang ang mga apostoles sa unang siglo gipahunong sa mga awtoridad sa pagsangyaw, ang maong matinumanong mga alagad mipili sa pagsunod sa Diyos. Nagpadayon sila sa pagsangyaw ug kana nakapalipay nila. (Buh. 5:27-29, 41, 42) Siyempre, dihang ang atong buluhaton may restriksiyon, kinahanglan tang mag-amping samtang magsangyaw. (Mat. 10:16) Pero kon himoon nato ang atong maarangan, magmalinawon ta kay napalipay nato si Jehova ug nasangyaw nato ang mensahe nga makaluwas ug kinabuhi.

18. Kinsay makahatag nato ug tinuod nga kalinaw?

¹⁸ Makasalig ta nga bisan sa lisod kaayong mga panahon, puwede tang magmalinawon. Nianang panahona, angay natong hinumdoman nga ang kalinaw nga atong gikinahanglan mao ang kalinaw nga gikan sa Diyos, ang kalinaw nga si Jehova lang ang makahatag. Salig niya dihang dunay sakit nga mokaylap, kalamidad, o paglutos. Ayawg palayo sa iyang organisasyon. Pamalandonga ang imong nindot nga kaugmaon. Kon imo nang himoon, ‘ang Diyos sa kalinaw magauban kanimo.’ (Filip. 4:9) Sa sunod nga artikulo, atong hisgotan kon sa unsang paagi ang mga igsoon nga nag-atubang ug kalisdanan atong matabangan nga makabaton ug kalinaw nga gikan sa Diyos.