1. Nganong makaingon ta nga wala masayang ang paglaom ni Abraham nga makabaton ug anak?

 SI Jehova nagsaad sa iyang higala nga si Abraham nga ang tanang nasod sa yuta mapanalanginan pinaagi sa iyang kaliwat. (Gen. 15:5; 22:18) Kay si Abraham naay lig-ong pagtuo sa Diyos, kombinsido siya nga matuman ang saad sa Diyos. Bisan pa ana, dihang si Abraham 100 na ang edad ug iyang asawa 90, ang maong matinumanong magtiayon wala pa gihapoy anak. (Gen. 21:​1-7) Pero ang Bibliya nag-ingon: “[Si Abraham] milaom ug mituo nga mahimo siyang amahan sa daghang kanasoran. . . . Mituo siya sa gisulti kaniya.” (Roma 4:18) Kabalo ta nga natuman gyod ang gilaoman ni Abraham. Natawo ang anak nga dugay na niyang gipangandoy, si Isaac. Nganong kombinsido si Abraham nga tumanon ni Jehova ang iyang gisaad?

2. Nganong kombinsido si Abraham nga matuman gyod ang gisaad ni Jehova?

² Kay si Abraham naay suod nga relasyon kang Jehova, “kombinsido gayod siya nga matuman [ang] gisaad” sa Diyos. (Roma 4:21) Nabatonan ni Abraham ang pag-uyon ni Jehova ug gitawag siya nga matarong tungod sa iyang pagtuo. (Sant. 2:23) Sumala sa atong makita sa Roma 4:​18, ang pagtuo ug paglaom ni Abraham konektado. Karon, hisgotan nato kon unsay gisulti ni apostol Pablo bahin sa paglaom diha sa Roma kapitulo 5.

3. Unsay gipatin-aw ni Pablo bahin sa paglaom?

³ Gipatin-aw ni Pablo kon nganong makaseguro ta nga ang atong “paglaom dili moresultag kahigawad.” (Roma 5:5) Gitabangan pod ta niya nga masabtan kon sa unsang paagi nato  mapalig-on ang atong paglaom. Samtang atong hisgotan ang giingon ni Pablo sa Roma 5:​1-5, konsideraha ang imong kaugalingong eksperyensiya. Pinaagi ana, makita tingali nimo nga paglabay sa panahon ang imong paglaom nahimong mas tinuod para nimo. Hisgotan sab nato kon sa unsang paagi mas molig-on ang atong paglaom. Konsiderahon una nato ang giingon ni Pablo nga nindot kaayong paglaom nga dili moresultag kahigawad.

4. Unsay gihisgotan sa Roma 5:​1, 2?

⁴ Basaha ang Roma 5:​1, 2. Gisulat kana ni Pablo ngadto sa kongregasyon sa Roma. Ang mga igsoon didto nakakat-on bahin kang Jehova ug Jesus, nagpakitag pagtuo, ug nahimong mga Kristohanon. Busa ang Diyos ‘nagpahayag na [kanila] nga matarong tungod sa pagtuo,’ ug gidihogan sila pinaagi sa balaang espiritu. Oo, nabatonan nila ang kasaligan ug nindot kaayong paglaom.

5. Unsay paglaom sa mga dinihogan?

⁵ Sa ulahi, si Pablo misulat sa dinihogang mga Kristohanon sa Efeso bahin sa paglaom nga gihatag sa Diyos kanila. Makadawat silag “panulondon para sa mga balaan.” (Efe. 1:18) Gihisgotan pod ni Pablo sa mga taga-Colosas kon asa nila madawat ang ilang ganti. Iya kining gitawag ug “paglaom nga giandam alang kaninyo sa langit.” (Col. 1:​4, 5) Busa ang dinihogang mga Kristohanon naay paglaom nga mabuhi sa walay kataposan didto sa langit, diin magmando sila uban sa Kristo.—1 Tes. 4:​13-17; Pin. 20:6.

6. Unsay giingon sa usa ka dinihogang brader bahin sa iyang paglaom?

⁶ Gipabilhan gyod sa dinihogang mga Kristohanon ang maong paglaom. Usa nila, si Brader Frederick Franz, misulti sa iyang gibati bahin niini: “Ang atong paglaom maoy usa ka segurado nga butang, ug kini bug-os nga matuman diha sa matag usa sa . . . 144,000 ka membro sa gamayng panon sa . . . sukod nga dili gayod nato mahanduraw.” Paglabay sa daghang  tuig nga matinumanon siyang nag-alagad sa Diyos, si Brader Franz miingon niadtong 1991: “Wala ta mawad-ig pagpabili niana nga paglaom. . . . Labi pa nato kining gipabilhan bisan dugay kitang naghulat alang niana. Kini maoy usa ka butang nga takos nga pagahulaton, bisag mokabat pa kinig milyonmilyong katuigan. Labi pa nakong gipabilhan ang atong paglaom sukad masukad.”

7-8. Unsay paglaom sa kadaghanang alagad ni Jehova? (Roma 8:​20, 21)

⁷ Kadaghanan sa nagsimba kang Jehova karon dunay lahi nga paglaom—ang paglaom nga nabatonan ni Abraham, nga mao ang kinabuhing walay kataposan sa yuta ubos sa pagmando sa Gingharian sa Diyos. (Heb. 11:​8-10, 13) Gihisgotan ni Pablo ang nindot kaayong palaaboton niadtong nakabaton niana nga paglaom. (Basaha ang Roma 8:​20, 21.) Dihang una nimong nakat-onan ang saad sa Bibliya bahin sa umaabot, unsay imong pinakaganahan? Naghinamhinam ba ka sa panahon nga mahimo na kang hingpit ug dili na makasala? O nalipay ba kaayo ka dihang imong nahibaloan nga ang imong namatay nga mga minahal banhawon diha sa paraisong yuta? Kana naghatag natog nindot kaayong palaaboton “pinasukad sa paglaom.”

⁸ Naglaom man ta nga mabuhi sa walay kataposan sa langit o sa yuta, naa tay nindot nga paglaom nga makahatag natog kalipay. Ug ang atong makapalipayng paglaom mahimo pang mas tinuod para nato. Gipatin-aw ni Pablo kon sa unsang paagi na mahitabo. Konsiderahon nato ang iyang gisulat bahin sa atong paglaom. Pinaagi niini, mas makasalig ta nga matuman gyod ang atong gilaoman.

9-10. Sumala sa naeksperyensiyahan ni Pablo, unsay madahom sa mga Kristohanon? (Roma 5:3) (Tan-awa sab ang mga hulagway.)

⁹ Basaha ang Roma 5:3. Matikdi nga ang kasakitan makatabang nga mapalig-on nimo ang imong paglaom. Dili tingali kana ang atong gidahom. Pero ang tanang sumusunod sa Kristo makadahom gyod ug kasakitan. Konsideraha ang naeksperyensiyahan ni Pablo. Siya  miingon sa mga taga-Tesalonica: “Dihang kauban mi ninyo, giingnan mo namo daan nga makasinati tag kasakitan, ug nahitabo kana.” (1 Tes. 3:4) Ug sa mga taga-Corinto, siya misulat: “Gusto namong mahibalo mo, mga igsoon, sa kasakitan nga among naagoman . . . Mibati mi nga wala nay kasegurohan ang among kinabuhi.”—2 Cor. 1:8; 11:​23-27.

¹⁰ Ang mga Kristohanon sab karon makadahom ug kasakitan. (2 Tim. 3:12) Komosta sa imong bahin? Gilutos ba ka tungod sa imong pagtuo kang Jesus ug sa imong pagsunod kaniya? Tingali gibiaybiay ka sa imong pamilya ug mga higala. Basin dili pa gani maayo ang ilang pagtratar kanimo. Nagkaproblema ba ka sa trabaho tungod sa imong paningkamot nga magmatinud-anon sa tanang butang? (Heb. 13:18) Nakasinati ba kag pagsupak sa gobyerno kay imong gisangyaw sa uban ang imong paglaom? Bisag unsa pang kasakitan ang ato tingaling maatubang, si Pablo miingon nga angay tang maglipay. Ngano?

11. Nganong angay nga determinado ta nga molahutay sa bisan unsang pagsulay?

¹¹ Malipay ta bisan dihang makaatubang ug kasakitan tungod sa resulta niini. Ang Roma 5:3 nag-ingon nga “ang kasakitan moresultag paglahutay.” Ang tanang Kristohanon makaatubang ug kasakitan, busa ang tanang Kristohanon angayng molahutay. Angay nga determinado ta nga molahutay bisag unsa pa nga pagsulay ang atong maatubang. Pinaagi ana, makita nato ang katumanan sa atong gilaoman. Dili nato gusto nga maparehas niadtong mga tawo nga naa sa hunahuna ni Jesus dihang naghisgot siya bahin sa mga binhi nga nahulog sa yutang batoon. Sa primero, gidawat nila ang pulong uban ang kalipay pero dihang ‘mitungha ang kasakitan o paglutos,’ sila napandol. (Mat. 13:​5, 6, 20, 21) Tinuod, ang pag-atubang ug pagsupak o pagsulay dili sayon o makapalipay, pero ang paglahutay niini moresultag nindot kaayong mga panalangin. Sa unsang paagi?

12. Unsay kaayohan kon molahutay ta sa mga pagsulay?

¹² Gipasiugda sa tinun-ang si Santiago ang mga kaayohan kon molahutay ta sa mga pagsulay. Siya misulat: “Ipatapos sa pagkamalahutayon ang katuyoan niini, aron nga mahimo mong bug-os ug maayo sa tanang bahin, nga dili makulangan sa bisan unsa.” (Sant. 1:​2-4) Miingon si Santiago nga ang paglahutay naay katuyoan. Unsay katuyoan niini? Makatabang ni nato nga mas maugmad pa ang mga hiyas nga sama sa pailob, pagtuo, ug pagsalig sa Diyos. Pero naa pa tay makuha nga mas dakong kaayohan kon molahutay ta.

13-14. Unsay resulta sa paglahutay, ug unsay koneksiyon niini sa paglaom? (Roma 5:4)

¹³ Basaha ang Roma 5:4. Gihisgotan ni Pablo nga ang paglahutay moresultag “pag-uyon sa Diyos.” Busa kon molahutay ka, mabatonan nimo ang pag-uyon ni Jehova. Wala ni magpasabot nga si Jehova nalipay nga nag-atubang kag mga pagsulay o problema. Hinuon, nalipay siya sa imong paglahutay. Dako gyong panalangin nga mabatonan ang pag-uyon sa Diyos!—Sal. 5:12.

¹⁴ Hinumdomi nga si Abraham milahutay sa mga pagsulay ug nakabaton sa pag-uyon sa Diyos. Giisip siya ni Jehova ingong Iyang higala ug ingong matarong nga tawo. (Gen. 15:6; Roma 4:​13, 22) Ug posible pod na kanato. Ang pag-uyon sa Diyos wala magdepende sa gidaghanon sa atong gihimo sa pag-alagad kaniya o sa atong mga pribilehiyo. Hinuon, mabatonan nato ang iyang pag-uyon kon matinumanon tang molahutay. Ug bisan unsay atong edad, sirkumstansiya, o katakos, kitang tanan puwedeng makalahutay. Naa ba kay pagsulay karon nga matinumanon nimong ginaatubang? Mahupayan ka sa  pagkahibalo nga nabatonan nimo ang pag-uyon sa Diyos. Ang pagkahibalo niini makapalig-on gyod sa atong paglaom.

15. Unsa pay dugang giingon ni Pablo, ug nganong nakapalibog ni sa uban?

¹⁵ Sumala sa gihisgotan na ni Pablo, mabatonan nato ang pag-uyon ni Jehova kon matinumanon tang molahutay sa mga pagsulay. Matikdi ang dugang giingon ni Pablo: “Ang pag-uyon sa Diyos moresultag paglaom, ug ang paglaom dili moresultag kahigawad.” (Roma 5:​4, 5) Makapalibog tingali ni sa uban. Ngano? Kay sa Roma 5:​2, si Pablo miingon nga ang mga Kristohanon sa Roma naa nay paglaom, ang “paglaom nga mabatonan . . . ang himaya sa Diyos.” Busa ang uban tingali makapangutana, ‘Kon ang maong mga Kristohanon naa nay paglaom, nganong naghisgot pa man pag-usab si Pablo ug paglaom?’

16. Sa unsang paagi ang paglaom mosugod pagtubo diha sa usa ka tawo? (Tan-awa sab ang mga hulagway.)

¹⁶ Atong masabtan ang giingon ni Pablo kon atong hunahunaon nga ang paglaom puwedeng motubo. Sa pag-ilustrar: Nahinumdoman ba nimo dihang una nimong nadunggan ang nindot kaayong paglaom nga naa sa Pulong sa Diyos? Niadtong panahona, tingali naghunahuna ka nga morag damgo lang ang ideya nga mabuhi sa walay kataposan sa paraisong yuta. Pero dihang mas daghan kag nakat-onan bahin kang Jehova ug sa mga saad sa Bibliya, mas nakombinsir ka nga kini nga paglaom tinuod gyong mahitabo.

17. Sa unsang paagi ang imong paglaom padayong motubo human sa imong pagpahinungod ug pagpabawtismo?

¹⁷ Bisan human ka magpahinungod ug magpabawtismo, ang imong paglaom padayong mitubo samtang nagkat-on kag dugang ug mas mihamtong sa espirituwal. (Heb. 5:13–6:1) Lagmit naeksperyensiyahan nimo ang gihisgotan sa Roma 5:​2-4. Tingali nasinatian nimo ang lainlaing kasakitan, pero milahutay ka ug nakita nimo nga giuyonan ka sa Diyos. Kay segurado ka nga imong  napalipay ang Diyos, naa na kay mas dakong rason sa pagdahom nga madawat nimo ang iyang mga gisaad. Ang imong paglaom mas milig-on pa kay sa sinugdan. Nahimo ning mas tinuod ug mas personal para nimo. Dako kaayo nig epekto sa tanang bahin sa imong kinabuhi, ug nakaapektar ni sa imong pagtratar sa pamilya, paghimog mga desisyon, ug bisan sa paggamit nimo sa imong panahon.

18. Unsang pasalig ang gihatag ni Jehova?

¹⁸ Si Pablo dugang naghisgot ug importante kaayong punto bahin sa paglaom nga imong nabatonan human nimo madawat ang pag-uyon sa Diyos. Siya miingon nga ang imong gilaoman matuman. Nganong makaseguro ka ana? Kay gigiyahan siya sa Diyos sa pagsulat niini nga pasalig ngadto sa mga Kristohanon: “Ang paglaom dili moresultag kahigawad; kay gigamit sa Diyos ang iyang balaang espiritu, nga gihatag niya kanato, aron ipakita nga gimahal ta niya.” (Roma 5:5) Makaseguro gyod ka sa paglaom nga gihatag ni Jehova kanimo.

19. Unsay imong maseguro bahin sa imong paglaom?

¹⁹ Pamalandonga ang gisaad ni Jehova kang Abraham ug kon sa unsang paagi giuyonan siya sa Diyos ug giisip siya ingong Iyang higala. Wala gyod mapakyas ang gilaoman ni Abraham. Ang Bibliya nag-ingon: “Human maghulat nga mapailobon, nadawat ni Abraham kini nga saad.” (Heb. 6:15; 11:​9, 18; Roma 4:​20-22) Wala gyod siya mahigawad. Makaseguro pod ka nga kon magpabilin kang matinumanon, madawat gyod nimo ang imong gilaoman. Ang imong paglaom tinuod; makapalipay ni, dili makapahigawad! (Roma 12:12) Si Pablo misulat: “Hinaot nga ang Diyos nga nagahatag ug paglaom magpuno sa inyong kasingkasing ug kalipay ug kalinaw tungod sa inyong pagsalig kaniya, aron molig-on pa gyod ang inyong paglaom pinaagi sa gahom sa balaang espiritu.”—Roma 15:13.