SEGURADO nga gipabilhan nimo ang daghang regalo ni Jehova, apil na ang imong kagawasan sa pagdesisyon kon unsaon nimo pag-enjoy kini nga mga regalo. Sumala sa Bibliya, ang bino regalo sa Diyos. Kini nag-ingon pa gani: “Ang tinapay makapakatawa, ug ang bino makapalipay sa kinabuhi.” (Eccl. 10:19; Sal. 104:15) Pero namatikdan tingali nimo nga ang uban nagkaproblema sa alkoholikong ilimnon. Dugang pa, lainlain ang opinyon sa mga tawo bahin sa pag-inom depende sa ilang lugar ug kultura. Busa unsay makatabang sa mga Kristohanon sa paghimog maalamong desisyon bahin niini?

Bisan asa pa ta nagpuyo o bisan unsa pang kultura ang atong gidak-an, makabenepisyo gyod ta ug magmalipayon kon magpagiya ta sa Diyos dihang mohimog mga desisyon.

Tingali namatikdan nimo nga daghang tawo ang pirmeng moinom, ug kusog pa gyod sila moinom. Ang uban moinom kay makaparelaks ni nila. Ang uban pod moinom dihang naa silay problema. Ug sa ubang lugar, isipon kang sosyal ug tinuod nga lalaki kon daghan ang imong imnon.

Pero ang mga Kristohanon gihatagan ug maalamong giya sa ilang mahigugmaong Maglalalang. Pananglitan, gipasidan-an ta niya sa makapaguol nga mga resulta sa sobrang pag-inom. Tingali nabasa nimo sa Proverbio 23:​29-35 ang detalyadong deskripsiyon bahin sa hubog nga tawo ug ang pipila sa mga problema nga resulta niini. a Si Daniel, ansiyano sa Europe, nahinumdom sa iyang kinabuhi sa wala pa siya mahimong Kristohanon, “Tungod sa sobrang pag-inom, nakahimo kog dili maayong mga desisyon ug naa koy pait nga mga eksperyensiya nga hangtod karon dili nako malimtan.”

Sa unsang paagi magamit sa mga Kristohanon ang ilang kagawasan sa pagpili ug malikayan ang mga problema nga resulta sa sobrang pag-inom? Kinahanglan nga ang atong panghunahuna ug binuhatan ipahiuyon nato sa panglantaw sa Diyos.

Susihon nato kon unsay giingon sa Bibliya bahin sa alkoholikong ilimnon ug ang mga rason sa uban kon nganong moinom sila.

Wala idili sa Pulong sa Diyos ang pag-inom ug alkoholikong ilimnon. Gani, ang Bibliya nag-ingon nga ang pag-inom ug bino makapalipay. Atong mabasa: “Kan-a ang imong pagkaon uban ang kasadya, ug imna ang imong bino uban ang malipayong kasingkasing.” (Eccl. 9:7) Dihay mga higayon nga si Jesus miinom ug bino, ug mao man sab ang ubang matinumanong alagad ni Jehova.—Mat. 26:​27-29; Luc. 7:34; 1 Tim. 5:23.

Pero bisag wala idili sa Pulong sa Diyos ang pag-inom ug alkoholikong ilimnon, wala uyoni niini ang paghuboghubog. Kini klarong nag-ingon: “Ayaw mo paghuboghubog.” (Efe. 5:18) Ug nag-ingon pa gani ni nga ang mga “palahubog . . . dili makapanunod sa Gingharian sa Diyos.” (1 Cor. 6:10) Busa gidumtan gyod ni Jehova ang sobrang pag-inom ug ang paghuboghubog. Imbes mosunod lang sa kon unsay naandan sa atong kultura, gusto natong modesisyon base sa kon unsay makapalipay sa Diyos.

Ang uban naghunahuna nga kaya nilang moinom ug daghan nga dili ra mahubog, pero peligroso kaayo na. Giklaro sa Kasulatan nga ang pagkahimong “ulipon sa daghang bino” makadaot sa moralidad ug espirituwalidad sa usa ka tawo. (Tito 2:3; Prov. 20:1) Nagpasidaan pa gani si Jesus nga ang “pagpalabig inom” puwedeng makapugong sa usa sa pagpuyo sa bag-ong kalibotan sa Diyos. (Luc. 21:​34-36) Busa unsay makatabang sa usa ka Kristohanon aron malikayan ang mga problema nga konektado sa pag-inom ug alkoholikong ilimnon?

Peligroso gyod kon ang panglantaw sa usa bahin sa pag-inom naimpluwensiyahan sa iyang kultura. Maalamon nga himoon sa mga Kristohanon kon unsay makapalipay kang Jehova kon bahin sa mga butang nga sama sa pagkaon ug pag-inom. Ang Bibliya nagpahinumdom kanato: “Kon kamo magkaon o mag-inom o magbuhat ug bisan unsa, himoa ang tanan alang sa kahimayaan sa Diyos.” (1 Cor. 10:31) Konsideraha ang mosunod nga mga pangutana ug mga prinsipyo sa Bibliya:

Moinom ba ko aron ganahan ang uban nako? Ang Exodo 23:2 nag-ingon: “Ayawg sunda ang kadaghanan.” Dinhi, gipasidan-an ni Jehova ang mga Israelinhon nga dili sundogon ang mga tawo nga wala makapalipay niya. Kana nga tambag mapadapat pod sa mga Kristohanon karon. Kon tugotan nato ang uban nga mag-impluwensiya sa atong panghunahuna ug mga desisyon bahin sa alkoholikong ilimnon, basin mapahilayo ta kang Jehova ug dili nato masunod ang iyang mga sukdanan.—Roma 12:2.

Moinom ba ko aron ipakita sa uban nga lig-on ko? Sa ubang kultura, komon ug dalawaton ra ang sobrang pag-inom ug pirmeng pag-inom. (1 Ped. 4:3) Pero matikdi kon unsay gidasig sa 1 Corinto 16:13: “Magpabiling nagtukaw, barog nga lig-on sa pagtuo, magpakalalaki, magmakusganon.” Makatabang ba gyod ang alkoholikong ilimnon aron mahimong kusgan o lig-on ang usa ka tawo? Dili. Tungod sa alkoholikong ilimnon, posibleng dili na siya makahunahunag tarong ug dili na makahimog maayong mga desisyon. Busa ang pag-inom ug sobra dili magpakita nga lig-on siya. Hinuon, nagpakita ni nga huyang siya. Ang Isaias 28:7 naghisgot bahin sa tawo nga napahisalaag tungod sa alkoholikong ilimnon. Kini nag-ingon nga siya nagbaragbarag ug nagpalingpaling sa iyang panghukom.

Ang tinuod nga kusog naggikan kang Jehova, ug aron mabatonan ni, kinahanglan nga kita magpabiling nagtukaw ug mobarog nga lig-on sa pagtuo. (Sal. 18:32) Mahimo na sa usa ka Kristohanon kon iyang likayan ang mga kapeligrohan ug mohimo siyag mga desisyon nga dili makadaot sa iyang relasyon kang Jehova. Kanay gipakita ni Jesus dihang dinhi siya sa yuta, ug daghan ang nagtahod niya tungod sa iyang kaisog ug determinasyon nga himoon kon unsay husto.

Moinom ba ko aron malimtan ang akong mga problema? Ang salmista gigiyahan sa Diyos sa  pagsulat: “Dihang nalumsan ko sa mga kabalaka, ang . . . paghupay [ni Jehova] nakapalipay kanako.” (Sal. 94:19) Kon nabug-atan ka sa imong mga problema, dangop kang Jehova alang sa paghupay, dili sa alkoholikong ilimnon. Ang usa ka epektibong paagi aron mahimo nimo na mao ang pag-ampo pirme kang Jehova. Nakita pod sa uban nga dako kaayog tabang ang pagpangayog praktikal nga tambag gikan sa hamtong nga higala diha sa kongregasyon. Sa tinuod lang, ang pag-inom ug alkoholikong ilimnon aron maatubang ang mga problema makapahuyang hinuon sa determinasyon sa usa ka tawo nga himoon kon unsay husto. (Os. 4:11) Si Daniel, nga gihisgotan ganina, miingon: “Pirme kong mobatig grabeng kabalaka ug nakonsensiya ko sa akong mga nahimo kaniadto. Moinom ko aron moarang-arang akong gibati, pero misamot hinuon ang akong mga problema ug nawad-an kog mga higala ug pagtahod sa kaugalingon.” Unsay nakatabang kang Daniel? “Na-realize nako nga si Jehova ang akong gikinahanglan, dili ang ilimnon. Tungod ana, malamposon nakong naatubang ang akong mga problema,” siya miingon. Ang tinuod, si Jehova andam kanunay nga motabang nato, bisan pag morag wala nay paglaom ang atong situwasyon.—Filip. 4:​6,7; 1 Ped. 5:7.

Kon moinom ka usahay, puwede nimong susihon ang imong kaugalingon pinaagi niini nga mga pangutana: ‘Naa bay membro sa akong pamilya o suod nga higala nga nabalaka sa akong batasan sa pag-inom?’ Kon oo, basig nagpakita ni nga naa na kay na-develop nga batasan sa pag-inom nga wala lang nimo mamatikdi. ‘Kusog na ba kong moinom?’ Nagpakita tingali ni nga hapit na kang maadik sa alkoholikong ilimnon. ‘Maglisod ba ko kon dili ko makainom sulod sa pipila ka adlaw o mas dugay pa?’ Kon oo, tingali nagpakita ni nga nabatasan na nimo ang pag-inom o kaha naadik na ka sa alkoholikong ilimnon. Basin nagkinahanglan kag propesyonal nga tabang alang niana.

Tungod sa mga kapeligrohan o problema nga resulta sa pag-inom, ang ubang Kristohanon midesisyon nga di gyod moinom ug alkoholikong ilimnon. Ang uban midesisyon nga dili moinom kay dili sila ganahan sa lasa. Kon kanay desisyon sa imong mga kauban, makapakita kag kaayo nila kon tahoron nimo ang ilang desisyon.

 O tingali nakita nimo nga maayong magtakda ug limitasyon kon unsa ka daghan ang imong imnon nga alkoholikong ilimnon. O basin modesisyon ka kon kapila lang moinom, tingali kausa sa usa ka semana o kaha ginagmay o usahay lang dihang mokaon. Pilion pod sa uban kon unsa nga ilimnon ang ilang imnon. Pananglitan, moinom lang silag gamayng bino o beer pero dili sila moinom ug hard liquor ug bisan cocktail. Dihang ang usa magtakdag limitasyon sa iyang pag-inom, mas sayon para niya nga sundon kana. Ug dili angayng maulaw ang usa ka hamtong nga Kristohanon kon naghimo siyag limitasyon ug determinado siya nga sundon kana.

Ang laing butang nga kinahanglang hunahunaon mao ang pagpakitag konsiderasyon sa uban. Ang Roma 14:21 nag-ingon: “Maayo pag dili na lang mokaog karne o moinom ug bino o mohimog bisan unsa kon makapandol kini sa imong igsoon.” Unsaon nimo pagsunod kini nga tambag? Ipakita ang inigsoong gugma. Kon gibati nimo nga naay mapandol kon moinom kag alkoholikong ilimnon, ang gugma magpalihok nimo nga dili na lang moinom niana nga okasyon. Pinaagi niini, imong gipakita nga gitahod nimo ang pagbati sa uban ug nga naghunahuna ka sa ilang kaayohan, dili sa imong kaugalingon.—1 Cor. 10:24.

Dugang pa, naa tingali mga balaod ang gobyerno nga angayng konsiderahon sa usa ka Kristohanon dihang mohimog mga desisyon. Apil tingali sa maong balaod kon pilay edad sa gitugotan nga moinom, o kaha dili puwedeng magdrayb o mag-operate ug machine ang nakainom.—Roma 13:​1-5.

Gihatagan ta ni Jehova ug daghang nindot kaayong mga regalo, ug apil ana ang atong kagawasan sa pagdesisyon kon unsaon nato pag-enjoy kini nga mga regalo. Pananglitan, makapili ta kon unsay atong kaonon ug kon unsay atong imnon. Hinaot nga ang atong mga desisyon magpakita nga atong gipabilhan kini nga kagawasan pinaagi sa paggamit niini sa paagi nga makapalipay sa atong langitnong Amahan.