1. Unsay kinahanglang himoon sa usa ka brader aron masunod niya ang tambag nga ‘magmalig-on ug magpakalalaki’?

 SI Haring David miingon kang Solomon: “Magmalig-on ka ug magpakalalaki.” (1 Hari 2:​1-3) Kini nga tambag importanteng sundon sa tanang brader. Aron mahimo kini, kinahanglan nilang makat-onan ang pagsunod sa mga balaod sa Diyos ug ang pagpadapat sa mga prinsipyo sa Bibliya sa tanang bahin sa ilang kinabuhi. (Luc. 2:52) Nganong importante kaayo nga mahimong hamtong nga Kristohanon ang mga batan-ong brader?

2-3. Nganong importante nga ang batan-ong brader mahimong hamtong nga Kristohanon?

² Ang usa ka Kristohanong lalaki daghag importanteng responsibilidad diha sa pamilya ug sa kongregasyon. Mga batan-ong brader, seguradong nahunahunaan na ninyo ang mga responsibilidad nga puwede ninyong mabatonan sa umaabot. Tingali tumong ninyo nga mahimong payunir, ministeryal nga alagad, ug sa ulahi mahimong ansiyano. Tingali gusto pod ninyong magminyo ug makabaton ug anak. (Efe. 6:4; 1 Tim. 3:1) Aron makab-ot ni nga mga tumong, kinahanglan mong mahimong hamtong nga Kristohanon. b

³ Unsay makatabang ninyo nga mahimong hamtong nga Kristohanon? Naay importanteng mga skill nga kinahanglan ninyong makat-onan o ugmaron. Busa unsay puwede ninyong himoon karon aron makapangandam mo sa mga responsibilidad sa umaabot ug magmalamposon sa paghimo niini?

4. Asa ka makakitag maayong mga ehemplo nga puwede nimong sundogon? (Tan-awa sab ang hulagway.)

⁴ Pangitag maayong mga ehemplo nga puwede nimong sundogon. Sa Bibliya, daghag maayong mga ehemplo nga puwedeng  sundogon sa mga batan-ong brader. Ang maong mga lalaki nga gihisgotan sa Bibliya nahigugma sa Diyos ug nag-atiman ug lainlaing responsibilidad para sa katawhan sa Diyos. Makakita pod kag hamtong nga mga brader diha sa imong pamilya ug sa kongregasyon nga maayong mga ehemplo. (Heb. 13:7) Ug ang imong hingpit nga ehemplo mao si Jesu-Kristo. (1 Ped. 2:21) Samtang konsiderahon nimo pag-ayo kini nga mga ehemplo, matikdi ang ilang nindot nga mga hiyas. (Heb. 12:​1, 2) Dayon pamalandonga kon unsaon nimo sila pagsundog.

5. Sa unsang paagi nimo maugmad ang katakos sa panghunahuna, ug nganong importante kini? (Salmo 119:9)

⁵ Ugmara ug “ampingi . . . ang katakos sa panghunahuna.” (Prov. 3:21) Ang usa nga naay katakos sa panghunahuna mamalandong pag-ayo ayha mohimog desisyon. Busa paningkamot nga padayon kanang maugmad. Ngano? Kay kadaghanan sa batan-ong lalaki sa kalibotan karon naghimog mga desisyon base sa ilang emosyon o kaugalingong ideya. (Prov. 7:7; 29:11) Dugang pa, ang TV, mga salida, internet, ug social media posibleng makaimpluwensiya nimo. Pero sa unsang paagi maugmad nimo ang katakos sa panghunahuna? Una, tun-i ang mga prinsipyo sa Bibliya ug hunahunaa kon nganong makahatag kinig kaayohan. Dayon gamita ang maong mga prinsipyo sa paghimog mga desisyon nga makapalipay kang Jehova. (Basaha ang Salmo 119:9.) Kon ugmaron nimo ang katakos sa panghunahuna, makatabang nig dako aron mahimo kang hamtong nga Kristohanon. (Prov. 2:​11, 12; Heb. 5:14) Konsideraha kon sa unsang paagi ang katakos sa panghunahuna makatabang nimo niining duha ka situwasyon: (1) sa pagpakiglabot sa mga sister ug (2) sa paghimog mga desisyon bahin sa imong sininaan ug pamostura.

6. Sa unsang paagi ang katakos sa panghunahuna makatabang sa batan-ong brader sa pagpakitag pagtahod sa mga sister?

⁶ Ang katakos sa panghunahuna makatabang nimo sa pagpakitag pagtahod sa mga babaye. Normal lang sa usa ka batan-ong brader nga makagusto sa usa ka sister, ug dili na sayop. Pero ang batan-ong lalaki nga naay katakos sa panghunahuna dili mosulti, mosulat, o mohimog bisan unsa nga magpakitag romantikong pagbati sa usa ka sister gawas kon sinsero siya ug naa  siyay planong minyoan ang sister. (1 Tim. 5:​1, 2) Kon trato na niya ang usa ka sister, iyang maprotektahan ang maayong reputasyon niini kon dili sila mag-uban nga sila rang duha ug walay kasaligang chaperone.—1 Cor. 6:18.

7. Sa unsang paagi ang katakos sa panghunahuna makatabang sa batan-ong brader dihang modesisyon siya bahin sa sininaan ug pamostura?

⁷ Ang laing paagi nga mapakita sa batan-ong lalaki nga naugmad niya ang katakos sa panghunahuna mao ang paghimog maayong mga desisyon bahin sa sininaan ug pamostura. Daghan sa nag-design ug nag-advertise ug bag-ong style sa mga sinina wala magtahod kang Jehova o imoral ug pagkinabuhi. Busa ang mga sinina nga ilang gi-design fit kaayo o makapahimo sa lalaki nga morag babaye tan-awon. Dihang mopili kon unsay sul-obon, ang batan-ong lalaki nga gustong mohamtong maningkamot nga magpagiya sa mga prinsipyo sa Bibliya ug sa maayong mga ehemplo diha sa kongregasyon. Puwede niyang pangutan-on ang iyang kaugalingon: ‘Ang ako bang sininaan ug pamostura nagpakita nga naa koy katakos sa panghunahuna ug pagtahod sa uban? Makita ba sa uban pinaagi sa akong sininaan nga alagad ko sa Diyos?’ (1 Cor. 10:​31-33; Tito 2:6) Ang batan-ong lalaki nga naay katakos sa panghunahuna makabaton sa pag-uyon sa mga igsoon ug sa iyang langitnong Amahan.

8. Sa unsang paagi ang batan-ong brader makakat-on nga mahimong kasaligan?

⁸ Mahimong kasaligan. Ang kasaligan nga batan-ong lalaki magkugi sa pag-atiman sa iyang mga responsibilidad. (Luc. 16:10) Konsideraha ang hingpit nga ehemplo ni Jesus. Siya dili gyod iresponsable. Iyang gituman ang mga asaynment nga gihatag ni Jehova, bisan dihang lisod kining himoon. Gimahal niya ang mga tawo—ilabina ang iyang mga tinun-an—ug kinabubut-on niyang gihatag ang iyang kinabuhi para nila. (Juan 13:1) Masundog nimo si Jesus kon maningkamot ka nga himoon ang bisan unsang asaynment nga gihatag kanimo. Kon dili ka segurado kon unsaon ni paghimo, magmapainubsanon ug pangayog tabang sa hamtong nga mga brader. Ayawg kakontento nga basta mahimo lang nimo ang imong asaynment; ihatag ang imong pinakamaayo. (Roma 12:11) Humana ang imong asaynment ug himoa ni “para kang Jehova, ug dili para sa mga tawo.” (Col. 3:23) Siyempre, dili ka hingpit, busa magmapainubsanon ug angkona ang mga sayop nga imong mahimo.—Prov. 11:2.

9. Nganong kinahanglang magkat-on ang batan-ong brader ug praktikal nga mga skill?

⁹ Aron mahimong hamtong nga Kristohanon, kinahanglan kang magkat-on ug praktikal nga mga skill. Makatabang ni nimo nga mahimo ang imong mga responsibilidad sa kongregasyon, makakitag trabaho nga makasuportar nimo o sa imong pamilya, ug makabaton ug maayong relasyon sa uban. Konsideraha ang pipila niining importante nga mga skill.

10-11. Sa unsang paagi makabenepisyo ang batan-ong brader ug ang kongregasyon kon maayo siyang mobasa ug mosulat? (Salmo 1:​1-3) (Tan-awa sab ang hulagway.)

¹⁰ Pagkat-on nga mahimong maayo sa pagbasa ug pagsulat. Ang Bibliya nag-ingon nga ang  malipayon ug malamposon nga tawo mogahin ug panahon kada adlaw sa pagbasa sa Pulong sa Diyos ug pagpamalandong niana. (Basaha ang Salmo 1:​1-3.) Pinaagi sa pagbasa sa Bibliya kada adlaw, mahibaloan niya ang panghunahuna ni Jehova, nga makatabang niya nga makabatog hustong panghunahuna ug mapadapat ang iyang nakat-onan. (Prov. 1:​3, 4) Ang ingon niini nga mga brader gikinahanglan sa kongregasyon. Ngano?

¹¹ Ang atong mga igsoon nanginahanglan ug mga brader nga naay katakos sa pagtudlo ug paghatag ug tambag nga gibase sa Bibliya. (Tito 1:9) Kon maayo kang mobasa ug mosulat, makaandam kag mga komento ug pakigpulong nga makapalig-on sa pagtuo ug makahatag ug kaayohan sa uban. Makahimo pod kag mapuslanon nga mga note samtang magtuon ka ug maminaw sa mga pakigpulong diha sa tigom, asembliya, ug kombensiyon. Kini nga mga note makatabang nimo sa pagpalig-on sa imong pagtuo ug sa pagdasig sa uban.

12. Unsay makatabang nimo nga mahimong maayo sa pagpakigkomunikar?

¹² Ugmara ang maayong paagi sa pagpakigkomunikar. Ang mga brader kinahanglang maningkamot nga mahimong maayo niining bahina. Ang usa ka lalaki nga maayong makigkomunikar maminaw ug mosabot sa hunahuna ug pagbati sa uban. (Prov. 20:5) Masabtan niya ang ilang tono sa tingog, ekspresyon sa nawong, ug linihokan. Dili ni nimo makat-onan kon dili ka makig-uban sa mga tawo. Kon pirme kang mogamit ug electronic nga mga tool sa pagpakigkomunikar, sama sa email ug text, basin mas malisdan ka nga mahimong maayo sa pagpakigkomunikar sa personal. Busa pangitag mga kahigayonan nga personal nimong maestorya ang uban.—2 Juan 12.

13. Unsa pay kinahanglang makat-onan sa batan-ong brader? (1 Timoteo 5:8) (Tan-awa sab ang hulagway.)

¹³ Pagkat-on nga masuportahan ang imong kaugalingon. Aron mohamtong ang usa ka brader, kinahanglang makakat-on siya nga suportahan ang iyang kaugalingon ug ang iyang pamilya. (Basaha ang 1 Timoteo 5:8.) Sa ubang nasod, ang mga batan-ong brader makakat-on tingali ug skill gikan sa ilang papa o paryente. Sa ubang lugar pod, ang mga batan-on makakat-on tingalig trabaho o skill samtang naa sa high school. Bisag unsa pay kahimtang, maayo gyod nga makakat-on kag skill nga makatabang nimo sa pagpangitag trabaho. (Buh. 18:​2, 3; 20:34; Efe. 4:28) Pagkugi ug seguroa nga mahuman nimo ang trabaho nga imong sugdan. Mamatikdan ni sa uban ug makatabang ni nga makabaton kag maayong reputasyon. Kon imo ning himoon, mas dali kang makakitag trabaho ug makapabilin niana. Ang mga hiyas ug skill nga atong nahisgotan importante pod aron mahimo sa usa ka brader ang iyang mga responsibilidad  sa umaabot. Hisgotan nato ang pipila niini nga mga responsibilidad.

14. Sa unsang paagi ang batan-ong brader makapangandam sa bug-os panahong pag-alagad?

¹⁴ Bug-os panahong alagad. Daghang hamtong nga brader ang batan-on pang nagsugod sa bug-os panahong pag-alagad. Ang pagpayunir makatabang sa mga batan-on nga makakat-on sa pagpakig-uban sa lainlaing personalidad. Makatabang pod ni nila nga makakat-on sa pag-budget. (Filip. 4:​11-13) Ang maayong paagi aron maandam sa bug-os panahong pag-alagad mao ang pag-oksilyare payunir. Daghan ang nag-oksilyare payunir sulod sa pipila ka panahon ug nakatabang ni aron maandam sila sa pagregular payunir. Ang pagpayunir mag-abli sa ubang kahigayonan sa bug-os panahong pag-alagad, apil na ang pag-alagad ingong construction servant o Bethelite.

15-16. Sa unsang paagi ang batan-ong brader mahimong kuwalipikado sa pag-alagad sa kongregasyon?

¹⁵ Ministeryal nga alagad o ansiyano. Ang mga brader kinahanglang naay tumong nga mahimong kuwalipikado sa pag-alagad sa mga igsoon ingong ansiyano. Ang Bibliya nag-ingon nga ang mga brader nga nangab-ot niini nga pribilehiyo “nagtinguhag maayong buhat.” (1 Tim. 3:1) Sa dili pa mag-alagad ingong ansiyano, ang usa ka brader kinahanglang mokuwalipikar ingong ministeryal nga alagad. Ang ministeryal nga mga alagad nagtabang sa mga ansiyano sa daghang praktikal nga paagi. Ang mga ansiyano ug ministeryal mapainubsanong nag-alagad sa mga igsoon ug madasigong nakigbahin sa ministeryo. Ang mga batan-ong brader puwedeng mokuwalipikar ingong ministeryal nga alagad bisag wala pa silay 20 anyos. Ug ang kuwalipikado kaayo nga ministeryal nga alagad puwedeng matudlo ingong ansiyano bisag mga 20 anyos pa siya.

¹⁶ Sa unsang paagi ka mokuwalipikar niini nga mga pribilehiyo? Ang kuwalipikasyon para sa ministeryal nga mga alagad ug mga ansiyano gibase diha sa Bibliya ug sa gugma kang Jehova, sa imong pamilya, ug sa kongregasyon. (1 Tim. 3:​1-13; Tito 1:​6-9; 1 Ped. 5:​2, 3) Paningkamoti nga masabtan nimo ang matag kuwalipikasyon. Ug iampo kang Jehova nga tabangan ka nga makab-ot kini. c

17. Sa unsang paagi makapangandam ang batan-ong brader sa pagkahimong bana ug ulo sa pamilya? (Tan-awa sab ang hulagway.)

¹⁷ Bana ug ulo sa pamilya. Sama sa giingon ni Jesus, ang ubang hamtong nga Kristohanong lalaki wala magminyo. (Mat. 19:12) Pero kon modesisyon ka nga magminyo, madugangan ang imong responsibilidad kay mahimo kang bana  ug ulo sa pamilya. (1 Cor. 11:3) Gidahom ni Jehova nga higugmaon sa bana ang iyang asawa ug itagana ang iyang pisikal, emosyonal, ug espirituwal nga panginahanglan. (Efe. 5:​28, 29) Ang mga hiyas ug skill nga gihisgotan sa nag-unang mga parapo, sama sa pag-ugmad ug katakos sa panghunahuna, pagtahod sa mga babaye, ug pagkahimong kasaligan, makatabang aron mahimo kang maayong bana. Kini mag-andam nimo sa pagtuman sa responsibilidad ingong bana ug ulo sa pamilya.

18. Sa unsang paagi ang batan-ong brader maandam sa pagkahimong amahan?

¹⁸ Amahan. Kon maminyo ka, posible kang mahimong amahan. Unsay imong makat-onan kang Jehova bahin sa pagkahimong maayong amahan? Naay daghan. (Efe. 6:4) Gisulti gyod ni Jehova sa iyang Anak nga si Jesus nga iya siyang gimahal ug giuyonan. (Mat. 3:17) Kon mahimo kang amahan, paneguroa nga pirme nimong mapasaligan ang imong mga anak nga gimahal nimo sila. Komendahi sila kanunay sa maayong mga butang nga ilang mahimo. Ang mga amahan nga nagsundog sa ehemplo ni Jehova makatabang sa ilang mga anak nga mahimong hamtong nga Kristohanon. Makapangandam ka para niini nga responsibilidad kon pakitaan nimog pagmahal ang mga membro sa inyong pamilya ug ang kongregasyon, ug kon magkat-on ka nga ipahayag ang imong gugma ug apresasyon kanila. (Juan 15:9) Makatabang ni nga mahimo kang maayong bana ug amahan sa umaabot. Samtang mangandam ka niini, mahimo kang bililhon para kang Jehova ug dakong panalangin sa imong pamilya ug sa kongregasyon.

19-20. Unsay makatabang sa mga batan-ong brader aron mahimo silang hamtong nga Kristohanon? (Tan-awa ang hulagway sa atubangan sa magasin.)

¹⁹ Mga batan-ong brader, dili awtomatiko nga mahimo mong hamtong nga Kristohanon. Kinahanglan mong mopilig maayong mga ehemplo nga inyong sundogon, mag-ugmad ug katakos sa panghunahuna, mahimong kasaligan, magkat-on ug praktikal nga mga skill, ug mangandam sa umaabot nga mga responsibilidad.

²⁰ Usahay, mabug-atan tingali mo dihang inyong hunahunaon ang mga butang nga kinahanglan ninyong himoon. Pero molampos mo sa paghimo ana. Hinumdomi nga si Jehova gusto kaayong motabang ninyo. (Isa. 41:​10, 13) Siyempre, tabangan pod mo sa mga igsoon sa kongregasyon. Dihang makab-ot ninyo ang inyong bug-os nga potensiyal ingong hamtong nga Kristohanon, ang inyong kinabuhi magmalipayon gyod. Gimahal mo namo, mga batan-ong brader! Hinaot si Jehova dagayang magpanalangin ninyo samtang naningkamot mo nga mahimong hamtong nga Kristohanon.—Prov. 22:4.