1. Aron mahimong hamtong nga Kristohanon, unsay kinahanglan natong himoon?

 ANG bata paspas gyong modako ug mohamtong, nga mora bag awtomatiko ning mahitabo. Pero ang pagkahimong hamtong nga Kristohanon dili gyod awtomatiko; nagkinahanglan nig paningkamot. b (1 Cor. 13:11; Heb. 6:1) Aron mahimong hamtong nga Kristohanon, kinahanglang naa tay suod nga relasyon kang Jehova. Gikinahanglan pod nato ang iyang balaang espiritu samtang nag-ugmad tag maayong mga hiyas, nagkat-on ug praktikal nga mga skill, ug nangandam sa umaabot nga mga responsibilidad.—Prov. 1:5.

2. Unsay atong makat-onan sa Genesis 1:​27, ug unsay atong hisgotan niini nga artikulo?

² Gihimo ni Jehova ang mga tawo nga lalaki o babaye. (Basaha ang Genesis 1:27.) Klaro nga ang lalaki ug babaye managlahi sa pisikal, pero managlahi pod sila sa ubang paagi. Pananglitan, gihimo ni Jehova ang lalaki ug babaye nga naay espesipikong mga responsibilidad, maong nagkinahanglan silag mga hiyas ug skill nga motabang nila sa paghimo niini nga mga responsibilidad. (Gen. 2:18) Niining artikuloha, hisgotan nato kon unsay puwedeng himoon sa batan-ong sister aron mahimo siyang hamtong nga Kristohanon. Sa sunod nga artikulo, hisgotan nato kon unsay puwedeng himoon sa mga batan-ong brader.

3-4. Asa makakita ang mga batan-ong sister ug maayong ehemplo nga puwede nilang sundogon? (Tan-awa sab ang hulagway.)

³ Gihisgotan sa Bibliya ang daghang babaye nga nahigugma  kang Jehova ug nag-alagad kaniya, ug maayo sila nga ehemplo. (Tan-awa sa jw.org ang artikulo nga “Mga Babaye Diha sa Bibliya—Unsay Atong Makat-onan Kanila?”) Naa nila ang mga hiyas nga gihisgotan sa atong temang teksto. Sila “may pagpugong sa kaugalingon” ug “matinumanon sa tanang butang.” Dugang pa, ang mga sister makakitag hamtong nga Kristohanong mga babaye diha sa ilang kongregasyon nga puwede nilang sundogon.

⁴ Mga batan-ong sister, naa ba moy nailhan nga hamtong nga mga babayeng Kristohanon nga puwede ninyong sundogon? Matikdi ang ilang nindot nga mga hiyas, dayon hunahunaa kon unsaon ninyo kana pagsundog. Sa mosunod nga mga parapo, hisgotan nato ang tulo ka importanteng hiyas nga kinahanglang ugmaron sa mga sister aron mahimo silang hamtong.

5. Nganong ang pagkamapainubsanon importante aron mahimong hamtong nga Kristohanong babaye?

⁵ Ang pagkamapainubsanon importante kaayo aron mahimong hamtong nga Kristohanon. Kon ang usa ka babaye mapainubsanon, mabatonan niya ang maayong relasyon kang Jehova ug sa uban. (Sant. 4:6) Pananglitan, ang usa ka babaye nga nahigugma kang Jehova mapainubsanong mosunod sa kahikayan sa pagkaulo nga naggikan sa iyang langitnong Amahan. (1 Cor. 11:3) Kana nga kahikayan mapadapat diha sa kongregasyon ug sa iyang pamilya. c

6. Unsay makat-onan sa mga batan-ong sister bahin sa pagkamapainubsanon ni Rebeca?

⁶ Konsideraha ang ehemplo ni Rebeca. Sa tibuok niyang kinabuhi, iyang gipakita nga maalamon siya kay naa siyay inisyatibo ug kaisog sa paghimog desisyon. (Gen. 24:58; 27:​5-17) Pero matinahoron siya ug mapinasakopon. (Gen. 24:​17, 18, 65) Kon mapainubsanon nimong suportahan ang mga kahikayan ni Jehova, sama sa gihimo ni Rebeca, mahimo kang maayong impluwensiya sa imong pamilya ug sa kongregasyon.

7. Sa unsang paagi masundog sa mga batan-ong sister ang pagkamakasaranganon ni Ester?

⁷ Ang pagkamakasaranganon maoy laing hiyas nga gikinahanglan aron mahimong hamtong  nga Kristohanon. Ang Bibliya nagdasig nato nga magpaubos ug ilhon ang atong limitasyon. (Prov. 11:2) Si Ester makasaranganon ug matinumanon nga alagad sa Diyos. Tungod ana, wala siya mangahas sa paghimog mga desisyon o mahimong mapahitas-on. Gisunod niya ang tambag sa iyang ig-agaw nga si Mardokeo. (Est. 2:​10, 20, 22) Mahimo pod kang makasaranganon kon mangayo kag maayong tambag sa uban ug sundon kana.—Tito 2:​3-5.

8. Sumala sa 1 Timoteo 2:​9, 10, sa unsang paagi ang pagkamakasaranganon makatabang sa mga sister sa paghimog maalamong desisyon bahin sa sininaan ug pamostura?

⁸ Gipakita pod ni Ester ang pagkamakasaranganon sa laing paagi. Siya “nindot ug lawas ug guwapa”; pero wala siya magtinguha nga mapokus kaniya ang atensiyon. (Est. 2:​7, 15) Unsay makat-onan sa mga sister sa ehemplo ni Ester? Ang usa niana mao ang gihisgotan sa 1 Timoteo 2:​9, 10. (Basaha.) Giingnan ni apostol Pablo ang Kristohanong mga babaye nga magsul-ob ug sinina nga magpakitag pagtahod sa kaugalingon ug sa uban ug maayong panghunahuna. Ang Gregong mga pulong nga gigamit dinhi nagpasiugda nga ang sininaan sa Kristohanong babaye kinahanglang magpakitag pagtahod ug konsiderasyon sa pagbati o opinyon sa uban. Proud gyod ta sa atong minahal nga Kristohanong mga sister kay makasaranganon silag sininaan!

9. Unsay atong makat-onan sa ehemplo ni Abigail?

⁹ Ang katakos sa pag-ila maoy laing hiyas nga kinahanglang ipakita sa tanang sister. Unsa ang katakos sa pag-ila? Kini maoy katakos sa pag-ila kon unsay husto ug sayop ug sa pagpili kon unsay maalamong buhaton. Konsideraha ang ehemplo ni Abigail. Ang iyang bana mihimog dili maayong desisyon nga naa unyay dakong epekto sa iyang tibuok panimalay. Si Abigail milihok dayon. Ang iyang maayong panghukom nakaluwas ug kinabuhi. (1 Sam. 25:​14-23, 32-35) Ang katakos sa pag-ila makatabang pod nato sa pagkahibalo kon kanus-a mosulti ug kon kanus-a maghilom. Ug makatabang ni nato nga dili manghilabot sa kinabuhi sa uban dihang magpakitag personal nga interes kanila.—1 Tes. 4:11.

10-11. Sa unsang paagi makabenepisyo ka ug ang uban kon maayo kang mobasa ug mosulat? (Tan-awa sab ang hulagway.)

¹⁰ Ang Kristohanong mga babaye kinahanglang makakat-on ug praktikal nga mga skill. Ang ubang skill nga makat-onan sa usa ka babaye sa bata pa siya makatabang niya sa tibuok niyang kinabuhi. Konsideraha ang pipila ka pananglitan.

¹¹ Pagkat-on nga mahimong maayo sa pagbasa ug pagsulat. Sa ubang kultura, ang pagbasa ug pagsulat wala giisip nga importanteng skill nga kinahanglang makat-onan sa mga babaye. Pero importante ni nga skill para sa tanang Kristohanon. d (1 Tim. 4:13) Busa ayawg tugoti nga naay  makapugong nimo sa pagkat-on nga mahimong maayo sa pagbasa ug pagsulat. Unsang mga benepisyo ang imong madawat kon imo ning himoon? Kini nga mga skill motabang nimo nga makakitag trabaho ug magpabilin niana. Mahimo kang maayong estudyante ug magtutudlo sa Pulong sa Diyos. Labaw sa tanan, mas masuod ka kang Jehova samtang imong basahon ang iyang Pulong ug pamalandongon kana.—Jos. 1:8; 1 Tim. 4:15.

12. Unsay atong makat-onan sa Proverbio 31:26?

¹² Ugmara ang maayong paagi sa pagpakigkomunikar. Importante ni para sa mga Kristohanon. Bahin niini, ang tinun-ang si Santiago naghatag ug praktikal nga tambag para nato: “Ang matag usa kinahanglang abtik sa pagpaminaw, hinay sa pagsulti.” (Sant. 1:19) Dihang maminaw ka pag-ayo samtang nagsulti ang uban, makapakita kag “empatiya” kanila. (1 Ped. 3:​8, footnote) Kon dili ka segurado nga imong nasabtan ang gisulti o gibati sa imong kaestorya, puwede nimo siyang pangutan-on ug haom nga mga pangutana. Dayon paghunahuna kadiyot ayha ka mosulti. (Prov. 15:​28, footnote) Pangutan-a ang kaugalingon: ‘Ang ako bang isulti tinuod ug makapadasig? Kini ba nagpakitag pagtahod ug pagkabuotan?’ Pagkat-on gikan sa hamtong nga mga sister nga maayong mokomunikar. (Basaha ang Proverbio 31:26.) Obserbahi ang ilang paagi sa pagsulti. Kon maugmad nimo ang maayong paagi sa pagpakigkomunikar, mas mabatonan nimo ang maayong relasyon sa uban.

13. Sa unsang paagi ka makakat-on sa pag-atiman sa panimalay? (Tan-awa sab ang hulagway.)

¹³ Pagkat-on sa pag-atiman sa panimalay. Sa daghang lugar, mga babaye ang naghimo sa kadaghanang buluhaton sa balay. Ang imong mama o laing hamtong nga sister makatabang nimo sa pagkat-on sa paghimo niini. Ang sister nga si Cindy miingon: “Ang usa sa pinakamaayong nakat-onan nako gikan kang mama mao nga kon kugihan ta, malipayon ta. Kay gitudloan ko niya kon unsaon pagluto, pagpanghinlo, pagpanahi, ug pagpamalit, naatiman nako ang akong kaugalingon ug mas daghan kog nahimo para kang Jehova. Gitudloan pod ko ni Mama nga mahimong maabiabihon, ug tungod niini nailaila nako ang maayog ehemplo nga mga igsoon nga puwede nakong sundogon.” (Prov. 31:​15, 21, 22) Ang kugihan ug maabiabihon nga babaye nga nakakat-on sa pag-atiman sa panimalay maoy panalangin sa iyang pamilya ug sa kongregasyon.—Prov. 31:​13, 17, 27; Buh. 16:15.  

14. Unsay imong nakat-onan sa eksperyensiya ni Crystal, ug asa ka angayng magpokus?

¹⁴ Pagkat-on nga masuportahan ang kaugalingon. Importante ni nga tumong para sa tanang hamtong nga Kristohanon. (2 Tes. 3:​7, 8) Ang sister nga si Crystal miingon: “Gitabangan ko sa akong ginikanan sa pagpilig mga subject sa high school nga makatabang aron makakat-on kog skill nga akong magamit sa ulahi. Giingnan ko ni Papa nga mokuhag accounting  class ug nakatabang gyod ni nako.” Gawas sa pagkat-on ug mga skill nga gikinahanglan aron makakitag trabaho, paningkamoti nga makakat-on ka kon unsaon pag-budget. (Prov. 31:​16, 18) Kon likayan nimo ang wala kinahanglana nga pagpangutang ug makontento ka sa simpleng kinabuhi, makapokus ka sa imong espirituwal nga mga tumong.—1 Tim. 6:8.

15-16. Nganong panalangin sa kongregasyon ang dili minyong mga sister? (Marcos 10:​29, 30)

¹⁵ Kon mag-ugmad kag mga hiyas nga makapalipay kang Jehova ug magkat-on ug importanteng mga skill, makatabang ni nimo nga mahimong andam sa umaabot. Konsideraha ang pipila ka pananglitan sa mga puwede nimong himoon.

¹⁶ Puwede usa kang magpabiling dalaga. Base sa mga pulong ni Jesus, ang ubang babaye midesisyon nga dili magminyo, bisag wala ni gidasig sa ilang kultura. (Mat. 19:​10-12) Ang uban nagpabiling dalaga tungod sa lainlaing rason. Makaseguro ka nga wala mamenosi ang imong bili para kang Jehova ug Jesus tungod sa imong pagkadili-minyo. Sa tibuok kalibotan, ang dili minyong mga sister maoy dakong panalangin sa kongregasyon. Tungod sa ilang gugma ug sinserong interes sa uban, nahimo silang espirituwal nga mga igsoon ug inahan ngadto sa daghan.—Basaha ang Marcos 10:​29, 30; 1 Tim. 5:2.

17. Sa unsang paagi makapangandam ang batan-ong sister sa bug-os panahong pag-alagad?

¹⁷ Puwede kang mahimong bug-os panahong alagad. Ang Kristohanong mga babaye dako kaayog nahimo sa buluhatong pagsangyaw sa tibuok kalibotan. (Sal. 68:11) Puwede ba nimong planohon karon nga mosulod sa bug-os panahong pag-alagad? Puwede ka mahimong payunir, construction volunteer, o Bethelite. Iampo ang imong tumong. Pakig-estorya sa uban nga nakakab-ot niana nga tumong, ug sayra kon unsay kinahanglan nimong buhaton aron mahimong kuwalipikado. Dayon paghimog realistikong plano. Kon imong makab-ot ang imong tumong, mag-abli nig daghang nindot nga kahigayonan para nimo sa pag-alagad kang Jehova.

18. Nganong angayng pilion ug maayo sa usa ka sister ang iyang mabana? (Tan-awa sab ang hulagway.)

¹⁸ Puwede kang modesisyon nga magminyo. Ang mga hiyas ug skill nga atong gihisgotan makatabang nimo nga mahimong maayong asawa. Siyempre, kon naghunahuna kang magminyo, kinahanglang pilion nimog maayo ang  imong mabana. Kini ang usa sa pinakaimportanteng desisyon nga imong himoon. Hinumdomi nga mailalom ka sa pagkaulo sa lalaki nga imong minyoan. (Roma 7:2; Efe. 5:​23, 33) Busa pangutan-a ang kaugalingon: ‘Hamtong ba siya nga Kristohanon? Ginauna ba niya si Jehova sa iyang kinabuhi? Maalamon ba ang iyang mga desisyon? Moangkon ba siya kon masayop siya? Naa ba siyay pagtahod sa mga babaye? Kaya ba ko niyang suportahan sa espirituwal, materyal, ug emosyonal? Responsable ba siya? Pananglitan, unsay iyang mga asaynment sa kongregasyon ug giunsa na niya pag-atiman?’ (Luc. 16:10; 1 Tim. 5:8) Siyempre, kon gusto nimong makakitag maayong bana, kinahanglan nga mangandam pod ka nga mahimong maayong asawa.

19. Nganong ang pagkahimong “katimbang” naghatag ug pasidungog sa asawa?

¹⁹ Ang Bibliya nag-ingon nga ang maayong asawa maoy “katimbang” o magtatabang ug “kauban” sa iyang bana. (Gen. 2:18) Nakapamenos ba ni sa bili sa asawa? Wala! Kini nga papel naghatag ug pasidungog sa asawa. Gani sa Bibliya, kadaghan gitawag si Jehova ingong “magtatabang.” (Sal. 54:4; Heb. 13:6) Mahimong tinuod nga katimbang ang asawa dihang iyang suportahan ang mga desisyon sa iyang bana nga makaapektar sa pamilya. Ug kay nahigugma siya kang Jehova, maningkamot siya nga makita sa uban ang maayong mga hiyas sa iyang bana. (Prov. 31:​11, 12; 1 Tim. 3:11) Maandam ka para niini kon palalomon nimo ang imong gugma kang Jehova ug maningkamot ka nga mahimong katimbang sa uban diha sa balay ug sa kongregasyon.

20. Unsay mahimo sa usa ka inahan para sa iyang pamilya?

²⁰ Puwede kang mahimong inahan. Human ka maminyo, ikaw ug ang imong bana puwedeng magkaanak. (Sal. 127:3) Busa mas maayong mangandam daan. Ang mga hiyas ug skill nga atong nahisgotan niini nga artikulo makatabang nimo kon mahimo kang asawa ug inahan. Ang imong gugma, pagkabuotan, ug pailob makatabang nga ang imong pamilya magmalipayon ug ang imong mga anak mobating luwas ug gimahal.—Prov. 24:3.

21. Unsay atong gibati bahin sa atong mga sister, ug ngano? (Tan-awa ang hulagway sa atubangan sa magasin.)

²¹ Gimahal mo namo, mga sister, tungod sa tanan ninyong gihimo para kang Jehova ug sa iyang katawhan. (Heb. 6:10) Naningkamot mo sa pag-ugmad ug maayong mga hiyas, sa pagkat-on ug mga skill nga makatabang ninyo ug makapalipay sa uban, ug sa pagpangandam para sa inyong umaabot nga mga responsibilidad. Bililhon kaayo mo sa organisasyon ni Jehova!