1-2. Unsang mga situwasyon nga makahilak tingali ta?

 KITANG tanan nakahilak na. Usahay makahilak ta tungod sa kalipay. Pananglitan, tingali nakahilak ka dihang naay nahitabo nga importante o espesyal kaayo para nimo—sama nianang natawo ang imong anak, dihang nakahinumdom kag makapalipay nga kasinatian, o dihang nakita nimo pag-usab ang imong suod nga higala nga dugay na nimong wala makita.

² Pero sagad mohilak ta tungod sa kaguol. Pananglitan, makahilak tingali ta kon nasakitan ta pag-ayo sa gihimo sa uban. Makahilak pod ta kon mag-antos ta ug grabeng sakit o kaha mamatyan ug minahal. Nianang mga panahona, bation tingali nato ang gibati ni propetang Jeremias dihang gilaglag sa mga Babilonyanhon ang Jerusalem. Si Jeremias miingon: “Ang luha sa akong mga mata samag suba nga nagaagos . . . Ang akong mga mata walay hunong sa paghilak.”—Lam. 3:​48, 49.

3. Unsay bation ni Jehova dihang makita niya ang iyang mga alagad nga nag-antos? (Isaias 63:9)

³ Nahibalo si Jehova kon kapila na ta mihilak tungod sa makapaguol nga mga kahimtang, ug nakita gyod niya ang atong mga luha. Gipasaligan ta sa Bibliya nga nakita ni Jehova ang bisan unsang kasakit nga giantos sa iyang mga alagad, ug nadungog niya ang atong mga pag-ampo alang sa tabang. (Sal. 34:15) Pero dili kay kana lang. Samag mahigugmaong ginikanan, matandog gyod si Jehova dihang makita niya ang iyang mga anak nga mohilak, ug gusto gyod siyang motabang nila.—Basaha ang Isaias 63:9.

4. Kinsa nga mga pananglitan sa Bibliya ang atong hisgotan, ug unsay atong makat-onan niana bahin kang Jehova?

 ⁴ Gipakita sa Bibliya kon unsay gibati ni Jehova dihang nakita niya ang iyang mga alagad nga mihilak ug kon unsay iyang gihimo aron tabangan sila. Makita nato ni sa pananglitan ni Ana, David, ug Haring Ezequias. Nganong mihilak man sila? Giunsa sila pagtabang ni Jehova? Ug sa unsang paagi ang ilang mga kasinatian makahupay nato dihang mohilak ta tungod kay naguol, giluiban, o mibating walay paglaom?

MGA LUHA SA KAGUOL

5. Unsay gibati ni Ana sa iyang situwasyon?

⁵ Si Ana daghag giatubang nga problema ug tungod niana mihilak siya sa kaguol. Usa sa iyang mga problema mao nga ang iyang bana naay laing asawa, si Penina, kinsa kanunayng nagtamay niya. Ang nakapait pa gyod kay si Ana baog pero si Penina daghag anak. (1 Sam. 1:​1, 2) Si Penina kanunayng nagbiaybiay kang Ana kay baog siya. Kon ikaw si Ana, unsa kahay imong bation? Tungod sa grabeng kaguol ni Ana, “siya mohilak ug dili mokaon” ug “pait kaayo ang [iyang] gibati.”—1 Sam. 1:​6, 7, 10.

6. Unsay gihimo ni Ana aron mahupayan siya?

⁶ Sa unsang paagi nahupayan si Ana? Ang usa nga nakatabang niya mao ang pag-adto sa tabernakulo, ang sentro sa matuod nga pagsimba kaniadto. Didto, posibleng duol sa entrada sa hawanan sa tabernakulo, “siya miampo kang Jehova ug mihilak pag-ayo.” Iyang gihangyo si Jehova: ‘Hatagig pagtagad ang kasakitan sa imong alagad ug hinumdomi ko.’ (1 Sam. 1:10b, 11) Gibubo ni Ana kang Jehova ang tanan niyang gibati pinaagi sa pag-ampo. Seguradong naluoy ug natandog gyod si Jehova dihang nakita niya ang mga luha sa iyang pinalanggang alagad!

7. Unsay resulta human ibubo ni Ana kang Jehova ang tanan niyang gibati?

⁷ Human ibubo ni Ana kang Jehova ang tanan niyang gibati, gipasaligan siya sa hataas nga saserdoteng si Eli nga tubagon ni Jehova ang iyang pag-ampo. Unsay iyang gibati human niana? Ang Bibliya nag-ingon: “Si Ana milakaw ug mikaon, ug ang iyang nawong dili na magul-anon.” (1 Sam. 1:​17, 18) Bisan tuod wala pa mawala ang iyang problema, nahupayan na si Ana. Iya nang gitugyan kang Jehova ang iyang bug-at nga problema. Nakita ni Jehova ang iyang grabeng kaguol, nadungog ang iyang paghilak, ug sa ulahi gipanalanginan siya pinaagi sa paghatag niyag mga anak.—1 Sam. 1:​19, 20; 2:21.

8-9. Base sa Hebreohanon 10:​24, 25, nganong angay natong himoon ang atong maarangan sa pagtambong sa mga tigom? (Tan-awa sab ang hulagway.)

⁸ Kon unsay atong makat-onan. Naa ba kay gisagubang karon nga lisod nga situwasyon nga tungod niana maghilak ka sa kaguol?  Tingali namatyan kag membro sa pamilya o higala. Sa ingon niana nga situwasyon, natural lang nga gusto natong mag-inusara. Pero sama kang Ana nga nahupayan ug nadasig kay miadto siya sa tabernakulo, mahupayan pod ka kon motambong ka sa mga tigom—bisan pag wala kay gana. (Basaha ang Hebreohanon 10:​24, 25.) Sa mga tigom, makadungog tag makapahupay nga mga teksto sa Bibliya. Usa ni sa mga paagi nga ginatabangan ta ni Jehova nga mogaan ang atong gibati ug mahimong mas positibo. Makatabang na nga dili ta malumsan sa atong kaguol bisag naa pa gihapon ang atong problema.

⁹ Sa mga tigom, makauban pod nato ang mahigugmaong mga igsoon kinsa andam mohupay nato. (1 Tes. 5:​11, 14) Konsideraha ang eksperyensiya sa usa ka brader nga espesyal payunir, kinsa namatyan ug asawa. Siya miingon: “Makahilak gihapon ko. Usahay gusto lang kong mag-inusara ug mohilak. Pero madasig gyod ko sa atong mga tigom. Mahupayan kaayo ko sa makapalig-on nga mga pulong sa mga igsoon. Bisag guol kaayo ko ug mabalaka, mogaan gyod ang akong gibati dihang motambong ko sa mga tigom.” Dihang naa ta sa atong mga tigom, gamiton ni Jehova ang mga igsoon sa paghupay nato.

10. Unsaon nato pagsundog si Ana kon grabe ang atong kaguol?

¹⁰ Nahupayan pod si Ana dihang gibubo niya kang Jehova ang iyang gibati pinaagi sa pag-ampo. Sama sa gihimo ni Ana, puwede nimong ‘itugyan kang Jehova ang tanan nimong kabalaka,’ ug makasalig ka nga maminaw siya nimo. (1 Ped. 5:7) Ang usa ka sister kansang bana gipatay sa mga tulisan nahinumdom: “Samag nadugmok pag-ayo ang akong kasingkasing ug abi nakog dili na gyod ni maulian. Pero sa dihang moampo ko sa akong mahigugmaong langitnong Amahan, si Jehova, mahupayan gyod ko. Usahay dili nako masulti kon unsa gyoy akong gibati, pero nakasabot siya nako. Dihang mobati kog grabeng kaguol ug kabalaka, mohangyo ko kang Jehova nga hatagan kog kalinaw. Human ana mokalma na ko ug mobatig kalinaw sa hunahuna, ug okey na dayon ko.” Kon imong ibubo kang Jehova ang imong mga kabalaka, matandog gyod siya sa imong mga luha sa kaguol kay nakasabot siya sa imong gibati nga kasakit. Bisag naa gihapon ang imong problema, si Jehova makahupay ug makatabang nimo nga magmalinawon. (Sal. 94:19; Filip. 4:​6, 7) Ug iya gyod kang panalanginan sa imong matinumanong paglahutay.—Heb. 11:6.

MGA LUHA TUNGOD SA PAGLUIB

11. Unsay gibati ni David sa lisod nga mga situwasyon nga iyang nasinatian?

¹¹ Sa tibuok kinabuhi ni David, daghan siyag nasinatian nga lisod nga mga situwasyon nga nakapahilak niya. Daghan ang nagdumot niya ug giluiban pa gani siya sa pipila niya ka higala ug membro sa pamilya. (1 Sam. 19:​10, 11; 2 Sam. 15:​10-14, 30) Dihay higayon nga siya misulat: “Naluya ko tungod sa akong pagpanghupaw; sa tibuok gabii gihumod nako sa mga luha ang akong higdaanan; nabahaan ang akong kama tungod sa akong paghilak.” Nganong mibati si David niana? “Tungod sa tanang nagaatake kanako,” siya miingon. (Sal. 6:​6, 7) Nasakitan pag-ayo si David sa gihimo sa uban, nga tungod niana kadaghan siyang mihilak.

12. Base sa Salmo 56:​8, sa unsa kombinsido si David?

¹² Bisan pa sa mga kalisdanan nga naatubang ni David, kombinsido siya nga gimahal siya ni Jehova. Siya misulat: “Si Jehova magpatalinghog sa tingog sa akong paghilak.”  (Sal. 6:8) Sa laing higayon, naa siyay gisulat nga makapainteres kaayo, nga makita nato sa Salmo 56:8. (Basaha.) Ang maong mga pulong nagpakita kon unsa ka mapinanggaon si Jehova. Gibati ni David nga samag gitigom ni Jehova ang iyang mga luha diha sa usa ka sudlanan o girekord ni sa usa ka basahon. Segurado si David nga nakita ni Jehova ang iyang kasakit ug nga Iya ning gihinumdoman. Kombinsido si David nga ang iyang mahigugmaong langitnong Amahan nahibalo dili lang sa iyang naagian, kondili sa iya pong gibati tungod niana.

13. Kon naay makapasakit nato, unsay angay natong hinumdoman? (Tan-awa sab ang hulagway.)

¹³ Kon unsay atong makat-onan. Mibati ba kag grabeng kaguol kay gipasakitan o giluiban ka sa usa nga suod kaayo nimo? Tingali nasakitan ka pag-ayo kay kalit kang gibulagan sa imong uyab o gibiyaan sa imong kapikas, o kaha ang suod nimo nga higala o membro sa pamilya miundang sa pag-alagad kang Jehova. Ang usa ka brader nga giluiban ug gibiyaan sa iyang asawa miingon: “Dili gyod ko katuo nga mahitabo ni nako. Grabe nakong guola ug mibati kong walay pulos. Naglagot pod ko.” Kon giluiban ka o gipasakitan, makalaom ka nga dili gyod ka biyaan ni Jehova. Ang brader miingon: “Naamgohan nako nga puwede tang biyaan sa mga tawo nga gimahal nato, pero si Jehova dili gyod mobiya nato. Siya ang atong Bato. Bisag unsa pay mahitabo, naa siya kanunay para nato. Dili niya biyaan ang mga maunongon kaniya.” (Sal. 37:28) Ayaw pod kalimti nga ang gugma ni Jehova mas labaw kay sa gugma ni bisan kinsa. Biyaan o luiban man ka sa uban, di gyod mausab ang pagbati ni Jehova kanimo. (Roma 8:​38, 39) Hinumdomi ni: Bisag unsa pay pagtratar kanimo sa uban, gimahal ka pag-ayo sa imong langitnong Amahan.

14. Unsay gipasalig kanato sa Salmo 34:18?

¹⁴ Kon giluiban ta, makapahupay pod nato ang giingon ni David diha sa Salmo 34:18. (Basaha.) Ang usa ka reperensiya miingon nga ang gihisgotan dinhi nga “mga naluya ang buot” mahimong magtumong niadtong “mibati nga wala na gyoy paglaom ang ilang kinabuhi.” Giunsa pagtabang ni Jehova kadtong mibati niana? Samag mahigugmaong ginikanan nga naggakos ug naghupay sa iyang naguol nga anak, si Jehova “duol” kanato ug andam motabang nato. Nasabtan niya ang kasakit nga atong gibati ug gusto gyod ta niyang hupayon. Daghan pod siyag gisaad nga maayong mga butang nga makatabang nato nga makalahutay sa atong mga kalisdanan karon.—Isa. 65:17.

 MGA LUHA TUNGOD SA KAWALAY-PAGLAOM

15. Unsay nakapaguol kang Ezequias nga maoy hinungdan sa iyang paghilak?

¹⁵ Sa edad nga 39, nahibaloan ni Haring Ezequias sa Juda nga naa siyay grabeng sakit. Gisulti ni propetang Isaias ang mensahe ni Jehova nga si Ezequias mamatay tungod sa iyang sakit. (2 Hari 20:1) Morag wala nay paglaom nga maulian si Ezequias, ug tungod niana nahugno siya ug mihilak pag-ayo. Nagpakiluoy siya pag-ayo kang Jehova nga tabangan siya.—2 Hari 20:​2, 3.

16. Unsay gihimo ni Jehova tungod sa pagpakiluoy ni Ezequias?

¹⁶ Natandog kaayo si Jehova sa pagpakiluoy ni Ezequias, maong Siya miingon: “Nadungog nako ang imong pag-ampo. Nakita nako ang imong mga luha. Ania, ayohon ka nako.” Pinaagi kang Isaias, si Jehova nagsaad nga iyang dugangan ang gitas-on sa kinabuhi ni Ezequias ug luwason ang Jerusalem gikan sa mga Asiryanhon.—2 Hari 20:​4-6.

17. Unsaon ta pagtabang ni Jehova kon naa tay grabeng sakit? (Salmo 41:3) (Tan-awa sab ang hulagway.)

¹⁷ Kon unsay atong makat-onan. Naa ba kay grabeng sakit ug morag wala na kay paglaom nga maulian? Duol kang Jehova diha sa pag-ampo, bisag maghilak ka. Ang Bibliya nagpasalig nato nga “ang Amahan nga malumo ug maluluy-on ug ang Diyos sa tanang paghupay” maghupay nato sa tanan natong pagsulay. (2 Cor. 1:​3, 4) Siyempre, dili ta makadahom nga wad-on ni Jehova karon ang tanan natong problema, pero makasalig ta nga tabangan ta niya. (Basaha ang Salmo 41:3.) Pinaagi sa iyang balaang espiritu, si Jehova naghatag natog kusog, kaalam, ug kalinaw aron makalahutay ta. (Prov. 18:14; Filip. 4:13) Gipalig-on pod ta niya pinaagi sa saad sa Bibliya nga ang tanang sakit wad-on na sa umaabot.—Isa. 33:24.

18. Unsang teksto ang makapahupay nimo kon naa ka sa lisod kaayo nga situwasyon? (Tan-awa ang kahong “ Makapahupayng mga Pulong nga Magpahid sa Atong mga Luha.”)

¹⁸ Nahupay gyod si Ezequias sa mga pulong ni Jehova. Kita pod mahupayan sa Pulong sa Diyos. Gipasulat ni Jehova ang makapahupayng mga pulong nga makatabang nato sa lisod nga mga situwasyon. (Roma 15:4) Dihang nahibaloan sa usa ka sister sa West Africa nga naa siyay kanser, nagsige siyag hilak. Siya miingon: “Ang usa ka teksto nga nakapahupay gyod nako mao ang Isaias 26:3. Sagad dili nato mapugngan nga moabot ang mga pagsulay, pero kini nga teksto nagpasalig nato nga hatagan ta ni Jehova ug kalinaw sa hunahuna aron makapabilin tang kalmado.” Naa bay teksto nga nakahupay pag-ayo nimo dihang nag-atubang kag lisod kaayo nga situwasyon?

19. Unsay atong madahom sa umaabot?

¹⁹ Nagkinabuhi na ta sa kataposang bahin  sa kataposang mga adlaw, maong nahibalo ta nga mas modaghan pa ang hinungdan sa atong paghilak. Pero sama sa atong nakat-onan sa eksperyensiya ni Ana, David, ug Haring Ezequias, makita ni Jehova ang atong mga luha ug matandog gyod siya niana. Dili gyod balewalaon ni Jehova ang atong mga luha. Busa kon mag-atubang tag lisod kaayo nga mga situwasyon, ibubo nato kang Jehova ang tanan natong gibati pinaagi sa pag-ampo. Dili gyod nato ipalain ang atong kaugalingon gikan sa atong mahigugmaong mga igsoon. Ug hinaot nga padayon tang mapalig-on sa makapahupayng mga pulong nga naa sa Bibliya. Makasalig ta nga kon padayon tang molahutay nga matinumanon, panalanginan ta ni Jehova. Apil ana ang nindot nga saad nga sa umaabot, iyang pahiran ang tanan natong mga luha tungod sa kaguol, pagluib, ug kawalay-paglaom. (Pin. 21:4) Nianang panahona mohilak na lang ta tungod sa kalipay.