1-2. Unsay angayng reaksiyon sa mga ginikanan kon ang ilang anak mangutana bahin sa atong binase sa Bibliya nga mga pagtulon-an?

 DAGHAN ang mouyon nga dili gyod lalim ang mahimong ginikanan. Kon ginikanan ka, gikomendahan ka tungod sa imong paningkamot nga palig-onon ang pagtuo sa imong anak. (Deut. 6:​6, 7) Samtang magkadako ang imong anak, tingali mosugod na siyag pangutana bahin sa atong binase sa Bibliya nga mga pagtulon-an ug moral nga mga sukdanan.

² Sa sinugdan, tingali mabalaka ka sa pangutana sa imong anak. Basin maghunahuna pa gani ka nga nangutana siya kay wala kaayo siyay pagtuo bahin sa Diyos ug sa Bibliya. Pero ang tinuod, samtang magkadako ang imong anak, kinahanglan gyod siyang mangutana aron molig-on ang iyang pagtuo. (1 Cor. 13:11) Maong dili ka angayng mabalaka. Hinuon, isipa ang tanang sinserong pangutana sa imong anak ingong kahigayonan nga matabangan siya nga mas molalom ang iyang pagsabot ug molig-on ang iyang pagtuo.

3. Unsay atong hisgotan niini nga artikulo?

³ Niining artikuloha, atong hisgotan kon unsaon pagtabang sa mga ginikanan ang ilang anak nga (1) maugmad ang lig-ong pagtuo, (2) mapabilhan ang moral nga mga sukdanan sa Bibliya, ug (3) mapatin-aw ang iyang tinuohan ngadto sa uban. Hisgotan pod nato kon nganong maayo nga mangutana ang mga anak ug kon unsang mga kalihokan ang makahatag sa mga ginikanan ug kahigayonan nga mapatin-aw ngadto sa ilang mga anak ang Kristohanong mga pagtulon-an.

 TABANGI ANG IMONG ANAK NGA MAUGMAD ANG LIG-ONG PAGTUO

4. Unsa kahay posibleng ipangutana sa imong anak, ug ngano?

⁴ Nahibalo ang Kristohanong mga ginikanan nga ang ilang pagtuo sa Diyos dili samag panulondon nga mapasa ngadto sa mga anak. Wala ka matawo nga naa nay pagtuo kang Jehova. Mao man pod ang imong anak. Paglabay sa panahon ang imong anak tingali mangutana: ‘Naa ba gyoy Diyos? Tinuod ba gyod ang giingon sa Bibliya?’ Ang Bibliya nagdasig nato nga gamiton ang atong “gahom sa pagpangatarongan” ug ‘seguroon ang tanang butang.’ (Roma 12:1; 1 Tes. 5:21) Busa, unsaon nimo pagtabang ang imong anak nga molig-on ang iyang pagtuo?

5. Unsay mahimo sa mga ginikanan aron tabangan ang ilang anak nga maugmad ang iyang pagtuo sa Bibliya? (Roma 12:2)

⁵ Dasiga ang imong anak nga pamatud-an sa iyang kaugalingon nga tinuod ang giingon sa Bibliya. (Basaha ang Roma 12:2.) Kon naay mga pangutana ang imong anak, gamita ni ingong kahigayonan aron tabangan siya sa pagpangita sa mga tubag gamit ang atong mga publikasyon, sama sa Watch Tower Publications Index ug Giya sa Pagpanukiduki Para sa mga Saksi ni Jehova. Sa Giya sa Pagpanukiduki ubos sa ulohang “Ang Bibliya,” puwede niyang tan-awon ang sub-ulohang “Inspirado sa Diyos” aron makakita siyag mga ebidensiya nga ang Bibliya dili lang kay basta nindot nga libro nga gisulat sa mga tawo. Kini gyod “ang pulong sa Diyos.” (1 Tes. 2:13) Pananglitan, puwede siyang mag-research bahin sa karaang siyudad sa Nineve didto sa Asirya. Kaniadto, naay mga eskolar sa Bibliya nga nag-ingon nga ang siyudad sa Nineve wala gyod maglungtad. Pero sa mga 1850, nakubkoban sa mga arkeologo ang kagun-oban sa karaang siyudad sa Nineve, nga nagpakita nga tinuod gyod ang giingon sa Bibliya. (Sof. 2:​13-15) Para sa impormasyon kon sa unsang paagi ang kalaglagan sa Nineve nagtuman sa tagna sa Bibliya, puwede niyang tan-awon ang artikulong “Nahibalo Ka Ba?” sa Nobyembre 2021 nga Bantayanang Torre. Kon itandi sa imong anak ang iyang nakat-onan sa atong mga publikasyon ug ang iyang nakat-onan sa mga encyclopedia ug ubang reperensiya, makatabang ni nga mas makombinsir siya nga tinuod gyod ang giingon sa Bibliya.

6. Sa unsang paagi madasig sa mga ginikanan ang ilang anak nga maghunahuna bahin sa mga ebidensiya nga iyang nakita? Paghatag ug pananglitan. (Tan-awa sab ang hulagway.)

⁶ Dasiga ang imong anak nga maghunahuna bahin sa mga ebidensiya nga iyang nakita. Mga ginikanan, pangitag mga kahigayonan nga makaestorya ninyo ang inyong anak bahin sa Bibliya o sa Diyos sa makalingaw nga paagi. Pananglitan, puwede mong mobisita sa museum, botanical garden, o sa eksibit sa sangang buhatan sa mga Saksi ni Jehova. Kon mo-tour mog museum, in-person  man o virtual, ipakita sa imong anak ang mga panghitabo sa kasaysayan o nakubkoban nga mga gamit nga magpalig-on sa iyang pagtuo nga tinuod ang giingon sa Bibliya. Nahibalo ba ang imong anak nga ang personal nga ngalan sa Diyos makita diha sa usa ka papan nga bato nga gitawag ug Moabite Stone nga 3,000 ka tuig nang naglungtad? Ang orihinal nga Moabite Stone gidispley diha sa Louvre Museum sa Paris, France. Naa poy replika sa Moabite Stone nga gidispley diha sa “The Bible and the Divine Name” nga eksibit sa hedkuwarter sa mga Saksi ni Jehova sa Warwick, New York. Makita diha sa Moabite Stone nga si Haring Mesa sa Moab mirebelde batok sa Israel, nga mao poy giingon sa Bibliya. (2 Hari 3:​4, 5) Kon makita mismo sa imong anak ang mga ebidensiya nga tinuod ug tukma ang giingon sa Bibliya, mas molig-on ang iyang pagtuo.—Itandi ang 2 Cronicas 9:6.

7-8. (a) Unsay atong makat-onan sa nindot nga mga disenyo nga atong makita sa kalalangan? Paghatag ug pananglitan. (Tan-awa sab ang hulagway.) (b) Unsang mga pangutana ang makatabang sa imong anak nga molig-on ang iyang pagtuo sa Maglalalang?

⁷ Dasiga ang imong anak nga mamalandong bahin sa kalalangan. Kon maglakawlakaw mo sa nindot nga lugar o mag-garden, ipakita sa imong anak ang nindot nga mga disenyo diha sa kalalangan. Ngano? Kay kini nga mga disenyo nagpakita nga naa gyoy intelihenteng persona nga naghimo niini. Pananglitan, daghang disenyo sa kalalangan ang pormag spiral o patuyok. Kining spiral nga mga pattern daghang tuig nang gitun-an sa mga scientist. Ang scientist nga si Nicola Fameli miingon nga kon imong iphon ang mga spiral diha sa usa ka butang o disenyo, imong makita nga naa ni gisunod nga sequence sa mga numero, nga nailhan nga Fibonacci sequence. Ang spiral nga mga pattern makita diha sa daghang kalalangan sama sa porma sa ubang galaksiya, sa pattern sa lagang nga mga kinhason (nautilus shell), sa mga dahon, ug sa mga sunflower. a

⁸ Samtang magkadaghan ang makat-onan sa imong anak sa eskuwelahan bahin sa science, iyang makita nga ang mga butang sa kalalangan naay gisunod nga mga balaod nga maoy hinungdan sa ilang porma o shape. Pananglitan, ang disenyo sa kada snowflake nagsunod sa geometric pattern nga gitawag ug fractal. Ang fractal nga mga pattern makita pod sa ubang kalalangan. Pero kinsa may nagtakda niini nga mga balaod sa kalalangan? Kinsa may naghimo o nagdisenyo niining nindot nga mga pattern? Kon hunahunaon pag-ayo sa imong anak kini nga mga pangutana, posibleng molig-on ang iyang pagtuo nga gilalang gyod sa Diyos ang tanang butang. (Heb. 3:4) Kon modakodako na ang imong anak, puwede nimo siyang pangutan-on, “Kay gilalang man ta sa Diyos, di ba makaingon gyod ta nga naghatag pod siya natog mga balaod o giya aron magmalipayon ta?” Dayon sultihi  siya nga kini nga mga giya makita diha sa Bibliya.

TABANGI ANG IMONG ANAK NGA PABILHAN ANG MORAL NGA MGA SUKDANAN SA BIBLIYA

9. Ngano kahang makapangutana ang imong anak kon importante ba gyod nga sundon ang moral nga mga sukdanan sa Bibliya?

⁹ Kon ang imong anak makapangutana kon importante ba gyod nga mosunod sa moral nga mga sukdanan sa Bibliya, paningkamoti nga imong masabtan kon nganong nakapangutana siya ana. Dili ba gyod siya uyon sa moral nga mga sukdanan sa Bibliya, o dili lang siya makamaong mopatin-aw niini sa uban? Bisan unsa pa may hinungdan sa iyang pangutana, matabangan nimo ang imong anak nga mapabilhan ang moral nga mga sukdanan sa Bibliya kon tun-an ninyo ang librong Mabuhi Ka Hangtod sa Hangtod! b

10. Unsaon nimo pagtabang ang imong anak nga mapabilhan ang iyang relasyon kang Jehova?

¹⁰ Dasiga ang imong anak nga pabilhan ang iyang relasyon kang Jehova. Dihang mag-Bible study ka sa imong anak, gamita ang mga pangutana ug mga hulagway sa librong Mabuhi Ka Hangtod sa Hangtod! aron imong mahibaloan kon unsa gyoy iyang gihunahuna ug gibati. (Prov. 20:5) Pananglitan, sa leksiyon 8, si Jehova gipakasamag maayong higala nga naghatag natog mga pahinumdom aron maproteksiyonan ta ug makabatog kaayohan. Human ninyo mahisgoti ang 1 Juan 5:​3, puwede nimo siyang pangutan-on, “Kay si Jehova maayo man nga Higala, unsay angay natong pagbati sa iyang mga sugo?” Morag simple lang na nga pangutana, pero makatabang na sa imong anak nga isipon ang mga balaod sa Diyos ingong pamatuod sa Iyang gugma.—Isa. 48:​17, 18.

11. Sa unsang paagi matabangan nimo ang imong anak nga mapabilhan ang mga prinsipyo sa Bibliya? (Proverbio 2:​10, 11)

¹¹ Hisgoti ang mga kaayohan sa pagpadapat sa mga prinsipyo sa Bibliya. Dihang basahon ninyo ang Bibliya o ang inadlaw nga teksto, hisgoti kon sa unsang paagi ang mga prinsipyo sa Bibliya nakatabang sa inyong pamilya. Pananglitan, nakita ba sa imong anak ang kaayohan sa pagkahimong kugihan ug matinud-anon? (Heb. 13:18) Puwede pod nimong ipatin-aw kon sa unsang paagi ang pagpadapat sa mga prinsipyo sa Bibliya nanalipod nato sa pisikal ug nakahatag natog kalipay. (Prov. 14:​29, 30) Ang paghisgot niini nga mga prinsipyo makatabang sa imong anak nga mas mapabilhan pa gyod ang mga tambag sa Bibliya.—Basaha ang Proverbio 2:​10, 11.

12. Giunsa pagtabang sa usa ka amahan ang iyang anak nga mapabilhan ang mga prinsipyo sa Bibliya?

¹² Tagda kon unsay gihimo ni Steve, usa ka amahan sa France, ug sa iyang asawa aron masabtan sa ilang tin-edyer nga anak nga si Ethan nga gihatag ni Jehova ang iyang mga balaod tungod sa gugma. Siya miingon: “Amo siyang pangutan-on, ‘Nganong gusto man ni Jehova nga sundon nato ni nga prinsipyo? Sa unsang paagi gipakita niini nga prinsipyo nga iya tang gimahal? Unsay mahitabo kon dili nimo ni sundon?’” Kini nga mga panaghisgot nakatabang kang Ethan nga pabilhan gyod ang moral nga mga sukdanan ni Jehova. Si Steve midugang: “Gusto namong masabtan ni Ethan nga ang kaalam nga naa sa Bibliya mas labaw gyod kay sa kaalam sa tawo.”

13. Sa unsang paagi mabansay sa mga ginikanan ang ilang anak sa pagpadapat sa mga prinsipyo sa Bibliya? Paghatag ug pananglitan.

¹³ Bansaya ang imong anak nga ipadapat ang mga prinsipyo sa Bibliya. Pananglitan, tingali giasayn ang imong anak nga mobasag usa ka libro ingong bahin sa ilang project diha sa eskuwelahan. Ang mga karakter sa libro basin naghimog imoral o masuk-anon kaayo, pero gipresentar  sila ingong maayong mga tawo nga angayng sundogon. Puwede nimong pangutan-on ang imong anak kon ang gihimo niini nga mga karakter uyon ba sa mga prinsipyo sa Bibliya. (Prov. 22:​24, 25; 1 Cor. 15:33; Filip. 4:8) Makatabang ni niya aron mahimo siyang andam sa paghatag ug pamatuod ngadto sa iyang magtutudlo ug mga classmate dihang hisgotan na sa klase ang maong libro.

TUDLOI ANG IMONG ANAK SA PAGDEPENSA SA IYANG PAGTUO

14. Para sa batan-ong mga Kristohanon, unsang topiko ang lisod tingaling ipatin-aw, ug ngano?

¹⁴ Naa tingali panahon nga ang batan-ong mga Kristohanon mahadlok modepensa sa ilang tinuohan. Tingali mao nay ilang bation dihang hisgotan sa klase ang teoriya sa ebolusyon. Ngano? Kay daghang magtutudlo ang moingon nga tinuod ang ebolusyon. Kon ginikanan ka, unsaon nimo pagtabang ang imong anak nga makabatog kompiyansa sa pagdepensa sa iyang pagtuo?

15. Unsay makatabang sa usa ka batan-ong Kristohanon nga mahimong mas kombinsido sa iyang gituohan?

¹⁵ Tabangi ang imong anak nga mahimong mas kombinsido sa iyang gituohan. Ang imong anak dili angayng maulaw nga nagtuo siya sa Maglalalang. (2 Tim. 1:8) Ngano? Kay daghang scientist ang nagtuo pod nga ang kinabuhi wala lang basta mitunghag iya. Ilang nasabtan nga naa gyoy intelihenteng persona nga nagdisenyo ug naglalang sa daghang buhing butang. Tungod niana, wala sila magtuo sa teoriya sa ebolusyon nga ginatudlo sa daghang eskuwelahan sa tibuok kalibotan. Mas makombinsir ang imong anak sa iyang gituohan kon pamalandongon niya kon unsa poy nakakombinsir sa ubang mga igsoon nga gilalang gyod ang kinabuhi. c

16. Sa unsang paagi matabangan sa mga ginikanan ang ilang anak nga depensahan ang iyang pagtuo bahin sa Maglalalang? (1 Pedro 3:15) (Tan-awa sab ang hulagway.)

¹⁶ Tabangi ang imong anak nga mahimong andam sa pagdepensa sa iyang pagtuo bahin sa Maglalalang. (Basaha ang 1 Pedro 3:15.) Puwede ninyong hisgotan ang mga artikulo sa jw.org sa serye nga “Mga Batan-on Nangutana—Paglalang o Ebolusyon?” Pangutan-a ang imong anak kon asa sa mga rason ang gibati niya nga pinakaepektibo sa pagtabang sa uban nga masabtan nga naay Maglalalang. Dayon hisgoti na uban niya. Pahinumdomi siya nga dili siya kinahanglang makiglalis sa iyang mga schoolmate.  Dasiga siya nga mogamit ug simpleng mga pangatarongan kon ang uban interesadong maminaw. Pananglitan, ang iyang schoolmate tingali moingon: “Motuo lang ko sa akong makita, ug wala pa gyod ko makakita sa Diyos.” Ang imong anak puwedeng motubag: “Imadyina nga naglakaw ka sa lasang ug wala gyoy laing tawo didto. Dayon nakakita kag nindot nga atabay. Unsay imong ikaingon bahin sa atabay? Makaingon ba ka nga mitungha ra nig iya? Kon naay naghimo sa atabay, labaw na gyod nga naay naghimo sa atong planeta ug sa tanang buhing butang!”

17. Unsaon pagtabang sa mga ginikanan ang ilang anak nga masulti ngadto sa uban ang ilang gituohan? Paghatag ug pananglitan.

¹⁷ Dasiga ang imong anak nga mangitag mga kahigayonan nga masulti ngadto sa uban ang ilang gituohan bahin sa Bibliya. (Roma 10:10) Ang iyang mga paningkamot sa pagpatin-aw sa iyang pagtuo puwede nimong ikompara sa pagtuon ug instrumento sa musika. Sa primero, simple lang nga mga kanta ang iyang praktisan. Pero samtang magkadugay, mas mahanas ra siya sa pagtugtog. Ingon ana pod kon bahin sa pagpatin-aw sa iyang pagtuo ngadto sa uban. Sa primero, puwede siyang mogamit ug simple ra nga mga paagi. Pananglitan, puwede niyang pangutan-on ang iyang schoolmate: “Nahibalo ba ka nga ang mga scientist sagad manundog ra sa mga disenyo sa kalalangan? Naa koy ipakita nimo nga nindot nga video.” Human siya makapakitag video gikan sa serye nga Gidisenyo Ba Kini? puwede siyang mangutana: “Kon ang mga scientist gipasidunggan tungod sa ilang disenyo nga kinopya ra gikan sa kalalangan, kinsa may angayng pasidunggan sa orihinal nga disenyo?” Kining simple nga pamaagi basin makapukaw sa interes sa iyang schoolmate ug ganahan na siyang mokat-og dugang.

PADAYONG TABANGI ANG IMONG ANAK SA PAGPALIG-ON SA IYANG PAGTUO

18. Sa unsang paagi padayong mapalig-on sa mga ginikanan ang pagtuo sa ilang anak?

¹⁸ Kadaghanan sa mga tawo karon walay pagtuo kang Jehova. (2 Ped. 3:3) Busa mga ginikanan, samtang magtuon mo sa Bibliya uban sa inyong anak, dasiga siya nga susihon ang mga topiko nga mas makapalalom sa iyang pagsalig sa Bibliya ug sa moral nga mga sukdanan sa Diyos. Tabangi siya nga mamalandong sa nindot nga mga kalalangan ni Jehova. Tabangi pod siya nga mapabilhan ang makapainteres nga mga tagna sa Bibliya nga natuman na. Ug labaw sa tanan, pag-ampo uban niya ug hangyoa si Jehova nga tabangan siya. Kon imo nang himoon, makasalig ka nga panalanginan ni Jehova ang imong mga paningkamot nga palig-onon ang pagtuo sa imong anak.—2 Cron. 15:7.