1. Unsay hunahuna sa uban bahin sa kinabuhing walay kataposan?

 DAGHANG tawo ang nag-amping sa ilang ginakaon ug kanunayng nag-ehersisyo aron magpabiling himsog. Pero wala sila maghunahuna nga mabuhi sila hangtod sa hangtod. Para nila morag imposible na, ug wala pod sila mangandoy niana tungod sa daghang kalisdanan nga resulta sa pagkatigulang. Pero posible gyod natong mabatonan ang “kinabuhing walay kataposan,” sama sa giingon ni Jesus sa Juan 3:16 ug 5:24.

2. Unsay giingon sa Juan kapitulo 6 bahin sa kinabuhing walay kataposan? (Juan 6:​39, 40)

² Usa ka adlaw, milagrosong gipakaon ni Jesus ug tinapay ug isda ang linibo ka tawo. a Makapahingangha kaayo to, pero mas makapahingangha ang iyang giingon pagkasunod adlaw ngadto sa maong mga tawo nga misunod kaniya sa Capernaum, duol sa baybayon sa Galilea. Gitudloan niya sila bahin sa pagkabanhaw ug sa kinabuhing walay kataposan. (Basaha ang Juan 6:​39, 40.) Hunahunaa kon unsay kahulogan niana para sa imong mga higala ug mga membro sa pamilya nga namatay. Ang giingon ni Jesus nagpakita nga daghan niadtong namatay ang puwedeng mabanhaw ug nga ikaw ug ang imong mga minahal puwedeng makabaton ug kinabuhing walay kataposan. Pero daghan ang naglibog sa uban pang giingon ni Jesus sa Juan kapitulo 6. Unsa diay ang iyang giingon?

3. Unsay giingon ni Jesus bahin sa iyang kaugalingon diha sa Juan 6:51?

 ³ Human sa milagrosong pagpakaon ni Jesus ug tinapay para sa maong mga tawo, nahunahunaan nila ang mana nga gitagana ni Jehova sa ilang mga katigulangan. Gani diha sa Kasulatan, ang mana gitawag ug “tinapay gikan sa langit.” (Sal. 105:40; Juan 6:31) Busa gigamit ni Jesus ang mana sa pagtudlo kanila sa usa ka importanteng kamatuoran. Bisag ang mana milagrosong tagana gikan sa Diyos, kadtong mikaon niana namatay ra gihapon. (Juan 6:49) Sa laing bahin, gitawag ni Jesus ang iyang kaugalingon ingong ang “tinuod nga tinapay gikan sa langit,” “ang tinapay sa Diyos,” ug “ang tinapay sa kinabuhi.” (Juan 6:​32, 33, 35) Gipasiugda ni Jesus ang dakong kalainan tali sa mana ug sa iyang kaugalingon. Siya miingon: “Ako ang buhing tinapay nga nanaog gikan sa langit. Kon may mokaon niini nga tinapay, siya mabuhi hangtod sa hangtod.” (Basaha ang Juan 6:51.) Ang maong mga Hudiyo naglibog pag-ayo. Wala gyod sila makasabot kon nganong miingon si Jesus nga siya “ang tinapay” nga minaog gikan sa langit ug nga kini mas labaw kay sa mana nga gihatag sa Diyos sa ilang katigulangan. Dayon, naay dugang gisulti si Jesus: “Ang tinapay nga akong ihatag mao ang akong unod.” Unsa kahay iyang gipasabot? Interesado ta sa tubag niana kay gusto tang mahibalo kon sa unsang paagi kita ug ang atong mga minahal makadawat ug kinabuhing walay kataposan. Susihon nato kon unsay gipasabot ni Jesus.

BUHING TINAPAY UG IYANG UNOD

4. Nganong nakurat ang uban sa giingon ni Jesus?

⁴ Ang uban nga nakadungog sa gisulti ni Jesus nakurat dihang miingon siya nga ang tinapay nga kinahanglan nilang kaonon mao ang iyang “unod [nga ihatag niya] alang sa kinabuhi sa katawhan.” Naghunahuna kaha sila nga iyang ipakaon nila ang iyang literal nga unod, nga usa ka buhat sa kanibalismo? (Juan 6:52) Matikdi ning dugang detalye nga gisulti ni Jesus nga mas nakapakurat nila: “Gawas kon mokaon mo sa unod sa Anak sa tawo ug moinom sa iyang dugo, kamo dili makabaton ug kinabuhi.”—Juan 6:53.

5. Nganong makaseguro ta nga dili ang pag-inom sa iyang literal nga dugo ang gipasabot ni Jesus?

⁵ Sa panahon ni Noe, gidid-an sa Diyos ang mga tawo sa pag-inom ug pagkaon ug dugo. (Gen. 9:​3, 4) Mao pod ni ang iyang gisugo sa Israel diha sa Balaod. Si bisan kinsa nga mokaon ug dugo “angayng patyon.” (Lev. 7:27) Gisunod ni Jesus ang maong Balaod. (Mat. 5:​17-19) Busa imposible gyod nga awhagon niya ang mga Hudiyo nga mokaon sa iyang literal nga unod o moinom sa iyang literal nga dugo. Sa pagkatinuod, pinaagi niining makapakurat nga mga pamulong, gitudloan ni Jesus ang mga tawo kon sa unsang paagi mabatonan ang kinabuhi—“kinabuhing walay kataposan.”—Juan 6:54.

6. Unsaon nato pagsabot ang giingon ni Jesus bahin sa pagkaon sa iyang unod ug pag-inom sa iyang dugo?

⁶ Unsay punto ni Jesus? Klaro nga simboliko lang ang giingon ni Jesus, sama sa iyang giingon sa babayeng Samarianhon: “Kadtong moinom sa tubig nga akong ihatag kaniya dili na gyod uhawon pa, ug ang tubig nga akong ihatag mahisama unyag tuboran sa tubig diha kaniya nga magabugwak aron mohatag ug kinabuhing walay kataposan.” (Juan 4:​7, 14) b Ang giingon ni Jesus wala magpasabot nga  ang babayeng Samarianhon makadawat ug kinabuhing walay kataposan pinaagi lang sa pag-inom ug literal nga tubig. Sa susama, ang iyang giingon sa mga tawo didto sa Capernaum wala magpasabot nga mabuhi sila sa walay kataposan kon mokaon sila sa iyang literal nga unod ug moinom sa iyang literal nga dugo.

ANG KALAINAN SA DUHA KA HITABO

7. Unsay giingon sa uban bahin sa gisulti ni Jesus diha sa Juan 6:53?

⁷ Ang uban moingon nga ang gisulti ni Jesus diha sa Juan 6:53 bahin sa pagkaon sa iyang unod ug pag-inom sa iyang dugo mao pod ang angayng himoon panahon sa Panihapon sa Ginoo, kay niining duha ka hitabo halos parehas lang ang iyang giingon. (Mat. 26:​26-28) Miingon sila nga ang tanang motambong sa Panihapon sa Ginoo angayng mokaon sa tinapay ug moinom sa bino. Sakto ba na? Importante nga atong susihon kon sakto ba ang ilang giingon kay kada tuig minilyon sa tibuok kalibotan ang motambong uban nato sa pagsaulog sa maong okasyon. Hisgotan nato ang mga kalainan sa atong mabasa sa Juan 6:53 ug sa giingon ni Jesus panahon sa Panihapon sa Ginoo.

8. Unsa ang pipila ka kalainan sa duha ka hitabo? (Tan-awa sab ang mga hulagway.)

⁸ Hisgotan nato ang duha ka kalainan niini nga mga hitabo. Una, kanus-a ug asa gisulti ni Jesus ang narekord sa Juan 6:​53-56? Iya kanang  gisulti ngadto sa mga Hudiyo didto sa Galilea niadtong 32 C.E., mga usa ka tuig ayha niya gisugdan ang Panihapon sa Ginoo didto sa Jerusalem. Ikaduha, kinsa man ang iyang mga kaestorya? Ang kadaghanan sa naminaw niya didto sa Galilea mas interesado sa pagtagbaw sa ilang pisikal nga tinguha kay sa ilang espirituwal nga panginahanglan. (Juan 6:26) Gani, dihang naay gisulti si Jesus nga wala nila masabti, nawad-an dayon silag pagtuo kaniya. Bisan gani ang pipila sa iyang mga tinun-an mihunong sa pagsunod kaniya. (Juan 6:​14, 36, 42, 60, 64, 66) Pero lahi ang kahimtang dihang gisugdan ni Jesus ang Panihapon sa Ginoo mga usa ka tuig sa ulahi niadtong 33 C.E. Nianang panahona, ang iyang 11 ka matinumanong apostoles miunong niya bisag wala nila bug-os masabti ang tanan niyang gitudlo. Dili parehas sa kadaghanan didto sa Galilea, ang iyang matinumanong mga apostoles kombinsido nga si Jesus ang Anak sa Diyos nga minaog gikan sa langit. (Mat. 16:16) Gikomendahan niya sila: “Kamo ang miunong nako sa akong mga pagsulay.” (Luc. 22:28) Kining duha ka kalainan klarong nagpakita nga ang mga pulong ni Jesus sa Juan 6:53 wala magtumong sa kon unsay angayng himoon panahon sa Panihapon sa Ginoo. Ug naa pay dugang ebidensiya niana.

ANG KAHULOGAN NIINI PARA NIMO

9. Kang kinsa mapadapat ang giingon ni Jesus panahon sa Panihapon sa Ginoo?

⁹ Panahon sa Panihapon sa Ginoo, gihatagan ni Jesus ang iyang mga apostoles ug tinapay nga walay pangpatubo ug giingnan sila nga kini nagrepresentar sa iyang lawas. Dayon gihatagan niya silag bino ug miingon nga kini nagrepresentar sa “dugo sa pakigsaad.” (Mar. 14:​22-25; Luc. 22:20; 1 Cor. 11:24) Matikdi nga ang bag-ong pakigsaad wala gihimo uban sa katawhan sa katibuk-an, kondili uban sa “panimalay [sa espirituwal nga] Israel” nga mahimo unyang bahin “sa Gingharian sa Diyos.” (Heb. 8:​6, 10; 9:15) Wala kana masabti sa mga apostoles niadtong panahona. Pero wala madugay, gidihogan sila sa balaang espiritu ug nahimong bahin sa bag-ong pakigsaad, ug sila magmando uban ni Jesus didto sa langit.—Juan 14:​2, 3.

10. Unsa pay kalainan sa giingon ni Jesus sa Galilea ug sa iyang giingon panahon sa Panihapon sa Ginoo? (Tan-awa sab ang hulagway.)

¹⁰ Matikdi nga panahon sa Panihapon sa Ginoo, si Jesus nagpokus lang sa “gamayng panon.” Ang maong gamayng grupo unang gilangkoban sa iyang matinumanong mga apostoles nga kauban niya niana nga okasyon. (Luc. 12:32) Sila ug ang uban pa nga mahimo unyang bahin niana nga grupo mao ang angayng moambit sa duha ka emblema—ang tinapay ug bino. Sila ang makauban ni Jesus didto sa langit. Busa ang giingon ni Jesus sa iyang mga apostoles nianang panahona mapadapat lang sa gamayng grupo sa mga tawo. Pero ang iyang giingon didto sa Galilea mapadapat ngadto sa daghan kaayong tawo.

11. Unsay giingon ni Jesus sa Galilea nga nagpakita nga wala siya magtumong sa limitado lang nga grupo sa mga tawo?

¹¹ Ang kadaghanan sa mga Hudiyo nga kaestorya ni Jesus sa Galilea niadtong 32 C.E. gusto lang mangayog pagkaon kaniya. Pero iyang gipasiugda nga naay mas importante kay sa literal nga pagkaon. Siya naghisgot bahin sa tagana nga makahatag nilag kinabuhing walay kataposan. Ug si Jesus miingon nga ang mga namatay posibleng mabanhaw sa kataposang adlaw ug mabuhi hangtod sa hangtod. Wala siya magtumong sa limitado lang nga gidaghanon sa mga tawo,  sama sa iyang gitumong panahon sa Panihapon sa Ginoo. Hinuon, didto sa Galilea, iyang gihisgotan ang panalangin nga kinabuhing walay kataposan nga puwedeng mabatonan sa tanan. Gani siya miingon: “Ang tinapay nga akong ihatag mao ang akong unod alang sa kinabuhi sa katawhan.”—Juan 6:51.

12. Unsay gikinahanglan aron madawat ang mga panalangin nga gihisgotan ni Jesus?

¹² Si Jesus wala moingon nga ang tanang tawo seguradong makabaton ug kinabuhing walay kataposan. Hinuon, siya miingon nga kadto lang ‘mokaon niini nga tinapay,’ kadtong magpakitag pagtuo, ang makadawat niana nga panalangin. Daghan niadtong nangangkong Kristohanon ang naghunahuna nga basta kay “motuo” lang sila kang Jesus ug isipon siya ingong ilang manluluwas, maluwas na sila. (Juan 6:​29, Maayong Balita Biblia) Pero dili na igo, kay daghan niadtong mga Hudiyo nga naa sa Galilea ang mituo kang Jesus sa sinugdan pero mibiya kaniya sa ulahi. Ngano?

13. Unsay gikinahanglan aron mahimong tinuod nga tinun-an ni Jesus?

¹³ Daghan niadtong mga tawo nga gipakaon ni Jesus nagsunodsunod lang kaniya kay gihatag niya ang ilang gusto. Interesado lang sila sa iyang milagrosong pagpang-ayo, libreng pagkaon, o sa mga pagtulon-an nga uyon ra sa ilang gusto. Pero gipakita ni Jesus nga labaw pa ana ang gikinahanglan aron mahimong iyang tinuod nga tinun-an. Wala siya moanhi sa yuta aron lang tagbawon ang pisikal nga tinguha sa mga tawo. Kinahanglan silang mosanong sa iyang pagdapit nga ‘moadto’ kaniya pinaagi sa pagdawat ug pagsunod sa tanan niyang gitudlo.—Juan 5:40; 6:44.

14. Unsay kinahanglan natong himoon aron madawat ang mga panalangin nga naposible tungod sa unod ug dugo ni Jesus?

 ¹⁴ Gipasiugda ni Jesus ngadto sa mga tawo nga kinahanglan silang magpakitag pagtuo. Sa unsa? Sa makaluwas ug kinabuhi nga bili sa iyang unod ug dugo, nga hapit na niyang ihalad. Ang maong mga Hudiyo kinahanglang motuo niana, ug mao man sab ta karon. (Juan 6:40) Kinahanglan tang magpakitag pagtuo sa lukat aron madawat nato ang mga panalangin nga naposible tungod sa unod ug dugo ni Jesus, nga gihisgotan sa Juan 6:53. Kini nga mga panalangin posibleng mabatonan sa daghan kaayong tawo.—Efe. 1:7.

15-16. Unsang importanteng mga punto ang atong nakat-onan sa Juan kapitulo 6?

¹⁵ Daghan tag nakat-onan sa Juan kapitulo 6 nga dakog epekto nato ug sa atong mga minahal. Klarong gipakita niini nga gimahal gyod ni Jesus ang mga tawo. Samtang didto sa Galilea, giayo niya ang mga masakiton, gitudloan ang mga tawo bahin sa Gingharian, ug giseguro nga matagan-an ang ilang panginahanglan alang sa pagkaon. (Luc. 9:11; Juan 6:​2, 11, 12) Labaw sa tanan, gipasiugda niya nga siya ang “tinapay sa kinabuhi.”—Juan 6:​35, 48.

¹⁶ Kadtong iyang gihisgotan nga apil sa “ubang mga karnero” dili angayng mokaon sa tinapay ug moinom sa bino panahon sa tinuig nga Panihapon sa Ginoo. (Juan 10:16) Pero makabenepisyo gihapon sila sa mga panalangin nga naposible tungod sa unod ug dugo ni Jesu-Kristo. Madawat nila ang maong mga panalangin pinaagi sa pagpakitag pagtuo sa bili sa iyang halad lukat. (Juan 6:53) Sa laing bahin, kadto lang apil sa bag-ong pakigsaad ug may paglaom nga magmando sa langitnong Gingharian sa Diyos ang angayng mokaon sa tinapay ug moinom sa bino. Pero dinihogan man ta o bahin sa ubang mga karnero, importante kaayo para nato ang asoy sa Juan kapitulo 6. Nagtudlo ni nato nga kinahanglan gyod tang magpakitag lig-ong pagtuo aron madawat ang kinabuhing walay kataposan.