Natawo ko niadtong 1927 sa usa ka gamayng lungsod duol sa Chicago, Illinois, U.S.A. Lima mi ka magsoon—si Jetha, Don, ako, Karl, ug Joy. Determinado ming tanan nga moalagad kang Jehova sa tibuok namong kinabuhi. Si Jetha mieskuwela sa ikaduhang klase sa Gilead niadtong 1943. Si Don misugod sa pag-alagad sa Bethel sa Brooklyn, New York niadtong 1944, si Karl niadtong 1947, ug si Joy niadtong 1951. Nadasig gyod ko sa ilang ehemplo ug sa ehemplo sa akong mga ginikanan.

Si Papa ug Mama relihiyoso ug ganahang magbasag Bibliya. Gitudloan pod mi nila nga higugmaon ang Diyos. Pero si Papa nawad-ag pagtahod sa relihiyon human siya magsundalo sa Europe panahon sa Gubat sa Kalibotan I. Mapasalamaton kaayo si Mama nga nakauli ra si Papa nga buhi, maong giingnan niya si Papa: “Karl, mangadto na pod ta sa simbahan.” Si Papa mitubag: “Ihatod ka nako didto, pero dili ko mosulod.” Si Mama nangutana: “Ngano man?” Si Papa miingon: “Kay panahon man god sa gubat, ang mga lider sa relihiyon nagbendisyon sa ilang mga sundalo ug mga armas. Mao pod nay gihimo sa ilang kontra nga parehas nilag relihiyon. Nagpasabot ba na nga pareho silang dapigan sa Diyos?”

Usa ka adlaw samtang si Mama nagsimba, naay duha ka Saksi ni Jehova nga miadto sa balay. Ilang gitanyagan si Papa ug duha ka volume nga librong Light, nga naghisgot bahin sa basahon sa Pinadayag. Nainteres si Papa sa libro ug iya ning gidawat. Dihang nakita ni Mama ang mga libro, iya pod ning gibasa. Dayon usa ka adlaw, nabasa ni Mama diha sa lokal nga newspaper nga giimbitar ang mga tawo sa pagtuon sa Bibliya gamit ang librong Light. Giadto niya ang adres. Ug sa iyang pag-abot, giablihan siya sa usa ka tigulang nga babaye. Gipakita ni Mama ang libro, ug siya nangutana, “Mao ba ni ang inyong gitun-an dinhi?” Ang babaye mitubag, “Oo Day, dali, sulod.” Pagkasunod semana, ako ug ang akong mga igsoon giuban ni Mama, ug human niana, kada semana na ming mag-adtoan didto.

Panahon sa usa ka tigom, gihangyo ko sa nagdumala nga basahon ang Salmo 144:​15, nga nag-ingon nga malipayon kadtong mga nagsimba kang Jehova. Kini nga teksto nakadasig gyod nako. Nadasig pod ko sa duha pa ka teksto—1 Timoteo 1:11 nga  nag-ingon nga si Jehova maoy “malipayong Diyos,” ug Efeso 5:1 nga nag-awhag nato nga ‘sundogon ang Diyos.’ Nakaingon ko nga angay kong magmalipayon sa pag-alagad sa akong Maglalalang ug pasalamatan siya niini nga pribilehiyo. Kini ang gipaningkamotan nakong himoon sa tibuok nakong kinabuhi.

Ang kinadul-ang kongregasyon gikan sa Chicago may distansiya nga 32 kilometros (20 milya). Bisan pa niana, naningkamot mi sa pagtambong, ug ang akong kahibalo sa Bibliya miuswag. Dihay higayon nga gitawag sa nagdumala si Jetha para magkomento. Samtang naminaw ko sa iyang komento, nakaingon ko: ‘Kabalo man ko ana. Maayo pag miisa ko sa akong kamot.’ Sukad adto, nangandam na ko sa paghimog mga komento. Ako ug ang akong mga igsoon miuswag sa espirituwal, ug nabawtismohan ko niadtong 1941.

Dili gyod nako malimtan ang 1942 nga kombensiyon sa Cleveland, Ohio. Kapig 50 ka lokasyon sa United States ang naka-tie in pinaagig telepono. Ang among pamilya ug ang ubang igsoon nag-estar sa mga tent nga duol sa lokasyon sa kombensiyon. Niadtong panahona, padayon pa gihapon ang Gubat sa Kalibotan II, ug nagkagrabe ang pagsupak batok sa mga Saksi ni Jehova. Sa magabii, naay grupo sa mga brader nga mag-park sa ilang mga sakyanan nga nagtalikod sa mga tent. Nagkasabot sila nga naay magbantay sa sulod sa matag sakyanan sa tibuok gabii. Kon mamatikdan nila nga dunay kapeligrohan, pasigahon sa mga brader ang headlight sa ilang mga sakyanan aron masulawan ang mga moatake, ug dayon moserbato sila. Tungod niini, dali rang makatabang ang uban. Nakaingon ko, ‘Andam gyod kanunay ang katawhan ni Jehova!’ Wala ra hinuoy daotang nahitabo. Ug kay mibati kong luwas, lami ra akong tulog.

Katuigan sa ulahi, dihang namalandong ko niadto nga kombensiyon, naamgohan nako nga si Mama wala mabalaka o mahadlok bisan gamay. Bug-os siyang misalig kang Jehova ug sa iyang organisasyon. Dili gyod nako malimtan ang iyang maayong ehemplo.

Dihang hapit na ang maong kombensiyon, nagregular payunir si Mama. Maong panahon sa kombensiyon, naminaw gyod siya pag-ayo sa mga pakigpulong nga naghisgot bahin sa bug-os panahong pag-alagad. Dihang pauli na mi, si Mama miingon, “Gusto unta nakong magpadayon sa pagpayunir, pero maglisod ko tungod sa kadaghan sa trabaho sa balay.” Gipangutana mi niya kon gusto ba ming motabang. Misugot mi, maong iyang giasayn ang kada usa namo nga manghinlo sa usa o duha ka kuwarto sa dili pa mi mamahaw. Dihang moadto na mi sa eskuwelahan, iyang susihon kon hinlo ba ang balay ug dayon mosangyaw na siya. Busy kaayo si Mama, pero wala gyod mi niya pasagdi. Inig-abot namo sa balay sa tingpaniudto ug human sa klase, naa siya kanunay aron atimanon mi. Usahay human sa klase, mouban mi niya sa pagsangyaw, ug nakatabang na namo nga masabtan kon unsa gyod ang kinabuhi sa payunir.

Pagka-16 anyos nako, nagsugod ko sa pagpayunir. Bisag dili pa Saksi si Papa, magsige siyag pangomosta bahin sa akong pagsangyaw. Usa ka gabii, ako siyang giingnan nga bisag naningkamot ko, wala gyod koy nakaplagan nga gustong  magpa-Bible study. Dayon, ako siyang gipangutana, “Gusto ba kang magpa-Bible study nako, Pa?” Naghunahuna siya kadali ug miingon, “Aw, sige god!” Maong si Papa ang una nakong Bible study. Pribilehiyo kaayo to para nako!

Among gitun-an ang librong “The Truth Shall Make You Free.” Samtang nagkadugay ang among pag-Bible study, namatikdan nako nga gitabangan ko ni Papa nga mouswag pa sa akong personal nga pagtuon ug pagtudlo sa uban. Pananglitan, usa ka gabii human namo mabasa ang parapo, siya miingon: “Nasabtan nako kon unsay giingon sa libro. Pero giunsa man nimo pagkahibalo nga sakto ang gipang-ingon dinhi?” Nakuratan ko sa pangutana ni Papa, maong ako siyang giingnan: “Dili ko makahatag ug pamatuod nimo ana karon, pero tubagon nako na sa sunod natong pagtuon.” Ug gitubag gyod to nako. Nakakita kog mga teksto nga nagsuportar sa punto nga among gihisgotan. Human adto, mag-research na gyod ko para mahimo kong mas andam sa among pagtuon. Nakatabang to nako nga mouswag sa espirituwal ug nakatabang pod to kang Papa. Gipadapat gyod niya ang iyang mga nakat-onan ug nabawtismohan siya niadtong 1952.

Pagka-17 anyos nako, mibalhin kog puyo. Si Jetha a nahimong misyonaryo, ug si Don nahimong Bethelite. Gimahal gyod nila ang ilang mga asaynment, ug kini nakapadasig nako. Maong nag-aplay ko sa Bethel ug sa Gilead ug gisalig nako kang Jehova kon asa ko niya gustong gamiton. Ug ang resulta? Gidapit ko nga mag-alagad sa Bethel niadtong 1946.

Sa daghang katuigan, gihatagan kog lainlain nga asaynment sa Bethel, maong daghan kog nakat-onan. Sulod sa 75 ka tuig sa Bethel, nakakat-on ko kon unsaon pag-imprenta ug mga libro. Nakakat-on pod kog accounting ug kon unsaon pag-import ug pag-export ug mga item. Pero labaw sa tanan, nag-enjoy gyod ko sa espirituwal nga edukasyon nga gitagana sa Bethel pinaagi sa morning worship ug mga pakigpulong nga gibase sa Bibliya.

Nakakat-on pod ko sa akong manghod nga si Karl, nga nagsugod sa pag-alagad sa Bethel niadtong 1947. Maayo kaayo siya nga estudyante ug magtutudlo sa Bibliya. Kas-a nangayo kog tabang niya sa akong pakigpulong. Akong giingnan si Karl nga daghan na kog na-research nga impormasyon pero nalisdan ko kon unsaon ni paggamit. Iya kong gitabangan pinaagi lang sa usa ka pangutana, “Kuya, unsa ba gyoy imong tema?” Nakuha dayon nako ang iyang punto—ang impormasyon lang nga akong gikinahanglan ang akong gamiton. Di gyod nako to malimtan nga leksiyon.

Aron magmalipayon sa Bethel, kinahanglan ming bug-os makigbahin sa ministeryo, ug naa mi makapadasig nga mga kasinatian. Ang usa nga dili  namo malimtan nahitabo didto sa Bronx sa New York City. Usa ka gabii, ako ug ang laing brader mibisita sa babaye nga midawat kaniadto sa magasing Bantayanang Torre ug Pagmata! Nagpailaila mi ug miingon, “Nia mi dinhi kay gusto namong tabangan ang mga tawo nga makakat-on ug nindot nga mga butang gikan sa Bibliya.” Siya mitubag, “Kon bahin na sa Bibliya, dayon mo.” Gibasa ug gihisgotan namo ang pipila ka teksto bahin sa Gingharian sa Diyos ug sa umaabot nga bag-ong kalibotan. Ganahan kaayo siya adto, maong iyang giimbitar ang pipila niya ka higala nga mouban sa among pagtuon pagkasunod semana. Sa ulahi, siya ug ang iyang bana nahimong matinumanong mga alagad ni Jehova.

Miabot ang panahon nga gusto na kong magminyo. Pero milabay pa ang mga 10 ka tuig ayha ko nakakitag sister nga gusto nakong minyoan. Unsay nakatabang nako nga makakitag maayong asawa? Ako ning giampo kang Jehova, ug gipamalandong nako ni nga pangutana, ‘Unsay gusto nakong buhaton human mi maminyo?’

Pagka-1953 nga kombensiyon sa Yankee Stadium, nailaila nako si Mary Aniol. Classmate siya sa akong magulang nga si Jetha sa ikaduhang klase sa Gilead, ug partner sila sa ilang misyonaryong asaynment. Lipay kaayo si Mary nga nag-estorya bahin sa iyang asaynment ingong misyonaryo sa Caribbean ug sa mga Bible study nga iyang gidumala sulod sa daghang katuigan. Samtang mas nagkailhanay pa mi, nakita namo nga parehas diay mig espirituwal nga mga tumong. Nagkahigugmaay mi, maong nagpakasal mi niadtong Abril 1955. Si Mary regalo gyod gikan kang Jehova ug maayo nga ehemplo. Malipay siya sa pagbuhat sa bisan unsang asaynment nga ihatag kaniya. Kugihan kaayo siya, mahunahunaon sa uban, ug kanunay niyang ginauna ang intereses sa Gingharian. (Mat. 6:33) Nag-alagad mi sa sirkitong buluhaton sulod sa tulo ka tuig, ug pagka-1958, gidapit mi nga mag-alagad sa Bethel.

Daghan kog nakat-onan kang Mary. Pananglitan, niadtong bag-o pa lang ming minyo, nagsabot mi nga mag-uban mig basag Bibliya, ug mga 15 ka bersikulo ang among basahon. Human ana, komentohan namo ang mga teksto ug hisgotan kon unsaon ni pagpadapat sa among kinabuhi. Sagad, sultihan ko ni Mary sa iyang mga nakat-onan sa Gilead o sa iyang pag-alagad ingong misyonaryo. Kini nga mga panaghisgot nakatabang nako sa pagpauswag sa akong mga pakigpulong ug sa pagdasig sa mga sister.—Prov. 25:11.

Ang akong pinalangga nga si Mary namatay niadtong 2013. Nangandoy gyod ko nga makita siya pag-usab sa bag-ong kalibotan! Sa pagkakaron, determinado ko nga padayong mokat-on ug mosalig kang Jehova sa bug-os nakong kasingkasing. (Prov. 3:​5, 6) Mahupayan ug malipay gyod ko sa paghunahuna kon unsay himoon sa katawhan ni Jehova sa bag-ong kalibotan. Seguradong apil ani ang pagkat-on ug bag-ong mga butang gikan sa atong Dakong Instruktor! Oo, mapasalamaton kaayo ko sa tanan niyang gitudlo kanako ug sa iyang dili hitupngang pagkamaayo.