Si apostol Pablo misulat sa iyang kaubang ansiyano nga si Timoteo: “Atubangan sa Diyos ug kang Kristo Jesus ug sa piniling mga anghel, ako nagsugo kanimo nga sundon kini nga mga instruksiyon nga dili maghukom daan o magpihigpihig.”—1 Tim. 5:21.

Una, hisgotan nato kon kinsay dili apil sa piniling mga anghel. Klaro, wala ni magtumong sa 144,000. Sa dihang gisulat kini ni Pablo kang Timoteo, wala pa magsugod ang pagpamanhaw sa dinihogang mga Kristohanon ngadto sa langit. Ang mga apostoles ug ang ubang mga dinihogan wala pa mahimong espiritung mga linalang, busa ang “piniling mga anghel” wala magtumong kanila.—1 Cor. 15:​50-54; 1 Tes. 4:​13-17; 1 Juan 3:2.

Dugang pa, ang “piniling mga anghel” dili pod puwedeng magtumong sa rebelyosong mga anghel panahon sa Lunop. Kining maong masinupakong mga anghel midapig kang Satanas ug nahimong mga demonyo, nga tungod niana nahimo silang kaaway ni Jesus. (Gen. 6:2; Luc. 8:​30, 31; 2 Ped. 2:4) Sa umaabot, bilanggoon sila sa kahiladman sulod sa 1,000 ka tuig ug human niana sila laglagon kauban sa Yawa.—Jud. 6; Pin. 20:​1-3, 10.

Busa ang “piniling mga anghel” nga gihisgotan ni Pablo posibleng nagtumong sa mga anghel sa langit kinsa misuportar sa “Diyos ug kang Kristo Jesus,” nga parehong gihisgotan sa maong teksto.

Naay minilyon ka matinumanong mga anghel, ug posibleng lahilahi silag asaynment. (Heb. 12:​22, 23; Pin. 14:​17, 18) Pananglitan, dihay higayon nga gisugo ang usa ka anghel sa paglaglag sa 185,000 ka Asiryanhong sundalo. (2 Hari 19:35) Ubay-ubayng mga anghel ang tingali giasayn aron “tigomon gikan sa [Gingharian ni Jesus] ang tanang nag-aghat sa uban sa pagpakasala ug kadtong naghimog kalapasan.” (Mat. 13:​39-41) Ang uban tingali giasayn pod sa ‘pagtigom sa iyang mga pinili’ ngadto sa langit. (Mat. 24:31) Ug ang uban gisugo sa ‘pagbantay kanato sa tanan natong dalan.’—Sal. 91:11; Mat. 18:10; itandi ang Mateo 4:11; Lucas 22:43.

Ang “piniling mga anghel” nga gihisgotan sa 1 Timoteo 5:21 lagmit mao ang mga anghel nga gihatagag espesyal nga mga asaynment sa pag-atiman sa katawhan sa Diyos. Sa konteksto niini, si Pablo naghatag ug tambag kon unsaon pagdumala sa mga ansiyano ang ilang mga responsibilidad ug nagdasig sa kongregasyon nga tahoron ang mga ansiyano. Si Pablo nagtambag nga ang mga ansiyano “dili maghukom daan o magpihigpihig” ug dili magdalidali sa paghimog mga desisyon o pagpahamtang ug paghukom. Angay nilang sundon ang maong tambag ni Pablo tungod kay sila nag-alagad “atubangan sa Diyos ug kang Kristo Jesus ug sa piniling mga anghel.” Busa klaro nga ang ubang mga anghel gihatagag mga asaynment sa pag-atiman sa kongregasyon, sama sa pagtaganag proteksiyon, pagtabang sa pagsangyaw, ug pagreport kang Jehova sa ilang mga naobserbahan.—Mat. 18:10; Pin. 14:6.