Nabasa ba nimog maayo ang mga isyu sa Ang Bantayanang Torre niining tuiga? Sulayi kon makatubag ka sa mosunod nga mga pangutana:

Unsang ehemplo ang gipakita ni Jehova kon unsaon pagtratar ang mga babaye?

Patas ang iyang pagtratar sa mga babaye ug mga lalaki. Si Jehova naminaw sa mga babaye, ug interesado siya sa ilang gibati ug gikabalak-an. Gisaligan pod niya sila sa paghimo sa iyang buluhaton.—w24.01, panid 15-16.

Unsaon nato pagpadapat ang Efeso 5:7 nga nag-ingon: “Ayaw ninyo himoa ang ilang ginahimo”?

Si apostol Pablo nagpasidaan nato nga dili makig-uban sa mga tawo nga dili makatabang nato sa pagsunod sa mga sukdanan sa Diyos. Angay tang mag-amping dili lang sa mga tawo nga makauban nato sa personal kondili bisan diha sa social media.—w24.03, panid 22-23.

Unsang dili tinuod nga mga estorya ang angay tang mag-amping?

Angay tang mag-amping sa dili kasaligang mga estorya gikan sa mga higala, sa mga email gikan sa mga tawo nga wala ta kaila, ug sa mga apostata nga nagpakaaron-ingnong interesado sa kamatuoran.—w24.04, panid 12.

Unsay atong nahibaloan ug wala mahibaloi bahin sa hukom ni Jehova kang Haring Solomon ug niadtong mga namatay sa Sodoma ug Gomora ug sa Lunop?

Wala ta mahibalo kon sila ba gisentensiyahan na ni Jehova ug kalaglagan hangtod sa hangtod. Pero nahibalo ta nga si Jehova nasayod sa tanang detalye ug siya maluluy-on kaayo.—w24.05, panid 3-4.

Kay si Jehova “ang Bato,” unsay gipasalig niini kanato? (Deut. 32:4)

Makadangop ta kang Jehova alang sa tabang. Kasaligan siya, kay kanunay siyang motuman sa iyang mga saad. Siya lig-on ug dili matarog, ug dili mausab ang iyang personalidad ug katuyoan.—w24.06, panid 26-28.

Unsay makatabang nimo nga maka-adjust sa bag-ong kongregasyon?

Salig kang Jehova, kinsa motabang nimo sama sa iyang pagtabang sa iyang mga alagad kaniadto. Likayi nga ikompara ang imong kongregasyon kaniadto sa imong kongregasyon karon. Pakigbahin sa mga kalihokan sa imong bag-ong kongregasyon, ug paningkamot nga makakitag bag-ong mga higala.—w24.07, panid 26-28.

Unsang mga leksiyon ang atong makat-onan sa tulo ka ilustrasyon nga makita sa Mateo kapitulo 25?

Ang ilustrasyon bahin sa mga karnero ug mga kanding nagpasiugda sa kaimportante sa pagkahimong matinumanon ug maunongon. Ang ilustrasyon bahin sa maalamon ug buangbuang nga mga ulay nagpasiugda nga importante ang pagpabiling andam ug alerto. Ug ang ilustrasyon sa mga talanton nagpakita nga kinahanglan tang magmakugihon.—w24.09, panid 20-24.

Unsa ka habog ang portiko sa templo ni Solomon?

Sa 2 Cronicas 3:​4, ang ubang karaang manuskrito nag-ingon nga “120 ka maniko” ang gihabogon sa portiko, sa ato pa, 53 metros (175 piye). Pero ang ubang kasaligang sinulat nag-ingon nga kini “20 ka maniko,” o mga 9 metros (30 piye). Base sa gibag-on sa bungbong sa templo, posible nga 20 ka maniko ra gyod ang gihabogon niini.—w24.10, panid 31.

Unsay gipasabot sa giingon sa 1 Timoteo 3:12 nga ang ministeryal nga alagad ‘kinahanglang usa ray asawa’?

Nagpasabot ni nga minyo siya sa usa lang ka babaye ug dili siya mohimog seksuwal nga imoralidad. Dili pod siya magpakitag romantikong interes ngadto sa ubang babaye.—w24.11, panid 19.

Nganong makaingon ta nga ang Juan 6:53 dili sumbanan sa Panihapon sa Ginoo?

Ang Juan 6:53 nag-ingon nga kinahanglang kaonon ang unod ug imnon ang dugo ni Jesus. Kining mga pulonga gisulti ni Jesus niadtong 32 C.E. sa Galilea ngadto sa mga Hudiyo nga wala pa magpakitag pagtuo kaniya. Pero ang Panihapon sa Ginoo gisugdan didto sa Jerusalem usa pa ka tuig sa ulahi. Niining higayona, nakig-estorya si Jesus niadtong mga kauban niyang magmando didto sa langit.—w24.12, panid 10-11.